Elder John D. Amos

Ilo 2020 eo, Elder John D. Amos ekar bōk juon kūr ekar ukōt mour eo an n̄an erom juon mijen būreejtōn n̄an Baton Rouge Louisiana Mijen. Elōn̄ men ko ilo mour eo an raar aikuj in oktak kōnke kōn kūr eo, bōtaab Elder im Sister Amos raar jouj ilo bōk ijjitōn̄ eo kōn tōmak.

“Jokāālet eo im kallim̧ur eo raar kōm̧m̧an kadede wōt etto,” Elder Amos ekar ba. “Ñe Irooj ej kūr, jej uwaak.”

John D. Amos ekar ļotak ilo Nobōm̧ba 2, 1961, ilo Lafayette, Louisiana, n̄an John N. Amos Sr. im Dorothy Victorian Amos. E ekar iioon lio enaaj kar pāleen, Michelle Evette Wright, jān kūlaaj ko raar būki ippān doon ilo kaļōj, raar major ilo electrical engineering.

Michelle, ekar juon membōr in Kabun̄ in kadede, ekar karuwaineneik John n̄an juon eeb an kabun̄ in ilo date eo aer im̧aan tata. Ālkin iien eo, lein ekar jino katak eļapļo̧k kōn Kabun̄ in im jerbal eo eļap an Rilo̧mo̧o̧r ilo gospel eo kar kōjepļaaktok.

“Aolep men kōn Jisōs Kraist,” ļein ekar ba. “E ej wūnjōn aolep men.”

Elder Amos im Michelle raar m̧are ilo Juun 9, 1990, ilo Atlanta Georgia Tampeļ. Ewōr jilu nejier ajri ro im jiljino jibwier.

Elder Amos ekar bōk degree ko ilo electrical im nuclear engineering. Ilo iien jerbal eo an, e ekar jerbal ilo United States Navy, jerbal ilo Siemens Energy Inc., im katak katakin ilo Univeristy eo an Central Florida.

Ilo kūr ko an ilo Kabun̄ in m̧oktaļo̧k ekoba Eria Jiljilimjuonn̄oul (North America Southeast Eria eo), mijen būreejtōn, rikakpilōklōk ilo stake būreejtōnji, bisop, rikakpilōklōk ilo bisoprik, būreejtōn an Jabōt Jikuuļ ilo ward, ward executive secretary, ritōl an doulul eo an pris ro routiej, im ritōl an nursery.