Enyigye na Ndaase Akoma
Hɛn Ahotseweefo a wɔwɔ Ebibiman mu hɔn kɛseyɛ no da edzi yie mpo ber a wohyia abrabɔ mu nsɔhwɛ na Asɔr a orinyin mu nsɔhwɛ no.
Afe a abasen kɔ no, wosianee me fii mo dwumadzi mu wɔ Eduosuon hɔn Presidency mu, wɔbɔɔ nsesa no ho dawur wɔ wiadze mfɛndzanan ehyiadzi ase ha. Osiandɛ wɔbɔɔ me dzin bɛn Wiadze Mfɛndzanan Etumdzifo a wɔapon hɔn edwuma no hɔn edzin a wɔbobɔe ho ntsi, dodow noara na wɔdween dɛ nna emi so muruwie m’edwuma. Ehyiadzi no baa ewiei no, minyaa ndaase na mbo na yɛ nkra beberee ma m’abrabɔ a ɔtoa do no mu. Binom mpo gyee to hɔn do dɛ wɔbɔtɔ me dan a ɔwɔ Salt Lake Etsifi no. Nna ɔyɛ ahomka dɛ wɔbɛfe me na mesan so hu dɛ sɛ muwie m’edwuma a mennkɛhaw wɔ me dan no ntɔnee ho. Mbom minnyae nndu hɔ.
Mo dwumadzi fofor nye emi na Monica kɔr Ebibiman fɛɛfɛw mu a, Asɔr no reyɛ prɔmprɔm. Wɔayɛ nhyira dɛ yɛsoom wɔ Ahotseweefo anokwafo a wɔwɔ Africa South Apaamu hɔ na yeehu Ewuradze no dɔ ma hɔn no. Ɔyɛ nkenyan dɛ ibohu mbasantsen ebusua ebusua a wofifi akwan horow mu, na Asɔrmba nwomasũafo enyimdzifo pii kã ho a woetu hɔn mber na talent horow esi hɔ dze rosom binom.
Mber kor noara no, wɔhwɛ nyimpadɔm no hɔn suban a, nkorɔfo beberee a wɔnnyɛ hyerɛpɛɛ rodɔm Asɔr no na wɔnam ebupɛn du no ntuae ho nokwardzi na nwomasũa akwanhorow a Asɔr no dze ma nhyira do resesa hɔn abrabɔ. Nhyehyɛɛ tse dɛ Succeed in School, EnglishConnect, BYU–Pathway, na Perpetual Education Fund no hyira abrabɔ beberee, nkanka mbasantsen a wɔreba no.
President James E. Faust kãa no mpɛn bi dɛ, “Wɔakã no dɛ Asɔr yi nntwe ekunyin ara mbom ɔtaa dɛ ɔyɛ nkorɔfo a wɔnnsɛ no ekunyin.’’
Hɛn Ahotseweefo a wɔwɔ Ebibiman mu hɔn kɛseyɛ no da edzi yie mpo ber a wohyia abrabɔ mu nsɔhwɛ na hɔn mber ma Asɔr a orinyin no. Wɔdze enyimpa hyia no aber nyina. Wɔda nkyerɛkyerɛ ofi President Russell M. Nelson a wɔayɛ atsenkã yie no edzi.
“Hɛn abrabɔ mu enyigye a yɛtse no mmfa gyinabew horow a yɛwɔ mu ho, mbom ɔfa adzebiara a hɛn abrabɔ tsim do ho.
“Sɛ yɛdze hɛn abrabɔ tsim Nyankopɔn no nkwagye ho nhyehyɛɛ … na Jesus Christ na N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.”
Wonya enyigye hɔn nsɔhwɛ horow nyina ekyir no. Woesũa dɛ yɛnye Agyenkwa no hɛn nkitahodzi ma hɛn tum ma yɛdze enyigye na ndaase akoma hyia nkõdzen horow.
Hom mma menye hom nkyɛ menye Ahotseweefo anokwafo yinom sũahu a ɔkyerɛ fapem yi, medze Mozambique bɛhyɛ ase.
Mozambique
Abosoom kakra a abasen kɔ no, mokɔhwɛɛ stake a nna oedzi afe kor na ɔwɔ ekuw 10 ne stake ehyiadzi bi do. Nkorɔfo bɔbor 2,000 na wɔhyɛɛ chapel kakraba hɔ na asese ebiasa a wɔbɔɔ no abowano no so mã. Stake president no edzi mfe 31, ne yer edzi 26, na wɔwɔ mba nkakraba beenu. Ɔno na odzi stake yi a orinyin na ɔhaw wɔ mu a onnhwinhwin—enyigye na ndaase akoma nko na ɔdze.
Menye patriarch no yɛɛ kokoa mu mpɛnsapɛnsamu no, musũae dɛ nna ne yer no yar dzendzenndzen, na odzi aper wɔ no nhwɛe mu. Menye stake president no kãa ho asɛm wiei no, yɛmaa ne yer asɔfodzi nhyira. Mibisaa patriarch no mpɛn dodow a ɔma patriarch nhyira.
Ɔkãa dɛ, “Awɔtwe anaa idu.’’
Mibisaa dɛ, “Bosoom kor a?’’
Obuae dɛ, “Dapɛn kor!’’ Mutuu no fo dɛ dodow dɛm a ɔyɛ no dapɛn n’ewiei no mmboa.
Ɔkãa dɛ, “Elder Godoy,’’ “wɔkɔ do ba dapɛn biara, a asɔrmba afoforfo na mbabun pii kã ho.’’ Bio no, onnhwinhwin—enyigye na ndaase akoma nko.
Wowieii Memenda ewimbir stake ehyiadzi nhyiamu, na morokɔ ahɔho bea no, muhun dɛ nkorɔfo rotɔ edziban wɔ kwan nkyɛn adzesaa ber no. Mibisaa me hɛnkanyi no siantsir a wɔanntɔ no enyimkan na mbom nna wɔreyɛ no mber a nna ɔyɛ adzesae dodow. Obuae dɛ nna wɔreyɛ edwuma anapa no dze enya sika dze atɔ edziban no ekyir no.
Mekãa dɛ “O, nna wɔreyɛ edwuma ndɛ dze edzidzi ɔkyena.’’
Mbom ɔtseen me dɛ: “Ɔnntse dɛm, nna wɔreyɛ edwuma enyimkan dze edzidzi anafua yi.’’ Nna m’enyidado nye dɛ hɛn asɔrmba no botum enya tsebew a oye, naaso osii no pi dɛ pii nara na wɔwɔ nsɔhwɛ a ɔtse dɛm mu wɔ ɔman no n’afã hɔ no. Anapa no, wɔ hɛn Kwesida nhyiamu na mbrɛana meehu hɔn gyinabew horow no, hɔn enyigye na ndaase akoma no tɔɔ mo do kɛse noara.
Zambia
Morokɔ Kwesida nhyiamu bi no, emi na stake president no hun awarfo bi a nna wɔdze abɔdomaba na mbofra nkakraba beenu renantsew wɔ kwan nkyɛn. Yegyinae dɛ yɛbɛfa hɔn nye hɔn akɔ. Ahobow kãa hɔn na wonyaa ahomka. Mber a mibisaa hɔn dɛ kwan tsentsen ahɛn na wɔbɛnantsew akɔ chapel no, egya no buae dɛ obotum edzi bɛyɛ sima 45 dze kɔ dɔnhwer kor, a ogyina mbofra no ahoɔhar do. Wotwaa akwantu yi akɔ na aba, Kwesida biara, a woennhwinhwin—enyigye na ndaase akoma nko na wɔdze.
Malawi
Kwesida bi ansaana stake ehyiadzi no, mekɛseraa nkorbata ebien bi a wɔdze aban no skuul adan ayɛ hɔn nhyiamu adan. Adan a, nna bea mpo a wɔyɛ hɔnho yie nnyi mu na wɔnnyɛ afɛɛfɛw no maa moho boow me. Mber a menye asɔrmba kakra dzii ehyia wɔ hɔ no, nna mayɛ krado dɛ mebɛpa kyɛw wɔ hɔn nhyiamu adan ne tsebew ho, naaso nna hɔn enyi gye dɛ woenya beebi a ɔbɛn na wɔboa ano, amma wɔannantsew kwan tsentsen. Bio no, woennhwinhwin—enyigye na ndaase akoma nko.
Zimbabwe
Memenda baanodzi dwuma ntsetsee n’adzekyee no, stake president no nye mo kɔr Kwesida som a nna wɔreyɛ no wɔ dan a wɔahire mu. Nkorɔfo 240 na wɔbae. Nkyii bishop no daa asɔrmba afoforfo 10 a wonumaa hɔn dɛm dapɛn no edzi. Nna mboanofo no gugu adan nketsenketse ebien mu a, asɔrmba binom so tsena abowano, rohwɛ nhyiamu no wɔ ntokura na mbobow mu. Bio no, woennhwinhwin—enyigye na ndaase akoma nko.
Lesotho
Mekɛseraa ɔman kakraba fɛɛfɛw yi, wɔsan so frɛ no dɛ “bepɔw ahenman no,’’ dze hwɛɛ Asɔr ne mansin bi a ɔreyɛ ahoboaboa dze abɛyɛ stake. Memenda nhyiamu horow n’adzekyee no, mokɔr Kwesida som wɔ hɔn nkorbata kor mu wɔ dan a wɔahire mu. Nna sacrament dan no mu ayɛ mã ebu do, na nkorɔfo gyina gyina abow n’ekyir dze hɔnho ahyɛ mu. Mekãa kyerɛɛ nkorbata president no dɛ ohia dan kɛse. M’ahobow mu no, ɔkãe kyerɛɛ me dɛ nna iyi yɛ n’asɔrmba hɔn mu fã nko. Afã kor no bɔkɔ sacrament nhyiamu a otsĩa ebien no dɔnhwer a otsĩa ebien ekyir no. Bio no, woennhwinhwin—enyigye na ndaase akoma nko.
Mesanee kɔr Lesotho ekyir no osian akwanhyia yaayaw a osii a nna hɛn mbabun beberee kã ho no ntsi, a Elder D. Todd Christofferson dzii kan kãa ho asɛm no. Mekɛseraa ebusua ebusua na baanodzifo no, nna m’enyi da kwan dɛ ɔbɛyɛ awerɛhow. Mbom, mihyiaa Ahotseweefo a wɔyɛ dzen na wogyina bran a wɔdze ahomka na nkenyan egyina gyinabew no.
Mpho Anicia Nku, 14, onyaa ne tsir dzidzi mu, a ɔwɔ mfonyin mu no, kyerɛɛ no yie wɔ nankasa ne nsɛm mu dɛ: “Twer Ewuradze na hwɛ No aber nyina, osiandɛ Ɔno mu na ibenya asomdwee, na Ɔbɔboa wo wɔ ayarsa mu.’’
Iyinom yɛ fasusu kakra a yehu hɔn suban papa osiandɛ wɔdze hɔn abrabɔ esi Jesus Christ n’asɛmpa no do. Wonyim beebi a wobenya mboa na enyidado.
Agyenkwa No N’ayarsa Tum
Ebɛnadze ntsi na Agyenkwa no botum aboa hɔn na ihɛn wɔ hɛn abrabɔ ne gyinabew biara mu.? Yebotum ehu nyiano no wɔ kyerɛwsɛm no mu:
“Na obefir edzi, ɔatse yaw na oehu amandze na obenya nsɔhwɛ ahorow biara bi. …
“… Na Ɔfaa hɔn mberɛwyɛ too no do, ama ehumbɔbɔr eetum aahyɛ n’abadaa mã … ma oetum ehu … mbrɛ obesi aboa no nkorɔfo dɛ mbrɛ hɔn mberɛwyɛ tse no.”
Dɛ mbrɛ Elder David A. Bednar kyerɛkyerɛe no, honandua mu yaw, awerɛhow, anaa mberɛwyɛ a yenya biara nnyi hɔ a Agyenkwa no nnyim. “Emi na ɔwo wɔ mberɛwyɛ ber mu no botum esũ dɛ, ‘Obiara nntse [dza merefa mu no ase]. …’ Ibia dasanyi biara, nnyim. Mbom Nyankopɔn ne Ba no nyim na Ɔtse ase yie ankasa.’’ Na ebɛnadze ntsi a? Osiandɛ Ɔtsee na Ɔsoaa hɛn adzesoadze ansaana yɛrebɛyɛ.
Medze me dasee wɔ Christ ne nsɛm a yehu no wɔ Matthew 11 dze wie dɛ:
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.
“Na mo kɔndua yɛ mberɛw, na m’adzesoa yɛ har.”
Tse dɛ Ahotseweefo a wɔwɔ Ebibiman mu no, menyim dɛ anohoba yi yɛ nokwar. Ɔyɛ nokwar wɔ hɔ, na ɔyɛ nokwar wɔ beebiara. Megye ho dase wɔ Jesus Christ ne dzin mu, amen.