Hom Nye Nyankopɔn Nkã Mbɔ Mu

Mber a musũa kyerɛwsɛm no, muhu nsɛmfua a wohia, tsitsir ara osiandɛ wɔwɔ mfaso soronko osian sũahu horow a menya no wɔ m’abrabɔ mu no nsunsuando ntsi. Meyɛɛ m’abrabɔ edwuma dɛ sikasɛm nhwehwɛmunyi a ɔawea. Mikitsa dɛm nyimdzee no, kasafua mbɔ mu ayɛ me ehiadze ber a mekenkaan kyerɛwsɛm no. Nna m’edwuma nye dɛ medze sika dodow a wɔabɔ ho amandzɛɛ na sika a wɔakyerɛw totoho na medze nkontaabu nhyehyɛɛ a ɔfata, na nhwehwɛmu edwindze dzi ho dwuma. Merekã no bio a, nna mo botae nye dɛ medze sikasɛm amandzɛɛ no bata sikasɛm nkrataa no ho no mohwɛ no yie dɛ wɔayɛ pɛɛpɛr na woedzi mu. Nna medze enyiber bɔ mbɔdzen dɛ mebesiesie esintɔ, na nna ɔnntɔ kã dɛ mutu mber mapã si hɔ dze siesie esintɔ nketsenketse mpo.

Ɔsomafo Paul totɔe serɛɛ Corinthfo no dɛ wɔnye “Nyankopɔn mbɔ mu.“ Yɛnye Nyankopɔn bɔbɔ mu kyerɛ dɛ wɔdze hɛn bɛsan aba ma yɛnye Nyankopɔn asaa, anaa yɛnye Nyankopɔn nkitahodzi a no mu atwe anaa osian hɛn bɔn na ndzeyɛe ntsi woebubu no bɛsan ananmu esiesie. Yɛrekã no tsiabaa a, yɛnye Nyankopɔn robɔ mu kyerɛ dɛ yɛdze hɛn pɛ na ndzeyɛe rebata Nyankopɔn ne pɛ ho anaa dɛ mbrɛ President Russell M. Nelson, kyerɛkyerɛɛ no, yɛbɛma Nyankopɔn edzi nyim wɔ hɛn abrabɔ mu.

Dɛ mbrɛ wɔkyerɛkyerɛɛ wɔ kyerɛwsɛm mu no dɛ, hom wɔ fahodzi a homara hom dze yɛ hom biribi, “dɛ hom bɛsan mu afa daapem owu kwan no anaa onnyiewiei nkwa kwan no.” Naaso sɛ hɛn enyi ammber a, fahodzi a hɛnara yɛdze bɛyɛ biribi no botum egya hɛn ma yɛnnkɛfa hɛn pɛ abata Nyankopɔn ne pɛ ho.

Nkɔnhyɛnyi Jacob kyerɛkyerɛɛ dɛ sɛ yehu hɛnho dɛ yɛnye Nyankopɔn nnyɛ kor anaa yɛmmbata No ho a, kwan kor pɛr a yebotum enya nkabɔmu nye dɛ “yebodua Christ No werdambɔ no do yɛnye [Nyankopɔn] akã abɔ mu.“ Otwar dɛ yehu dɛ nkabɔmu dan ehumbɔbɔr, a ɔkyerɛ dɛ Jesus Christ no werdambɔ enyimnyam nyɛe no ma nkabɔmu yɛ yie.

Ber a edwendwen woara w’abrabɔ ho no, dwen mber a etsee nkã dɛ enye Ɔsor Egya hɔn ntamu awar osiandɛ etwee woho fii No ho. Mfatoho, ibia egoow w’enyiber a edze bɔ mpaa ma No mu anaa wɔ irisie Ne mbrasɛm mu no. Dɛmara dɛ yɛsan mu yi dɛ yɛbɔtwe hɛnho efi Nyankopɔn ho no, otwar dɛ yɛsan mu yi dɛ yebedzi kan abɔ mbɔdzen nye no abɔ mu. Ewuradze tsĩi hɛn asodzi mu mber a Ɔkãa dɛ, “Hom ntwe mbɛn me na mobɔtwe abɛn hom; hom nhwehwɛ me enyiberdo na hom bohu me; hom mbisa na hom nsa bɛkã; hom mbɔ mu, na wobobue ama hom.”

Agyenkwa no si dɛn boa hɛn ma yɛdze nkitahodzi a ohia yi san ananmu na yɛka bɔ mu? Emi dze, menya kankɔ kɛse wɔ m’akwantu mu dɛ menye Nyankopɔn bɔbɔ mu sɛ midzi afotu a President Nelson kyerɛkyerɛɛ do na munu moho da biara a. Siantsir no nye dɛ nkabɔmu kyerɛ nkitahodzi a ɔasɛe ne nsanananmu, tsitsir ara wɔ adasa na Nyankopɔn ntamu, ber a yeriyi bɔn n’akwansiwdze efi hɔ.

Nkabɔmu horow akɛse no mu kor a yɛkenkan ho asɛm wɔ kyerɛwsɛm mu nye Enos ne dze. Nna biribi a ɔwɔ n’abrabɔ mu no mma ɔnye Nyankopɔn nnsaa. Otuu anamɔn dɛɛ ɔredan Jesus Christ no Werdambɔ no nye Nyankopɔn ayɛ nkabɔmu. Ɔkyerɛkyerɛɛ ne pɛ dɛ obonu noho mu, n’ahobrɛadze, dza otsim do, na n’enyimpisi mu. Ɔnye Nyankopɔn nkabɔmu no wosii no pi mber a ɔtsee dɛ ndze aba no hɔ, see dɛ, “Enos wɔdze wo bɔn akyɛ wo, na wobehyira wo.” Enos hun nsusuando a nnuhu na nkabɔmu nyaa wɔ no do mber a ɔkãa dɛ, “Na emi, Enos, minyim dɛ Nyankopɔn nndzi ator; dɛm ntsi wɔpepaa m’afɔdzi.“

Nkabɔmu no nsunsuando nnyɛ ahomgye fi afɔdzi mu nko, ɔsan ma yenya asomdwee wɔ hɛn mu na yɛnye binom so nya asomdwee. Ɔsa nkitahodzi yarba, ɔgow akoma, na ɔhyɛ hɛn osuanyiyɛ dzen, a ɔdze awerɛhyɛmu mbordo wɔ Nyankopɔn enyim ba. Dza ɔma me enyidado na awerɛhyɛmu kɛse nye nkabɔmu n’aba kor so a Enoa kãa ho asɛm mber a ɔkãa dɛ, “Na emi, Enos, metsee dɛm nsɛm yi ekyir no, me gyedzi hyɛɛ ase dɛ oritsim wɔ Ewuradze mu.“

Mber a nna meyɛ banyimba no, nna me maame afamu nanabanyin wɔ cherry eduaba haban kɛsenara. Menyaa kwan kɛyɛɛ edwuma wɔ haban no mu, ɔtaa dɛ wɔ ɔhyewber mu wɔ cherry eduaba ne buber no. Dɛ banyimba kakraba koraa no, muhun dɛ nna m’edwuma nye dɛ wɔma me bokitsi na wɔsoma me dua kor no sor ma metsetsew cherry eduaba no.

Cherry eduaba ne ntsetsewee no sesaa koraa mber a nanabanyin tɔɔ efir a nna wɔfrɛ no cherry eduaba awosow awosow. Nna efir no suo dua no ne mfinimfin na ɔwosow no, a ɔma cherry eduaba no tsetsew gu eboa a wɔdze sosɔw cherry eduaba no do. Muhun dɛ sɛ awosow awosow efir no hyɛ ase dɛ ɔrowosow dua no a, ɔnnkyɛr koraa na cherry eduaba no nyinara atsetsew efi dua no do. Mesanee so hun dɛ ɔmmfa ho sɛ dua no wɔwosow no simaba 10 anaa sima kor a, cherry eduaba no bi runngugu. Nokwar ara dɛ nna wɔwosow hɔn wonngu.

Erowosow cherry eduaba efi dua do yɛ yie osian ethylene a oyi no ntsi. Hormone yi ma cells a wɔwɔ cherry eduaba ne mfɛwee mu na dua ne ntamu no yɛ mberɛw. Dɛm ntsi, ɔnnyɛ dzen dɛ cherry eduaba a ɔaber ne mfɛwee no bɛtsew efi dua no ho osian nkitahodzi a wɔayɛ mberɛw no ntsi.

Kyerɛwsɛm mu no, yesũa dɛ Jesse no Dunsin no yɛ mfatoho ma Messiah, Jesus Christ, a wɔhyɛɛ no ho nkɔm dɛ obefi Jesse, Ɔhen David n’egya n’ebusua mu aba no. Dɛmara dɛ ethylene ma cherry eduaba a wɔaber ne mfɛwee nkitahodzi a ɔnye dua no wɔ yɛ mberɛw no, asowadzen, ekyingye na suro botum ama nkitahodzi a yɛnye Jesse no dunsin, anaa Jesus Christ wɔ no aayɛ mberɛw, na waɔma kwan ma hɛn wosowee nnkɛyɛ dzen na yɛapaa hɛnho efi No ho. Dɛ mbrɛ hɛn nokwardzi tse biara no, otwar dɛ yekwetsir dɛ hɛn nkitahodzi a yɛnye Jesus Christ wɔ no bɛyɛ mberɛw.

Nkyerɛkyerɛ na Ahyɛmudzi mu no, anokwafo no mpo wɔbɔ hɔn kɔkɔ dɛ: “Mbom, obotum aba dɛ nyimpa bɔhwe ase efi adom no ho na oefi Nyame tseasefo no ne nkyɛn.” Ewuradze kɔ do dɛ, “Nyew, … hom mma hɔn a wɔatsew hɔnho no so mpo nhwɛ yie.” Ama yeekwetsir asehwe no, Ewuradze tu fo dɛ, “Dɛm ntsi, hom mma asɔr no nyɛ ahwɛyie na ɔmbɔ mpaa da biara, amma wɔannkɔ nsɔhwɛ mu.”

Obi botum dze gyinabew a inngyina pintsinn no ato dza kyerɛwsɛm kã ho asɛm dɛ irinyin ama ɔsɛɛ a nyɛe no nsunsuando a ɔreba kã ho. Wobotum so dze asɛnsin no akã no yie ara ma wɔakyerɛ ɔsɛe, prowee, anaa ɔtsewhwe a ɔma biribi n’asehwe anaa ne sɛɛe da edzi.

Inyinii yi gyina hɔ ma ebɛnadze? Ana ɔkyerɛ dɛ yebotum ekodu beebi a yennkotum asesa a? Oho, ibia ɔkyerɛ dɛ yebotum ekodu beebi wɔ mber bi mu a yennkenya pɛ dɛ yɛbɛsesa. Yebenyin ama ɔsɛɛ n’ano edur nye dɛ yɛbɛyɛ ndzɛmba a ɔbɛhyɛ yɛnye Jesus Christ ntamu nkitahodzi dzen. Dɛ mbrɛ wɔakã no, nnuhu gyaa Enos ma ɔhyɛɛ ne gyedzi dzen. Ahoɔdzen wɔ nnuhu mu—daa daa, ntsɛmara, na ntaataado nnuhu. Dɛ mbrɛ President Nelson kyerɛkyerɛɛ hɛn no: “Biribiara mma ahotɔ, mma nkamfo, anaa onnhia tsitsir mma hɛn ankorankor mpontu nnkyɛn dɛ daa daa yebesi hɛn adwen pi wɔ nnuho do.”

Dza ɔkã yɛrobɔ nnuhu dawur ho no, nkɔnhyɛnyi Jacob kyerɛkyerɛɛ dɛ yeruhu Nyankopɔn ne nsa wɔ hɛn abrabɔ mu, yɛrohwehwɛ nyikyerɛ na yerinya, na yeretsie Nyankopɔn mber a Ɔrekasa no nyina boa hɛn ma yennhinhim. Jacob sanee kyerɛkyerɛɛ dɛ, “Dɛm ntsi, yɛyɛ nkɔnhyɛfo no mpɛnsampɛnsa mu, na yɛwɔ nyikyerɛ pii na nkɔnhyɛ sunsum, na dɛm dasegye yinom nyinara ɔma yenya enyidado, na hɛn gyedzi nnhihim.” Yeretsie na yɛdze nkɔnhyɛfo na asomafo hɔn nsɛm robɔ bra no botum dze enyidado, awerɛhyɛmu, na ahoɔdzen ahyɛ hɛn mã, a no nsunsuando bɛma hɛn gyedzi egyina pintsinn no.

Mesũa dɛ yɛpɛ dɛ yɛnye Nyankopɔn kã bɔ mu no, otwar dɛ yɛpɛ dɛ yebonu hɛnho kã ho. Yerunu hɛnho na yerinya Jesus Christ No Werdambɔ ne nhyira horow no mma hɛn gyedzi nnhihim. Gyedzi a onnhihim ma yenya pɛ aber nyina dɛ yɛnye Nyankopɔn bɛkã abɔ mu. Iyi yɛ nhwɛdo a onngyina fakor.

Nuambanyin na nkyerɛbaa, moto nsa frɛ hom dɛ hom ndua Jesus Christ No Werdambɔ no do nye Nyankopɔn nkã mbɔ mu. Megye dsae dɛ yɛreyɛ ahyɛmudzi horow na yeresie no ma yɛnye hɛn Agyenkwa nkitahodzi no mu yɛ dzen, na dɛm ntsi yekwetsir dɛ yebenyin ama ɔsɛɛ. Megye dase dɛ yɛnye Nyankopɔn nkabɔmu yi, ɔnam Jesus Christ no Werdambɔ do no mma hɛn gyedzi nnhihim.

Minyim dɛ Ɔsor Egya dɔ emi na ɔwo, na, Ɔsomaa No Dɔba, Jesus Christ, dɛ ɔmbɛyɛ hɛn Agyenkwa na Pomfo, na Siesiefo kɛse no. Megye Jesus Christ ho dase na meyɛ dɛmara wɔ Jesus Christ ne dzin mu, amen.