Jesus Christ N’Asɛmpa a Otsim-Ebusua do

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo nkyerɛkyerɛ no tsim ebusua do. Dza ohia tsitsir ma hɛn nkyerɛkyerɛ fa ebusua no ho nye temple no. Ayɛdze horow a yɛgye no hɔ no ma hɛn tum ma yɛsan dɛ onnyiewiei ebusua ebusua kɔ hɛn Ɔsor Egya n’enyim.

Dze bodu Ebɔbira 2025 wiadze mfɛndzanan ehyiadzi mu no, nna President Russell M. Nelson dze temple afofor 200 ne nsii ato gua. Ɔpɛ temple afofor a wɔdze to gua wɔ wiadze mfɛndzanan ehyiadzi biara n’ewiei, na hɛn nyinara yɛnye no dzi ehurusi. Naaso, sesei temple ne kɛsenara wɔ hɔn nhyehyɛɛ na hɔn nsii ahyɛse ankasa no, ɔfata dɛ yɛtsew temple afofor ne hyewbɔ a wɔdze to gua no ho. Dɛm ntsi medze Asomafo Duebien no hɔn Quorum hɔn mpendo no, yɛremmfa temple afofor biara nnto gua wɔ ehyiadzi yi ase. Afei yɛbɔkɔ kan ayɛ temple n’ayɛdze horow ama Asɔrmba wɔ wiadze nyina, a mber na beebi a wɔdze temple afofor hɔn nsii bɔto gua kã ho.

Me kasaa ne fã a medze ama seseiara no mekyerɛɛw no wɔ hɛn dɔfo President Russell M. Nelson no wu ekyir. Dza sesei odzi do no mekyerɛwee na wɔpeen do adapɛn pii ansaana, naaso ɔda ho da me nkyerɛkyerɛ a, Ewuradze kenyanee no edzi.

Ebusua dawurbɔ no, wɔdze too gua mfe 30 pɛpɛɛpɛ a wɔabasen kɔ no, kã dɛ “ebusua yɛ Nyankopɔn Ne nhyehyɛɛ,” na “ɔyɛ Bɔadze no Ne nhyehyɛɛ ma Ne mba hɔn onnyiewiei nkrabea.” Ɔpaa mu kã so dɛ Nyankopɔn Ne mbrasɛm ma Ne mba dɛ wɔndɔr na wɔnhyɛ asaase do mã no, da ho dzi mu. Na “yɛkɔ do paa mu kã dɛ Nyankopɔn ahyɛ mbra dɛ awoo ho tum krɔnkrɔn no wɔdɛ odzi dwuma wɔ banyin na ɔbaa a wɔawar wɔ mbra kwan do, dɛ kun na yer, nkotsee ntamu.” Dɛ mbrɛ nkaano-Elder Russell M. Nelson kyerɛkyerɛɛ BYU etsiefo dɛ ebusua dzi “akotsen wɔ Nyame ne nhyehyɛɛ mu. … Nokwar, nhyehyɛɛ no no botae kor nye ebusua benya nkwagye ntowdo.”

Wonyim Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ara yie dɛ Asɔr a otsim ebusua do. Ɔyɛ! Yɛnye Nyankopɔn ntamu nkitahodzi na hɛn ɔnnkyebo abrabɔ yi no botae no wɔdze ebusua no kyerɛkyerɛɛ mu. Jesus Christ n’asɛmpa no yɛ hɛn Ɔsor Egya ne nhyehyɛɛ a ɔdze mfaso bɛma No sunsum mu mba. Yebotum akã no nokwar mu ara dɛ asɛmpa nhyehyɛɛ no wodzii kan kyerɛkyerɛɛ hɛn wɔ onnyiewiei ebusua baguabɔ mu, hɛn ɔnnkyebo ebusua ebusua mu na wɔdze dzi dwuma, na ne hyɛbea enyidakwan nye ɔbɛma Nyankopɔn ne mba ntowdo wɔ onnyiewiei ebusua ebusua mu.

Nkyerɛkyerɛ nyina ekyir no, mpo wɔkõ tsĩa. United States ha no yeruhu amandze wɔ awar na abawoo a ɔresɛɛ ho. Bɛyɛ mfe ɔha mu no efiefi dodow a awarfo da ne tsir no do atsew, dɛmara so na abawoo do atsew. Awar na abawoo dodow wɔ hɛn Asɔrmba mu no ye koraa, mbom ɔno so no do atsew koraa. Ohia kɛse dɛ Latter-day Saintfo nnkɛyew hɔn ntseasee wɔ awar na mba hɔn bo a wɔsom ho. Ɔno nye ndaamba no a yɛrobɔ ho mbɔdzen no. President Nelson akyerɛkyerɛ hɛn dɛ, “Nkwagye ntowdo yɛ Ebusua asɛm.’’ “Ɔnam Jesus Christ n’asɛmpa no nkwagye ayɛdze horow no nko do na ebusua ebusua benya nkwagye ntowdo.”

Ntseasee wɔ hɔ a ɔnam abakɔsɛm mu siantsir ntsi a ɔman no mu awar na abawoo aba famu no, mbom Latter-day Saintfo su pa na ndzeyɛɛ sɛ dɛ otu mpon—nnyɛ ɔbɛkã—dza ɔrokɔ do do.

Meyɛ abanyimba mfe 70 abasen kɔ no, metsenaa me nananom hɔn haban mu bea a dza ɔkɔ do wɔ da ne nyina mu no ebusua no na ɔhwɛ do. Nna tɛlɛbihyɛn anaa abaɛfor mfir biara nnyi hɔ a obeyi adwen efi ebusua mu dwumadzi ho. Dza ɔnye no bɔ ebira no, nkurow akɛse mu no, ebusuafo mu kumaa na wonya dwumadzi horow a otsim ebusua do ho sũahu. Nkurow akɛse mu tsena na ndɛ akwantu, agodzi akɛse a wɔahyehyɛ, na nkitahodzi a ɔkɔ ntsɛntsɛm no ama wɔaayɛ mberɛw ma mbabun afa hɔn efiefi dɛ bea a wɔda na wodzidzi, na mbom bea a awofo hɔn kwankyerɛ wɔ hɔn dwumadzi no do atsew koraa.

Awofo hɔn nhyɛdo so no do ehuan osian akwan a ndɛ Asɔrmba bɔ hɔnho akɔhoma. Mber a woetwa mu no, nna nhyɛdo akɛse a ɔkã ebusua ebusua bɔmu nye woridzi aper enya botae kor bi—tse dɛ wɔrodɔw kwae anaa worinya akɔhomabɔdze. Nna ebusua no yɛ nhyehyɛɛ a wɔbɔmu yɛ edwuma dze nya dza wɔbɔtɔn. Ndɛ, ebusua ebusua dodowara wɔbɔ mu tɔ dza wohia, a onnhia nhyehyɛɛ kɛse na adwensaa biara.

Awofo hɔn nhyɛdo rokɔ famu no, Nda Odzi Ekyir Ahotseweefo wɔ asodzi a Nyame dze ama dɛ wɔkyerɛkyerɛ hɔn mbofra ma woesiesie hɔnho ma ebusua no ne nkrabea wɔ daapem mu (hwɛ Nkyerɛkyerɛ na Ahyɛmudzi 68:25). Otwar dɛ hɛn mu dodowara yɛ iyi ber a nnyɛ hɛn ebusua ebusua nyina na wɔyɛ egya, ɛnã, na mba. Awargyaa, owu, na mpaapaamu yɛ dza osisi ampaara. Menyaa dɛm ho sũahu wɔ ebusua a wɔtsetsee me wɔ mu no.

M’egya wui nna medzi mfe esuon, ntsi hɛn nã kunafo na ɔtsetsee emi, mo nuabanyin kakraba na m’akyerɛbaa. Gyinabew horow a ɔyɛ dzen mu no, ɔperee kɔr kan. Nna aka nonko na oebubu, mbom ne nkyerɛkyerɛ ndamyɛ mu fa Asɔr no a wɔdze asan ananmu aba no maa hɛn kwankyerɛ. O, mbrɛ osii bɔɔ mpaa dze hwehwɛɛ ɔsor mboa ma ɔdze tsetsee ne mba a, na wohyiraa no! Wɔtsetsee hɛn wɔ enyigye fie a nna hɛn egya a oewu no yɛkaa no ber biara. Hɛn nã kyerɛkyerɛɛ hɛn dɛ yɛwɔ egya, na ɔwɔ kun na yɛbɔkɔ do ayɛ ebusua osian hɔn temple awar ntsi. Hɛn egya efi mu mber tsiabaa ara, osiandɛ Ewuradze afrɛ no edwuma fofor mu.

Minyim dɛ ebusua ebusua binom so hɔn enyi nngye, mbom enã ɔhokwafo biara botum akyerɛkyerɛ Ɔsor Egya no dɔ ho nsɛm na temple awar ne nhyira horow a ɔdze ba ho nsɛm. Wo so botum ayɛ iyi! Ɔsor Egya ne nhyehyɛɛ no ma awerɛhyɛmu dɛ iyi botum ayɛ hɔ ama obiara. Temple awar yɛ hɛn nyina enyisɔ na ho nhyira dɛ wɔbɔsɔw hɛn ano dɛ onnyiewiei ebusua. Tse dɛ me maame no, yɛdɔ dɛ yɛserɛ kã Lehi n’anohoba a ɔdze bɔɔ ne babanyin Jacob dɛ Nyankopɔn “behyira wo wɔ w’amandzehu mu ma woesi wo yie” (2 Nephi 2:2). Iyi kɔ ma Latter-day Saint ebusua biara, awofo beenu na mba anaa sesei wɔtɔ sin. Yɛyɛ ebusua asɔr.

Hɛn nkyerɛkyerɛ na hɛn gyedzi wɔ onnyiewiei ebusua ebusua mu no hyɛ hɛn dzen na ɔkã hɛn bɔmu. Mowerɛ nnkefir me Maame ne Papa Harris, n’anohoba dabiarada, ber a hɛn mbofra no yɛtse ne haban a ɔbɛn Payson, Utah mu no. Ɔkãa awerɛhowsɛm dɛ me papa ewu wɔ ekyir ekyir Denver, Colarado. Mutuu mbirika kɔr pia mu na mubuu ntwɛr wɔ mpa ne nkyɛn, na muhuee m’akoma nyina sũi. Me nana banyin kaa mo do na ɔkɔr no ntwɛr enyim wɔ me nkyɛn na ɔkãa dɛ, “Mebɛyɛ w’egya.’’ Dɛm ahobow anohoba no yɛ fasusu a ɔyɛ ndam a nananom botum ayɛ dze ahyɛ ananmu akwan a ɔda hɔ ber a ebusua ebusua hwer anaa wɔyew ebusuanyi.

Abaatan, ɔhokwafo anaa wɔaawar—na binom, tse dɛ nananom, a wɔhyɛ dɛm dwumadzi yi mã ma mbofra—yɛ akyerɛkyerɛfo apapa. Hɔn adzekyerɛ a ɔkɔ do yie no yɛ hɔn fasusu. Ebusua yɛ bea mãpa a yɛdze kyerɛ na yesũa onnyiewiei suban pa, tse dɛ awar no ho hia a ohia na mbofra, abrabɔ no botae, na dɛw no nokwar fibea. Ɔyɛ bea pa so a yesũa abrabɔ mu adzesũadze tsitsir ahorow no, tse dɛ ayamuyie, bɔnfakyɛ, ahohyɛdo, na nwomasũa na edwuma pa ho mfaso.

Ampaara, Asɔrmba mu dodowara wɔ ebusua mu mba adɔfo a wɔnngye asɛmpa su pa na enyidakwan horow no. Ebusua mu mba a wɔtse dɛm no hia hɛn dɔ na abotar. Yɛnye hɛnho ridzi nkitaho no, ɔsɛ dɛ yɛkaa dɛ emudziyɛ a yɛhwehwɛ no nnyɛ wɔ ɔnnkyebo abrabɔ mu atseetsee mu nko. Nkyerɛkyerɛ kɛse no a ɔwɔ Nkyerɛkyerɛ na Ahyɛmudzi 138:57–59 mu no ma hɛn awerɛhyɛmu dɛ nnuhu na sunsum mu nyinii botum atoado wɔ sunsum wiadze a ɔtoa ɔnnkyebo abrabɔ do. Dza ohia kɛse no, ber a ebusua ebusua ka bɔmu hyɛ hɔnho dzen no, ɔsɛ dɛ obiara kaa dɛ bɔn na esintɔ a ɔmmpar hɛn ɔnnkyebo abrabɔ sũahu ho no, wobotum edua nnuhu do enya bɔnfakyɛ osian Jesus Christ N’enyimnyam Werdambɔ nkwagye no.

Hɛn Agyenkwa, Jesus Christ nye hɛn fasusu tsitsir. Wobehyira hɛn sɛ yɛdze Ne nkyerɛkyerɛ na etuhoakyɛ yɛ hɛn abrabɔ no nhwɛdo a. Yɛreka Christ do na yɛdze hɛnho rema wɔ som mu ama hɛnho nkorkor no nye pɛsɛankonya na monko su a sesei ɔyɛ dɛ ma ɔnnyɛ nã yi ho edur papa.

Awofo wɔ asodzi dɛ wɔkyerɛkyerɛ hɔn mbofra fie nyimdzee kã asɛmpa fapem ho. Ebusua ebusua nya koryɛ ber a wɔbɔ mu yɛ ndzɛmba a ɔyɛ mfaso. Ebusua tureyɛ kyekyer ebusua nkitahodzi. Ebusua sũahu horow a ɔyɛ enyigye no ma ebusua nkitahodzi mu yɛ dzen. Asesebɔ, agodzi akansi, na enyikadze nkaa no hia papaapa dze akã ebusua ebusua abɔmu. Ebusua ebusua wɔ dɛ wɔhyehyɛ ebusua nkabɔmu dze akaa hɔn ewuakɔr, a obegya akɔ temple.

Awofo sɛ dɛ wɔtsetse hɔn mba wɔ fie adzeyɛ mu, a wɔreyɛ edwuma wɔ aboano na fie no mu kã ho. Worusũa kasa fofor yɛ ahoboa a ɔyɛ mfaso ma asɛmpakã som na ndɛ mber abrabɔ. Awofo anaa nananom anaa ebusuafo nkaa no botum ayɛ adzesũadze yinom ho akyerɛkyerɛfo. Ebusua ebusua yɛ prɔmprɔm ber a wɔbɔ mu dɛ kuw dze sũa adze na wɔbɔ mu fa apam wɔ nsɛm nyina a ɔfa ebusua no na no mu mba hɔn ho.

Ibia binom bɛkã dɛ, “Mbom yennyi iyinom ho mber biara.” Ama woeenya mber dze ayɛ dza nokwar ara ɔyɛ mfaso no, awofo bohu dɛ wobotum asɔ hɔn ebusua esi do sɛ hɔn abaɛfor ndzɛmba no wodundum no a. Na awofo, hom nkaa, dza mbofra no rohwehwɛ ewimbir edzidzi ber nye wɔnye hom bɔhwer mber.

Nhyira akɛse ba ebusua ebusua do sɛ wɔbɔ mu bɔ mpaa, wobu ntwɛr anafua na anapa dze da ase wɔ nhyira horow na wɔbɔ mpaa wɔ hɔn akadadwen ho. Wohyira ebusua ebusua so sɛ wɔbɔ mu sɔr wɔ Asɔrsom na mpaabɔsom nkaa no mu a. Ebusua nkitahodzi so hyɛ dzen ber a wɔkã hɔn ebusua mu kodzisɛm, wɔkyekyer ebusua amambra, na wɔkyɛ sũahu krɔnkrɔn. President Spencer W. Kimball kaa hɛn dɛ “nkenyan nsɛm a ofi hɛn ankasa hɛn abrabɔ mu na hɛn ewuakɔr no … yɛ nkyerɛkyerɛ edwindadze a ɔyɛ ndam.” Wɔtaa yɛ nkenyan ne fibea mapã ma hɛn na hɛn mbasantsen.

Megye Ewuradze Jesus Christ ho dase dɛ Ɔyɛ Nyankopɔn hɛn Onnyiewiei Egya Ne Ba a, Wɔwoo no Kortoo no. Ɔto nsa frɛ hɛn dɛ yɛmfa ahyɛmu anamɔnkwan no a ogya kɔ Ɔsor ebusua nkabɔmu no do. Asɔfodzi nsɔwano tum, a nsaafee a wɔdze saan ananmu wɔ Kirtland Temple no kã ebusua ebusua bɔ mu ma mfesantsen (hwɛ Nkyerɛkyerɛ na Ahyɛmudzi 110:13–16). Sesei wɔdze ridzi dwuma wɔ Ewuradze ne temple horow a ɔrodɔɔ sõ mu wɔ wiadze nyina mu. Ɔwɔ hɔ ampara. Hom mma yɛnka ho, mobɔ ho mpaa wɔ Jesus Christ ne dzin mu, amen.