Jab Kapen Būruom̧

Jepļaaktok eo an gospel eo an Jisōs Kraist ekar ijjino iien eo Anij Jemān im Nejin Jitōn Bōro Jisōs Kraist rekar waļo̧k n̄an Josep Smith ke ekar dik, uwaake jar ettā eo an. Ej mōttan wōt Jeplaaktok eo, Josep Smith ekar ukōt juon ļo̧o̧k in etto kōn menin letok im kajoor eo an Anij. Ilowaan ļo̧o̧k ko ej walok “An Anij kōm̧m̧an pepe ippān armej ro rar jokwe ilo Amerika kein im ej pād tarlep in gospel eo ejjeļo̧k jem̧ļo̧kin ie.”

Ke iaar juon ļaddik em̧m̧an dettan, ke iaar ritti Bok in Mormon, ekkā aō kajjitōk etke Laman im Lemuel raar jab tōmak ilo m̧ool ko me kar kwalok ñan er, men̄e juon enjeļ ro an Irooj ekar waļo̧k im kajju kōņoņo ñan er. Etke Laman im Lemuel raar jab kōttāik er make im pokake katak ko an jemāer, Liai, kab ļaddik eo jatier edikļo̧k Nipai?

Iaar lo juon iaan uwaak kein n̄an kajjitōk in ilo 1 Nipai, eo im ej kwaļo̧k ke Nipai ar “būrom̧ōj kōn pen in burueer.” Nipai ar kajjitōk ippān ļaddik ro jein rerūttoļo̧k, “Ewi wāween bwe en pen būruōmi, im pilo ilo koļmānļo̧kijeņ ko ami?”

Ta meļeļe in n̄an bōk juon bōro epen?

Meļeļein “pen” ilo kajin Korea ilo Bok in Mormon ej 완악 (Wan-Aak: 頑惡). Naan in rej bar kōjerbale ilo kajin China “Wan” (頑), meļeļein “pen būruōn,” im “Aak” (惡), meļeļein “nana.” Ñe ej pen būruōd, jepillo, im men ko rem̧m̧an reban pād ilo būruōd im ļōmņak ko ad. Enaaj pen būruwōd im enaaj ļapļo̧k ad kea kōn men ko an laļ in, kilōke būruwōd jān men ko an Anij. Jenaaj kāālet wōt men ko jej ļōmņaki im jab bar roñjake ro jet im kapilōk ko aer ñan kōj. Jenaaj kāālet bwe jen jab kōppeļļo̧k būruwōd ñan men ko an Anij ak jenaaj erļo̧k wōt ñan men ko an laļ in im rikapo eo. Ñe ej pen būruwōd, jejjab kōņaan eñjaake Jetōb Kwojarjar. Jelukkuun “a rum̧wij n̄an ememej Irooj,” im eļak tokļo̧k jekōm̧m̧an an “ejjeļo̧k ad kea” kōn naan ko An.

Alma ar katakin armej ro an Ammonihah ke jet “raar jab bōk Jetōb in Anij kōn pen eo an burueer.” Eaar bar katakin bwe “ro renaaj kapene burueer, n̄an er ej leļo̧k dikļo̧k in m̧ōttan naan eo m̧ae iien rej jab jeļā kōn mennin ittino ko An.” Āliktata ej jako jetōb eo, im Irooj enaaj “bōkļo̧k [An] innaan” jān ro rej kapen būrueer, āinwōt Leman im Lemuel. Kōnke Leman im Lemuel rej wōnm̧aanļo̧k wōt im kapen būrueer, kajet tokjān eñjaake eo an Jetōb Kwojarjar, im kāālet bwe ren jab roñjake naan ko im katak ko an jemāer im Nipai, raar make kōjekdoon e m̧ool ko an indeeo jān Anij.

N̄an keidi Leman im Lemuel, Nipai ar wōnm̧aanļo̧k wōt kōttāiki e make, im kappukōt kōkkapilōklōk ko jān Jetōb eo an Irooj. Ilo an ukōtļo̧k, Irooj ar kapidodoiki būruōn Nipai. Nipai ej kwalok ke “iaar kūr n̄an Irooj; im lo Eaar lotok eō; im Eaar kōm̧m̧an bwe buruō en bārōk bwe in maron̄ tōmak naan ko jema eaar kōnono.” Irooj ar jipañ Nipai bwe en bōki, meļeļe, im tōmak aolep men ko rettiņo̧ an Anij im naan ko An. Nipai ar maroñ in pād ippān mōttā eo an Jetōb Kwojarjar iien otemjeļo̧k.

Ta eo jemaron̄ kōm̧m̧ane bwe en jab pen būrueer?

Moktata, jemaroñ ukweļo̧k aolep iien.

Jisōs ekar ba, “Kōn menin, jabdewōt eo ej ukeļo̧k im itok n̄an Eō āinwōt juon ajri, e Inaaj bōk e,” Ad jitōnbōro rikanaan, Būreejtōn Russell M. Nelson eaar katakin:

“Ukweļo̧k ej kii eo n̄an eddōkļo̧k. Tōmak eo erreo ej kōm̧akūt kōj m̧aanļo̧k ilo iaļan bujen in.

“Jouj im jab mijak ak karum̧wijļo̧k iien ukweļo̧k. Setan ej m̧ōņōņō ilo am̧ en̄taan. … Jino rainin n̄an en̄jake lan̄lōn̄ eo n̄an utikļo̧k armej ilo lukkuun biktokin. Rilo̧mo̧o̧r eo ej iakwe kōj aolep iien ak eļaptata ñe jej ukwelok.”

Ilo ad lo m̧ōņōņō kōn ar kapidodoik būrueer im itok ñan ippān Irooj, jenaaj erom “āinwōt juon ajri, ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa ioon, em̧ool āinwōt juon ajri ej ajeļo̧k e n̄an jemān.”

Kein karuo, jemaroñ kammineneik kōj kōttāik būrueer.

Ukweļo̧k aolep iien enaaj kōm̧m̧an an ettā būrueer. Jekōņaan kōttāiki kōj im̧aan mejān Irooj, āinwōt juon ajri eo ej pokake jemān. Innem Jetōb Kwojarjar enaaj maroñ pād ippād aolep iien, im enaaj pidodo būruwōd.

Kōrā eo pāleeō, Sue, im ña kōm̧ro jeļā kajjien ruo ripālele ium̧win emān iiō ko. Ke kōm̧ro ar jino jeļā kajjieer, ļeo pāleen ekar juon membōr ekāāl n̄an Kabun̄ in, im kōrā eo pāleen ej ekkatak ippā mijenede ro kōn gospel in. Elōn̄ mijenede ro raar jerbal ippān bwe en maron̄ itok n̄an Kraist. Kōm̧ ar eñjaake ke ewōr an jeļā ke em̧ool gospel in im jeļā ke Kabun̄ in ej m̧ool. Ej kijoñ eñjaake Jetōb ilo iien am loļo̧k im ej lukkuun bōk koņaan ilo makūtkūt ko ilo aolep kweilo̧k ko. Elukkuun kijoñ m̧ōņōņō lo̧k ippān aolep membōr ro ilo ward eo. Bōtaab, ar pen ñan e bwe en maroñ in tōn baptaij. Juon raan ekar riiti Moronai 7:43–44, ej riit āinwōt in:

“Im bar juon alen, lo ij ba n̄an kom̧ bwe e ej jab maron̄ wōr an tōmak im kōjatdikdik, ijello̧kun n̄e enaaj ineem̧m̧an, im ettā būruōn.

“Eļan̄n̄e āindein, [am̧] tōmak im kōjatdikdik e waan, bwe ejjeļo̧k bōk e im̧aan Anij, ijello̧kun riineem̧m̧an im ettā ilo bōro.”

Ālkin riiti eoon kein, ar kile ta ej aikuj in kōm̧m̧ane. Liin ej ba wōt ke ekar lukkuun meļeļe ta in meanwōd im ettā. Bōtaab, meļeļe in an ejjab bwe ñan an wōr an tōmak im kōjatdikdik ñan pokake kien ko an Anij. Eaar aikuj in joļo̧k an pen būruen im jeļā ko an make. Eaar jino kōttāiki e make ilo an m̧ool in ukwelo̧k. Eaar jino meļeļe kōn mennin ettā ekkar ñan ta eo ej waļo̧k im̧aan mejān Anij. Eaar kōjatdikdik ioon Jemādwōj Ilañ im jar ñan kapidodoiki būrueen. Kōn jar kein, eaar eñjaake an Jetōb kwaļo̧k ñan e ke Jemādwōj Ilañ ekōņaan bwe en peptaij.

Ļeo im kōrā eo pāleen raar jim̧or kwaļo̧k ke ekar ļapļo̧k aerro ettā, eļapļo̧k aerro meļeļe kōn naan ko an Anij, im kōn an pidodo būruweerro ñan ļoori katak ko an Irooj, Jisōs Kraist.

Kein kajilu, Jej maron̄ lōke im kōjatdikdik ioon Rilo̧mo̧o̧r eo ad.

Nipai ej juon joñok eo eļap ilo an ñan kōtļo̧k būruōn bwe en pidodo ilo an lōke Irooj. Eaar katakin, iaar likūt aō lōke ilo Kwe, im inaaj lōke Kwe indeeo. Ij jamin likūt aō lōke ioon pein kanniōk.” Enan̄in āinlok wōt, ilo revelesōn kar leļo̧k ñan Josep Smith, Irooj ar ba, “Likūt am lōke ilo Jetōb eo ej tōlļo̧k n̄an kōm̧m̧an em̧m̧an—aaet, n̄an kōm̧m̧an jim̧we, n̄an etetal ettā, n̄an ekajet jim̧we.” Ñe jej likūt ad lōke ilo Irooj im likūt ar kōjardikdik ilo E, Enaaj kapidodoik būruōd, im jenaaj lo jipañ ilo men ko reppen jej iooni, jorrāān ko, im metak ko ad.

Ñe jej lukkuun m̧ool in ukweļo̧k, kōttāiki kōj, im lōke im kōjatdikdik ioon Irooj, enaaj pidodo būrueer. Enaaj lutōkleplep iood Jetōb eo An im kwalok ñan kōj men ko retino an lañ. Jenaaj tōmak aolep naan ko an Eaar katakin kōj kaki, im enaaj m̧wilaļļo̧k meļeļe ko ar.

Ad Rilo̧mo̧o̧r Jisōs Kraist e wōt juon emaroñ waanjoñok eo kōn mennin meanwōd. Ilo 2 Nipai 31:7 jej ritti, “Ak men̄e E ekwōjarjar, Ej kwaļo̧k n̄an ro nejin armej bwe, ekkar n̄an kanniōk Ej kōttāiki E im̧aan eo Jemān, im kam̧ool n̄an Jemān bwe Enaaj pokake E ilo kōjparok kien ko An.” Meñe E ej kwojarjar im wānōk, Ej kōttāiki E make im̧aan Jemān im Eaar pokake E ilo an kar peptaij.

Ilo jem̧ļo̧k in mour eo An, Jisōs Kraist ekar kōtļo̧k Ankilaan ñan Jemān ilo an kar bōk mōttan kap eo emeeo. “En̄taan eo eaar kōm̧m̧an bwe E n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb.” Rilo̧mo̧o̧r eo ar kajitōk bwe E “In kar jab idaak kap eo emeo̧, im jenlik.” “Mekarta,” Ekar ba, “Aiboojoj ñan Jema, im [E] eaar bōke im kadedeļo̧k [An] m̧aanjāppopo ko Aō ñan ro nejin armej ran.”

Ro jeiū im jatū, em̧ōj letok n̄an kōj anemkwoj in kālet. Jemaroñ kāālet ñan kapen būruod, ak jemaroñ kāālet ñan kapidodoiki būruōd . Ilo mour ko ad kajjojo ran, jemaroñ kāālet ñan kōm̧m̧an men ko renaaj kōm̧m̧an bwe Jetōb eo an Anij en itok im pād ilo būruōd. Ijeļā bwe ilo kāālet kein, ewōr aenōm̧m̧an im m̧ōņōņō ie.

Jen ļoor waanjon̄ak ko an ro Rilo̧mo̧o̧r, Jisōs Kraist, eo ar lo̧o̧re ankilaan Jemān. Ilo ar naaj kōm̧m̧ane, bwe emōj an Irooj kallimm̧uri kōj, “Bwe, lo, Inaaj aintok er āinwōt lolo eo ej aintok jojo ko an ium̧win pein, eļan̄n̄e rej jamin kapen burueer.” Ilo etan Jisōs Kraist, amen.