Kɔ na Wo So Kɛyɛ Dɛmara
Mebɛpɛ dɛ mekasa nkanka fa asɛmpasomfo a wɔafrɛ hɔn wɔ ɔsom edwuma horow mu. Wɔyɛ fasusu ma hɛn.
Ber a Agyenkwa no rutu kwan a oduaa Bethsaida no, nkorɔfo binom dze onyifurafo bi brɛɛ No. Bia nna wɔrepɛ dze hɔn ara hɔn enyiwa ehu anwanwadze hɔ no ara. Agyenkwa no “[suoo] onyifurafo no ne nsamu dze no fii ekuroba no mu” kɛsaa no yarba wɔ kokoa mu. Ahyɛse no, nna ɔyɛ dɛ ayarsa no annyɛ edwuma papa. Banyin no “[maa] n’enyiwa do, na ɔsee dɛ, Muhu nyimpa, na muhu hɔn tse dɛ ndua nenam.” Ayamuhyehye mu ara, Jesus “[dze] ne nsa guu n’enyiwa do bio, ma ɔhwɛɛ n’enyim tɔɔtsenn.” Agyenkwa no dze ne nsa aka no bio no, onyifuranyi no “hun adze … krɔnn.”
Iyi yɛ fasusu kor ara fa mbrɛ Agyenkwa no n’abrabɔ no ɔsom ndwuma a ɔyɛ ahobrɛadze hyɛɛ mu mã. Ɔkaa hɛn dɛ “Ɔammba ma wɔaasom no, na mbom Ɔbɔsomee” na nkyii ɔto nsa frɛ hɛn dɛ yendzi Ne fasusu do ber a yɛreyɛ pii sen dza woebisa hɛn no, na yɛdze rema hɔnnom a wɔserɛ adze fi hɛn hɔ, na yɛrodɔ hɛn nyɛnko. Wobisaa no, “Me nyɛnko nye woana?” Christ kyɛɛ Samarianyi yamuyiefo no ho abɛbusɛm na Ɔhyɛɛ dɛ “kɔ, na wo so kɛyɛ dɛmara.”
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo n’asɛmpasomafo yɛ ndɛ Samarianyi yamuyiefo ho mfatoho a Christ to nsa frɛ hɛn dɛ yɛmbɛyɛ no. Mebɛpɛ dɛ mekasa nkanka fa asɛmpasomfo a wɔafrɛ hɔn wɔ ɔsom edwuma horow mu. Wɔyɛ fasusu ma hɛn wɔ mbrɛ som si (1) bue nkorɔfo hɔn akoma mu ma Jesus Christ n’asɛmpa no, (2) ma hɛn nyina kwan ma yɛsom a hɛn tsebea mmfa ho, na (3) ɔdze Christ no tum ba hɛn abrabɔ mu.
Odzi Kan, Som Bue Nkorɔfo Hɔn Akoma mu ma Jesus Christ n’Asɛmpa no
Bɛyɛ mfe 91 Ansaana wɔbɔwo Christ, Ammon, Mormon Nwoma no mu asɛmpasomafo bi, daa noho edzi kyerɛɛ Ɔhen Lamoni dɛ, “Mepɛ dɛ metsena nkorɔfo yi mu mber kakra; … [na] mebɛyɛ w’akowaa.” Ɔnam ɔsom a ɔdze soom ɔhen no ntsi, wɔmaa Ammon kwan dɛ “[ɔnkasa] akokodur do, …na [ɔnkã nkyerɛ Ɔhen Lamoni] ebɛn tum” a ɔnam do dze somee. Ɔhen no bɔɔ anohoba dɛ sɛ ɔkã kyerɛ no a “ɔno biribiara a [Ammon] pɛ no, … [ɔhen no dze] bɛma [no].“ Dza Ammon bisae ara nye dɛ ɔhen no betsie nsɛm fa Jesus Christ n’Asɛmpa no ho. Ammon no som no kowiee dɛ “[ɔtwee] nyimpa mpempem [baa] nnuho mu.”
Hɛn nda yi mu, ɔsom kɔ do gya nkorɔfo kɔ asɛmpa no ho. Nna Akyerɛbaa Bevan rosom dɛ asɛmpasomafo a ɔkyerɛkyerɛ adze ber a ɔhyɛɛ ase dɛ orinya apɔwmudzen ho nsɛnsɛm a, okehiaa dɛ ɔsan kɔ fie kɛgye ayarsa. Nkyɛ wobesian no no, ɔkɔr do somee dɛ ɔsom asɛmpasomafo fi fie.
Ber a wɔrokɔ nserahwɛ wɔ park bi, Akyerɛbaa Bevan na ne nyɛnko nyaa nkenyan dɛ wɔnye maame bi a okitsa mba nkakraba anan nkasa, naaso wotwentweɔɔn hɔn ananadze ma ebusua no tuu kaar kɔree. Da a odzi do no, wɔsanee kɔr park hɔ a, wɔrobɔ mpaa dɛ dɛm ebusua yi bɔwɔ hɔ. Anwanwadze mu ara, nna maame no tsena bea kor noara a ɔtsenae ndeda no. Dɛm aber yi Akyerɛbaa Bevan na ne nyɛnko no bɛn maame no, hun nyia ɔyɛ, na wobohun dɛ nna ohia mboa dzendzenndzen wɔ honam afamu. Wɔmaa no mboa na wɔtoo nsa frɛɛ no dɛ onsũa asɛmpa no.
Ɔnam dɛm som no na nsato no ntsi, wonumaa maame no na ne ba panyin dze no, na afe kor ekyir ne ba a odzi do no toaa do. Wɔda ho yɛ asɔrmba a wɔbɔhyew ndɛ. Akyerɛbaa Bevan nyim dɛ krɔnkrɔn mu ara na suahu yi bae na “ɔkyerɛɛ [no] dɛ [ɔwɔ] beebi pɔkyee a nna Nyankopɔn pɛ dɛ [ɔwɔ] ara.”
Tse dɛ Ammon na Akyerɛbaa Bevan, ber a yɛsom binom no, “[yɛkyerɛ] su pa [kyerɛ] hɔn” na wɔpɛ dɛ wɔtse “enyidado a ɔwɔ [hɛn] mu no ase.”
Jesus to nsa frɛ hɛn dɛ “kɔ, na wo so kɛyɛ dɛmara.”
Otsĩa ebien, Som Ma Hɛn Nyinara Kwan ma Yɛsom ma Hɛn Tsebea Tse Biara no.
President Russell M. Nelson frɛɛ “aberantsɛ a odzi mu na obotum “biara dɛ ɔnyɛ ahoboa na ɔnsom asɛmpakã dwuma” nna akataasia biara a obotum no dɛ “ɔmbɔ mpaa mfa nhu sɛ Ewuradze bɛpɛ dɛ [ɔbɔsom] asɛmpakã dwuma a.” Ɔbɔɔ anohoba dɛ “hom adwenpɔwbɔ dɛ hom bɔsom asɛmpakã dwuma, dɛ hom kyima kã asɛmpa anaa hom yɛ ɔsom dwuma no, behyira hom na nkaafo dodow.” Ɔsom dwuma asesa kasafua botum.“ ne nkyerɛase. Seseiara aberantsɛ na akataasia biara a odzi mu a ɔpɛ dɛ ɔsom etuhoakyɛ asɛmpasomafo dwuma ma Ewuradze no botum ayɛ a, kumaabi koraa na wonnkotum.
Elder Holgado yɛ mfatoho a ɔkyerɛ dɛ ibotum asom a ankorankor tsebea mmfa ho. Wɔwoo no no nna ɔwɔ awosu yarba bi a ɔnntaa nnsi, a osianka no dɛ ɔbɔsom nkyerɛkyerɛ asɛmpasomafo dwuma. Wɔfrɛɛ Elder Holgado dɛ ɔsom asɛmpasomafo na ɔyɛɛ etuhoakyɛ edwuma no wɔ bishop n’adzekorabea, a ɔboaa binom ma wonyaa mboa a wɔrohwehwɛ. Ɔhyehyɛɛ ndzɛmba wɔ shelf horow do, dze nduadzewa guguu bɔtɔ ahorow mu, na ɔmoamoaa ndakaba.
Ber a Elder Holgado kasaa wɔ sacrament nhyiamu ase wɔ n’asɛmpasomafo dwuma ekyir no, ɔkyɛe dɛ “Nyankopɔn hia ɔsom edwuma asɛmpasomafo. Ohia nkorɔfo ma wɔadɔ na wɔasom binom. Dɛm nkorɔfo yi hyehyɛ toilet krataa, dze broccoli gugu bɔtɔ mu, pam dan mu ndzɛmba, na wɔyɛ papa ma nkorɔfo.”
Onnhia dɛ wɔbɛma wo ɔsom asodzi anaa ebɔbɔ dzin ahyɛnsewdze ana ayɛ papa. Agyenkwa no hu ɔsom dwumadzi biara. Hɛn nyinara yebotum aboa binom ma wɔaba Christ hɔ ber a yɛdze ayamuyie dɔ rosom. Hɛn nyinara yebotum asom obi wɔ Christ ne dzin mu a yedua Sunsum Krɔnkrɔn no tum do na yɛtsena ase dɛ gyedzi wɔ Jesus Christ mu ho fasusu. Ɔsom boa hɛn ma yɛdze hɛn ho si hɔ dɛ afɔrbɔdze nyikan a ɔsɔ Nyankopɔn enyi.
Jesus to nsa frɛ hɛn dɛ “kɔ, na wo so kɛyɛ dɛmara.”
Otsĩa Ebiasa, Som Dze Christ no Tum Ba Hɛn Abrabɔ mu
Asɛmpasomafo aberantsɛ bi a ɔsesaa fii nkyerɛkyerɛ edwuma wɔ dze kɔr som edwuma dzii aper wɔ nankasa ne haw binom ho a ogya no ma okehiaa Christ n’ayarsa tum. Etuhoakyɛ som dze dɛm tum no baa n’abrabɔ mu. Ɔkãa dɛ, “Metsee nkã dɛ sɛ miridzi aper a, metse dɛ Christ remaa mo do. Ɔyɛ adze soronko dɛ ihu dɛ Orudua edziban korabea mu, temple mu, na N’asɛmpa mu rihyira nkorɔfo.”
Elder yi hyɛɛ ase tsee dɛwdzi a ɔdɔ bun mu, na ahokeka fofor a oenya no hyiraa ɔno na n’ebusua mu no nyinara. Sunsum no hɛɛn hɔn fie yie ara, wɔkɔr temple bɔɔ mu ntaataado yie ara, na Christ bɛyɛɛ dza enyiwa tsim do kɛsenara wɔ hɔn ebusua mu. Dɛm asɛmpasomafo yi gye dzi dɛ Christ nam som do gyee no nkwa na Ohyiraa n’ebusua.
President Nelson kyerɛkyerɛɛ dɛ, “Kradoyɛ dɛ ebɔsom na ahyɛ binom dzen no gyina hɔ dɛ ahyɛnsewdze a ɔkyerɛ obi ne kradoyɛ dɛ obenya ayarsa” a odua Agyenkwa no No ɔpon tum no do.
Jesus to nsa frɛ hɛn dɛ “kɔ, na wo so kɛyɛ dɛmara.”
Som Edwuma Asɛmpasomafo Yɛ Jesus Christ N’esuafo a Woetu Hɔn Ho Esi Hɔ no ho Fasusu
Sɛ ɔwo anaa wo busuanyi bi nya nhyira ɔfrɛ no dɛ ɔnnyɛ som edwuma asɛmpasomafo a, ɔyɛ mber a ɔwɔ dɛ hom dzi ho ehurusi. Seseiara w’ebusua benya Ewuradze Jesus Christ n’ananmusinyi a woeyi no esi hɔ a ɔtse hom fie. Ɔno bɛsesa hom nyina wɔ kwan pa do. Ɔnnsɛ dɛ yawdzi biara ba som ɔfrɛ biara mu. Yɛtow, “Mobɔkɔ bea epɛ dɛ mokɔ” na “Mebɛyɛ dza epɛ dɛ meyɛ.” Iyi yɛ kwan ma hɛn a yɛdze kyerɛ dɛ yedzi dza yɛkã no do!
Ɔkɔ ma hom nyinara a hom som, na nkanka som edwuma asɛmpasomafo nkakraba a wɔbor 4,000 no, yɛdɔ hom! Sɛ asɛmpasomafo a wɔkyerɛkyerɛ adze yɛ Ewuradze n’ano a, nna som asɛmpasomafo yɛ Ewuradze ne nsa, na hom nnyɛ asɛmpasomafo a wogu ekyir bi. Hom mu kor biara dzi akotsen wɔ Israel mboano no mu. President Nelson kyerɛkyerɛɛ dɛ “ber biara a yɛbɛyɛ biribiara dze aboa obiara no … ma woedzi na woesie hɔn ahyɛmu a wɔnye Nyankopɔn dzi no, nna yɛroboa aboaboa Israel ano.”
Hom som asɛmpasomafo boa Israel ano wɔ kwan ahorow pii mu, na hom som sesa abrabɔ. Mpɛn pii no hom nnyim nyia onya hom som no ho mfaso, mbom Nyankopɔn nyim. Kaa daa daa dɛ “susuampa dɛ hom [som] mo nuanom nketseaba yi mu kor no, hom [som No].” Yɛtse hom ndze ber a hom yɛ etuhoakyɛ wɔ Asɔr no foon do ɔfrɛ mbea; yehu hom anoyerɛw ber a hom boa wɔ sɔn ekuw ekuw mu; na yɛtse hom kandzea ber a hom som wɔ temple horow mu. Hom ma nyia ɔkɔm dze no edziban, fura hɔn a wɔda adagyaw, dze nsu ma nyia nsukɔm dze no.
Hɛn nyinara wɔ dɛ yɛkɔ na yɛkɛyɛ dɛmara.
Som Yɛ Adzehia Tsitsir wɔ Christ N’esuafo Hɔn Abrabɔ mu
Som wɔ tum dɛ obue nkorɔfo hɔn akoma mu ma asɛmpa no na ɔma hɛn nyinara kwan dɛ yɛdze hɛn kra nyina ma Christ. Ɔsesa hɛn akoma ma yɛbɛyɛ tse dɛ Ɔno yie, na kwan no do no, yɛmaa binom do. Da bi President Nelson bisaa dɛ, “Wiadze yi a sunsum mu prɔwee hyɛ mu mã yi, ana ankorankor … botum dze nsesa aba a?” No mbuae nye dɛ: “Nyew! … ‘Ewuradze n’ahyɛmu nkorɔfo no, … wɔdze Nyankopɔn no tum wɔ enyimnyam kɛse mu’ … ayɛ hɔn akodze no … botum epegya adasa nyinara hɔn abrabɔ.” Ɔnam som do yɛsesa nkorɔfo hɔn akoma—na wiadze no.
Christ “kyinii yɛɛ yie.” Ɔsoom ayarfo, maa enyifurafo hun adze, na Ɔseraa hɔn a woebu hɔn enyimtsia. Ɔyɛɛ edziban, boaa wɔ ayeforhyia ase, na ɔmaa mpempem ɔkɔm dze hɔn edziban. Ber a yɛsom kor no wɔ Christ ne dzin mu no, yɛkɔ do nyin wɔ krɔnkrɔnyɛ mu na yɛfata onnyiewiei nkwa akyɛdze no. Jesus Christ tse ase. Ɔyɛ m’Agyenkwa na wo so w’Agyenkwa. Ɔno nye hɛn Pomfo. Ɔno nye hɛn fasusu kɛse wɔ som ho. Moto nsa frɛ hɛn mu kor biara dɛ yɛnkɔ nkɛyɛ dɛmara. Wɔ Jesus Christ ne dzin mu, amen.