Obiara No Nko Nntsena

Mfe 50 nye yi, mesũa kusum, a asɛmpa kusum kã ho. Medze akradze borɔtow hyɛɛ ase.

San Francisco ne Chinatown hɔ no, Gong ebusua no dze akradze borɔtow na enyansasɛm bi tse dɛ “Akwantu war dɛnara, ɔdze anamɔn kor hyɛ ase” dze wie hɔn ewimbir edzidzi.

Meyɛ aberantsɛba no, nna meyɛ akradze borɔtow. Mehyɛ nsa kotoku efufuw no, mimiamia borɔtow ahyeehyew no fi fononoo no mu yɛ no nkrukruba.

M’ahobow mu no, musũae dɛ ahyɛse no nna akradze borɔtow nnkã Chinafo hɔn kusum ho. Ama meehu nsonsonee a ɔda Chinafo, Americafo, na Europefo akradze borɔtow kusum ntamu mu no, mohwehwɛɛ akradze borɔtow fi asaasetɔw asorɔtow do—dɛmara dɛ obi dze mbea asorɔtow bedzi dwuma bohu bea pɔkyee a kwaa mu ogya no wɔ. Chinafo edzidzi mbea a wɔwɔ San Francisco, Los Angeles, na New York no tɔn akradze borɔtow na dza wɔwɔ Beijing, London, anaa Sydney no nntɔn bi. Americafo nko na wodzi Ɔman Akradze Borɔtow Da afahyɛ. Chinafo hɔn guadzi dawurbɔ nko na wɔma “Americafo Akradze Borɔtow Apapa.”

Akradze borɔtow yɛ enyika, fasusu a ɔnnyɛ dzen. Mbom fapem ntotoho kor noara fa nyɛe wɔ kusum tsebew nsonsonee mu no botum aboa hɛn ma yeehu asɛmpa kusum mu. Afei Ewuradze rubuebue akwanhorow afofor sesei a yɛdze bosũa asɛmpa kusum dɛ mbrɛ Mormon Nwoma ntotohosɛm na Ahyɛmu Fofor abɛbusɛm nkɔnhyɛsɛm rehyɛ mã no.

Nkorɔfo rutu wɔ beebiara. Wiadze Amansan Kuw no kã mbea nyina etukɔrfo ɔpepe 281 ho asɛm. Iyi yɛ ankorankor ɔpepe 128 a wɔbor afe 1990 na mbɔho ebiasa wɔ afe 1970 nsusui no. Beebiara no, nsakyereefo bebereebe rohwehwɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no. Ahomgyeda biara no, asɔrmba na anyɛnkofo fi hɔn awoe amanaman 195 mu na nkwaado boa ano wɔ 31,916 Asɔr mboanofo mu. Yɛkã kasa ahorow 125.

Ndaansa yi wɔ Albania, Macedonia Etsifi, Kosovo, Switzerland na Germany no, muhun asɔrmba afoforfo a wɔrehyɛ Mormon Nwoma ntotohosɛm fa ngodua ho no mã. Jacob 5 mu no, wenyin ture no Wura na no nkowaa hyɛ ngodua no ndwow na nkorbata no dzen ber a wɔboaboa hɔn ano na wɔdze hɔn a wofifi mbeambea ahorow no bɔ mu hyehyɛ mu. Ndɛ Nyankopɔn ne mba boa ano kor wɔ Jesus Christ mu; Ewuradze ma ɔdomankoma akwan nwanwa a yɛbɛtserɛw na yɛatse N’asɛmpa a wɔdze asan ananmu aba no ase na yɛdze bɔ bra no mu.

Orisiesie hɛn ama sor ahenman no, Jesus kã aponto kɛse na ayeforhyia abɛbusɛm no. Abɛbusɛm yinom mu no, ahɔho a wɔtoo nsa frɛɛ hɔn no maa anoyi dɛ wonnkotum aba. Owura no see no nkowaa no dɛ “fir edzi ntsɛm kɔ kurow mu abɔntsen nye nsaaba mu” na “akwantsen nye ban mu” na “kɛfa” ehiafo, nye epirafo, nye enyifurafo, nye mpakye “bra ha.” Yɛrekã no sunsum mu a, ɔno yɛ hɛn mu kor biara.

Kyerɛwsɛm paa mu kã dɛ:

“Wɔato nsa afrɛ aman nyina wɔ” “edzidzi wɔ Ewuradze fie.”

Hom nsiesie Ewuradze no kwan … ama n’ahendzi atserɛw wɔ asaase do, ama hɔn a wɔtse do no aagye, na hom nsiesie homho mfa mma da a ɔreba no.”

Ndɛ hɔn a wɔato nsa afrɛ hɔn wɔ Ewuradze edzidzi no fi bea biara na kusum biara mu. Mpanyin na mbofra, sikanyi na bɔbɔfo, apaamu na wiadze nyina no, yɛma hɛn Asɔr mboanofo no yɛ tse dɛ hɛn sɔn horow.

Dɛ Ɔsomafo panyin no, Peter hun sor a oebue enyido-adzehu fa “abradaa kɛse a wɔakyekyer no etwaanan … no mu na … mbowa nyina bi wɔ.” Peter kyerɛkyerɛɛ dɛ: “Nokwar ara mehu dɛ Nyankopɔn nnhwɛ nyimpa enyim. … Ɔman biara mu nyia osuro [Ewuradze no], na ɔyɛ ndzeyɛtsenenee no, ɔpɛ dɛ ɔgye no.”

Samarianyi yamuyiefo n’abɛbusɛm mu no, Jesus to nsa frɛ hɛn dɛ yɛmboa hɛnho nkorkor na ma Ɔno wɔ N’ahɔhodan mu—N’Asɔr. Ɔto nsa frɛ hɛn dɛ yɛnyɛ anyɛnkofo ayamuyiefo. Samarianyi yamuyiefo no bɔɔ anohoba dɛ ɔbɛsan aba bio na oebotua hɔn a wɔhwɛɛ hɔn wɔ N’ahɔhodan mu no kaw. Erema obiara kwan wɔ N’Asɔr a wɔdze asan ananmu aba no kã yɛdze Jesus Christ n’asɛmpa no robɔ bra ho.

“Kwan wɔ ahɔhodan mu hɔ” sunsum no “obiara no nko nntsena” kã ho. Sɛ eba Asɔr, sɛ ihu obi no nko a, meserɛ ibotum akã hello na atsena ne nkyɛn a? Ibia iyi nnyɛ wo ntɔyɛɛ. Ibia nyimpa no hwɛbea anaa ne kasae yɛ soronko sen wodze. Na, nokwar, tse dɛ mbrɛ akradze borɔtow botum akã no, “Asɛmpa anyɛnkofa akwantu na ɔdɔ dze hello a odzi kan na obiara no nko nntsena hyɛ ase.”

“Obiara no nko nntsena“ kyerɛ so dɛ obiara no nko nntsena nkãtse mu anaa sunsum mu. Menye egya bi a nna oridzi yaw kɛseraa ne babanyin. Mfe a abasen no, nna babanyin n’enyi gye dɛ ɔbɛyɛ deacon fofor. Ber no nna dza ɔkã ho nye dɛ ebusua no bɔtɔ n’asopaatsee afofor a odzi kan ama no.

Naaso, deaconfo a wɔwɔ asɔr no sereew no. Nna n’asopaatsee no yɛ afofor, naaso ɔnnyɛ dza wɔaba do. Enyimguase na yaw mu no, deacon kakraba no kãa dɛ ɔronnkɔ Asɔr bio dabiarada. M’akoma da ho dzi yaw ma ɔno na n’ebusua.

Jericho huntuma kwan no do no, wɔaserew hɛn mu kor biara, woegu hɛn enyim ase na yeedzi yaw, ibia woesi hɛn atwetwe anaa woebu hɛn enyimtsia. Na, yɛdze botae mpɛnpɛndo asorɔtow no, hɛn mu kor biara so emmbu binom, ennhu anaa yenntsie hɔn, ebia yɛdze enyidaho afom binom. Osiandɛ yenyim pɔkyee dɛ obi afom hɛn na hɛn so yɛafom binom ntsi na Jesus Christ dze hɛn nyinara ba N’ahɔhodan mu no. N’Asɔr mu na ɔnam N’ayɛdze na ahyɛmudzi horow do no, yehu Jesus Christ na hɛnho nkorkor. Yɛdɔ na wɔdɔ hɛn, yɛsom na wɔsom hɛn, yɛdze bɔn kyɛ na yenya bɔnfakyɛ. Meserɛ kae dɛ, “awerɛhow biara nyi asaase a sor nnkotum asa yarba”; asaase adzesoadze bɛyɛ har—hɛn Agyenkwa n’enyigye yɛ nokwar.

1 Nephi 19 mu no, yɛkenkan dɛ: “Israel Nyankopɔn noara mpo [wɔdze] hɔn anan tsiatsia no do; … wommbu no bi. … Na wɔahwe no abaa, na oehu amandze; na wɔabɔ no asotɔr, na ɔbɛpen do. Nyew, wobehima no ntafi, na ɔbɛpen do.”

Me nyɛnko Professor Terry Warner kã dɛ atsɛmbu, abaahwe, sotɔrbɔ, na ntafi hima no yɛ adze a nna osi, nnyɛ wɔ Christ no ɔnnkyebo abrabɔ mu nko. Mbrɛ yesi hwɛ hɛnho nkorkor—nkanka nyia ɔkɔm dze no, nsukɔm dze no, nyia a oegya ɔno nko—nye mbrɛ yesi hwɛ No.

N’Asɔr a wɔdze asan ananmu aba mu no, hɛn nyinara yenya ahomka sɛ obiara no nko nntsena a. Mma hom mma yɛmma wɔmmbɛkã ho ara anaa yɛnngye hɔn ara. Hom mma nokwar mu ara yɛnka hɔn mfua, yɛngye hɔn nto mu, yɛnsom hɔn, na yɛndɔ hɔn. Mma hom mma nyɛnko, akyerɛbaa, nuabanyin biara nnkɛyɛ mamforanyi anaa ɔhɔho mbom abofra wɔ fie.

Ndɛ, dodow na wɔtse ankonamyɛ nkã na wɔtsew hɔnho. Social media na artificial intelligence botum dze ndaadaa ayɛ ma yɛadwen dɛ yɛnye binom wɔ anyɛnkofa na nkãtse mu nkitsahodzi. Yɛpɛ dɛ yɛtse obiara ne ndze. Yɛpɛ nokwar mekãho na ayamuyie.

Siantsir pii wɔ hɔ a yebotum atse nkã dɛ yɛnnkã asɔr no ho, yɛrekã no enyidzi mu a, hɛn nko na yɛtsena. Hɛn kasa ndze, efuradze, ebusua gyinabew botum ahaw hɛn. Ibia yɛtse nkã dɛ yɛnnsomu; wusiw bɔn hɛnho; yɛper hwehwɛ suban ahotsew; yɛnye obi egyaa anyɛnkofa na yedzi yaw na hɛn enyim egu ase; dɛm Asɔr nhyehyɛɛ yi anaa kor no haw hɛn. Ibia yedzi sigyaw, yegyae awar, yɛyɛ ekunafo. Hɛn mbofra yɛ dede; yennyi mba. Yɛannsom asɛmpakã dwuma anaa yɛbaa fie ntsɛm. Na pii a ɔkekã ho.

Mosiah 18:21 to nsa frɛ hɛn dɛ yɛmfa hɛn akoma mbɔ mu kor wɔ ɔdɔ mu. Meserɛ dɛ mma hom mma yemmbu atsɛn, yɛnnhaw, yɛnnyɛ ketsee wɔ binom do—na, sɛ okehia a, yemmbu hɛnho atsɛn dzen. Yɛmmfa da kor nnkyekyer Zion. Naaso “hello” kor biara, enyidzi kor biara no, twe Zion bɛn yie. Hom mma yɛntwer Ewuradze yie na yɛnsan mu nyi no enyigye mu ara dɛ yebedzi Ne mbrasɛm nyinara do.

Nkyerɛkyerɛ mu no, wɔ gyedzi fifo mu na Ahotseweefo anyɛnkofa mu no, obiara no nko nntsena osian ahyɛmudzi a yɛkã ho wɔ Jesus Christ mu ntsi.

Nkɔnhyɛnyi Joseph Smith kyerɛkyerɛɛ dɛ: “Wɔaka dɛ yehu, yɛdze hɛnho hyɛ mu na yɛboa porowporow Nda a Odzi Ekyir enyimnyam no ma ɔkɔ kan, ‘mberano ne mãhyɛ no … ,’ ber a wɔbɔboaboa Nyankopɔn n’Ahotseweefo ano ayɛ hɔn kor fi aman, na ebusua, na nyimpa biara mu.”

Nyankopɔn “ɔnnyɛ adze biara gyedɛ dza ɔyɛ mfaso dze ma wiadze; … ama ɔatwe nyimpa nyinara mbanyin [na mbaa] aba no hɔ. …

“… Ɔto nsa frɛ hɔn nyinara dɛ wɔmbra ne nkyɛn mbenya ne papayɛ; … na hɔn nyinara yɛ adze kor ma Nyame.”

Nsakyeree wɔ Jesus Christ mu hia hɛn dɛ yɛpɔr honammunyi no na wiadze kusum no gu. Dɛ mbrɛ President Dallin H. Oaks kyerɛkyerɛ no, ɔwɔ dɛ yegyaa amambra na kusum nyɛe biara a ɔnye Nyankopɔn ne mbrasɛm bɔ ebira no mu na yɛbɛyɛ Nda a Odzi Ekyir Ahotseweefo. Ɔkyerɛkyerɛ mu dɛ, “Asɛmpa kusum bi wɔ hɔ, subanpa gyinapɛn na botae na nyɛe horow bi a ɔwɔ hɔ ma Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba [no] nyinara.” Ahosie, dapɛn dapɛn asɔr nkɔree, ibefi nsa dzen, towa, tsii, na kɔfe ho kã asɛmpa kusum no ho. Nokwardzi na emudzi kã ho; yɛtse ase dɛ yenngyina fakor wɔ Asɔr ɔfrɛ anaa gyinabew mu.

Musũa fi asɔrmba anokwafo na anyɛnkofo hɔ wɔ asaase na kusum biara mu. Kyerɛwsɛm a wosũa no wɔ kasahorow beberee mu na kusum nhumu mu no ma asɛmpa ntseasee no mu dɔ. Christ-su suban horow ne nkyerɛasee ahorow no ma mo dɔ na ntseasee wɔ m’Agyenkwa ho no mu dɔ. Wohyira hɛn nyinara sɛ yɛkyerɛkyerɛ hɛn kusum mu dzin, dɛ mbrɛ President Russell M. Nelson kyerɛkyerɛɛ no, dɛ Nyame ne ba, ahyɛmudzi ba, Jesus Christ no osuanyi.

Jesus Christ n’asomdwee no wɔ hɔ ma hɛn dɛ ankorankor. Ɔnnkyeree na aberantsɛba bi dze enyiber bisaa dɛ, “Elder Gong, meda ho ara botum akɔ heaven a?’’ Ɔdween ho dɛ sɛ obotum enya bɔnfakyɛ da. Mibisaa ne dzin, tsie no yie, meserɛɛ no dɛ ɔnye ne bishop nkedzi nkɔmbɔ, tuii fua no kɛsenara. Ɔdze enyidado wɔ Jesus Christ mu fii hɔ.

Mekãa aberantsɛba noho asɛm wɔ gyinabew bi so mu. Ekyir no minyaa krataa bi a nna dzin nnhyɛ ase na ɔhyɛ ase dɛ, “Elder Gong, emi na me yer atsetse mba baakron … na yɛasom asɛmpakã dwuma ebien.” Naaso “aber nyina nna metse nkã dɛ wɔnnkɛma mo kwan wɔ celestial ahenman mu hɔ … osiandɛ bɔn a meyɛɛ no me mbabun ber mu no muo koraa!”

Krataa no kɔr do dɛ, “Elder Gong, mber a ekãa aberantsɛba no a onya bɔfakyɛ enyidado ho asɛm no, enyigye hyɛɛ me mã, na mehyɛɛ ase hun dɛ ibia [mubotum enya bɔnfakyɛ].“ Krataa no wiei dɛ, “M’enyi mpo gye moho sesei!”

Ahyɛmudzi a yɛkã ho no mu yɛ dzen ber a yɛbɛn hɛnho nkorkor na Ewuradze nkyɛn wɔ N’ahɔhodan mu no. Ewuradze hyira hɛn nyinara sɛ obiara no nko nntsena a. Na woana nyim? Ibia nyimpa a yɛtsena ne nkyɛn no botum abayɛ hɛn akradze borɔtow nyɛnko papaapa. Hom mma ahobrɛadze mu ara yɛnhwehwɛ bea mma Ɔno na hɛnho nkorkor wɔ Ewuradze edzidzi ase, medze m’akoma nyinara serɛ wɔ Jesus Christ ne dzin mu, amen.