Am̧ Ukweļo̧k Ejjab Kadodoik Jisōs Kraist, Ej Kōmeram̧ An Lan̄lōn̄

Jejjo iiō remootļo̧k ilo juon tūreep n̄an Florida, ikar jijet nam̧ōj im riiti juon bok. Taitōļ eo an ej kwaļo̧k bwe jej maron̄ wōt etal n̄an lan̄, men̄e jejjab wānōk kiiō. Juon kōrā ej etetal ekar kajjitōk, “Kwoj ļōmņak epidodo?”

Ikar ejjed, pok, im innām kar kile liin ekar ekōnono kōn bok eo ikar riiti. Ikar ba juon men ekōjak āinwōt, “Ekwe, ijjab lukkuun ettoļo̧k jāne, ak inaaj kōjjeļāik eok ekōjkan an jem̧ļo̧k.”

O, ewi jon̄an aō kōņaan bwe in maron̄ bar ro̧o̧l likļo̧k n̄an iien eo! Ikar jiron̄ liin, “Aaet, epidodo! Kōnke lan̄ ejjab n̄an armej ro me rōwānōk; ej n̄an armej ro me kar jeorļo̧k aer bōd, ro rej kāālet im kāālet Kraist.”

Rainin ikōņaan kōnono n̄an kōj ro me jet iien rej en̄jake, “Ukweļo̧k im jeorļo̧k bōd rej āinwōt jerbal n̄an aolep ijello̧kin n̄a.” Ro me rej ļōmņak ippāer make, “Kōn aō kōm̧m̧ani ejja bōd ko wōt, bōlen en̄in ej jekjek iwōjake in.” Ro me, āinwōt n̄a, ewōr an raan ko n̄e iaļ in bujen eo ej āinwōt ekanooj in pen, ainļo̧k wōt juon etetal aitok lukkuun ju!

Juon mijenede em̧m̧an ilo Australia, Elder QaQa jān Fiji, ekar kwaļo̧k juon ejja kain en̄jake in ilo naan in kam̧ool eo ke ej tōn ro̧o̧l: “Ijeļā bwe Anij ej iakwe eō, ak jet iien ij ļōmņak, Anij ejeļā ke ij iakwe E?’ Kōnke ijjab weppān, im ij kōm̧m̧an wōt bōd.”

Ilo kajjitōk jab eo em̧ool, ekōļon̄tak, Elder QaQa ekar kwaļo̧k lukkuun ta eo ekkā aō inepata kake. Bōlen kwoj bar kōļmenļo̧kjeņ, ļōmņak, “Ij lukkuun kajjieon̄, bōtaab Anij ejeļā ke ij lukkuun kajjieon̄? N̄e ij likjab wōt, Anij ejeļā ij iakwe wōt E?”

Ekabūrom̧ōj eō n̄an kwaļo̧k menin, ak ikōn jon̄e jemjerā eo aō ippān Rilo̧mo̧o̧r kōn ewi jon̄an an weppān aō kar mour. Ikar ļōmņake juon mour in pokake eo ijjab aikuj in ukweļo̧k. Im n̄e ij kōm̧m̧an bōd, bwe ilo aolep raan ij kattoļo̧k eō make jān Anij, ļōmņak, “E ej lukkuun inepata ippa.”

Menin ejjab m̧ool.

Ikar jeļā bwe eļan̄n̄e kwoj kōttar m̧ae iien eo ebwe an erreo ak weppān n̄an etal n̄an Rilo̧mo̧o̧r, kwar jab lukkuun meļeļe jibadbad eo!

Ta eo eļan̄n̄e jaar ļōmņak kōn kien ko im pokake ilo juon wāween eoktak?

Ij kam̧ool bwe ilo an Anij kea kōn bōd ko ad, E ej kea eļapļo̧k kōn ta eo ej waļo̧k ālkin ad kōm̧m̧an bōd. Jenaaj ke oktakļo̧k im bar oktakļo̧k n̄an E? Jenaaj ke pād wōt ilo bujen jemjerā in?

Bōlen kwomaron̄ ron̄ naan ko an Irooj “Eļan̄n̄e [kwoj] yokwe Eō, kōjparok kien ko Aō” im en̄jake ebweer kōnke kwoj jan̄in kōjparok aolep kien ko. In kakeememej kom̧ bwe ej barāinwōt juon kien n̄an ukweļo̧k! Ilo m̧ool, emaron̄ in kien eo eļap tata āliji ilo jeje ko rekwojarjar.

Ilo kōnono eo an Alma make, “O bwe in kar juon enjeļ, im kar tōpar aolep kōņaan ko an buruō … im kūr ukeļo̧k,” ekar jab kajjieon̄ n̄an kajook kōj kōn kwaļo̧k bōd ko ad. Ekar kōņaan kwaļo̧k ukweļo̧k bwe kwe im n̄a jen maron̄ joļo̧k en̄taan ilo laļ in. Juon wūn Alma ekar dike jerawiwi ej kōnke ej kōm̧m̧an ad metak.

Jet iien ij aikuj keememej, āinwōt juon kein kakeememej ijo imaron̄ loe, bwe kien ko rej iaļ eo ļo̧k jān metak. Im ukweļo̧k ej barāinwōt. Rikanaan eo ad ekar ba, “Rilo̧mo̧o̧r eo ej iakwe kōj aolep iien ak eļaptata ilo ad ukweļo̧k.”

Kōn menin ke Irooj ej ba, “O kom̧in ukeļo̧k, kom̧in ukeļo̧k” ta eļan̄n̄e kwoj ļōmņak An ba “Ij iakwe eok. Ij iakwe eok.” Pijaik An akweļo̧k ippam̧,n̄an joļo̧k m̧wiļ ko am̧ rej kōm̧m̧an am̧ metek, kajjitōk ippam̧ n̄an diwōjļo̧k jān marok im oktakļo̧k n̄an meram eo An.

Ilo ward eo an leddik eo nejū Carly, juon pris kāāl ekar bukwelōlō n̄an kōjeraam̧an kwojkwoj eo, im ijello̧kin an ba, “Bwe ren maron̄ kōm̧m̧ane ilo ememej bōtōktōkin Nejū,” em̧ōkaj an kar ba, “Bwe ren maron̄ kōm̧m̧ane ilo ememej iakwe eo an Nejūm̧.” Kōmejaaļaļ ekar kobrak mejān Carley ke m̧ool eo an naan ko kar juk.

Ad Rilo̧mo̧o̧r ekar m̧ōņōņō in en̄taan kōn metak in Pinmuur eo An kōnke E ej iakwe eok. Ilo m̧ool, kwoj “lan̄lōn̄ em̧ōj likūt e im̧aan” ke E ekar en̄taan.

Kūr eo n̄an ukweļo̧k ej juon kakōļļe in iakwe eo an Anij.

Ba aaet n̄an kūr jab in ej juon kakōļļe kōn iakwe eo ad.

Pijaikļo̧k pija in Kraist eo em̧m̧an tata ippam̧. Kiiō pijaik An ettōn̄ kōn lan̄lōn̄ kajjojo iien kwoj kōjerbal menin letok eo An, kōnke E ej “kōjatdikdik emeram.”

Aaet, am̧ ukweļo̧k ejjab kadodoik Jisōs Kraist; ej kōmeram An lan̄ļōn̄!

Jen katakin men jab in!

Kōnke ukweļo̧k ej nuuj eo ad em̧m̧an tata!

Jejjab pād ilo iaļ in bujen eo kōn jab kōm̧m̧ane juon bōd. Jej pād ilo iaļ eo kōn ukweļo̧k aolep raan.

Im n̄e jej ukweļo̧k, Anij ej meļo̧kļo̧k ilo an jab kajook kōj, keidi kōj n̄an jabdewōt, ak būron̄e kōj kōnke menin ejja men eo wōt jaar ukweļo̧k jān e wiik eo ļo̧k.

Ej ej lem̧ōņōņō aolep iien E ej lo ad bukwelōlō. E ej lo̧udin̄din̄ n̄an jeorļo̧k ad bōd kōnke kōn E jej tūb eo!

Kwoj ke en̄jake bwe em̧ool?

Innām etke ekanooj pen n̄an kōj n̄an tōmak?!

Setan, rinana eo eļaptata im rikapo eo, ej kōjerbal jook n̄an dāpij kōj jān Anij. Jook ej āinwōt juon en̄jake eo ekanooj eddo me eļan̄n̄e kwoj kadiwōjļo̧k jān ānbwinum̧, enaaj āinwōt juon lukkuun eddo.

Jook ej āinwōt ainikien eo me ej kakkure, im ba, “Ta kar am̧ ļōmņak?” “Ewōr ke men ejim̧we kwar kōm̧m̧ane?”

Jook ejjab jiron̄ kōj jaar kōm̧m̧an bōd, ej jiron̄ kōj ej ad make bōd. Em̧ool kwomaron̄ ron̄, “Tileekek.” Rikapo eo ej kōm̧m̧an jabdewōt men ilo kajoor eo an n̄an dāpij eddodo eo itulowa, jiron̄ kōj kōn wōņāān eo eļap, bwe enaaj pididodļo̧k eļan̄n̄e jej pād wōt ilo marok, kōm̧akūt aolep kōjatdikdik.

Setan ej riko̧o̧t an kōjatdikdik.

Im kwoj aikuj in ron̄jake menin, kōn menin inaaj ba naan kein: Kwojjab ainikien eo ilo bōram̧ ak bōd ko kwar kōm̧m̧ani. kwomaron̄ ba men jab barāinwōt. Jiron̄ Setan, “Ejjab rainin.” Door e itulikūm̧.

En̄jake epaakeļo̧k Rilo̧mo̧o̧r eo, būrom̧ōj in anij me ej ukōtļo̧k eok n̄an Rilo̧mo̧o̧r eo am̧ im lale an jouj eo An deļo̧n̄ ilo mour eo am̧ im mour an ro kwoj iakwe. Ij kallim̧ur bwe ilo iien eo wōt jej bōktok juon bōro erup ilo peran n̄an E, E em̧ōkaj an pād.

Eļan̄n̄e kwar lo juon emaļo̧n̄, kwon ke kar erļo̧ke lo̧k peiūm̧ im lo̧mo̧o̧ren er? Kwomaron̄ ke pijaikļo̧k Rilo̧mo̧o̧r eo am̧ jab bōk an peiūm̧ erļo̧k ļo̧k? Ij pijaikļo̧k An keļo̧k n̄an dān eo, wallaļļo̧k ium̧win aolep men n̄an kotak kōj bwe jen maron̄ bōk kūtuwōd! Ejjeļo̧k juon emaron̄ rūm̧ļo̧k jān an meram in Kraist romaak.

Rilo̧mo̧o̧r ej lukkuun kōmeramļo̧k jook ko an maroklep. E ej jamin jerwane aorōk eo am̧. Kanooj lale.

• Pijaikļo̧k pā jab in ej jutak kōn aorōk.

• Pā in ej jutak kōn pokake. Bōlen kwar ruj in jibbon̄, kōm̧m̧an juon jar eļap meļeļe in, im kar riiti jeje ko rekwojarjar n̄an ron̄ ainikien Anij. Kwar kōm̧m̧ani jokāālet ko im kōm̧m̧an n̄an armej ro ipeļaakūm̧ āinwōt Kraist. Kwoj ron̄jake kweilo̧k eo eļap! Pokake eo am̧ epād ijin!

• Ak bōlen men ko rejjan̄in em̧m̧an. Kwar kakkōt n̄an kōm̧m̧ani men ko reddik, men ko reļem waan n̄an ekkejel n̄an lan̄. Kwar kōm̧m̧ani jet jokāālet ko ekar jab bun̄ būruōm̧ kaki.

• Ewi aorōk eo am̧? Pā in enan̄in ke kar em̧m̧akūt n̄an jidik?

Aorōk eo am̧ ejjab pedped ioon pokake. Aorōk eo am̧ ejjab m̧ūjkōk; ejjamin oktak. Kar lewaj n̄an eok jān Anij, im ejjeļo̧k men kwe ak bar juon emaron̄ kōm̧m̧ane n̄an ukōte. Pokake ej bōktok jeraam̧m̧an ko; em̧ool. Bōtaab aorōk ejjab juon iaer. Aorōk eo am̧ ej iien otemjej “ekanooj ļap ilo mejān Anij,” jekdo̧o̧n ta kāālet ko am̧ rekar bōkļo̧k eok n̄ane.

N̄e ij kōm̧m̧an bōd, ikōņaan pād wōt ilo iaļ in bujen eo ippān Kraist, im inaaj jiron̄ eok etke.

Ikar rūttoļo̧k ebbōk katak ko diving im kar katak bwe n̄e riekjet ro rej jikoore juon dive, rej lale wāween kōm̧m̧ane. Tulo̧k lo dān ekar ke lukkuun ju, kōn addi ko kankan im edik an jelōb? Innām raar ke kōm̧m̧ane juon men ejej uwaan. Raar pedped ilo jekjek in an pen.

Aolep rej dive kōn jekjek in an pen eo aer make. Am̧ Rilo̧mo̧o̧r ej e wōt juon me em̧ool ejeļā jekjek in pen eo kwoj dive kake. Ikōņaan juon jemjerā ippān juon armej eo me emeļeļe kōn n̄a, eo ejeļā būruō im ewi jon̄an aō kajjieon̄!

E ejeļā tab in marok ko rej wanlaļtak ioon kōj wōj rito ritak ro bwe iaļ eo ad ej eļļaļo̧k turin reba eo ettoon—jekdo̧o̧n n̄e jej jibwe aen in dāpdep eo, jenaaj ioon kapo.

Itok n̄an Kraist ej ba, “Kwonaaj ke jipan̄ eō?” kōn kōjatdikdik, juon kam̧ool kwaļo̧k bwe pā ko Pein rej eļļo̧k n̄an kwe aolep iien. Ij tōmak ilo kōļmenļo̧kjeņ in ekāāl kōn ukweļo̧k ej meļeļe in jekdo̧o̧n n̄e ejjeļo̧k ippād juon pokake eo eweppān kiiō, jej kajjieon̄ pokake eo eweppān kiiō, kāālet n̄an pād im bar pād, kōnke jej iakwe E.

Keememej armej ro an Kiin̄ Benjamin me raar jab bar itok wōt in kōm̧m̧an nana, ak n̄an kōm̧m̧an em̧m̧an wōt? Kwoj ke ļōmņak raar lim im̧ōn kōppād ko aer, ro̧o̧l n̄an m̧ōko, im jab bar kōm̧m̧an bōd? Em̧ool jaab! Oktak eo ej bwe rekar jab bar kōņaan jerawiwi. Ekar wōr aer en̄jake eo epojak n̄an pokake! Būruweer ekar oktak im oktakļo̧k n̄an Anij ke raar pād ilo apan̄!

Ilo juon iien, ilo parijet eo, ikar lo juon bao ej keļo̧k imejatoto, buuļ pikpiki pā ko pein, kakkōt, bōtaab ekar pād ejja ijo wōt. Innām ikar lo bar juo bao, eutiejļo̧k. Kar kelōn̄ļo̧k im em̧m̧an an jepļā, jab inepata kōn kōto. En̄in ej oktak eo ikōtaan kajjieon̄ n̄an kōm̧m̧an men in kōn kōj make im oktakļo̧k n̄an ad Rilo̧mo̧o̧r, kōtļok An ļōn̄aj kōj, kōn “kōmour ilo pein.”

Āinwōt ritōl ro an mijen ilo Australia, ilo loļo̧k eo am āliktata ippān kajjojo mijenede, kōm kar kōnono kōn 3 Nipai 17, ijo armej ro raar epaak Rilo̧mo̧o̧r eo im maron̄ kar ron̄ An jar kōn er. Kōm kar kajjitōk, “Eļan̄n̄e kwar ron̄ an Rilo̧mo̧o̧r eo jar kōn kwe, ta eo kwoj ļōmņak E en kar ba?”

N̄an ron̄ uwaak ko aer ekar juon iaan en̄jake ko reļļap ilo mour in Jetōb eo aō. Kajjojo mijenede ro rekōn bōjrak, im kōmejaaļaļ ekar kobark mejāer ilo aer kar kakeememej kōm, “Am̧ Rilo̧mo̧o̧r ejeļā jekjek in pen eo kwoj ioone. E ekar en̄jake!”

En̄in ej ta eo mijenede ro rōm̧m̧an im jouj raar kwaļo̧ke: Juon sister ekar ba, “Jisōs emaron̄ kar ba n̄an Jemād, ‘ej kōm̧m̧ane ijo em̧m̧antata emaron̄e. Ijeļā ewi jon̄an an kajjieon̄.’” Juon elder ekar ba: “Kōn aolep men me ekar waļo̧k ilo mour eo an, elukkuun utiej būruō kōn e.”

Jen kajjieon̄e menin. Bun̄nin, m̧okta jān am̧ jar, pijaik an Jisōs Kraist epaake eok. E ej Rijojomar eo am̧ ippān Jemān. Kajjitikin eok make, “Ta eo Rilo̧mo̧o̧r eo aō en kar ba n̄an Jemān kōn n̄a?”

Innām ikōn̄.

Ron̄jake ainikein eo me ej ba em̧m̧an men ko kōn kwe—ainikien eo an Rilo̧mo̧or, eo m̧ōtta em̧man tata, im Jemam̧ ilo Lan̄, eo ej lukkuun pād. Keememej, Aer iakwe im am̧ aorōk rej aolep iien em̧m̧an, jekdo̧o̧n ta!

Ij jutak ijin n̄an kam̧ool bwe Jisōs Kraist ej leļo̧k meram n̄an ro rej jijet ilo marok. Kōn menin, ilo raan ko me n̄e kwoj en̄jake bwe ainikien eo ej jiron̄ eok n̄an tileekek, bwe kwoj aikuj tileekek ilo juon ruum̧ emarok kwe make, ij kūr eok n̄an peran im tōmak ilo Kraist! Etetal ioon im oktakļo̧k n̄an Meram eo—Ad Kōjatdikdik Emeram Eweppān.

Kobrak kōn An meram, kwonaaj lo armej ro ipeļaakūm̧ me raar en̄jake makeļo̧k barāinwōt, bōtaab kiiō, kōn meram eo ebbōl ilo, kwe im er naaj ļōmņak, “Etke jaar kanooj mijak ilo marok? Im etke ekar kanooj to ad pād ijo?”

“Kōm̧m̧an bwe Meram ko an Irooj ren paut eok ilo Pein im kaenōm̧m̧an im iakwe kom̧ wōt.” Kōm̧m̧an bwe jen iakwe E ejjeļo̧k jemļo̧kin im bar, kāālet E. Ilo etan Jisōs Kraist, amen.