Mālim Ekwojarjar, Likao ro Rekam̧ōņōņō
Ej aō kam̧m̧oolol n̄an indeeo bwe ro rej kabwijer Priesthood eo an Aron, kōn kajoor, kain̄i, im eddo ko an, ej kōjeram̧m̧an kōj aolep.
Kom̧m̧ool, Elder Andersen, kōn en̄jake eo ekabulōn̄lōn̄ kōn kajoor in Pinmuur eo an Rilo̧mo̧o̧r eo.
Juon jibbon̄ in Jabōt ilo Jānwode eo kiiō, ke ikar jijjōt ilo iien kweilo̧k in kwojkwoj eo aō, elōn̄ļo̧k jen 12 likao ro rekar kūr er n̄an Priesthood eo an Aron. Iaar en̄jake an laļin in oktak ilaļin neō.
Jidimkij in aō kile bwe peļaakin laļ in, eria n̄an eria, ilo kweilo̧k in kwojkwoj ko lukkuun āinwōt in juon, jon̄oul taujin tikōn ro, rūkaki ro, im pris ro—āinwōt eo m̧ōttan Būreejtōn Holland ke ej jibbon̄, Easton—raar rejetak er n̄an ekkapit n̄an jerbal in karejar ko an priesthood eo enaaj kar waļo̧k aolep jikin aolepen kabun̄ in aiintok Israel.
Kajjojo Jānwōde, rej kapit n̄an opij ko an priesthood 100,000 likao ro, kōkkeitaak er kōn kain̄i n̄an juon laajrakin in mālim emeram likļo̧k kōn Jepļaaktok eo n̄an Josep im Oliver, n̄an Jon ri Peptaij im n̄an Jisōs Kraist.
Kiiō, ad ejjab aolep iien lukkun kwaļok ad ļōm̧nak. En̄in, jej em̧m̧anļo̧k.
Ak jekdoon, aō loe rikabwijer priesthood ro rellōn̄ aer āinwōt juon jouruur ej ajeeded aolepen laļ in, ij ļōm̧nak—ilo juon “kabun̄ in lan̄lōn̄” juon kain wāween—eļļan̄e ejjab kean̄ jān ijoko lōn̄. Jibon̄nin jabōt in jānwōde eo 2025, ikar ļōmņak enaaj kar wōr iien ko raorōk im urur in Roman candle ko. Ej aikuj wōr parade ko!”
Jeļā kajoor eo an Anij kōn lukkun, jekar rikamool ro n̄an jon̄ak eo an laļin ilo an kar bōjrak mālim an anij ke ekar ajeeded ipeļaakin laļin.
Ekkapit kein rej bun̄it likao rein n̄an aolepen tōrein mour in jerbal ko aer ilo aer loe er make ilo iien ko raorōk im jikin ko ijo aer pād im jar im kajoor eo an priesthood eo an Anij rej kabwijere ewōr tokjen.
Chain in ej ijjino ippān juon anjel in jerbal in karejar jilkintok jān Anij. Jon Ripeptaij in etto eo ekar jerkakpeje ekar waļo̧k n̄an Josep im Oliver, kar likūt pein ioon bōraer, im ba, “Ioomiro ro rikarejera, ilo etan Messaia Ij likūt Priesthood eo an Aron, eo ej kabwijer ki ko an kōjeraam̧m̧an ko an enjeļ raņ, im an gospel in ukeļo̧k eo, im an peptaij jān tulo̧k n̄an jeorļo̧k in jero̧wiwi ko” (Katak im Bujen Ko 13:1
Jon ekar naetan mālim in “Priesthood an Aron,” ālkin ļeo jein Moses im kampānion an priesthood. Etto, rikabwijer priesthood in an Aron rekar n̄an katakin im jipan̄ kōn kain̄i ko—kain̄i ko jej pedped ioon mour in rikaloor n̄an Messiah eo ilju im jeklaj, Irooj Jisōs Kraist (lale Deuteronomy 33:10).
Bok in Bōnbōn ejejjet an leļo̧k eddo ko n̄an rikabwijer priesthood ro an Aron eddo ko an kein jerbal ko an kain̄i ko. “Im kwōn bwini Aron im ro nejin … Kuṇaer lale tōptōp eo … im tebōḷ … im jāpe ko in ṃōn kwōjarjar rej jerbal kake, im katiin, im aolepen jerbal ko an” (Bōnbōn 3:10, 31).
Kain̄i in Kallim̧ur Mokta kōn katok kōn menin mour eaar kūrm̧ool im kar bōk jikin kōn mour eo an Rilo̧mo̧o̧r im Pinm̧uur. Kain̄i eo etto eaar bōk jikin kain̄i eo jej kiiō naetan m̧ōn̄ā Kejota an Irooj.
Irooj ej kaen̄ rainin rikabwijer priesthood ro an Aron n̄an kōm̧m̧ane ejja men ko wōt raar kōm̧m̧ani etto: n̄an katakin im kōm̧m̧ani kain̄i ko—aolep n̄an kakeemejmej kōj kōn Pinm̧uur eo An.
N̄e tikōn ro, rūkaki ro, im pris ro, rej jipan̄ ilo kwojkwoj eo, rej bōk kōjeraam̧m̧an ko an menin āinwōt bar aolep: jān kōjeparok bujen in rej kōm̧m̧ane ilo aer kajjojo bōk mōttan pilawe im den eo. Ak jān kōm̧m̧ani eddo kein rekwojarjar, rej barāinwōt ekkatak eļapļo̧k jerbal im eddo ko aer ilo priesthood.
Priesthood eo an Aron ej nae etan priesthood in keppopo jidikin kōnke kain̄i ko aer ej kōtļo̧k bwe ren en̄jake eddo im m̧ōņōņō eo n̄an pād ilo jerbal eo an Irooj, kepooje er n̄an pojak n̄an jerbal eo ilju im jekļaj an priesthood, n̄e ren maron̄ in kūr iooer n̄an kōm̧m̧ani m̧wil ko ejeļo̧k kōtmāne—ekoba kōnono kōn kōjeraam̧m̧an ko reim̧we ilo iien ko n̄e kōjātdikdik, im ettōņak ko, im em̧ool mour im mej, rej jokkun wōt juon.
Kōtmāne rōt kein rem̧ool rej aikuj maanjabpopo.
Katak im Bujen Ko rej kōmeļeļeik bwe tikōn ro im rūkaki ro rej “aikuj kakkōl, tipdiki, kōketak, im katakin, im karuwainenetok aolep n̄an itok n̄an Kraist” (Katak im Bujen Ko 20:59 N̄an kakobaba n̄an jeraam̧m̧an kein, priests ro rej aikuj “kwaļo̧k … im peptaij” (Katak im Bujen Ko 20:50
Kiiō, aolepāer im maron̄ lukkuun lōn̄, ak ilo laļ eo emool, men kein ej waļo̧k āinwōt aer waļo̧k im aolepen laļ in.
Juon bisop ekar katakin būreejtōnji eo doulul in tikōn ro rekāāl eddo kein. Kiiō būreejtōnji edik raar jino kōnono kōn elmen aer maron̄ kōm̧m̧ane menin ilo doulul eo aer im ward eo aer. Raar ļōmņak rej aikuj jino loļo̧k membōr ro re rūtto an ward n̄an lale ta eo rej aikuji innām etal im kōm̧m̧ane.
Ilubwiljin ro raar jipan̄ er ej Alan, juon eo ejakōl, kōtrae, im jet iien ej jememe. Liin pāleen Alan, Wanda, ej kab membōr in Kabun̄ in, ak Alan ekar, āinwōt ad ba, juon men in kōm̧m̧an kōl.
Mekarta, tikōn ro rej etal wōt in jerbal, kajekdoon kakūtōtō ko, ilo aer japōl sno im joļo̧ki kobej ko. Tikōn ro remaron̄ in pen aer en̄jake, im aaet Alan ekar jino iakwe er. Ekar etal im rekar karuwainenetok e n̄an jar.
“Idike etaļ n̄an jar“ ekar uwaak.
“Ekwe, ak em̧m̧an ippem kōm,” rekar ba. “Kiiō itok ippām. Komaron̄ wōt itok n̄an kweilo̧k eo an doulul eo am̧ n̄e kwoj kōņaan.”
Im kōn mālim eo an bisop eo, ekar itok—im kar itok wōt.
Tikōn ro raar erom rūkaki, im ke raar wōnmaanļo̧k in jerbal n̄an e, ekar katakin er kōm̧m̧an wa im ekkal em̧. Jān iien eo rikōn ro rekar erōm rūkaki ro raar erom̧ pris, Alan eaar kūr er “ļaddik ro nejū
Raar kiio pojak n̄an mijen im kar kajjitōk eļan̄n̄e remaron̄ ekatak katak ko an mijenede ippān. Ekar kaje ke epan ron̄jake im tōmak, bōtaab, aaet, remaron̄ ekkatak ilo m̧weo im̧ōn.
Innām Alan ekar nan̄inmej. Im ekar meraļo̧k.
Im juon raan, ilo kweilo̧k an doulul eo, ekar kajjitōk ippāer n̄an jar kōn e bwe en joļo̧k kabaatat, innām raar jar. Ak ālkin aer kar ļoorļo̧k e n̄an kapijuknen im bōk aolepen kein kabaatat ko an.
Āinwōt an nana ļo̧k an ājmour kar kōm̧m̧an an Alan pād ilo Aujpitōļ im jikin exercise ko, “ļaddik ro nejin” raar jipan̄ e, kōm̧m̧ane kajoor ko an priesthood im kōn iakwe emool. (lale Katak im Bujen Ko 121:41
Kabwilōn̄lōn̄ eo eaar wōnmaanļo̧k ke Alan ekar kajjitōk n̄an peptaij—ak tokāļik mej mokta jen an kōm̧m̧an. Ilo kajjitōk eo an, tikōn ro an-raar tokālik pris raar ribbōk bok in mej ro im rikōnono ilo iien mej an ijo—ejim̧we im jejjet ilo iien eo—kar kakkōl, tipdiki, kōketak, im katakin, im karuwainenetok aolep n̄an itok n̄an Kraist.
Im ālkin iien eo, ilo tampeļ eo, ekar juon iaan ļaddik ro nejin Alan eo me ekar peptaiji būreejtōn eo mokta an doulul eo an tikōn ro eaar bōk jikin Alan.
Aolep men ko Jon ri Peptaij ekar ba kōm̧m̧ane, rekar kōm̧m̧ane. Rekar kōm̧m̧an ta ko tikōn, rikaki, im priest ro rej kōm̧m̧an aolepen Kabun̄ in im ipeļaakin laļin.
Juon iaan men ko rikabwijer priesthood eo an Aron rej eddo ki ej koba kain̄i ko an kwojkwoj eo.
Iiō eo ļo̧k ikar bwebwenato ippen juon bisop eļap ikideelel ippān im kōrā eo pāleen em̧m̧an. Ejjab to ilo juon iien Jādede jibbon̄, rekar ettōr n̄an peptaij eo an ļaddik eo nejier im ekar jidimkij n̄an er kōn jab kōtmene im jako eo an leddik eo nejier ejitōn bōro, Tess.
Jibon̄ōn eo juon, membōr in ward eo aer raar kobatok n̄an kweilo̧k in kwojkwoj eo kōn tūriamo, barāinwōt būromōj kōn jako eo an leddik jidikdik in em̧m̧an. Ejjeļo̧k rekar kōtmene ke baamle eo an bisop eo ren kar pād ilo jar jibbon̄ eo, ak jejjo minit mokta jen an kar jino kweilo̧k eo, baam̧le eo an bisop eo ej deļon̄ ilo ejjeļo̧k keroro im etal n̄an ijo jikier.
Bisop eo eaar etal n̄an jikin kōnono eo im etal wōt jen jikin eo ekkā an jijjet ie ikōtaan rikabilōklōk ro an im jijjet ikōtaan pris ro an ilo tebōļ in kwojkwoj eo.
Bon̄in eo ekar en̄taan im jaje kiki m̧okta jen kappukōt meļeļe im aeņōm̧m̧an, ekar bōk juon en̄jake ekajoor bwe ta eo baam̧le eo an elukkun kar aikuji—im ta eo ward eo an ekar aikuji. Ej n̄an ron̄jake ainikien bisop eo aer, būreejtōn eo an aaronic Priesthood eo aer, eo jemān e būrom̧ōj, kwaļo̧k kallim̧ur ko an bujen kwojkwoj eo.
Ālkin iien in ba kake, ekar bukwelōlō ippen pris ro im kōnono n̄an Jemān. Kōn kōm̧m̧ane juon men eo ekabūrom̧ōjm̧ōj, ekar kwaļo̧k juon iaan naan ko rekajoor tata jabdewōt e mālim an ba ilo mour in.
Naan ko an kaje indeeo.
Naan ko an kain̄i.
Naan ko an bujen.
Kōmeļeļe ko rej kobaik kōj n̄an lukkuun wūn eo an mour in—im n̄an kabwilōn̄lōn̄ ko rej itok ilo karōk an Jemedwōj Ilan̄ n̄an kōj.
Komaron̄ ke ļōmņake ta eo jarlepju in jar ekar ron̄ ilo chapel en raan eo—ta eo rekar en̄jake ilo naan ko jekar ron̄jake aolep Jabōt ilo im̧ōn jar ko am̧?
O Anij, Jemām Indeeo, kōmij kajjitōk Ippam̧ ilo etan Nejūm̧, Jisōs Kraist, n̄an kōjeraam̧m̧an im kokwōjarjar pilawā in n̄an jetōb ko an ro otemjej rej bōk m̧ōttan; bwe ren maron̄ m̧ōn̄ā ilo aer ememej ānbwinnin Nejūm̧, im kam̧ool n̄an Kwe, O Anij, Jemām Indeeo, bwe rem̧ōņōņō in bōk ioer etan Nejūm̧, im keememej E iien otemjej, im kōjparok kien ko An ko Eaar liļo̧k n̄an er, bwe Jetōb eo An en maron̄ pād ippāer iien otemjej. Amen” (Katak im Bujen Ko 20:77
O Anij, Jemām Indeeo, kōmij kajjitōk Ippam̧, ilo etan Nejūm̧, Jisōs Kraist, n̄an kōjeraam̧m̧an im kokwōjarjar [dān] in n̄an jetōb ko an ro otemjej rej idaak jān e, bwe ren maron̄ kōm̧m̧ane ilo ememej bōtōktōkin Nejūm̧, eo eaar to̧o̧rļo̧k kōn er; bwe ren maron̄ kam̧ool n̄an kwe, O Anij, Jemām Indeeo, bwe ren keememej E iien otemjej, bwe Jetōb eo An en maron̄ pād ippāer. Amen” (Katak im Bujen Ko 20:79.
Jemān im jinen in rem̧m̧an kam̧ool bwe kallim̧ur eo ekar kūrm̧ool. Raar kōm̧m̧ane, ilo m̧ool, n̄an aenōm̧m̧an eo aer ej n̄an indeeo, “bwe Jetōb eo An en maron̄ pād ippāer iien otemjej”
Ij kamoolol n̄ān indeeo bwe rikabwijer ro an Priesthood eo an Aron, kōn kajoor, kain̄i, im eddo ko, renaaj kōjeraam̧m̧an aoleped wōj kōn kii ko an lukkuun “enjeļ raņ, im an gospel in ukweļo̧k eo, im an peptaij jān tulo̧k n̄an jeorļo̧k in jerawiwi ko” (Katak im Bujen Ko 13:1 Ilo etan Jisōs Kraist, amen.