Ewuradze Hwɛ Akoma mu
Dza Nyankopɔn hia nyina ma No botae ahyɛ mã na Ɔaboa hɛn ma yɛabɛyɛ nyia Ɔpɛ dɛ yɛbɛyɛ no nye dɛ hɛn mu kor biara bɛdan hɛn akoma nyinara ama No.
Ber a Ewuradze hyɛɛ nkɔnhyɛnyi Samuel dɛ onyi Israel hen fofor wɔ Jesse ne mbabanyin mu no, ɔhwɛɛ Jesse ne babanyin panyin Eliab, na ɔdze ahokeka tsẽaa mu dɛ, “Ampa Ewuradze ne nyia wɔasera no no na ɔwɔ n’enyim no.” Naaso nna Eliab nnyɛ akowaa a Ewuradze eyi no no. Agyenkwa no bɔɔ Samuel kɔkɔ dɛ: “Mma nnhwɛ n’enyim, anaa ne tsipɛn ne tsentsen; osiandɛ memmpɛ no; na Ewuradze nnhwɛ dɛ mbrɛ nyimpa hwɛ; na nyimpa hwɛ dza opue n’enyiwa do, na Ewuradze dze ɔhwɛ akoma mu.”
Bia nna honam mu no ɔnnyɛ David na no ho yɛ dzen papaapa anaa wɔaben papaapa wɔ n’enuanom no mu, eso nna sunsum mu no no ho yɛ dzen wɔ Nyame enyim. Nna ɔdze n’akoma nyina dɔ Nyankopɔn na ɔwɔ pɛ a no mu dɔ dɛ ɔbɛyɛ setsie ama No. Nna ɔwɔ gyedzi a onnhihim wɔ Nyankopɔn no dɔ, tum na anohoba nhyira mu, dɛ mbrɛ ɔdaa no edzi ber a akokodur mu ara ɔkõe tsiaa Goliath dzii no do konyim a ɔdze Ewuradze no mboa.
Asɛm yi kyerɛkyerɛ hɛn dɛ dza Nyankopɔn hia nyina ma No botae ahyɛ mã na Ɔaboa hɛn ma yɛabɛyɛ nyia Ɔpɛ dɛ yɛbɛyɛ no nye dɛ hɛn mu kor biara bɛdan hɛn akoma nyinara ama No. Mbrakyerɛfo no, Ɔhyɛɛ no dɛ, “Dɔ Ewuradze wo Nyankopɔn wɔ w’akoma nyina mu.” Ɔkãa kyerɛɛ Nkɔnhyɛnyi Joseph Smith dɛ, “Hwɛ Ewuradze rohwehwɛ akoma nye adwen pa.” Na ma Nephifo no, Agyenkwa no a Ɔasoɛr no ma hɔn dɛm nsato yi: “Na afɔr a hom bɔbɔ ama me nye akoma a abobɔ nye sunsum a abotow.”
Ebɛnadze ntsi a? Agyenkwa no kyerɛkyerɛɛ dɛ sɛ yɛdan hɛn akoma nyinara kɔ No do a, ɔnam No werdam afɔrbɔ no ntsi yebotum enya ahoɔdzen na sunsum mu akyɛdze horow nhyira a yehia dze edzi hɛn ɔnnkyebo asetsena atseetsee do, etsia nsɔhwɛ, enya akwankyerɛ na ntseasee, na yɛatse dɛwdzi na asomdwee nka wɔ hɛn abrabɔ mu. “Ndzɛmba nkakraba mu na dza ɔyɛ akɛse fi mu ba.” Ɔkãa dɛ Obotum ama “ndzɛmba a ɔyɛ mberɛw no ahyɛ dzen” na Ɔdze dza yehia biara dɛ yɛdze begyina yie wɔ ɔnnkyebo abrabɔ yi mu na yeenya nkwa a onnyi ewiei no behyira hɛn. Ɔsee dɛ, “Nhyira akã hɔn a hɔn akoma mu tsew, na hɔn na wobohu Nyankopɔn.”
Megye dzi dɛ iyi ntsi na, bia ne fã bi no, nna Jesus Christ taa tsentsen akyerɛwfo na Phariseefo no wɔ No ɔnnkyebo somdwuma mu no. Ɔwɔ mu dɛ nna wosie mbra no enyiberdo dze, eso nna hɔn siantsir a wɔdze dzi do no nntsen. Ɔkãa hɔn enyim see dɛ, “Ɔman yi dze hɔn anofamfa dzi me nyi, na hɔn akoma dze, ɔnye me ntamu twe kɛse.”
Iyi yɛ nkaadze mapã ma N’akadofo nyina dɛ ɔnnyɛ dza yɛyɛ ara nko—hɛn nsɛm na ndzeyɛɛ—mbom siantsir so a yɛyɛ dza Jesus Christ ebisa hɛn dɛ yɛnyɛ no—hɛn apɛdze na hɛn botae a ɔtae ekyir. Ɔkãa dɛ, “Emi, Ewuradze mubobu nyimpa nyina atsɛn dɛ mbrɛ hɔn ndwuma tse, dɛ mbrɛ hɔn akoma ne pɛ tse.” Hɛn Ɔsor Egya rohwehwɛ dza ɔkyɛn ntɔyɛɛ setsie na ɔsom ndzeyɛɛ ara fi Ne mba hɔ. Ɔpɛ dɛ yɛpra hɛn akoma mu yɛ ndzɛmba, osiandɛ yɛdze hɛn akoma nyinara dɔ No. Ɔpɛ dɛ yenya pɛ dɛ yɛbɛyɛ tse dɛ Ɔno.
Afei, sɛ hɛn akoma no sunsum mu apɔwmudzen na Agyenkwa no dwen ho tsitsir a—dza Ɔhwehwɛ wɔ osuanyi mapã no mu a—yebesi dɛn ayɛ hɛn akoma ho nhwehwɛmu na yehu sɛ odzi mu wɔ Nyankopɔn n’enyi mu a?
Ndaansa yi ara, ber a emi na me yer fi hɛn asɛmpasomafo dwuma wɔ Portugal bae no, yɛyɛɛ apɔwmudzen ho nhwehwɛmu pii dze hwɛɛ hɛn honam ne tsebea. Nna nhwehwɛmu no mu binom fa hɛn akoma n’apɔwmutse ho—tse dɛ bɔgya nhwehwɛmu, echocardiogram na atseetsee ho nsɔhwɛ ahorow. Megye dzi dɛ Agyenkwa no so ama hɛn sunsum mu nhwehwɛmu ndzɛmba a yebotum dze ahwɛ hɛn akoma no sunsum mu tsebea. Menye hom nkyɛ kakra.
Edze Sunsum mu Nhwehwɛmu Reker W’akoma
Odzi Kan, Dza Hɛn Enyi Tsim do, Dza Ohia Hɛn, na Hɛn Botae
Jesus kyerɛkyerɛɛ dɛ, “Na mbrɛ w’akoradze wɔ no, hɔ na w’akoma so wɔ.” Akoradze yɛ adze a ɔsom hɛn bo, biribi a yɛdze hɛn ahom na hɛn adwen ma no. Mbrɛ yedzi hɛn mber na dza yɛdze hɛn adwen tsim do, nna dza okenyan hɛn ma yɛyɛ dza yɛyɛ no, kyerɛ pii fa hɛn akoma ho. Agyenkwa no bɔɔ kɔkɔ dɛ ɔwɔ mu dɛ Ɔbɛfrɛ dodowara, na mbom kumaabi na wɔbɛsan mu eyi hɔn “osiandɛ hɔn akoma dzi wiadze ndzɛmba ekyir, na wɔper hwehwɛ nyimpa hɔ enyinyam.” Ana medze Agyenkwa no dzi kan wɔ m’abrabɔ mu? Ana m’enyiwa yɛ kor wɔ N’enyinyam nko dɔ wɔ dza meyɛ nyina mu?
Otsĩa Ebien, Hɛn Kradoyɛ dɛ Yebedzi Nyankopɔn ne Mbrasɛm do
Kyerɛwsɛm nyina mu, Ewuradze na No nkɔnhyɛfo dze ahantanyɛ na seanntse atoto akoma a oepirim ho. Nephi tuu no nuanom mbanyin no fo dɛ: “Ebɛnadze ntsi na hom nndzi Ewuradze ne mbrasɛm do? Ɔyɛ dɛn ntsi na osian hom akomadzen ntsi hom rebɛhera yi?” Ewuradze bɔɔ ahotseweefo a nna wɔwɔ Missouri no kɔkɔ dɛ, “Na mbom nyia ɔnnyɛ biribiara gyedɛ wɔahyɛ no ana, na ɔdze akoma a ekyingye wɔ mu bɛgye mbrasɛm no na ɔayɛ ho akwadwer no, ɔno na wobu no fɔ.” Ber a Agyenkwa no ronnhwehwɛ emudziyɛ wɔ yerisie ne mbrasɛm ho no, Obisa hɛn dɛ yennya pɛ na yɛmper dɛ yɛdze hɛn akoma nyina bedzi mbrasɛm no do.
Otsĩa Ebiasa, Hɛn Enyiber a Yɛdze Sũa Kyerɛwsɛm no na Yɛdze Hwehwɛ Nyikyerɛ
Ewuradze tuu Oliver Cowdery fo dɛ “kora dɛm nsɛm yi do wɔ w’akoma mu.” Wɔto nsa frɛ hɛn dɛ yɛnhwehwɛ kyerɛwsɛm no mu enyiber do, na ɔnam Sunsum Krɔnkrɔn no tum do, yɛnhwehwɛ dɛ yebenya ntseasee na asɛmpa no nokwar ho dase wɔ hɛn akoma mu.
Nkɔnhyɛnyi Abinadi kãa Ɔhen Noah mumuyɛnyi n’asɔfoe no enyim dɛ wɔannyɛ dɛm, a ɔrekã no dɛ, “Hom ammfa hom akoma amma ntseasee; dɛm ntsi, hom annyɛ enyansafo.” Ana morobɔ mbɔdzen nokwar ara dɛ mubosũa kyerɛwsɛm no daa daa na medua mpaabɔ do dze m’akoma ama ntseasee wɔ ho?
Otsĩa Anan, Hɛn Adwendwen na Hɛn Nsɛm
Agyenkwa no kyerɛkyerɛɛ dɛ “akoma mu na adwembɔn fi ba” na dɛ “dza ebu do wɔ akoma mu no na ano kã.” Hɛn adwendwen na hɛn kasaa ne papayɛ yɛ adzepa a ɔkyerɛ hɛn akoma n’ahotsew. Ana meregyegye adwendwen fi bebree do dodow wɔ binom hɔn ndzeyɛɛ anaa botae a wɔdze yɛ adze ho, anaa wɔ mankasa mpo ho? Ana meyɛ ntsɛm dodow bua binom atsɛn na mubu binom fɔ? Ana mohwehwɛ dɛ mibenya nkyerɛmu anaa siantsir ama mo mfomdo a? Na me kasaa so ɛ? Ana ɔhyɛ nkuran na okenyan hɔn a woetwa mo ho ehyia? Anaa ɔtaa dze ntõtõ na ayawdzi ba a?
Mo honam mu nhwehwɛmu n’ewiei no, me datser kãa kyerɛɛ me dɛ, ne nyina mu no, m’akoma wɔ apɔmudzen—naaso ehiadze kumaabi wɔ hɔ a ɔwɔ dɛ wɔhwɛ dzi ho dwuma, ana wɔabɛyɛ biribi dzendzen. Ɔkyerɛɛ me dɛ menyɛ m’abrabɔ ho nsesa binom. Dɛm ara, sɛ eyɛ w’akoma ho sunsum mu nhwehwɛmu yi na ihu dɛ ndzɛmba a ɔnnyɛ wɔ mu a, meserɛ mma mmbɔ hu! Agyenkwa no ama sunsum mu eduryɛ na ayarsa mapã a ɔbɔboa wo. Ɔabɔ anohoba mpo dɛ Ɔbɛma wo akoma fofor! Ndzeyɛɛ binom nye yi a obotum etu w’akoma no sunsum mu ahoɔdzen mpon.
Irutu W’akoma no Sunsum mu Apɔwmutse Mpon
Odzi kan, Hyɛ Ɔwo nye Christ Ntamu Nkitahodzi Dzen
Ber a yetu mber si hɔ daa daa dze bɛn Christ yie no, hɛn akoma sesa. Daa daa kyerɛwsɛm adzesũa, a nokwar mpaabɔ na akɔnkye a ɔtaa kɔ do kã ho no, bɔto wo dɔ ma Agyenkwa no mu na ɔahyɛ wo gyedzi na pɛ dɛ ibonu woho dzen na ahobrɛadze mu ara edze w’akoma ama Nyankopɔn. Susu mfatoho yi fi Nephi hɔ: “Ntsi, musũi frɛɛ Ewuradze; na hwɛ ɔbaa me nkyɛn, na ɔbɔdwedwee m’akoma ma megyee nsɛm nyinara a m’egya kãe no dzii.”
Ber a yɛkɔ do dze hɛn pɛ pa na ndzeyɛɛ tsenenee nyɛn gyedzi aba no, yebenya akoma mu ahosan kor noara a Nephifo no nyae no: “Wɔfaa akɔnkyen na wɔbɔɔ mpaa mpɛn pii, na wonyaa ahoɔdzen mu ahoɔdzen wɔ hɔn ahobrɛadze mu, na wonyaa gyedzi a otsim wɔ Christ mu, iyi maa dɛw na awerɛkyekyer hyɛɛ hɔn akra mã, nyew, ɔtseew hɔn akoma mu na ɔmaa hɔn ahosan so mpo, dɛm ahosan yi bae osiandɛ wogyaa hɔn akoma mu maa Nyankopɔn.”
Otsĩa Ebien, Fa Wo Pɛ Bata Ne Dze ho
Agyenkwa no kyerɛkyerɛɛ dɛ, “Sɛ hom dɔ me a, hom ndzi me mbrasɛm do.” Ɔto nsa frɛ hɛn dɛ yɛnkyerɛ hɛn dɔ ber a yɛreyɛ na yerisie ahyɛmudzi a yɛnye No yɛ no. Ber a yɛper dabiara dɛ yebedzi Ne mbrasɛm do, nokwar muara yenu hɛnho fi hɛn bɔn ho, na yɛkɔ do per dze ne dzin to hɛn do na yɛdze hɛn pɛ bata Ne pɛ ho no, wobotum dze Sunsum Krɔnkrɔn no ne daa daa anyɛnkoyɛ no ehyira hɛn.
Nephi dzii dase dɛ, “Minyim dɛ sɛ hom yi hom akoma mu nyina kã Ɔba no do, na dɛ hom remmfa ndabraba nye ndaadaa nnkɔ Nyame enyim, na mbom dɛ hom dze nokwardzi, hom bonu hom ho wɔ hom bɔn ho, na hom edzi dase akyerɛ Egya no dɛ hom pɛ dɛ hom fa Christ ne dzin to hom do, wɔ enuma mu … , ɔno na hom benya Sunsum Krɔnkrɔn no.” Sunsum krɔnkrɔn no bɔweɔn wo na Ɔaboa wo ma ehu Ewuradze ne pɛ na afa dza oye.
Odzi Ewiei, Fa W’akoma Nyina Som Nyankopɔn na Binom
Agyenkwa No to nsa frɛ obiara dɛ “hom mfa hom akoma nyina nsom no.” Sɛ yɛfa dɛ yɛbɛyɛ adze kor biara a Ewuradze akã dɛ yɛnyɛ—tse dɛ yeridzi ne mbrasɛm do, yɛrefa sacrament, yɛrosɔr wɔ temple, na yɛrosom binom—a yɛdze nokwar akoma na yɛapra hɛn yamu no, ɔsom na asɔryɛ kor biara bɛyɛ sunsum mu sũahu a tum wɔ mu a ɔhyɛ hɛn gyedzi na dasee dzen na ɔdze dɛw na ɔdɔ ma Nyankopɔn na hɛn nyɛnko nyimpa hyɛ hɛn akoma mã.
Nkɔnhyɛnyi Alma n’asɛmbisa no da ho gyegye ndɛ: “Ana Nyankopɔn awo hom wɔ sunsum mu? Ana no su da edzi wɔ hom enyim? Ana hom enya dɛm nsakyer kɛse yi wɔ hom akoma mu?”
Nuambanyin na nkyerɛbaa, moto nsa frɛ hom dɛ hom mfa hom akoma mu nyina mma Agyenkwa no ndɛ. Hom mma asɔryɛ na ɔsom ndzeyɛɛ kor biara nyɛ nokwar na enyidaho dze. Hom mfa wiadze ne ndanenyi no nsi nkyɛn na hom mper nnya mber pa mma Ewuradze wɔ hom abrabɔ mu dabiara. Hom nnu hom ho na hom nsan mfa hom akoma nyina mbra Ne nkyɛn na Ɔdze No dɔ abasa no botwa hom ho ehyia. Mma hom nnhwehwɛ wiadze ndzɛmba, mbom hom nsan mu nyi dɛ hom dze hom enyi betsim N’enyimnyam nko do na hom ahwehwɛ ndzɛmba a ofir bea pa. Onyim w’adwendwen na w’akoma n’apɛdze, na ber a eba No hɔ no, Ɔdze ahoɔdzen, ahwerɛhyɛmu, asomdwee, na dɛwdzi wɔ abrabɔ yi mu na bea wɔ Ne celestial ahenman mu behyira wo afeebɔ.
Minyim dɛ Jesus Christ tse ase. Ɔno nye hɛn Pomfo. Na Ɔdze N’akoma nyina dɔ emi na ɔwo. Wɔ Jesus Christ ne dzin mu, amen.