Iakwe Em̧ool—Juon Kōkkaļļe in Rikaļoor Em̧ool

Juon rikaļoor ej juon rianōk ak rijikuuļ an bar juon. Rikaļoor ro rej “rikatak ro” ro rej wūjlepļo̧k mour ko aer n̄an erom̧ āinwōt rūkaki eo aer. Ijoke, erom̧ juon rikaļoor an Jisōs Kraist ej kwaļo̧k eļapļo̧k jān tōmak katak ko An im katak ko. Aaet ej kwaļo̧k eļapļo̧k jān jeļāļo̧kjeņ eo ekwojarjar An im ej bōke E āinwōt ad Rilo̧mo̧o̧r im Ripinmuur—āinwōt an lukkuun aōrōk menin.

Būreejtōn Dallin H. Oaks ekar kōmeļeļeiki: “Ļoor Kraist ejjab juon men bajjek ak iminene. Ej juon kien me ej wōnm̧aanļo̧k wōt im wāween mour bwe aikuj in tōl kōj ilo aolep iien ko im ilo aolep jikin ko.” Rikaļoor ej juon iaļ ej aikuj tiljek im ļōt me jej bwe n̄e jej bōke n̄an oktak jān katok in pinmuur eo an Irooj im kajoor in kōmaron̄ eo An. Mejān kajjik eo em̧ool an rikaļoor em̧ool ej n̄an erom̧ āinwōt Jisōs Kraist—aaet n̄an kwaļo̧k wāween eo n̄e jej bōk “inememen eo An ilo paotok ko [ami]?.”

N̄an erom̧ rikaļoor an Irooj, jej aikuj kajjieon̄ āinwōt juon jon̄ak ilo ļōmņak ko An im kōm̧m̧an ko aolep raan—n̄an waanjon̄ak, An pokake, ettā bōro, im kijenmej. Ilo ad lukkuun kobaik m̧wil kein n̄an kadkad ko ad make, jej erom̧ “āinwōt [E] ilo ṃwilōmi.” Mwil in an Rilo̧mo̧o̧r eo jej kajjieon̄e ej pād ilo ioļapļap in kabun̄jar eo an n̄an E. Āinwōt an Būreejtōn katakin, “Ad kabun̄ n̄an Jisōs ej em̧m̧antata an kwaļo̧k ilo wāween ad kajjieon̄e Jisōs.”

Jān aolep elōn̄ m̧wil ko rekwojarjar an Jisōs Kraist jej aikuj in kajjieon̄i, juon men eļapļo̧k an aorōk im kalibubuik aolep men ko jet. Mwil eo ej An iakwe erreo, ak iakwe em̧ool. Rikanaan ro jim̧or Mormon im Rijilōk Paul rej kakeememej kōj bwe eļan̄n̄e ejjeļo̧k iakwe em̧ool, “[kom̧] jekdo̧o̧n.” Ak, āinwōt an kar kwaļo̧k n̄an Rikanaan Joseph Smith, eļan̄n̄e ejjeļo̧k “iakwe em̧ool, [kōj] jejjab maron̄ kōm̧m̧an men otemjej.”

Rilo̧mo̧o̧r eo Make ekar kwaļo̧k kadkad in iakwe āinwōt kōkkaļļe ak jain eo jān rikaļoor ro An rem̧ool naaj maron̄ kile n̄e Ekar kwaļo̧ke:

“Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon.

“Ilo men in armej otemjej renaaj jeļā bwe kom̧ij rikaļoora, eļan̄n̄e kom̧ij yokwe doon.”

Iakwe em̧ool ej juon jekjek em̧weie bwe emaron̄ pen n̄an kōm̧eļeļeiki ak epidodo bōke jān aolep ro rej en̄jake. Kwaļo̧k Gospel eo Aō ej katakin bwe “iakwe em̧ool, āinwōt tōmak, ej tōlļo̧k n̄an m̧akūtkūt.” Ilo m̧ool, iakwe em̧ool maron̄ kōmeļeļeiki āinwōt “iakwe ilo m̧akūtkūt.” Kōmeļeļe in ej letok eļap kōļmenļo̧kjeņ n̄an tukadu in ennaan eo an mour eo an Rilo̧mo̧o̧r eo—E “ej etetal im kōṃanṃan eṃṃan.”

Āinwōt rikaļoor ro an Jisōs Kraist, jej aikuj kappukot n̄an anōke wāween eo an ad Rilo̧mo̧o̧r eo ekar kōmeļeļeiki An iakwe erreo n̄an ro jet. Mekarta Rilo̧mo̧o̧r eo ej kwaļo̧k iakwe em̧ool ilo elōn̄ wāween, ikōņaan in kōlewetak kom̧ n̄an jilu jon̄ak ko raorōk kōn iakwe em̧ool eo An me em̧ōj kadede loe ilo rikaļoor ro rem̧ool An.

Juon, Rilo̧mo̧o̧r eo ekar kwaļo̧k iakwe em̧ool jān ad tūriam̧o. Ilo kwaļo̧k eo An ilubwiljin Rinipai āinwōt kar rekoot ilo Bok in Mormon e, Irooj ekar karuwaineneik armej ro n̄an jepļaakļo̧k n̄an m̧ōko m̧weer im kejōkļo̧kjeņ kōn men ko Ekar katakin im n̄an m̧aanjabpopo n̄an ro̧o̧ltok eo An raan eo juon. Rekoot kein rej kwaļo̧k:

“Ak armej ro rekar jijjōt ijo “raar jan̄,” mijōk “wōt E āinwōt n̄e raar kajjitōk ippān n̄an pād wōt aetokļo̧k ippāer.

“Im Eaar ba n̄an er: Lo, en̄jake ko Aō reobrak kōn tūriam̧okake kom̧.”

Tūriam̧o ej m̧ōttan eo ilo iakwe em̧ool me ej kappukot n̄an kadikļo̧k en̄taan. Eobrak kōn tūriam̧o, Irooj ekar kōmour rinan̄inmej im ikinejnej ilubwilijin armej ro. Ālkin wōt, Ekar kōjeraam̧m̧an ajri ro ro nejier ke enjeļ ro rekar wanlaļtak jān lan̄ im kabooļe er. Ekar kōm̧m̧ani m̧akūtkūt in jouj, iakwe kein, im ebar lōn̄ men ko, kōnke E ekar “em̧m̧akūt kōn tūriam̧o.”

Ke ikar jerbal āinwōt juon mijenede edik ilo South America, ikar barāinwōt jeraam̧m̧an jān tūriam̧o eo an juon m̧ōtta ejouj. Juon joteen ke ikar ettōrļo̧k n̄an m̧weo im̧ōn misen būreejtōn eo, juon likao ioon juon baajkōļ ekar jidimikōj in ketok im̧aan wa eo waaō. Ekar m̧ōkaj an waļo̧k jon̄an ikar jab maron̄ jeer jān itaak eo. Kabūrom̧ōjm̧ōj eo, likao eo ekar mej jān wāween eo. Ekar lukkuun nana aō mour kōn an jako mour eo an. Mijak im ļo̧kjenaō ke menin enana ewaļo̧k an ta eo ej kab waļo̧k im ejjab etto ikar en̄jake nijōkļo̧k kōn eddodo kōn en̄jake ko an im kar bōk eō n̄an kalbuuj im ļake. Ijjan̄in kar en̄jake eļapļo̧k mijak im ajjimakeke. Ikar obrak kōn ebbeer im mijak bwe inaaj maron̄ kalbuuj aolepān mour eo aō.

Juon m̧ōtta mijenede, Elder Brian Kochever, ekar ekkatak kōn itaak eo im kar m̧weiur kōn tūriam̧o. Ekar itok n̄an m̧ōn kalbuuj eo im akweļap ippān opiija ro bwe ren kōtļo̧k an pād ippa ilo ruum̧ in kalbuuj eo bwe ijjab maron̄ make iaaō. Kabwilōn̄lōn̄, rekar errā. N̄an rainin, ij en̄jake kam̧m̧oolol eļap kōn m̧akūtkūt in rikaļoor in āinwōt iakwe eo an Kraist, eo ekar kōmeraik, kaenem̧m̧an, im kōm̧anm̧an aō mour ilo iien in eļap būrom̧ōj ilo mour eo aō. An tūriam̧o̧ im lukkuun iakwe ekar juon kōkkaļļe ej kwaļo̧k rikaļoor eo an. Āinwōt an Būreejtōn Russell M. Nelson etale, “Juon iaan wāween ko repidodo n̄an kalikkare juon rikaļoor em̧ool an Jisōs Kraist ej wāween an tūriam̧o eo an armej eo kōm̧m̧an n̄an ro armej ro jet.”

Bar juon waanjon̄ak kōn wāween an Rilo̧mo̧o̧r eo kōmeļeļeiki iakwe eo An jān An mour kake im jerbal in karejar n̄an aikuj ko jejjab kōnono an ro jet. N̄an em̧m̧aan eo eo ekar ajjukukkuk ium̧win 30 iiō ko im ejjeļo̧k juon armej emaron̄ jipan̄ e, Irooj ekar kotak e im kōketak e n̄an mour ekwojarjar. N̄an kōrā eo kar jibwe kōn lōn̄, Ekar leļo̧k n̄an e kōjatdikdik im kaenōm̧m̧ane ijjelo̧kin liakeļo̧k ilo nana. N̄an em̧m̧aan eo mej āinwbinnin eo kar lelaļļo̧k e jān bōro̧o̧j in m̧weo, Irooj ekar jeorļo̧k an bōd jān jerawiwi ko, jab baj kōmour ānbwinnin jān nan̄inmej.

Ke ikar bōk kūr eo n̄an jerbal āinwōt juon bisop, ajri ro nejūm̧ro rekar kōm̧m̧an bwe kweilo̧k in kwojkwoj eo en apan̄ n̄an kōrā eo pāleeō, Cristin, eo ekar lale er make iaan ke ij jijet lokatok eo m̧aan. Ilo am̧ pijakļo̧k, ajri ro nejūm̧ ekkā aer jab kautiej. Ruo membōr in ward eo am̧, kar kile jekjek eo an, John im Debbie Benich, rekar jino jijet ippān kajjojo Jabōt n̄an jipan̄. Aer jouj ekar wōnm̧aanļo̧k wōt ium̧win elōn̄ iiō ko, im rekar jino erom̧ ripenej jenwan bubu im jim̧m̧a ro an baam̧le. Āinwō Irooj, rikaļoor rein rekar kile aikuj kar jab kōnono kaki im kar kōm̧m̧ani ilo iakwe—juon kōkkaļļe aorōk an rikaļoor ro aer.

Āliktata, iakwe eo ewājabdik an Rilo̧mo̧o̧r eo ej pedped wōt ioon an kōmaron̄ aolep ajri ro nejin Anij kakūrm̧ool jibadbad eo ad ekwojarjar eo me jemaron̄ “bōk m̧ōttan lo̧mo̧o̧r eo An, im kajoor eo an pinmuur eo An.” Ilo ad erom̧ eļapļo̧k āinwōt Maajta eo ad, ikdeleel eo ad n̄an jipan̄ m̧aan im kōrā ro jeid im jatid ilo iaļen bujen eo ad naaj ļapļo̧k.

N̄an waanjon̄ak, jemaron̄ ļōn̄aj im jem̧jerāiki ro rej en̄jake aer metak ak meļo̧kļo̧k, jipan̄ ro rej kāāl n̄an jarlepju eo ad en̄jake ruwainene, ak karuwainene ro m̧ōttad n̄an kabun̄jar ippād ilo kweilo̧k in kwojkwoj eo—bōlen Ijtō in tok. Elōn̄ wāween ko ban bwini n̄an rōjan̄ im jipan̄ ro jet ilo eddōkļo̧k eo aer eļan̄n̄e jej kōņaan im tiljek kappukot jipan̄ an lan̄ n̄an bōk māj ko im juon bōro n̄an en̄jake wāween an Jisōs Kraist lo im en̄jake n̄an er.

JIpan̄ ro jet ilo iaļen bujen eo aer maron̄ bōk jekjek in juon jerbal in jipan̄ kar jab karōke. Āinwōt juon waanjon̄ak, jerbal eo aō kiiō ilo Philippines, ikar ekkatak kōn baam̧le eo an Agamata. Rekar peptaij ilo 2023, im rekar kijerjer in kōm̧m̧ane juon raan n̄an maron̄ liāp āinwōt juon baam̧le ilo Urdaneta Philippines Temple eo epaak. Ijoke, m̧okta jān appointment eo aer, jejjo taibuun ko kakkure laļ in. Brother Agamata, juon rikallib, ekar jab maron̄ katōk jikin kallib eo an ilo ļan̄ kein rekajoor. Ke ļan̄ kein renana rekar eļļāļo̧k, ekar aikuj in m̧ōkaj an ekkat rice ke bwidej eo ekar m̧ōļawi kōn dān. Kabūrom̧ōjm̧ōj, tampeļ tūreep eo naaj kar to̧rto̧re m̧aanļo̧k.

Ruo rikaļoor ro, Elder im Sister Cauilan, ippānļo̧k jilu service mijenede ro, rekar ron̄ kōn wāween in epen an baam̧le eo an Agamata im leļo̧k jipan̄ mekarta ejjeļo̧k aer imminene ikijeen jikin kallib. Jerbal ium̧win an ļap det, rekar jipan̄ katōk ine ko, kōtļo̧k an Agamata ro kam̧ōj jerbal eo aer im etal n̄an liāp in tampeļ eo aer ilo an kar jikejuuļ. Elder Cauilan ekar lale an “baaktokin eo an [Agamata ko] ebbōl ke kōm̧ kar lo aer nuknuk mouj ilo m̧weo im̧ōn Irooj. Lan̄lōn̄ eo jekar en̄jake jerbal in karejar n̄an juon ej juon ilan̄lōn̄ n̄an keidi!”

Agamata ro kiiō rej lan̄lōn̄ kōn kōjeraam̧m̧an ko rem̧weie jān aer kar liāp āinwōt juon baam̧le indeeo kōnke jejjo rikaļoor ro rekar obrak kōn iakwe em̧ool—juon kōkkaļļe in aer rikaļoor—likūt ilo ļōmņak n̄an jipan̄ m̧aan im kōrā jeir im jatier bun̄m̧aanļo̧k ilo iaļen bujen eo aer.

Ro jeiū im jatū, rikaļoor an Jisōs Kraist ej wāween eo n̄an niknik ilo lem̧ōņōņō. Ej juon iaļ eobrak kōn m̧akūtkūt in ļōmņak ko retiljek im jibadbad ko ilo iakwe ņae ro jet. Tōre in iaļ in rikaļoor eo emaron̄ in pen im apan̄, im tōre in iien ko jemaron̄ in en̄taan im likjab, jemaron̄ in bōk kaenōm̧m̧an eo Anij ej ļōmņak kōn kōj im jan̄uwaade n̄an jipan̄ kōj aolep iien jej kajjieon̄. Aiseia ej kakeememej kōj “Anij enaaj jibwe [peid] anmooṇ im ba … , Kwōn jab mijak; Inaaj jipañ eok.”

Kōn naan in jiron̄ in jān Jemād ilo Lan̄ ilo kōļmenļo̧kjeņ, ij lukkuun jar bwe jenaaj ļoor kūr in an Būreejtōn Nelson n̄an likūt āinwōt kālet eo im̧aantata ad Rikaļoor. Jemaron̄ ke “kom̧in jar n̄an Jemād kōn aolep kajoor in bōro,” n̄an “obrak kōn iakwe, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist; … bwe n̄e Enaaj waļo̧k jenaaj āinwōt E,”kōnke jej kotak juon kōkkaļļe in rikaļoor em̧ool, eo ej “iakwe em̧ool … iakwe eo erreo an Kraist,”

Ij kam̧ool bwe Jisōs Kraist ej ad Rilo̧mo̧o̧r emour im eaibojooj, Ripinmuur, Riwaanjon̄ak, im Jerar. Ilo etan Jisōs Kraist, amen.