Kwaļo̧k kautiej Men ko Rekwojarjar

Ilo bok in Exodus, jej ilo̧k ippān Moses n̄an jikin ko reju ilo toļ Horeb ke ej kālet n̄an jab mijōk wōt inepata ko im jerbal ko an aolep raan—jet iien jej aolep aikuj m̧ōņōņō in kōm̧m̧ane—n̄an lale wōjke eo eurur ak ekar jab bwil. Ke ekar epaakļo̧k, “Anij ear kūr ñan e jān bwiljin wōjke eo, im ba, Moses, Moses. Im ekar ba, “N̄a e. Im [Anij] ekar ba, … kwōn utūk juj ko jān neem̧, bwe jikin ņe kwōj jutak ie, bwidej e kwōjarjar.” Ilo kwaļo̧k kautiej eļap, ettā bōro, im bwilōn̄, Moses ekar utūk juj ko an im kōpooj e make n̄an ron̄jake naan ko an Irooj im n̄an en̄jake kwojarjar eo An im̧aan Mejān.

En̄jake in ekwojarjar ilo Irooj waļo̧k n̄an Moses ioon toļ Horeb, jon̄an Moses ekar en̄jake eļap kautiej kōnke en̄jake in ekar juon kabwilōn̄lōn̄, ilo m̧ool, ekar juon wāween eaorōk kōn oktak eo an jān juon seperd ettā n̄an juon rikanaan ekajoor, tōl e n̄an etetal juon iaļ ekāāl ilo mour. Ejjeļo̧k oktak, kōj kajjojo maron̄ ukōt rikaļoor eo ad n̄an juon jon̄ak in jetōb eutiejļo̧k jān kōm̧m̧an kwaļo̧k kautiej āinwōt juon bōnjān eo eaorōk ak jon̄ak āinwōt juon m̧ōttan ekwojarjar an m̧wil in jetōb eo ad.

Naan eo kwaļo̧k kautiej maron̄ in lale likļo̧k n̄an Latin verb in revereri, eo ej meļeļein n̄an “jutak ilo mijak kōn juon men.” Ilo juon wāween ilo gospel eo, meļeļe in ej koba ippān juon en̄jake ak kam̧m̧oolol eo em̧wilaļ an kwaļo̧k kautiej, iakwe, im kam̧m̧oolol. Kain kōnono kōn kwojarjar in jān ro ewōr ippāer juon bōro erup im wūjlepļo̧k em̧wilaļ n̄an Anij im Jisōs Kraist ej jipan̄ kōļapļo̧k lan̄lōn̄ ilo jetōb ko.

Kwaļo̧k kautiej n̄an men ko rekwojarjar ej waļo̧k eo eļaptata an juon bōnjān jetōb eo eaorōk, ej juon bar ejaak in jem̧jerā eo ad n̄an ta eo ekwojarjar im kōmeļeļeiki iakwe eo jej iakwe im an jetōb eo ad epaake Jemādwōj Ilan̄, im ad Rilo̧mo̧o̧r, Jisōs Kraist. Ej barāinwōt juon iaan en̄jake ko relukkuun lelōn̄ļo̧k jetōb eo ad. Kain wānōk eo ej tōl ļōmņak ko ad, būruwōd, im mour ko ad n̄an Anij. Ilo m̧ool, kwaļo̧k kauitej ejjab baj juon wāween an jetōb; kwaļo̧k kautiej ej m̧ōttan eo elukkuun aorōk an jetōb—im kwaļo̧k kautiej in ej pedped an jetōb, ej kōm̧m̧an jem̧jrā ippān kwojarjar, āinwōt katakin jān ajri ro nejid n̄e rej al, “When I am rev’rent, I know in my heart Heav’nly Father and Jesus are near.”

Āinwōt rikaļoor ro an Jisōs Kraist, kar karuwainene kōj n̄an ejaake menin letok an kwaļo̧k kautiej ilo mour ko ad n̄an maron̄ n̄an ajeļo̧k kōj make n̄an juon kōm̧m̧ao ippān Anij im Nejin Jisōs Kraist, ilo ejja iien eo wōt kōkajoorļo̧k m̧wil in jetōb eo ad. Elōn̄ļo̧k ke kain en̄jake rot in ilo būruwōd, enaaj ejjeļo̧k pere ke emaron̄ ļapļo̧k lan̄lōn̄ im laudin̄din̄ ilo mour ko ad, im enaaj maron̄ dikļo̧k jikin n̄an būrom̧ōj im illu. Jej aikuj keememej bwe kwaļo̧k kautiej n̄an men ko rekwojarjar ej letok eļapļo̧k n̄an ta eo jej kōm̧m̧ane aolep raan im kōkajoorļo̧k en̄jake in kam̧m̧oolol eo ad—im̧we mijak, kautiej, im iakwe n̄an men ko routiejļo̧k im ekwojarjar ļo̧k.

Jerata eo, jej mour ilo juon laļ ijo me kwaļo̧k kautiej n̄an men ko rekwojarjar ej erom̧ jeja kōm̧m̧ane. Ilo m̧ool, armej ro rej pedped wōt ioon mour an laļ in emakijkij aer nōbar men ko ejjeļo̧k kwaļo̧k kautiej n̄ani ak m̧ool, āinwōt jabdewōt jibadōk ko an juon māākjiin, būrokraam̧ in tv, ak men ko rem̧m̧an ilo intōrnōt. An ejjeļo̧k kwaļo̧k kautiej n̄an kwojarjar ej kōm̧m̧an an ļapļo̧k juon m̧wil ejabde im jab tiljek in m̧wil im kōm̧m̧an, ko remaron̄ kōm̧m̧an an juon epepen in armej ro erom̧ jab kautiej n̄an ta eo ekwojarjar im kōm̧m̧an bwe epepen in armej ro tokālik ren jōbwābwe.

Jab kwaļo̧k kautiej emaron̄ barāinwōt tōlļo̧k kōj jān dāil bujen ko ippān Anij rej letok im kadikļo̧k en̄jake in eddo eo ad im̧aan Anij. Kōn menin, jej jelm̧ae kauwōtata ilo ad kea wōt kōn jokne eo ad make, kaju būruwōn ad jaje kōjparok jān ikdeleel ko an kanniōk im laļ in, im āliktata ejaake juon m̧wil in akōjdat n̄an men ko rekwojarjar im aaet akōjdat n̄an Anij, im barāinwōt bōnjān kwojarjar eo ad āinwōt ajri ro nejin Jemādwōj Ilan̄. Jab kwaļo̧k kautiej ņae men ko rekwojarjar ej kōwōnm̧aanļo̧k jibadbad ko an rikapo eo kapoktak wāween ko ilo ad bōk revelesōn ko me rej lukkuun aorōk n̄an an jetōb eo ad mour ilo raan kein ad.

Meļeļe eo im aorōk in kwaļo̧k kautiej n̄an ta eo ej kwojarjar ej jejjet an kar ellaajrak ilo aolepān jeje ko rekwojarjar. Juon waanjon̄ak ilo Katak im Bujen Ko āinwōt ej kwaļo̧k bwe kwaļo̧k kautiej n̄an Jemādwōj Ilan̄ im Nejin Jisōs Kraist ej juon wānōk eo eaorōk n̄an ro otemjej rej tōbrak ļo̧k ilo laļ an selestial.

Āinwōt juon kabun̄ jej kajjieon̄ kabwijer Jemādwōj Ilan̄ im Nejin ilo kwojarjar eo eutiejtata im kwaļo̧k kautiej ilo aolep jekjek, ekoba wāween ad kōmeļeļeik nememe ko Aer. Tōl eo an Jetōb Kwojarjar ej juon utōn men eaorōk ilo kōlmenļo̧kjeņ wāween an nememein kein rej aikuj kwaļo̧k paaktok eo ekwojarjar, kadkad, im m̧wil in rūkanij ko an Jemād im an Nejin. Jej lukkuun tiljek n̄an bōbrae ad kwaļo̧k kadkad in bōnjān ko me remaron̄ kapok kōj jān jibadbad eo ad eļap ioon Jemādwōj Ilan̄ im Nejin Jisōs Kraist im katak ko Aer, ekoba wāween ad kōjerbal kein jerbal ko rekapāāl litok jān technology, āinwōt kōjerbale artificial intelligence (IA) n̄an kwaļo̧k meļeļe im pija ko.

Ejja pedped in wōt ej jerbal n̄an jabdewōt meļeļe ko rej pād ilo jānōļ in leto letak meļeļe ko an Kabun̄ in. Aolep katak, bok, bok in katakin, im ennaan ko etiljek kar ejaaki im kōmālimi ium̧win tōl eo an Jetōb eo n̄an lukkuun lale bwe jej ļoore wānōk eo ekwojarjar, aorōk ko, im jon̄ak ko an gospel eo an Jisōs Kraist. Ilo juon ennaan ekāāl n̄an rūm̧m̧an ded ro an Kabun̄ in, Elder David A. Bednar ekar katakin, “N̄an dipuk iaļ ko reppen an jetōb im technology, Armej ro Rekwojarjar ilo Raan ko Āliktata rej aikuj in ettā im jar n̄an (1) pukot pedped ko an gospel eo im remaron̄ tōl er ilo kōjerbal artificial intelligence eo im (2) kajjieon̄ ilo niknik n̄an jemjerā eo an Jetōb Kwojarjar im menin letok eo an jetōb kōn revelesōn.”

Ro jeiū im jatū, āinwōt an ļap āinwōt an technology raan kein erom̧, ejjab baj maron̄ kōm̧m̧an bwilōn̄, mijak, im ļo̧kjenan loe ilo kain kwaļo̧k kautiej in ej itok jān kajoor eo an Jetōb Kwojarjar. Āinwōt rikaļoor ro an Kraist, jej aikuj in erom̧ tiljek n̄an jab kamōjņo̧iki jem̧jerā eo ad ippān Anij im Nejin ilo ad kōjerbale Al rej kwaļo̧k meļeļe ko im pija ko rejjab ekkar. Jej aikuj keememej bwe pedped wōt ioon juon kein jerbal an raan kein “pein kanniōk” ej juon kein pinej jenkwan eo ejabwe im ejjeļo̧k an kautiej n̄an im̧we, kotak, im kam̧ool bwe emaron̄ wōt bōk jān kajoor eo an Jetōb Kwojarjar eo. Āinwōt an Nipai kar kwaļo̧k, “O Irooj, iaar likūt aō lōke ilo Kwe, im inaaj lōke Kwe indeeo. Ij jamin likūt aō lōke ioon pein kanniōk.”

Ilo bar juon revelesōn, Rikanaan Josep Smith ekar kōmeļeļeļe bwe tampeļ ko rekar jutak n̄an Irooj aikuj in erom̧ juon jikin kautiej n̄an E. Ilo aolepān iien kwaļo̧k eo an, ad rikanaan, Būreejtōn Russell M. Nelson, ekar kajoor an kōmejajaiki ad kabun̄ jar ilo kautiej ilo tampeļ eo ekwojarjar. Ilo m̧weo im̧ōn Irooj jej ekkatak kōn deļo̧n̄e n̄an jikin eo ekwojarjar im̧aan mejān Jemād im Nejin. Ikar aolep iien loe ej katakin im aaet im̧we bwe juon iaan men ko jinoin jej kōm̧m̧ane ilo ad deļo̧n̄e ļo̧k tampeļ eo im kōpooje kōj make n̄an bōk koņaad ilo kain̄i ko rekwojarjar ijeņ ej n̄an kōm̧akūt juj ko ad im jānij n̄an nuknuk mouj ko ad. Āinwōt Moses, eļan̄n̄e kar karōk eo ad n̄an kōm̧m̧ane, jemaron̄ kile bwe utūkļo̧k juj in laļ in ko ad ej jinoin bun̄tōn ne eo need n̄an jikin eo ekwojarjar im emaron̄ oktak ilo wāween eo eutiejļo̧k im kwojarjar ļo̧k.

Ro jeiū im jatū, jejjab aikuj in tallōn̄ n̄an lōn̄tata in juon toļ, āinwōt Moses ekar, n̄an loe n̄an kwaļo̧k kautiej n̄an men ko rekwojarjar im ukōtļo̧k ad rikaļoor n̄an juon jon̄ak eo em̧wilaļļo̧k ilo jetōb im wūjlepļo̧k. Jemaron̄ loe, n̄an waanjon̄ak, ilo ad kajjieon̄ bōbrae peļaakin m̧weo im̧ōd jān kareel ko an laļ in. Menin emaron̄ tōprak jān m̧ool im jab jakwōd ad jar im̧aan Jemādwōj Ilan̄ ilo etan Jisōs Kraist im kappukot n̄an em̧m̧anļo̧k ad jeļā ad Rilo̧mo̧o̧r jān ad tiljek katak naan ko an Anij loi ilo jeje ko rekwojarjar im ilo katak ko an rikanaan ro ad. Ilo kakkobaba, kain oktak in jetōb in emaron̄ itok ilo ad kajjieon̄ kautiej bujen ko jekar kōm̧m̧ani ippān Irooj jān mour ilo pokake n̄an kien ko An. Kijejeto kein remaron̄ bōktok ainikien eo emera im m̧ool n̄an būruwōd. Pedped ioon kain m̧akūtkūt kein remaron̄ m̧ool jipan̄ ukōt m̧ōko im̧ōd n̄an jikin kwaļo̧k kautiej an jikin kone an jetōb—im̧ōn tōmak ko ad make ijo Jetōb eo ej jokwe ie, āinwōt en̄jake eo an Moses ilo toļ eo.

Jemaron̄ barāinwōt en̄jake kain oktak in ilo jetōb ilo ad tiljek bōk koņaad ilo iien kabun̄ jar eo an Kabun̄ in ekoba ukōtļo̧k būruwōd n̄an Irooj jān m̧ool al al in jar ko ad rekwojarjar. Oktakļo̧k—āinwōt Moses—jān poktak ko an laļ, eļaptata cell phone ko ad ak jabdewōt men eo ejjab jokkun wōt juon iien in ekwojarjar, kōmaron̄ ad lukkuun oktakļo̧k n̄an bōk m̧ōttan kwojkwoj eo, kōn ļōmņak ko ad im būruwōd pedped wōt ioon Rilo̧mo̧o̧r eo im katok in pinmuur eo An ippān ļo̧k bujen ko ad make. Kain tiljek rot in an kwojkwoj eo enaaj ejaake juon kwaļo̧k kautiej ilo iien kōkāāl in ilo ad kōm̧m̧ao ippān Rilo̧mo̧o̧r eo im naaj kōm̧m̧an bwe Jabōt juon raan elan̄lōn̄ im ej ukōt mour ko ad.

Ļaptata, jemaron̄ en̄jake oktak in jetōb ilo ad rikaļoor ilo ad aolep iien kabun̄jar ilo toļ eo an m̧weo im̧ōn Irooj—tampeļ ko ad rekwojarjar—im kajjieon̄ mour kōn lōke bujen, eļaptata n̄e jej jelm̧ae mālijjon̄ ko an mour in kanniōk in.

Kōrā eo pāleeō im n̄a em̧ōj am̧ kar en̄jake jet iien ko rekwojarjar an toļ ilo kwaļo̧k kautiej ilo am kajjieon̄ kōjerbal pedped kein ilo mour eo am, ko rej kōm̧m̧ane juon oktak eo eļap tokjān ilo ad rikaļoor. Ij keememej e ekar āinwōt inne eo ij etetal ļo̧k ilo uleej eo m̧okta jān am kalbwin ajri eo nejim kein karuo, eo ekar jibikbik an ļotak im ekar jab mour, ke kōrā eo pāleeō ekar nan̄inmej im ājmourļo̧k ilo aujpitōļ. Ij keememej aō jar n̄an lukkuun jar n̄an Anij kōn bōro em̧ool im kautiej, kajjitōk kōn jipan̄ n̄an jelm̧ae mālijjon̄ rapan̄. Ilo iien in, ikar bōk juon kam̧ool ilo jetōb ealikkar im kajoor ilo būruwō: men otemjej renaaj em̧m̧an ilo mour ko am eļan̄n̄e kōrā eo pāleeō im n̄an kar kijenmeje, dāpij wōt lan̄lōn̄ eo ej itok jān mour kōn gospel eo an Jisōs Kraist. Ta eo ekar āinwōt juon apan̄ ej jepooļe kōm̧, kabūrom̧ōjm̧ōj ilo iien eo ekar oktak n̄an juon en̄jake in kautiej, ekwojarjar, juon bōran lōb eo ekar jipan̄ rejtake tōmak eo am im ekar letok n̄an kōm̧ lōke ilo bujen ko kōm̧ ar kōm̧m̧ani ippān Irooj im ilo kallim̧ur ko n̄an n̄an im baam̧le eo am.

Ro jeiū im jatū, kwaļo̧k kautiej n̄an ejaak ko rekwojarjar kam̧m̧oolol em̧ool, ej kōļapļo̧k iakwe em̧ool, ej tōlļo̧k ļōmņak ko ad n̄an revelesōn, im bōktok eļapļo̧k lan̄lōn̄ n̄an mour ko ad. Ej likūt need ioon bwidej eo ekwojarjar im kotak būruwōd n̄an Anij.

Ij kam̧ool n̄an kom̧ bwe ilo ad kajjieon̄ kōjerbale kain wānōk in ilo mour ko ad, jenaaj maron̄ kōļapļo̧k ad ettā bōro, kōļapļo̧k ad meļeļe ankilan Anij n̄an kōj, im kōkajoorļo̧k lōke eo ad ilo kallim̧ur ko an bujen ko jekar kōm̧m̧ani ippān Irooj. Ij kam̧ool bwe ilo ad kautiej menin letok in an kwaļo̧k kautiej n̄an men ko rekwojarjar—men̄e ilo toļ in m̧weo im̧ōn Irooj, ilo juon im̧ōn kweilo̧k ak ilo m̧weo im̧ōd make—jenaaj maron̄ obrak kōn menin bwilōn̄ ekabwilōn̄lōn̄ im mijak ilo ad ekkejelļo̧k n̄an iakwe eo ewāppen an Jemādwōj Ilan̄ im Jisōs Kraist. Ij kam̧ool ilo kautiej men kein ilo et eo ekwojarjar an ad Rilo̧mo̧o̧r, Jisōs Kraist, amen.