Kōmour ilo Jetōb Ippān

Jon̄oul rilōba raar lam̧ōjļo̧k n̄an Rilo̧mo̧o̧r, “Kwōn tūriaṃokake kōm.” Im Jisōs ekar kōm̧m̧ane. E kar jiron̄ er n̄an kwaļo̧k er make n̄an pris ro im, ke rej etal, raar erreo jān nan̄inmej eo.

Im juon iaer, ke ej lo bwe ājmour, kōn eļap ainikien ej wūjtake Anij. Ekar jepļaak n̄an ippān Rilo̧mo̧o̧r, bun̄pedo i neen, im kwaļo̧k an kam̧m̧oolol.

Im Rilo̧mo̧o̧r e ba n̄an eo ar kam̧m̧oolol, “Am̧ tōmak ear lo̧mo̧o̧rōm̧.”

Jisōs Kraist ar kemour jon̄oul ri lōba ro. Bōtaap juon iaer, ar jepļaak ļo̧k n̄an ippān Rilo̧mo̧o̧r, ekar bōk elōn̄ļo̧k. Kar lo̧mo̧o̧ren e.

Ruatimjuon ri lōba raar ājmour ilo kanniōk.

Juon ar ājmour ilo kanniōk im im kar lo̧mo̧o̧ren ilo jetōb.

Ilo kejakļo̧kjen kōn bwebwenato in, iar ļōmņak n̄e kōnono in ej em̧ool. Eļan̄n̄e ājmour im kōmour rejjab juon wōt, juon emaron̄ ke mour ilo jetōb jān E ak jan̄in ājmour ilo kanniōk im en̄jake?

Maajta Rikōmour eo enaaj kōmour aolep ad en̄taan—kanniōk im en̄jake—ilo iien eo An. Ak ilo kōttar wōtn̄anmaron̄ ājmour, juon armej emaron̄ ke lo̧mo̧o̧rene?

Ta meļeļein aō ba lo̧mo̧o̧ran ilo jetōb?

Jej bōk ļomo̧o̧r ilo Jisōs n̄e jej kōjerbal anemkwoj in kāālet eo ad n̄an ļoor E ilo tōmak, ajeļo̧k būruōd n̄an E bwe E en maron̄ ukōti, kōjparok kien ko An, deļo̧n̄ ilo juon bujen jemjerā Ippān, ettā ilo kijejeto im ekkatak jān apan̄ ko an men ko an laļ in m̧ae jej jepļaak n̄an Ippan im bōk ājmour ilo aolep wāween. Imaron̄ in bōk kōmour ilo aō kōttar ājmour eļan̄n̄e ij m̧ool ilo jemjerā eo aō Ippan.

Tōmak ilo Jisōs Kraist ej kwaļo̧k kōjatdikdik. N̄aij lo kōjatdikdik ilo kajjieon̄ in bōk kōmour—juon bōk kōmour in ļotak jān tōmak ilo Jisōs Kraist. Tōmak ilo E ej kōļapļo̧k aō kōjatdikdik n̄an ājmour, im kōjatdikdik ej kōkajoor tōmak eo aō ilo Jisōs Kraist. Ej juon doulul ekajoor.

Irooj ear jiron̄ Inōs an tōmak ear “kōmour e.” Likiio in kōmour eo ear itok ke Inōs ej lin̄ūri naan ko an rikanaan eo jemen Jekab, ke ear aikuj meļeļe iien em̧m̧an eo n̄an mour indeeo, ke ear kūr n̄an Anij ilo jar ekajoor. Im ilo jekjek in ikdeleel im ettā in, ainikien Irooj ear itok n̄an e, im kar kwaļo̧k ke em̧ōj jeorļo̧k jerawiwi ko an. Im Inōs ear kajjitōk ippan Irooj, “ekōjkan an men in kōm̧m̧an?” Im Irooj ear uwaak “Kōnke tōmak eo am̧ ilo Kraist, …tōmak eaar kōmour eok.”

Jān tōmak ko ad ilo Jisōs Kraist, jemaron̄ kappukōt kōmour ilo jetōb ilo ad kōttar im kōjatdikdik kōn kōmour ilo kanniōk im en̄jake.

Kōn jim̧we in en̄taan in pinmuur eo An, jemaron̄ ukweļo̧k ilo m̧ool, Rilo̧mo̧o̧r ej kōmour kōj jān jerawiwi, im E kar kōm̧m̧ane n̄an Inōs. Pinmuur eo an ejjeļo̧k jem̧ļo̧kin ej bar tōpar būrom̧ōj im liaajļōļ ko ad.

Bōtaap E jab maron̄ letok kōmour jān nan̄inmej—to an metak, jumae pok āinwōt elōn̄ļo̧k nan̄inmej in ānbwin, cancer, inepata, nana mour, im ko jet āinļo̧k wōt. Kain kōmour rōt kein rej itok ilo iien eo an Irooj. Im ilo ad kōttar, jemaron̄ kāālet n̄an maron̄ mour ilo ad kōjerbal tōmak ilo E!

N̄an maron̄ bōk kōmour ej meļeļein n̄an dedeļo̧k im obrak. Āinwōt virgin ro ļalem remāletlet me ļaam̧ ko aer raar booļ kōn oil ke ļeo pālele ar itok, jemaron̄ in mour ilo Jisōs Kraist ilo ad tein̄i ļaam̧ ko ad kōn oil eo ej naajdik oktak eo ad n̄an E. Ilo wāween in, jepojak n̄an kakkōļļein kwojkwoj in pālele eo, Itok eo Kein Karuo An.

Ilo būrabōļ eo aolep virgin ro jon̄oul raar pād jikin eo ejim̧we, kōttar ļeo pālele. Kajjojo iaer raar itok kōn ļaam̧.

Ak ke E ej itok, ilo awa eo kar jab kōtmāne, ro ļalem rebwebwe ar jab bwe oil n̄an ļaam̧ ko aer. Kar jab kōmeļeļeik ke renana ijelo̧kin wōt ke rebwebwe. Ro rebwebwe raar likjab in kōppopo in dāpij an urur ļaam̧ ko aer kōn oil in oktak.

Kōn menin, ilo uwaak n̄an kajjitōk eo aer n̄an kōmālim n̄an deļo̧n̄e kwojkwoj in pālele eo, ļeo pālele ear ba, “Kom̧ jaje n̄a.”

Innām, meļeļe, bwe virgin ro ļalem remāletlet raar jeļā E. Raar kōmour ilo E.

Ļaam̧ ko aer raar book kōn oil in oktak, eo eaorōk me ear kōtļo̧k bwe virgin ro ļalem remāletlet ren deļo̧n̄ kejota in m̧are eo ilo tuanbwij maron̄ in ļeo pālele.

Āinwōt an kar Rilo̧mo̧o̧r ba, “Kom̧in niknik, jar iien otemjej, lale bwe Lamb ko ami ren pojak im urur, im oil eo ippemi, bwe kom̧in maron̄ pojak ilo iien itok eo an Ļeo Pālele.”

Virgin ro Lalem Remāletlet, jān Ben Hammond

Juon annan̄ ekabwilōn̄lōn̄ ej kwaļo̧k kōn Virgin ro Ļalem Remāletletem̧ōj doore ilo Temple Square nabōjin wōt kōjām ko an Relief Society Building im turin wōt Salt Lake Temple.

Ej juon jikin ejejjet n̄an būrabōļ eo. Kōnke n̄e jej kōm̧m̧ani im kōjparok bujen ko, eļaptata ko repād ilo m̧weo im̧ōn Irooj, jej kobrak ļaam̧ ko ad kōn oil in oktak eo.

Ilo an kōrā ro me rej āinwōt virgin ro ļalem remāletlet jab jeere oil in oktak eo aer, rej jeere meram eo aer ilo aer kotake ļaam̧ ko aer, ko im re obrak kōn oil im emeram an urur. Eļapļo̧k an aorōk aer kwaļok aer rie doon—aerane doon, im jibur doon, mije doon im jaaļe doon n̄an itok n̄an meram eo.

Em̧ool, “[jej] meram in laļ.” Rilo̧mo̧o̧r eo eaar kean̄:

“Ij lewaj n̄an kom̧ bwe kom̧in meram in armej rein. Jikin kwelo̧k eo likūt e ioon juon toļ ejamin ņojak.

“… [Jej] tile ke kāāntōļ eo im likūt e ium̧win jāpe? Jaab, a ioon juon jikin kāāntōļ, im ej kōmeram aolepān ro otemjej im̧weo;

“Kōn menin en romaak ami meram im̧aan armej rein, bwe ren maron̄ lo jerbal ko rem̧m̧an ami im wūjtak Jemāmi eo ej pād ilo lan̄.”

Em̧ōj kakien kōj n̄an jeere meram eo An. Innām kobrak wōt ļaam̧ eo am̧ kōn oil in oktak eo n̄an Jisōs Kraist im pojak n̄an kaurur ļaam̧ eo am̧ en urur im meram. Im kōtļo̧k bwe meram eo en romaak. N̄e jej jeere meram eo ad, jej boktok jokne eo an Jisōs Kraist n̄an ro jet, oktak eo ad n̄an E ej m̧wiļalļo̧k, im jemaron̄ mour jekdoon n̄e jej kōttar wōt n̄anājmour. Im ilo ad kōtļo̧k bwe meram eo ad en romaak, jemaron̄ in lan̄lōn̄ n̄e jej kōttar.

Juon waanjon̄ak in jeje ko rekwojarjar eaorōk ilo kalikkar pedped in ke jemaron̄ likiio ilo ad oktakļo̧k n̄an Jisōs Kraist im bōk kajoor jān E, jekdoon n̄e jej kōttar ājmour.

Rijilōk Paul ear wōr jet kain an en̄taan—ta eo ear kōmeļeļeik āinwōt juon “kālōklōk ilo kanniōk,” eo jilu attōn ekar kajjitōk bwe Irooj en joļo̧k. Im Irooj ear jiron̄ Paul, “Aō jouj e bwe n̄an eok, bwe aō kajoor e weeppānļo̧k ilo m̧ōjņọ.” Eo Paul ear kean̄:

“Innām inaaj kanooj m̧ōņōņō … kōmmejāje kōn m̧ōjņo̧ ko aō, bwe kajoor an Kraist en pād ioō.

“Innām e bun̄būruō ilo m̧ōjņo̧ ko, … ilo en̄taan ko kōn Kraist: bwe n̄e I m̧ōjņọ, innām I kajoor.”

Waanjon̄ak eo an Paul ej kwaļo̧k ke jekdoon ilo m̧ōjņo̧ ko ad, kajoor eo adi lo Jisōs Kraist emaron̄ weppān—meļeļe in, dedeļo̧k im ājmour. Ro rej ire ippān m̧ōjņo̧ ko an mour in kanniōk im oktakļo̧k n̄an Anij ilo tōmak āinwōt Paul remaron̄ bōk kōjeraam̧m̧an ko an ekkeijelļo̧k ippān Anij.

Paul ear jab mour jān nan̄inmej eo an, ak ear kōmour ilo jetōb ilo Jisōs Kraist. Im jekdoon ilo nana ko an, meram in oktak eo an n̄an im kajoor jān Jisōs Kraist ear romaak, im ekar lan̄lōn̄. Ilo leta eo an n̄an ri Pilipai ro, ekar ba, “Kom̧win lan̄lōn̄ ilo Irooj iien otemjej: im ij bar ba, kom̧win lan̄lōn̄.”

Ro jeiū im jatū, uwaak eo ej aaet, jemaron̄ kōmour ilo jetōb, jekdoon n̄e jej kōttar wōt ājmour ilo kanniōk im ilo en̄jake. Kōmour ejjab meļeļein ke bar mour ilo kanniōk im en̄jake ilo mour in. Kōmour ej itok jān tōmak ilo im oktak n̄an Jisōs Kraist im kōtļo̧k bwe meram in oktak eo en romaak.

“Bwe kūr elōn̄, e iiet ro [rej kāālōt] kāālōt er.”

Im aolep renaaj mour ilo kanniōk im en̄jake ilo Jerkakpeje eo. Bōtaab konaaj ke kāālōt kiiō n̄an bōk kōmour ilo E?

N̄aij kean̄ ilo lan̄lōn̄ ke em̧ōj aō oktak n̄an Irooj Jisōs Kraist. N̄aij kajjieon̄ in kōmour ilo E. Ijeļā ke aolep men renaaj jepļaaktok im kōmour enaaj itok, ilo iien eo An, kōnke E mour.

Meri Magdalini ekar juon kōrā Jisōs Kraist ar kōmour. Im liin ekar juon kōrā karkōmour ilo Jisōs Kraist. Āinwōt juon An rikaļoor, liin ear ļoor Rilo̧mo̧o̧r ilo aolepān Galili im kar jerbal in karejar n̄an E.

Liin ar pād iturin debwāāl eo, juon rikam̧ool n̄an mej eo An.

Liin ar etal n̄an ļōb eo An n̄an kadedeļo̧k kōppopo in kallib eo im ar loe ke dekā eo ej kaņojak ļōb eo em̧ōj boke, bwe ānbwinnin Irooj ar jako. Mary ekar jan̄ ilo lōb eo ke kar kajjitōk ippān, m̧oktata juon enjeļ innām Rilo̧mo̧o̧r Make, “Kōrā, etke kwōj jan̄? Wōn eo kwōj pukot e?”

Mary ear jan̄, “Raar bōkḷọk aō Irooj, im I jaje ijo raar likūt E ie.”

Im Jisōs ear kūr etan ilo mera, “Meri.” Im liin ar kile E im uwaak ilo kautiej, “Rabbonai …Ri Kaki.”

Aiseia ar ba ke ar kanaan kōn Rilo̧mo̧o̧r, “Ear orañḷọk mej ñan indeeo, im Irooj Jeova enaaj kaṃōrāik dānnin kōmjaaḷaḷ jān mejeir otemjej.”

Jerkakpeje eo An ar kaṃōrāik dānnin kōmjaaḷaḷ jān Meri. Em̧ool Ar bar kam̧ōrāik ko am̧.

Meri ar rikam̧ool eo jinointata an Rilo̧mo̧o̧r eo eaar jerkakpeje. Im liin ekar eo jinointata n̄an kam̧ool n̄an ro jet ta eo ar loe.

Ij kobaik ilo ettā naan in kam̧ool eo aō n̄an eo an Meri. E em̧ōj an jerkakpeje. Jisōs Kraist emour. Āliktata aolep renaaj mour, ilo kanniōk im en̄jake, ilo E. Im ilo kōttar kōmour in, tōmak ilo Maajta in Ri Kōmour eo enaaj kōmour kōj ilo jetōb. Ilo etan Jisōs Kraist, amen.