Wɔasɔ Hɛn Ahwɛ na Wɔahyɛ Hɛn Dzen wɔ Christ mu

Mo nuanom na nkyerɛbaa adɔfo, metse Ewuradze no dɔ nkã ber a yɛabɔ mu ehyia yi. Ahobrɛadze mu na menye hom kasa. Mobɔ mpaa dɛ Sunsum no bɔsoa dza Ewuradze bɛpɛ dɛ hom tse no akɔ hom akoma mu, ma wɔabor nsɛm a mebɛkã no do koraa.

Mfe pii a abɛsen kɔ no, mepɛɛ dɛ musũa physics na nkontaabu wɔ m’esũapɔn mber mu no. Minyaa atsenkã dɛ ɔbor mo do. Mehyɛɛ ase nyaa atsenkã dɛ morobɔ mbɔdzen esũa biribi a ɔbor mo do. Mpɛn dodow a menyaa atsenkã dɛ wɔabor mo do no, mpɛn dodow a metsee dɛ m’ahom a medze bɔkɔ do no repa. Abagura gyaa me ma metsee dɛ mo mbɔdzembɔ no rennkesi hwee. Mehyɛɛ ase dween dɛ mebegyae, dɛ menyɛ biribi a ɔyɛ mberɛw.

Minyaa atsenkã dɛ matɔ bahaw. Mokɔr do bɔɔ mpaa no metsee Ewuradze n’awerɛhyɛmu dzinn. Metsee dɛ Ɔrekã gu m’adwen mu dɛ, “Morosɔ wo ahwɛ, naaso Mekã woho so.”

Dɛm aber no nna minnyim dɛm nsɛm no n’asekyerɛ. Naaso nna minyim dza ɔsɛ dɛ meyɛ—meyɛɛ ho edwuma.

Morodwendwen na mereyɛ ho edwuma mfe no a odzi do no, mebaa bɛtsee nkuranhyɛ asɛm yi a ɔwɔ kyerɛwsɛm mu no ase: “Mutum adze nyina yɛ wɔ Christ a ɔhyɛ me dzen no mu.”

Musũaa dɛ aperdzi a menye physics dzii no yɛ akyɛdze ampaara ofi Ewuradze hɔ. Nna Ɔrekyerɛkyerɛ me dɛ medze No mboa no, mubotum ayɛ ndzɛmba a ɔyɛ dɛ mbrɛ wonnkotum ayɛ sɛ mowɔ gyedzi dɛ Ɔbɔwɔ hɔ aboa me a. Ɔnam akyɛdze yi mu no, nna Ewuradze ridzi dwuma dze asɔ me ahwɛ na Ɔahyɛ me dzen.

Nsɛmfua sɔ hwɛ wɔ nkyerɛasee pii. Erosɔ biribi ahwɛ nnyɛ ereyɛ no nsɔhwɛ ara. Ɔyɛ erotow n’ahoɔdzen mu. Erosɔ daadze-steel ahwɛ nye edze adze bi hom do. Wɔdze hyew, adze dur, na womia do ara yie kã ho kesi dɛ no su nya ahoɔdzen yie na ɔda edzi. Wɔrosɔ daadze-steel ahwɛ mma ɔnnyɛ mberɛw. Nokwar, ɔba bɛyɛ biribi a ibotum enya ho awerɛhyɛmu, biribi a ɔwɔ ahoɔdzen a obotum asoa adzesoadze kɛse.

Ewuradze sɔ hɛn hwɛ wɔ dɛm kwan noara do dze hyɛ hɛn dzen. Dɛm nsɔhwɛ no mmba wɔ mber a ɔyɛ ahomgye anaa ahotɔ mu. Ɔba wɔ mber a yenya atsenkã dɛ wɔãtwe hɛn mu ara yie ma wɔatra dza yɛdwen dɛ yebotum asɔw. Ewuradze kyerɛkyerɛ hɛn dɛ ɔsɛ dɛ yɛkɔ do nyin na yɛmmbrɛ wɔ hɛn mbɔdzembɔ mu, dɛ yennkegyaa dabiarada, dɛ yɛbɔbɔ mbɔdzen akɔ do.

Sɛ yɛkɔ do nya gyedzi wɔ Jesus Christ mu a—mber mpo a ndzɛmba bɛyɛ hɛn dɛ mbrɛ onnkotum ayɛ yie no—yebenya sunsum mu ahoɔdzen ara yie. Kyerɛwsɛm krɔnkrɔn nkyerɛwee tsĩ dɛm nokwar yi mu.

Mfatoho, Moroni nkɔnhyɛnyi no, wɔsɔɔ no hwɛe na wɔhyɛɛ no dzen wɔ dɛm kwan yi do. Odzii ne nda a odzi ewiei no wɔ ankonamyɛ mu. Ɔkyerɛɛw dɛ onnyi anyɛnkofo, dɛ woekum n’egya, dɛ wɔasɛɛ no nkorɔfo. Hɔn a wɔrohwehwɛ no nkwa no tsiiw no.

Naaso Moroni ennya abagura. Mbom, okrukyee ne dasegye wɔ Jesus Christ ho wɔ mprɛtse do ama nkorɔfo a orunnhu hɔn wɔ nkwa mu no, a nkorɔfo a wɔpɛ ekum no hɔn mbasantsen kã ho. Ɔkyerɛwee maa hɛn. Nna onyim dɛ binom besi ne nsɛm ho atwetwe. Onyim dɛ binom bɔpow. Naaso ɔkɔr do kyerɛwee.

No nsɔhwɛ mu no, wɔdze tseew Moroni ne gyedzi ho na wɔhyɛɛ no dzen. Ɔbɛyɛɛ krɔngyenn ara yie. Ne nsɛm wɔ tum a onyia a ɔasɔw akɔ ewiei nokwar mu wɔ. Yebotum atse dɛm tum no ber a yɛkenkan ne dasegye no:

“Afei emi, Moroni, merekyerɛw dza muhu dɛ oye; na merekyerɛw dze ama m’enuanom Lamanfo, na mepɛ dɛ wohu dɛ ber a woyii Christ ne mbaa ho nsɛnkyerɛdze kyerɛe no, bɛyɛ mfe ahaanan eduonu na no mboree botwaa mu koree ana.

“Na sɛ mekã nsɛm kakra bi a ɔbɛyɛ afotu ama hom wie a mobɔsɔw dɛm kyerɛwsɛm yi ano.

“Hwɛ, mutu hom fo, dɛ sɛ hom kenkan dɛm ndzɛmba yi, na sɛ ɔyɛ Nyame ne nyansaa dɛ hom kenkan a, hom nkaa mbrɛ Ewuradze n’ehumbɔbɔr a ɔwɔ ma adasamba no tse, fitsi ber a wɔbɔɔ Adam mpo dze besi ber a hom nsa bɛkã dɛm ndzɛmba yi na hom adwendwen ho wɔ hom akoma mu.

“Na ber a hom nsa bɛkã dɛm ndzɛmba yi no, mutu hom fo dɛ hom mbisa Nyankopɔn, Onnyiewiei Egya no, wɔ Christ ne dzin mu, dɛ sɛ dɛm ndzɛmba yinom nnyɛ nokwar a; na sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.

“Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.”

Moroni ne dasegye wɔtseew ho wɔ ankonamyɛ mu, naaso ɔdze kan hyerɛn dze ayɛ kwankyerɛ ama ebusuasantsen dze aahwehwɛ hɛn Egya a ɔwɔ Sor na Agyenkwa Jesus Christ.

Mormon Nwoma nkɔnhyɛnyi kor so, Jacob, wɔsɔɔ no hwɛɛ na wɔhyɛɛ no dzen ber a ɔyɛ abofra na ɔsɔɔw obene na odzii awerɛhow pii. Mbom n’egya, Lehi, kyerɛkyerɛɛ no dɛ Nyankopɔn bodua no nsɔhwɛ horow mu ehyira no.

“Na hwɛ, wo mbafobermu asɔw obene na edzi awerɛhow pii, osian wo nuanom hɔn ntsɛn ntsi.

Naaso, kwan biara do no Jacob, m’abakan wɔ sar yi do, ɔwo inyim Nyankopɔn ne kɛseyɛ; na obehyira wo wɔ w’amandzehu mu ma eesi wo yie.

“Dɛm ntsi, wobehyira wo kra, na enye wo nua Nephi bɛtsena asomdwee mu; na edze wo nkwa nda nyinara bɔsom wo Nyankopɔn. Dɛm ntsi, minyim dɛ wɔapon wo, osian wo Pomfo ne ndzeyɛɛ tsenenee ntsi; agye ato mu dɛ mber bi bɛba a ɔdze nkwagye bɛbrɛ adasa.”

Joseph Smith Nkɔnhyɛnyi no hyiaa dɛm nsɔhwɛ na dzenhyɛ yi ber a ɔwɔ Liberty Efiadze no. N’ahohiahia no bun mu no, Joseph Smith Nkɔnhyɛnyi no sũi:

“O Nyankopɔn, ewɔ hen? …

“Ibesianka wo nsa ekodu dabɛn?”

Ewuradze hun wɔ Joseph n’amandzehu mu no dɛ ɔrosɔw no yie no nsunsuando no retsew no ho ber a Obuaa dɛ:

“Me ba, asomdwee nkã wo kra; w’akotorka na w’amandzehu na ɔnnkɛkyɛr;

“Na afei, sɛ esɔw no yie a, Nyankopɔn bɛma wo do wɔ sor; na ibedzi konyim wɔ w’atamfo nyina do.”

Fasusu mapã wɔ erosɔw nsɔhwɛ na ɔrehyɛ wo dzen ho, sii wɔ Agyenkwa No Werdambɔ no mu. Ɔdze wiadze bɔn too Nankasa no ho do. Ɔfaa hɛn yaw na hɛn awerɛhow. Ɔnoom kuraba wenwen no. Odzii nokwar mber nyinara.

Osian N’enyimnyam Werdambɔ no ntsi, Jesus Christ botum ahyɛ hɛn dzen wɔ hɛn nsɔhwɛ ber mu. Onyim mbrɛ obesi aboa hɛn osiandɛ Ɔatse yaw nyina a yɛbɛtse pɛn wɔ honandua mu. “Ɔbɛfa no nkorɔfo hɔn yaw nye yarba ato noho do … ama ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse no.”

Yesũa dɛ ber a Ɔwɔ Gethsemane Ture mu no, Agyenkwa no serɛɛ Egya no sɛ nsɔhwɛ no bɛpa Noho akɔ a—mbom nkyii Ɔkãa so dɛ sɛ ɔyɛ Egya no pɛ a, Ɔno Agyenkwa no bɛyɛ. Sɛ yɛrekã a, Agyenkwa no mpo dua ekyingye na Onnyim dza ɔbɛba mu, naaso Onyaa gyedzi wɔ No Ɔsor Egya mu.

Enuanom na nkyerɛbaa, hom nsɔhwɛ na dzenhyɛ no bia ɔnnkɛyɛ tse dɛ Moroni anaa Jacob anaa Joseph Nkɔnhyɛnyi dze no. Mbom ɔbɛba. Bia a ɔbɛba dzinn, edua ebusua abrabɔ nsɔhwɛ horow mu. Bia a obodua yarba anaa abagura anaa awerɛhowdzi anaa ankonamyɛ mu aba.

Megye dase dɛ mber yinom mu nnyɛ adanse dɛ Ewuradze apa wo. Mbom, wɔyɛ adanse dɛ Ɔdɔ wo ara ma Ɔbɛtsew woho na Ɔahyɛ wo dzen. Ɔrema enya ahoɔdzen a ɔbɔsõ ma edze asoa onnyiewiei nkwa no mu dur no.

Sɛ yɛkɔ do dzi nokwar wɔ hɛn som mu a, Ewuradze bɛtsew hɛnho. Ɔbɛhyɛ hɛn dzen. Na dakor, yɛbɔhwɛ hɛn nkyir na yeehu dɛm nsɔhwɛ horow noara dɛ wɔyɛ No dɔ ho adanse. Yebohu dɛ nna Ɔrowen hɛn ama yeetum yɛnye no egyina wɔ enyimnyam mu. Dɛ mbrɛ Ɔsomafo Paul kãa wɔ nankasa n’abrabɔ ewiei no, “Makõ ɔkõ pa no, mewie mbirika no tu, mesuo gyedzi no mu esie.”

Megye dase dɛ Nyame nyim hom. Onyim nsɔhwɛ horow a hom hyia. Ɔnye hom wɔ hɔ. Ɔremmpa hom. Megye dase dɛ Jesus Christ nye Nyame Ne Ba no; Ɔyɛ hɛn ahoɔdzen, hɛn Pomfo, na hɛn enyidado. Sɛ yɛtwer No a, Ɔbɛma hɛn sunsum mu tum a obotum edzi nsɔhwɛ biara a yɛsoa do. Megye ho dase wɔ Jesus Christ ne dzin krɔnkrɔn no mu, amen.