Mennin Letok ko Reļļap an Anij: Pinmuur eo an Jisōs Kraist, Jerkakpeje, Jepļaaktok eo

Iiō ko ļo̧k, kūlaaj in gospel eo am ilo jibbon̄ tata ekar kakkilōklōke eoon ko ilo Baibōļ. Aaet iaar kakkilōklōki naan ko rekadu. Menin ekar koba Jon 11:35—eoon eo ekadu tata ilo jeje ko rekwojarjar, ruo wōt naan—“Jisōs jan̄.”

N̄an n̄a kiiō, bwe ilo m̧ool Jisōs ej jan̄ ilo būrum̧ōj im lan̄lōn̄ ilo kam̧ool kōn kien eo ekabwilōn̄lōn̄: Eo Nejin Anij ekwojarjar ekar itok n̄an mour in im katak ekkar n̄an kanniōk elmen an naaj aolep iien kōjeraam̧m̧an kōj.

N̄e jej jan̄ ilo būrom̧ōj ak lan̄lōn̄, Jisōs Kraist ekanooj in meļeļe. E emaron̄ pād ilo iien ko n̄e jej lukkuun in aikuji mennin letok ko reļļap:Pinmuur eo an Jisōs Kraist, Jerkakpeje, jepļaaktok eo.

Mari im Marta rej jan̄ kōn eo jatierro Lazerōs, eo ekar mej. Ketak kōn meanwōd, Jisōs ej jan̄. E ej kōjerkak Lazerōs n̄an mour.

Jisōs ej lo Jerusalem ilo raan eo m̧okta jān Kijoone eo. E ej jan̄, eban maron̄ aiin armej ro An āinwōt juon lo̧lo̧ enaaj kar aiin jojo ko nejin. Rainin Pinmuur eo An ej letok n̄an kōj kōjatdiikdik n̄e jej būrom̧ōj kōn ta eo emaron̄ kar.

Irooj in jikin kallib eo ej jan̄ n̄e E ej kajjitōk ippān Rikarejeran, “Ta em̧m̧anļo̧k imaron̄ kar kōm̧m̧an n̄an Jikin Kallib in Aō?”

Meri ej jutak būrom̧ōj turin lōb eo. Jisōs ej kajjitōk, “Etke kwōj jan̄?” E ejeļā “jan̄ enaaj pād wōt ilo bon̄, a lan̄lōn̄ enaaj itok n̄e e jibbon̄.” Jerkakpeje ej bōktok joraantak n̄an aolep.

Ilo āne ko ilo Bok in Mormon, ke jarlepju in ritiljek ro rej waļokļo̧k n̄an E, lan̄lōn̄ eo an Jisōs ej obrak. E ej jan̄.

“Im Eaar bōk ro re dik nejier, juon ilo̧k juon, im kōjeram̧m̧an er, im jar n̄an Jemān kōn er.

“Im ke Eaar kōm̧m̧ane men in Eaar bar jan̄.”

En̄in ej Ijtō ilo Jisōs Kraist: E ej uwaake jan̄in uwade ko an būruwōd im kajjitōk ko an jetōb ko ad. E ej kōmrāikļo̧k kōmejaaļaļ ko ad, ijello̧kin kōmejaaļaļ in lan̄ļōn̄ ko ad.

N̄e kōmejaaļaļ ko ad rej to̧o̧r, jet iien jej joļo̧k bōd, jook. Bōtaab jeļā bwe Jisōs Kraist emeļeļe metak ko an mour im lan̄lōn̄ ko maron̄ letok n̄an kōj kajoor eo eļapļo̧k jān eo ad make ilo ad ioon men ko renana im rōm̧m̧an.

Ilo South America, juon baba ej jan̄. Leddik eo nejin, eo eaar menin kam̧ōņōņō ilo mour eo an, ekar mej. “Imaron̄ leļo̧k jabdewōt men n̄an bar loe,” ej jan̄ ilo peiū. Ij bar jan̄.

Ilo aje eo an Pueble Mexico Tampeļ, kōmejaaļaļ m̧ōņōņō ko rej katutuik turin mejān juon sister. Paotokin ekar kwaļo̧k tōmak im wūjlepļo̧k. Liin ej ba, “Todos mis hijos estan aqui en el templo hoy”—“Aolep ajri ro nejū repād ijin ilo tampeļ rainin.” Epepen ko raar koba ilo im̧weo im̧ōn Irooj ej bōktok kōmejaaaļ in lan̄lōn̄ im kam̧m̧oolol.

Ilo tariņae eo enana, baam̧le ko im ro riturin raar kōm̧m̧ani men ko renana n̄an doon. Kōmejaaļal in illu rej jakoļo̧k n̄an leļo̧k kōjatdikdik. Ainikien liin ekar udiddi, juon kōrā ilo juon bukwōn edik ej ba, “Eo ituru, m̧okta jān aō ilo̧k n̄an aō lōb, ikōņaan bwe kwon jeļā ia eo n̄an pukot ro uwaan baam̧le eo am̧ raar jako.”

Lio pālele im ļeo pālele ewūlio rej liāp ilo m̧weo im̧ōn Irooj. Liin ej 70 iiō dettan, ejja āinwōt ļeo. Juon lio pālele aiboojoj, liin ekar erreo ilo an kōttar rainin. Liin ekar abje in an kōjjeļā nuknuk eo an ilo wāween in, innām wāween eņ. Ekar lukkuun jan̄. Kallim̧ur ko an Anij rej kūrm̧ool. Bujen ko An rej bōktok kōjeraam̧m̧an.

Ilo an kar katakin ilo m̧weo juon sister eo emej pāleen, Boyd K. Packer eo edik ekar kwaļo̧k juon katak em̧m̧an. Ālkin juon iien in jab errā ippān ļeo pāleen, sister eo ekar ba juon naan eo ekōmettak. Juon jorrāān eidik ekar bōk mour eo an ļeo pāleen raan jab eo. “Ium̧win lemn̄oul iiō ko,”liin emej pāleen ekar jan̄, “Ekar nana aō mour jeļā bwe naan ko āliktata ekar ron̄ jān tiiō raar naan ko relej, kōmmetak.”

Ijtō ilo Jisōs Kraist ej jipan̄ kōj, kile, kajim̧we jemjerā ko ad, ilo rejet ko ruo an rōn̄ōl in nuknuk eo. Jisōs emaron̄ kemour būrom̧ōj; E emaron̄ kōmaron̄ jeorļo̧k bōd. E emaron̄ kanemkwoj kōj im ro jet jān men ko kōj ak er kar ba ak kōm̧m̧ane n̄e jaab lukwōj kōj rikōm̧akoko.

Ijtō in Jisōs Kraist ej kōtļo̧k ad en̄jake kōmālim eo an Anij. Laļ in ej kōm̧m̧an ad en̄jake bwe ekanooj eļap ad aitok, kadu, depakpak, aidik—ak jejjab māletlet, aiboojoj, ak likjab ilo men ko an jetōb. Kōn oktak in jetōb eo ilo Jisōs Kraist jemaron̄ jo̧o̧r jān ļōmņak ko rejjab em̧m̧an.

Kōn lan̄lōn̄ eo ilo Ijtō, jej al “Mej kar anjo̧ ioon; armej ej anemkwoj. Kraist ekar anjo̧.” Jerkakpeje eo an Kraist ej kanemkwoj kōj jān mej, jān iien eo an m̧ōjņo̧ ko im likjab ko an ānbwin. Pinmuur eo an Jisōs Kraist ej barāinwōt kōjepļaak kōj n̄an men ko bwinnin jetōb E ekar to̧o̧rļo̧k bōtōktōk jān aolepān ānbwinin, to̧o̧rļo̧k in ekar āinwōt E ej jan̄ kōn bōtōktōk, n̄an letok bwe jen jeer jān jerawiwi im jepeļo̧k. E ej bar kakobaik kōj, dipio im kwojarjar, ippān doon im Anij. Ilo men otemjej rem̧m̧an, Jisōs Kraist ej kōjepļaak ilo jabōn—ejjab wōt ta eo ekar waļo̧k ak barāinwōt ta eo jemaron̄ erom.

Mour eo an Jisōs im meram eo rej kam̧ool kōn iakwe eo an Anij n̄an aolep ajri ro Nejin. Kōnke Anij Jemād ej iakwe aolep ajri ro Nejin ilo aolep tōre im āne, jej lo kūr eo An em̧m̧an n̄an itok pukot aenōm̧m̧an im lan̄lōn̄ eo ilo E ilo elōn̄ iminene ko im m̧anit ko. Jabdewōt jikin, jabdewōt iien, jekdo̧o̧n wōn kōj, jej kwaļo̧k paotok kwojarjar eo āinwōt ajri ro nejin ejja Rikōm̧anm̧an eo wōt. Kadkad eo kōtaan kumi kein Islam, Judaism, im Christianity ejja āinwōt wāween eo jej kwaļo̧k kadkad eo ad n̄an Rikōm̧anm̧an eo ilo ejja bujen eo an Jemād Ebream kōn iien ko ilo Egypt etto.

Jemād Ebream ekar itok n̄an Egypt im kar jeraam̧m̧an.

Josep, eo kar wia kake n̄an bwe en rikōm̧akoko ilo Egypt, kar jeļā meļeļe in kar ettōņak eo an Pero kōn iiō ko jimjuon in obrak kōn m̧ōn̄ā ālkin jimjuon iiō in n̄ūta. Josep ekar lo̧mo̧o̧ren baam̧le eo an im armej ro doon. Josep ekar jan̄ ke ekar lo karōk eo eļapļo̧k an Anij, ijo men otemjej rej jerbal ippān doon n̄an em̧m̧an eo an ro me rej kōjparok bujen ko aer.

Moses, ekar rūttoļo̧k ilo Egypt ilo m̧weo im̧ōn Pero, kar bōk im tokālik kōjepļaaktok ki ko n̄an aiintok ro nejin Anij.

Kakūrm̧ool kanaan eo, Josep, Meri, im ajri nin̄nin̄ Kraist kar kappok jikin jokwe ilo Egypt. Ilo Cairo, juon ritōmak in Muslim ilo kautiej ej ba: “Quran eo ej katakin bwe Josep, Mari, im nin̄nin̄ Jisōs lo kōjparok im m̧ōn kone ilo laļ eo aō. Ilo laļ eņ aō, Jisōs ke ekar āinwōt nin̄nin̄ kar m̧ōn̄ā m̧ōn̄ā ko kijem, etetal m̧oktata, ba naan ko An m̧oktata. Ijin ilo laļ eo aō, kōmij tōmak wōjke ko raar m̧al laļļo̧k n̄an leļo̧k n̄an E im baam̧le eo An leen wōjke. An pād ilo laļ eo aō ekar kōjeraam̧m̧an armej ro ad im ānen eņ.”

Karōk eo an Anij kōn mour in im anemkwoj eo ilo mour in ej kōtļo̧k ad katak jān iminene eo ad make. Jet iaan katak ko ilo mour reļļap tata rej itok jān men ko jeban kar kāāleti. Kōn iakwe, Jisōs Kraist ekar wanlaļtak ium̧win im wallōn̄ļo̧k ilōn̄ in men otemjej. E ej lan̄lōn̄ ilo ekkeke kwojarjar ko ad n̄an lo̧ļe im lo̧udin̄din̄, jouj ilo ejjeļo̧k kōtmene kōn kein nebar, tōmak n̄an ukwelo̧k im jeorļo̧k bōd. Im E ej jan̄ ilo būrom̧ōj kōn en̄taan in kanem armej eo eļap ad, lāj, jab jetjet—eo emakijkij an bōktok kōn kāālet an armej—ejja wōt an lan̄ ko im Anij an lan̄ pād ippāer.

Kajjojo tōre in Ijtō ej kam̧ool kōn laajrak eo an iien kein ilo jetōb im bwe rej waļo̧k ilo jon̄ak eo eļap jim̧or m̧ōttan eo ekwojarjar an jon̄ak eo an pinmuur, jerkakpeje, im jepļaaktok eo kōn Jisōs Kraist. Menin ekwojarjar im kakōļļe in ej waļo̧k ilo kweilo̧k eo eļap rej itok kōn jidilo̧k ak jide. Palm Sunday, Wiik Kwojarjar, im Ijtō keememe Pinmuur eo an Kraist im Jerkakpeje eo. Āinwōt rainin, aolep Eprōļ 6 jej keememe jutak eo im ejaake eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Jepļaaktok in ej juon unin ad koba ilo Jabō eo kein kajuon kajjojo Eprōl ilo kweilo̧k eo eļap.

Jepļaaktok eo ekar bar itok ke jerkakpeje Jisōs Kraist, Moses, Elias, im Elijah ke raar bar kōro̧o̧ltok ki ko an priesthood eo im mālim eo ilo kar aje eo an Kirtland Tampeļ eo ekāāl ilo Jabōt in Ijtō eo ilo Eprōļ 3, 1836. Ijo jekjek jab eo ilo raan eo n̄an kōjepļaaktok Kabun̄ eo an Jisōs Kraist ekar itok mālim eo an Anij im kōjeraam̧m̧an ko n̄an aiin ajri ro Nejin, kōpooj ajri ro Nejin n̄an bar ro̧o̧lļo̧k n̄an Ippān, im kobaik baam̧le ko n̄an indeeo. Jepļaaktok eo ilo raan eo ekar kakūrm̧ool kanaan eo jān waļo̧k jim̧or ilo Ijtō im Kijoone eo.

Ekoba Kirtland Tampeļ, kiiō epaak ikar loļo̧k jejjo jikin ko rekwojarjar ilo Ohio ijo Rikanaan Josep im ro jet raar lo ilo visōn Anij Jemād im Nejin, Jisōs Kraist. Rikanaan Josep ekar lo ewi jekjek in lan̄. Ilo lan̄, Jemādwōj Ilan̄, kōn Jisōs Kraist, “kōjparok aolep ko an pein” ilo juon aelōn̄ in kiin̄. Men ko wōt n̄an būki rej ro me ren m̧ōņōņō in “kaarmejjete Nejin ālikin an Jemān kar kwaļo̧k e.”

Ke jerbal in karejar eo An ilo mour ekar jinoe, Jisōs ekar kean̄ kōn mijen eo An n̄an kōjeraam̧m̧an kōj kajjojo kōn aolep ta eo jej m̧ōņōņō n̄an bōk—ilo aolep iien, aolep āne, aolep jekjek. Ālkin jitlo̧k 40 raan, Jisōs ekar etal n̄an m̧ōn kabun̄ eo im ba, “Jetōb eo an Irooj ej pād ippa, kōnke emōj an kapiti eō n̄an kwaļo̧k gospel eo an n̄an ro ri jeramōl; ar jilkinļo̧k n̄a bwe in ten kōm̧our ro erub būruweer kanekwoj ro rikamakoko, im kōm̧our mejen ro re bilo, im kanemkwoj ro rej kakkure.”

Jeram̧ōl, rup bōro, jipakwe, pilo, mao—en̄in ej kōj.

Bok in Aiseia ej wōnm̧aanļo̧k wōt kōn kallim̧ur in kōjatdikdik eo an Messia eo, letok kam̧ool: “Likūt n̄an ro rej liaajloļ ilo Zaion, … leļo̧k n̄an er pallin bōraer kōn bwidej in upaaj; oil in lan̄lōn̄ kōn būrom̧ōj, nuknuk in nōbar, kōn jetōb in parōk.”

Kōn menin, jej lam̧ōj, “Inaaj kanooj lan̄lōn̄ ilo Irooj, aō enaaj lan̄lōn̄ ilo aō Anij,” Aiseia ekar ba, “bwe E ar kanuknuk eō kōn nuknuk ko in lo̧mo̧o̧r, Ear kallbubu eō kōn kopā in wānōk””

Kajjojo tōre in Ijtō jej keememe, āinwōt juon kakōļļe edipio, menin letok ko reļļap an indeeo kōn Jisōs Kraist:Pinmuur eo An, lukkuun Pinmuur eo An (im eo lukkuun ad), Jepļaaktok eo an Kabun̄ eo An ilo raan ko āliktata ippān priesthood ki ko im mālim eo n̄an kōjeraam̧m̧an aolep ajri ro nejin Anij. Jej lan̄lōn̄ in kōņak nuknuk ko an lo̧mo̧o̧r im kopā in wānōk eo. Jej ekkelo̧k, “Hosanna n̄an Anij im Ļaam̧ eo!”

“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”

Jen kajjojo lo ilo pinmuur eo, jerkakpeje eo an Jisōs Kraist, im jepļaaktok eo—aenōm̧m̧an, erom, im uwaan—men eo me ej lukkuun indeeo im elan̄lōn̄, em̧ōņōņō im aindeeo, ij jar ilo Etan ekwojarjar, Jisōs Kraist, amen.