Jipan̄ ko Rekwojarjar n̄an Mour in

Kōn Rikanaan Josep Smith, Irooj ekar kwaļo̧k jejjo men ko kōn mour eo ad m̧okta. Ijōņ jaar pād āinwōt ajri in jetōb ro nejin Anij. Kōnke Anij ekar ikdeelel n̄an jipan̄ ro Nejin eddōkļo̧k, E ekar kāālet n̄an ejake juon laļ eo me ioon jen maron̄ kar bōk juon ānbwin, katak jān iminene, ejaki m̧wiļ ko rekwojarjar, im n̄an kam̧ool eļan̄n̄e jenaaj kōjparok kien ko an Anij. Ro me kar kile ke renaaj “bōk aiboojoj kobaikļo̧k ioon bōraer n̄an indeeo im indeeo” (Ebream 3:26).

N̄an ejaaki jekjek ko ilo karōk eo ekwojarjar, Anij ekar kāālet Nejin Ekar Keotak Emake Wōt bwe en ad Rilo̧mo̧o̧r. Lucifer, ekar peek bar juon ļōmņak n̄an kakkure anemkwoj in kāālet eo an armej, kar erom Setan im kar “jolaļļo̧k.” Kar jolaļtak n̄an laļin im kar kowaan mour wabanban in, Setan kaliaiki n̄an “kapiloik armej raņ, im n̄an tōlļo̧k er n̄an rikōm̧akoko ilo ankilaan, em̧ool jon̄an wōt eo enaaj jamin eo̧ron̄ ainikien [Anij]” (Moses 4:4).

Karōk eo eaorōk eļap an Anij n̄an eddōkļo̧k ilo mour in an ro Nejin ekar n̄an aer iioon “jum̧ae ilo men otemjej.” (2 Nipai 2:11). Ejja āinwōt an m̧ajeļ ko ilo ānbwinnin juon armej ban maron̄ eddōkļo̧k ak dāpji wōt n̄e ejjeļo̧k jum̧ae ņae kein gravity, kōn menin eddōkļo̧k in mour in rej aikuj bwe jen jum̧ae kapo ko an Setan im jum̧ae ko jet an mour in. Eo aorōk tata n̄an eddōkļo̧k ilo jetōb ej kajoor eo Anij ekar letok im men eo aikuji n̄an kāālet kōtaan em̧m̧an im nana. Ro me rej kāālet em̧m̧an naaj eddōk m̧aanļo̧k n̄an mejān kajjik eo aer indeeo. Ro me rej kāālet nana—āinwōt aolep ren kar ilo elōn̄ kapo ko an mour wabanban—aikuj naaj kar jipan̄ lo̧mo̧o̧ren, eo juon Anij em̧m̧an ekar karōke n̄an letok.

Ilo m̧ool, jipan̄ eo an Anij ilo mour in ekajoor tata ej kōpooj juon Rilo̧mo̧o̧r, Jisōs Kraist, eo enaaj kar en̄taan n̄an kōļļāik wōņāān eo im letok jeorļo̧k bōd in jerawiwi ko n̄an ukweļo̧k jāni. Kōn tūriam̧o im Pinmuur eo eaiboojoj ej kōmeļeļeik etke tōmak ilo Irooj Jisōs Kraist ej pedped in katak eo m̧oktata ilo gospel in. Pinmuur eo An ej “kakūrm̧ool jerkakpeje eo an ro remej” (Alma 42:23), im an “pinmuur [ko] kōn jero̧wiwi ko an laļ” (Alma 34:8), ej jeerļo̧k aolep jerawiwi ko ad jej ukweļo̧k jāni im letok kajoor eo an ad Rilo̧mo̧o̧r n̄an rie kōj ilo m̧ōjņo̧ ko ad ilo mour in.

Ilo kakkobaba n̄an wāween eo ewōj me jerawiwi ko jaar kōm̧m̧ani rej jeeriļo̧k im meļo̧kļo̧ki, karōk eo an Jemādwōj Ilan̄ ej letok elōn̄ menin letok ko n̄an kōjparok kōj, ekoba kōjparok kōj jān jerawiwi ilo jinoin tata. Aolep iien mour in ad ejj jino kōn juon jemān im jinen. Ilo m̧ool, erro jim̧or ewōr ippāer menin letok ko rooktak jān doon, n̄an jipan̄ karūttoļo̧k ro nejier. Eļan̄n̄e jaab, aer jako ej m̧ōttan jum̧ae eo jej aikuj anjo̧ ioon.

Karōk eo an Jemādwōj Ilan̄ ej leļo̧k jipan̄ ko jet n̄an tōl kōj ilo iaļ eo ad ilo mour in. Inaaj kōnono kōn emān iaer. Jouj im jab ļōmņak bwe inaaj kōnono kōn emen jipan̄ ko, kōnke rej iookļo̧k doon. Ilo kakkobaba, ebar wōr kōjparok in tūriam̧o ko jet ippānļo̧k kein.

M̧oktata, Ij kōnono kōn Meram ak Jetōb eo an Kraist. Ilo katak eo an eļap ilo bok in Moronai, Moronai ej kōnono jān katakin eo an jemān bwe “Jetōb eo an Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana” (Moronai 7:16). Jej riiti ejja katakin in wōt ilo revelesōn ko raan kein:

“Im Jetōb eo ej leļo̧k meram n̄an armej otemjej ej itok ilo laļ in; im Jetōb eo ej kōmeramļo̧k armej otemjej kōn laļ in, eo ej eo̧ron̄e ainikien Jetōb eo” (Katak im Bujen Ko 84:46).

Bar juon alen, “Bwe Aō Jetōb em̧ōj jilkinļo̧k ilo laļ n̄an kōmeram ro rettā im erup burueer, im n̄an eo liaakeļo̧k eo an ro renana” (Katak im Bujen Ko 136:33).

Būreejtōn Joseph Fielding Smith ekar kōmeļeļeik eoon kein: “Irooj ekar jab likūt armej (ke rej ļotak tok n̄an laļ in) jeļo̧k maron̄, kappukot meram eo im m̧ool eo, bōtaab aolep armej … ej ļotak tok kōn meram n̄an bōk tōl, naan in kōmeļeļe eo, kapilōk eo an Jetōb eo an Kraist, ak Meram eo an M̧ool eo.”

Jipan̄ ko reļļap kein karuo kar litok jān Irooj n̄an jipan̄ kōj kāālet ta eo ejim̧we rej jejjo kōmeļeļe im tōl ko rej waļo̧k ippān doon ilo jeje ko rekwojarjar ejja m̧ōttan wōt karōk in lo̧mo̧o̧r eo (karōk in m̧ōņōņ). Tōl kein rej kien ko, kain̄i ko, im bujen ko.

Kien ko rej kōmeļeļeik iaļ eo Jemādwōj Ilan̄ ekar kakōļļeik n̄an kōj n̄an eddōkļo̧k ie m̧aanļo̧k n̄an mour indeeo. Armej ro me rej pijaik kien ko āinwōt wāween eo Anij ej jokāālet wōn eo n̄an kaje relikjab n̄an meļeļe jibadbad in an karōk in m̧ōņōņō eo em̧m̧an an Anij. Ioon iaļ eo, jemaron̄ jidik kōn jidik kōtōprak jemjerā eo aikuji ippān ad Rilo̧mo̧o̧r im karbōk n̄an juon ļapļo̧k in kajoor eo An n̄an jipan̄ kōj ioon iaļ eo ad n̄an mejān kajjik eo E ej kōņaan n̄an kōj aolep. Jemādwōj Ilan̄ ej kōņaan aolep ajri ro Nejin n̄an bar ro̧o̧l n̄an aelōn̄ in selestial, ijo Anij im ad Rilo̧mo̧o̧r rej jokwe ie, im n̄an bōk kain mour eo an ro me rej jokwe ilo aiboojoj eo an selestial.

Kain̄i ko im bujen ko rej m̧ōttan kien eo me ej kōmeļeļeik iaļ eo n̄an mour indeeo. Kain̄i ko, im bujen ko rekwojarjar jej kōm̧m̧ani ippān Anij kōn bōk koņaad ie, rej bun̄tōn ko aikuji im kein kōdāpdep ko remenin aikuj ilo iaļ in. Ikōņaan ļōmņak kōn jerbal eo an bujen ko āinwōt an kwaļo̧k bwe ekkar n̄an karōk eo an Anij, kōjeraam̧m̧an ko An ko an raorōk tata rej liļo̧k n̄an ro kallim̧uri er m̧oktaļo̧k n̄an kōjparok jet kien ko im ro rej kōjparok kallim̧ur ko.

Jipan̄ ko jet kar liļo̧k jān Anij n̄an kōm̧m̧ani kāālet ko rejim̧we rej kwaļo̧k ko jān Jetōb Kwojarjar. Jetōb Kwojarjar ej membōr eo kein kajilu an Doulul in Anij. Jerbal eo An, kar kōmeļeļeik ilo jeje ko rekwojarjar, ej n̄an kam̧ool kōn Jemān im Nejin, n̄an katakin kōj, n̄an bōktok aolep men ko n̄an ememej eo ad, im n̄an tōl kōj n̄an aolep m̧ool. Jeje ko rekwojarjar ekitbuuj elōn̄ kōmeļeļe ko kōn “kwaļo̧k ko” jān Jetōb Kwojarjar, eo āinwōt juon kam̧ool ilo jetōb n̄an uwaake juon kajjitōk kōn m̧ool eo an Bok in Mormon. Juon kwaļo̧k ejjab n̄an pok kōn menin letok eo an Jetōb Kwojarjar, eo leļo̧k ālkin peptaij.

Juon iaan jipan̄ ko reļļap tata an Anij n̄an ro Nejin retiljek ej menin letok eo an Jetōb Kwojarjar. Aorōk eo an menin letok in ej kein kam̧ool ilo m̧ool eo bwe ekkā leļo̧k ālkin ukweļo̧k im peptaij kōn dān, “innām [jeje ko rekwojarjar rej kōmeļeļeik] ej itok jeorļo̧k in jero̧wiwi ko ami kōn kijeek im kōn Jetōb Kwōjarjar” (2 Nipai 31:17). Armej ro me raar bōk jeorļo̧k in jerawiwi ko—innām kōkāāl iien otemjej karreo eo aer kōn ukweļo̧k raan otemjej im mour ekkar n̄an bujen ko rej kōm̧m̧ane kōn kain̄i eo an kwojkwoj—karbōk n̄an kallim̧ur eo bwe Jetōb Kwojarjar eo, Jetōb eo an Irooj, “en maron̄ pād … ippāer iien otemjej” (Katak im Bujen Ko 20:77).

Kōn menin, Būreejtōn Josep F. Smith ekar katakin bwe Jetōb Kwojarjar eo enaaj “kōmeramļo̧k ļōmņak koa n armej ro renaaj karorōk men ko an Anij, n̄an kareel er ilo iien oktak eo aer kōn aer kōm̧anm̧an ankilaan Jemān, im n̄an pād ilo er juon naan in kam̧ool enaaj pād wōt āinwōt juon m̧ōtta ilo aolepān mour, jerbal āinwōt unin tōl em̧ool im ineem̧m̧an n̄an aolep m̧ool im kobrak er raan n̄an raan kōn lan̄lōn̄ im m̧ōņōņō, kōn juon m̧ūtōn n̄an kōm̧m̧an em̧m̧an n̄an aolep armej, n̄an jelm̧ae kalijōkļo̧k ijello̧kin kōm̧m̧an bōd, n̄an jouj im tūriam̧o, kijenmej im jipan̄. Aolep ro rej bōk menin letok in eļap jān jon̄an, bōōr in eļap wōņāān, ewōr juon maro ejjab bōjrak kōn jim̧we. Ilo an jako jipan̄ eo an Jetōb Kwojarjar,” Būreejtōn Smith eaar ba, “ejjeļo̧k armej emaron̄ etetal ilo iaļ eo eaidin̄ im aidik.”

Kōn ekanooj lōn̄ jipan̄ ko rekajoor n̄an tōl kōj ilo iaļ ko ad ilo mour in, ekainepata bwe ekanooj lōn̄ rej pād ilo jab pojak n̄an iien eo karōk aer n̄an iioon ad Rilo̧mo̧o̧r im Ripinmuur, Jisōs Kraist. Būrabōļ eo An kōn virgin ro joun̄oul, ej kwaļo̧k bwe jān ro kar kūr er n̄an iioon E, jimettan ekar jab pojak.

Jej aolep jeļā kōn waanjon̄ak ko raar jab pojak: mijenede ro rekar ro̧o̧l me kar kakkure eddōkļo̧k eo aer ilo jetōb kōn tōre in jāniknik ko, jodikdik ro me raar likūt ilo kauwōtata eddōkļo̧k eo aer ilo jetōb rej kōjenoļo̧k er jen katak im m̧akūtkūt ko an Kabun̄ in, em̧m̧aan ro me raar karum̧wijļo̧k ekkapit eo aer n̄an Melkesideke Priesthood eo, em̧m̧aan ro im kōrā ro—jet iien ro ineen bainiier ro rem̧m̧an ak ro jinen im jemān rōrreo—ro me raar ilo̧k jān iaļ in bujen eo an jidik jim̧or kōm̧m̧an im kōjparok bujen ko ilo tampeļ eo ekwojarjar.

Elōn̄ kain jeerļo̧k kein rej waļo̧k n̄e membōr ro rej likjab in ļoor pedped ko im̧aan tata ilo jetōb n̄an dāpij wōt karōk eo an jar an juon make, ekkatak jeje ko rekwojarjar aolep iien, im emakijkij ukweļo̧k. Ilo keidi, jet rej kowaan kōkāāl an bujen ko wiik otemjej kōn bōk kwojkwoj eo. Jet rej ba Kabun̄ in ejjab tōpar aikuj ko aer; ro rej bōk jikin ta eo rej kile āinwōt aikuj ko aer jekļaj m̧okaļo̧k jān ta eo Irooj ekar kōoooj ilo elōn̄ katak ko An im iien ko rem̧m̧an n̄an jerbal in jipan̄ eo ad aorōk n̄an ro jet.

Ettā bōro im lōke ilo Irooj rej uno ko n̄an kain jeerļo̧k kein. Āinwōt an Bok in Mormon eo katakin, “kōjeraam̧m̧an im kōļapļo̧k ro rej likūt aer kōjatdikdik ilo e” (Hilamōn 12:1). Lōke ilo Irooj ej juon aikuj āinjuon n̄an aolep ro rej jon̄e ilo bōd kein ko an Anij im katak ko an rikanaan ro An ņae men ko rej loi kiiō im māletlet an armej.

Ikar kōnono kōn elōn̄ jipan̄ ko an Jemād eo ej iakwe ilo Lan̄kar litok n̄an jipan̄ ro Nejin ro̧o̧lļo̧k n̄an ippān. Ijo kuņaad ilo karōk in ekwojarjar ej n̄an lōke ilo Anij im pukot im kōjerbal jipan̄ kein rekwojarjar, eo eļap tata Pinmuur eo an Nejin Jitōnbōro, ad Rilo̧mo̧o̧r im Ripinmuur, Jisōs Kraist. Ij jar bwe jenaaj katakin im mour kōn pedped in katak kein, ilo etan Irooj Jisōs Kraist, amen.