2025
Peran ilo Im̧aan Mejān Anij
Māe 2025
11:59

Peran ilo Im̧aan Mejān Anij

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Ilo ad tiljek kappukot n̄an bōk iakwe-em̧ool im wānōk n̄an kobrak mour ko ad, ad peran n̄an kepaakļo̧k Anij enaaj ļapļo̧k.

Ro jeiū im jatū rejitōnbōro, ij kam̧m̧oolol bwe imaron̄ kōnono n̄an kom̧ rainin, ilo kweilo̧k in eaorōk eļap. Meja ej nana ļo̧k wōt. Kom̧ em̧m̧ool kōn ami meļeļe ilo aō tilmake ennaan in aō.

Jej mour ilo juon tōre em̧m̧an ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ij obrak kōn lan̄lōn̄ ilo aō lo em̧m̧anļo̧k ko ilo elōn̄ eria ko.

Eļap aō m̧weiir kōn jodikdik ro nejid. Rej kōm̧m̧ani jerbal in jipan̄ ko ilo wāween eo eļap. Rej kappukot ro jibwier im jim̧m̧aer etto im kōm̧m̧ani kain̄i ko ilo tampeļ eo. Likao ro im jiron̄ ro nejid rej jilkinļo̧k peba in mijenede ko aer ilo wāween eo eļap. Diktak in epepen in ej jerkak āinwōt rikaļoor ro reperan an Jisōs Kraist.

Būreejtōn Nelson ej pād ippān leddik eo jibūn.

Jet iien emootļo̧k iaar ioone leddik eo jibū ej kab lo̧tak. N̄e ij ļōmņak kōn apan̄ ko enaaj iiooni ilo mour eo an, ij en̄jake juon kōņaan eļap n̄an jipan̄ e kalōk tōmak ilo Jisōs Kraist. Mour kake gospel eo An ej menin aikuj n̄an m̧ōņōņō eo an ilju im jekļaj.

Leddik in, ej āinwōt kōj, enaaj ioon apan̄ ko. Jenaaj aolep ioon nan̄inmej, ebbweer, kapo, im jabwābwe. Apan̄ kein remaron̄ joļo̧k lōke eo ad. Ijoke, rikaļoor ro an Jisōs Kraist ewōr ippāer kain peran ko roktak.

N̄e jej kōm̧m̧ani im kōjparok bujen ko ippān Anij, jemaron̄ bōk peran eo ej lo̧tak jen Jetōb. Irooj eaar jiron̄ Rikanaan Josep Smith bwe ad lōke enaaj “kanooj kajoor ilo im̧aan mejān Anij.” Pijaikļo̧k n̄an bōk aenōm̧m̧an peran ilo im̧aan mejān Anij!

Ilo aō kōnono n̄an bōk peran im̧aan mejān Anij, ij kōnono n̄an bōk peran eo n̄an pukot Anij kiiō wōt! Ij kōnono kōn jar ilo peran bwe Jemādwōj Ilan̄ ej ron̄jake kōj, bwe E eļapļo̧k an meļeļe aikuj ko ad jen kōj. Ij kōnono n̄an bōk peran bwe Ej iakwe kōj eļapļo̧k jen ad maron̄ jeļā, bwe Eaar jilkintok enjeļ ro bwe ren pād ippād im ro jej iakwe er. Ij kōnono n̄an bōk peran bwe Ej m̧ōņōņō in jipan̄ kajjojo iaad n̄an tōpar jibadbad eo ad ilōn̄tata.

Kiiō, elmen ad bōk kain peran rot in? Irooj eaar uwaake kajjitōk in ilo naan kein: “Aolepāņ am̧ … en barāinwōt obrak kōn iakwe-em̧ool n̄an armej otemjeļo̧k, … im erreo en kainōknōk ļōmņak ko am ilo ejjeļo̧k m̧wijkōk; innām am peran enaaj kanooj kajoor im̧aan mejān Anij.”

En̄in ej jibadbad eo! Ilo naan ko an Irooj make, iakwe-em̧ool im ewānōk rej kōpeļļo̧k iaļ eo n̄an bōk peran ilo im̧aan mejān Anij! Ro jeiū im jatū, jemaron̄ kōm̧m̧ane menin! Ad peran emaron̄ kanooj kajoor im̧aan mejān Anij, kiiō wōt!

Jen jim̧or ļōmņak kōn iakwe-em̧ool im wānōk.

M̧oktata, iakwe-em̧ool. Ruo iiō remootļo̧k, iaar kajjitōk ippād, āinwōt rikaļoor in bujen ro an Jisōs Kraist, n̄an erom̧ rikōm̧m̧an aenōm̧m̧an ro. Inaaj ālji ta eo ikar ba m̧o̧ktaļo̧k: “Illu ejamin kipel. Lāj ejjab kōkajoorļo̧k juon. Iakwelel ejjamin tōl n̄an uwaak ko reim̧we.”

Iakwe-em̧ool n̄an aolep armej otemjeļo̧k ej kōkaļļein rikōm̧m̧an aenōm̧m̧an ro. Jej aikuj kwaļo̧k iakwe-em̧ool ilo ad kōnono, jim̧or ilo lo̧bwilej im jikin ko rettiņo Ij kam̧m̧oolol kom̧ ro raar bōk kapilōk in aō ilo būruweer. Ak jemaron̄ kōm̧m̧an em̧m̧anļo̧k.

Kōnono ko ilo lo̧bwilej im ko ilo social media rej kairujruj. Naan ko rōkōmetak remaron̄ kōmetak ro jet. Jum̧ae ej kōm̧m̧an bwe en jako an Jetōb Kwojarjar m̧ōttā ippād.

Āinwōt rikaļoor ro an Jisōs Kraist, jej aikuj tōl ilo wāween eo āinwōt rikōm̧m̧an aenōm̧m̧an ro. Ilo an iakwe-em̧ool m̧ōttan mour eo ad, jenaaj joļo̧k kōnanaik ro jet. Enaaj bōjrak aō ekajete ro jet. Jenaaj bōk iakwe-em̧ool n̄an aolep armej. Iakwe-em̧ool n̄an aolep armej otemjeļo̧k en jibadbad in eddōkļo̧k eo ad. Iakwe-em̧ool ej peded in m̧wil in anij.

Jen akweļap n̄an Jemādwōj Ilan̄ n̄an kobrak būruwōd kōn eļaplo̧k iakwe-em̧ool—eļaptata n̄an ro epen aer iakwe—bwe iakwe-em̧ool ej juon menin letok jān Jemādwōj Ilan̄ n̄an rikaļoor ro rem̧m̧ol an Jisōs Kraist. Rilo̧mo̧o̧r eo ej Irooj in Aenōm̧m̧an. Jej kein jerbal ro An kōn aenōm̧m̧an.

Kiiō, jen kōnono kōn wānōk. Irooj ej jiron̄ kōj n̄an kainōknōk ļōmņak ko ad ilo ejjeļo̧k m̧wijkōk in wānōk. Pijaiki m̧ōk kōmjejā eo kwonaaj bōke n̄an jabdewōt ļōmņak rem̧m̧an, n̄e kwonaaj kōļapļo̧k kōn wānōk. Wānōk ej kōm̧m̧an em̧m̧anļo̧k im m̧ōņōņōļo̧k! Ilo juon wāween bar ba, pijaik m̧ōk ta eo enaaj waļo̧k n̄e kwoj likūt wānōk n̄an ļōmņak ko renana, ļōmņak ko rejekkar, ak inepata. Wānōk enaaj joļo̧k kain ļōmņak rot in. Wānōk enaaj joļo̧k am̧ eddodo, inepata.

Ro jeiū im jatū, ilo an ļapļo̧k an laļ in nana, jej aikuj kōļapļo̧k ad erreeo. Ļōmņak ko ad, naan ko, im kōm̧m̧an ko ad ejjab aikuj jako wānōk, n̄an obrak kōn iakwe eo erreeo an Jisōs Kraist n̄an aolep armej. Iien ko reļļap rej pād im̧aad ej n̄an erom̧ kain armej eo Anij ekōņaan bwe jen erom̧.

Emakijkij kabun̄jar ilo m̧weeo im̧ōn Irooj enaaj kōļaplo̧k maron̄ eo ad jim̧or ilo wānōk im iakwe-em̧ool. Aaet, iien ilo tampeļ enaaj kōļapļo̧k ad peran ilo im̧aan mejān Irooj. Kōļapļo̧k iien ilo tampeļ enaaj jipan̄ kōj pojak n̄an Itok eo Kein Karuo an ad Rilo̧mo̧o̧r, Jisōs Kraist. Jejjab jeļā raan eo ak awa in itok eo An. Ak ijeļā bwe Irooj ej im̧we eō bwe in likjerjere kōj n̄an pojak n̄an “raan eo eļap im kaamijak.”

Ilo ad tiljek kappukot n̄an bōk iakwe-em̧ool im wānōk n̄an kobrak mour ko ad, ad peran n̄an kepaakļo̧k Anij enaaj ļapļo̧k. Ij kajjitōk ippāmi n̄an bōk bun̄tōn ko n̄an kōļapļo̧k am̧ peran ilo im̧aan mejān Irooj. Innām, ilo ad pukot Jemādwōj Ilan̄ kōn eļapļo̧k peran, jenaaj obrak kōn eļapļo̧k m̧ōņōņō, im ami tōmak ilo Jisōs Kraist enaaj ļapļo̧k. Jenaaj jino en̄jake jetōb in kajoor eo ej kōļapļo̧k ad kōjatdikdik.

Jej kam̧m̧oolol Irooj kōn ekkal ko an tampeļ ilo iiō ko kiiō. Ium̧win tōl eo An, rainin, jej kōjjeļā kōn karōk eo n̄an kajjutak tampeļ ilo jikin kein 15:

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Ij kam̧ool bwe Jisōs Kraist, Ripinmuur in Israel, ej tōl, Kabun̄ in An. Ej m̧aanjabpopo n̄an bar jepļaaktok. Kōm̧m̧an bwe jen pojak n̄an bōk E. Kōn menin Ij jar ilo etan Jisōs Kraist. amen.

Kakeememej ko

  1. Dōkā eo me rikanaan Daniel eaar loe ilo ettōņak eo an kōn raan kein āliktata ej “enaaj jabwilbwil m̧aanļo̧k, m̧ae an kobrak aolepān laļ” (lale Daniel 2:31–45; Katak im Bujen Ko 65:2).

  2. Katak im Bujen Ko 121:45.

  3. “Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (Katak im Bujen Ko 84:88).

  4. Katak im Bujen Ko 121:45, naan ko kar kobaiktok; bar lale eoon 46.

  5. Russell M. Nelson, “Rikōm̧m̧an Aenōmman ro Aikuji,” Liaona, Māe 2023, 98.

  6. Kāālet n̄an jum̧ae ro jet ej kāālet n̄an mour ijelo̧in tōl eo an Jetōb Kwojarjar.

  7. Ej aikuj wōr ippād iakwe-em̧ool “n̄an armej otemjeļo̧k, im nukwin eo an tōmak” (Katak im Bujen Ko 121:45).

  8. Meļeļein bwe jar “kōn aolep kajoor in bōro” (Moronai 7:48).

  9. Lale Moronai 7:48.

  10. Lale Aiseia 9:6.

  11. As Joseph Smith taught, “If [we] wish to go where God is, [we] must be like God, or possess the principles which God possesses” (Teachings of Presidents of the Church: Joseph Smith [2007], 72). Ejjeļo̧k oktak, Rijilōk Paul eaar jiron̄ bwe jej aikuj “peran im kepaak n̄an tūroon in jouj, bwe jen bōk tūriam̧okake, im lo jouj im jipan̄ ilo iien aikuj” (Hibru 4:16).

  12. Lale Matu 24:36–37.

  13. Malakai 4:5; bar lale Zepanaia 1:14–18.

  14. Irooj eaar jiron̄ kōj n̄an “keememej tōmak, erreo, jeļāļo̧kjeņ, jatōr, lōjokmen, jeļā ņae, m̧wil em̧m̧an, iakwe-em̧ool, ettā, niknik” (Katak im Bujen Ko 4:6). N̄e jenaaj kōm̧m̧an, ad peran enaaj ļapļo̧k, innām, ilo naan ko An make, n̄e jej kajjitōk, jenaaj bōke. Im eļan̄n̄e jenaaj kaļļaļļaļ, enaaj kōpeļļo̧ke n̄an kōj. (Lale Katak im Bujen Ko 4:7.)

  15. Kōtļo̧k bwe jen en̄jake ta eo armej ro an Kiin̄ Benjamin raar kōm̧m̧ane: “raar obrak kōn lan̄lōn̄, im raar bōk jeorļo̧k in jero̧wiwi ko aer, im kar wōr aer aenōm̧m̧an in bōklōkōt, kōnke kar tōmak eo eļap aer ilo Jisōs Kraist” (Mosaia 4:3).