Nyankopɔn no Nkɔnhyɛfo

Mbabun adɔfo, ehyiadzi yi ayɛ dɛw ama hɛn paa! Yetsie efi Jesus Christ N’Asomafo atseasefo baasa hɔ dada. Ebɛn nhyira kɛsenara nye yi! Na yɛbɔkɔ do etsie kor so aka ho, Elder Henry B. Eyring. Sunsum mu mmee no rokɔ do!

Ber a mekasaa mfeda no, yesũaa mbrɛ yebesi bɛnam David na Goliath sũahu do egyina wiadze yi ano. Hom kaa abo enum no? Ndɛ, merekyɛ Ahyɛmu Dadaw no mu asɛm bi a mekenkanee ber a me mfe tse dɛ hom dze, a ɔmaa mepɛɛ dɛ mɛyɛ tse dɛ nyia odzi mu akotsen no. Bible nnkã ne dzin nnkyerɛ hɛn, ntsi yɛbɛfrɛ no Shunem ɔbaa no osiandɛ iyi nye no kurow ne dzin.

Dakor bi, nna nkɔnhyɛnyi Elisha rutwa mu wɔ Shunem, na yɛkenkaan dɛ “mbrɛ ɔbaa kɛse bi wɔ hɔ; na [ɔtoo nsa frɛɛ] no dɛ ondzidzi. Na ɔbaa dɛ, daa orutwa mu a, ɔman kɔ … kedzidzi” Mususu dɛ nkɔnhyɛnyi Elisha enyi gyee papaapa ber a ɔtoo nsa frɛɛ no dɛ ondzidzi wɔ ne fie no! Nna ɔakɔ mpɛn pii dadaw, ber a da kor bi ɔbaa no see no kun dɛ, “afei hwɛ, mehu dɛ nyia yi yɛ Nyame nyimpa krɔnkrɔn.”

Ɔbaa no se, “afei hwɛ, mehu.” Ɔyɛ dɛ ɔtoo nsa frɛɛ Elisa baa ne fie a onnyim dɛ ɔyɛ nkɔnhyɛnhyi; ɔnam Sunsum krɔnkrɔn no do na onyaa ne dase ber a otsie dza Elisha kãe na ɔkyerɛkyerɛɛ no yie. (Kaa dɛ, nna mfonyin biara nnyi hɔ dɛm ber no! Ntsi nna ɔyɛ dzen dɛ ibohu nkɔnhyɛnyi ber a ihwɛ n’enyim pɛ.)

Mbom asɛm no ennwie hɔ. Dakor bi, ɔbaa no see no kun dɛ, “Ma yɛnyɛ pia kakraba bi … na yɛmfa mpa, na ɔpon, na egua, na kandzeadua nsisi mu hɔ no na ɔmbra dɛ, sɛ ɔba hɛn nkyɛn a, ɔaman akɔ hɔ.”

Nna ɔbaa nokwafo yi wɔ ɔpɛ dɛ obesi dan wɔ ne fie ama nkɔnhyɛnyi no, na sɛ orutwa mu wɔ kurow no mu a, oenya bea bi atsena!

Ndɛ, yebotum esua biribi a ɔyɛ ndam efi dɛm sũahu yi mu.

Nyankopɔn dzii dase kyerɛɛ Shunem ɔbaa no dɛ Elisa yɛ Nyankopɔn no Nkɔnhyɛnyi, na odzii dwuma ber a obuee ne fie dze gyee no.

Hɛn so yebotum enya ankorankor dase a ɔfa Nyankopɔn no nkɔnhyɛfo ho ndɛ na yebue hɛn akoma na hɛn adwen mu—hɛn fie—ama asɛm no a hɛn Ɔsorsor Egya wɔ ma hɛn wɔ dɛm nda a odzi ekyir yinom mu.

Mbabun adɔfo, moto nsa frɛ hom dɛ hom mbisa homho asɛmbisa yi: “Ana mowɔ Nyakopɔn no nkɔnhyɛfo a wɔtse ase ho dase?”

Yɛnhyɛ ase wɔ ahyɛse no.

Nkɔnhyɛnyi nye woana? Nkɔnhyɛnyi nye “nyia Nyankopɔn afrɛ no na ɔkasa ma No. Nkɔnhyɛfo wɔ asaase no do ndɛ dɛ mbrɛ nna wɔwɔ tsetse ber mu no.

Nkɔnhyɛfo yɛ adzehufo, na nyikyerɛfo. Dɛm kyerɛ dɛ wobotum ehu dza nkorɔfo nnhu, na wobotum ahyɛ nsɛm a ɔbɛba daakye ho nkɔm. Wobotum so esiesie hɛn ama mbusu ahorow. Nkɔnhyɛfo nya mbrasɛm na nyikyerɛ fi Nyame hɔ. Gyedzi ho nsɛmpɔw no kã nyikyerɛ a ɔkɔ do wɔ nda a odzi ekyir yi ho asɛm. Ɔkã dɛ, “Yɛgye dza Nyame eyi akyerɛ nyina, na dza seseiara Oyi kyerɛ nyina dzi, na yɛgye dzi dɛ Ɔbɔkɔ do eyi ndzɛmba akɛse a no ho hia tsitsir pii a ɔfa Nyame N’ahenman ho no akyerɛ.”

Elder Gary E Stevenson kãa dɛ, “Ewuradze kɔ do da Ne mbrasɛm ahorow na Ne pɛ edzi kyerɛ No nkɔnhyɛfo ndɛ osiandɛ Ɔpɛ dɛ Odzi hɛn kan kɔ enyigye mu wɔ dɛm abrabɔ yi mu na celestial enyimnyam wɔ abrabɔ a odzi do no mu.”

Nkɔnhyɛfo so bɔ asɛmpa no dawur na wɔyɛ nkenyan akyerɛkyerɛfo na Nyankopɔn asomafo ma obiara a ɔwɔ asaase yi do.

Apamfo a wɔwɔ President a Odzi Kan na n’Apamfo mu, nye Asomafo Duebien no yɛ, nkɔnhyɛfo, adzehufo, nye nyikyerɛfo. Wɔsom dɛ abaguafo wɔ Ewuradze N’akwankyerɛ ase no, wɔwɔ tumdzi dɛ wɔbɔ nkyerɛkyerɛ ho dawur na wɔkyerɛ ase na wɔyɛ nhyehyɛɛ ma N’Asɔr. Wɔdze ahwɛyie bɔ mpaa na wɔyɛ mpɛnsampɛnsam mu, osiandɛ ɔwɔ dɛ dɛm quorum ahorow yi adwenpɔw no yɛ kor. Dɛm kwan yi do no, Ewuradze ma hɛn awerɛhyɛmu dɛ N’apɛdze bowie yie.

Nkɔnhyɛfo dzi Christ ho dase—N’asetsena, No somdwuma, na No krɔnkrɔnyɛ.

Hom mma yɛnkenkan dase ahorow fi nkɔnhyɛfo binom a wɔwɔ Mormon Nwoma no mu.

Abinadi paa mu kãa dɛ:

“Nyankopɔn nankasa besian aba adasamba mu, na ɔabɔpon no nkorɔfo.

“Na osiandɛ ɔtse honam mu ntsi wɔbɛfrɛ no Nyankopɔn ne Ba.”

Samuel Lamannyi so gyee dase dɛ “Jesus Christ yɛ “Nyame ne Ba, sor nye asaase Egya, adze nyina a ofi ahyɛse Bɔadze no.”

Na nkɔnhyɛnyi Moroni kãa dɛ “Mehu Jesus, na … ɔnye me akasa enyim na enyim.”

Ber a Christ kɔr Nephifo hɔ no, adze kor a odzi kan a ɔyɛɛ no nye Ɔfrɛ Asomafo duebien. Na Ɔkãa kyerɛ nkorɔfo no dɛ “Nhyira bɛkã hom sɛ hom tsie duebien yi a masan mu eyi hom yi nsɛm a.”

Afei, ma menkyɛ nsɛm kakra bi mma awofo anaa ebusuafo binom a wɔtsetse mbofra. Ewuradze Nankasa kyerɛkyerɛɛ Adam Eve nkwagye nhyehyɛɛ no mu nokwar. Na afei ɔkãa kyerɛɛ hɔn dɛ, “Mema wo mbrasɛm dɛ kyerɛkyerɛ wo mba ndzɛmba yinom a irinngya bi.”

Erekyerɛkyerɛ a irinngya bi n’asekyerɛ nye dɛn? Ɔyɛ asɛmpa no nokwar no a yesũa, yɛwɔ hɛn ankasa hɛn dase, na yɛnye hɛn mba bɛkyɛ dɛm nyimdzee no. Ɔyɛ dɛ wɔma nkyerɛkyerɛ ho nsɛm kɔ do wɔ ber a wɔahyehyɛ na ber a wɔnnhyehyɛɛ nyinara mu. Ɔyɛ erobɔ bra dɛ mbrɛ dɛm nyimdzee na dase no tse.

Mormon Nwoma no kã mberantsɛ 2,060 a wɔyɛ nsordaafo no hɔnho asɛm dɛ wɔyɛ “nyimpa a wodzi nokwar na wɔdwe, osiandɛ wɔakyerɛkyerɛ hɔn dɛ wondzi Nyame ne mbrasɛm do na wɔnnantsew tseneneeyɛ mu wɔ n’enyim.” Dɛm mbabun yi dze nokwardzi dzii Helaman, a dɛm ber no nna ɔyɛ hɔn nsordaafo panyin na hɔn nkɔnhyɛnyi so n’ekyir, na wohun dɛ hɔn nãnom dze nokwar na gyedzi ahyɛ hɔn akoma mã.

Awofo, wɔ wiadze a ndze pii na ɔtɔfabi a sum pii wɔ mu no, Nyame Nankasa ahyɛ hɛn mbra dɛ yɛntsetse hɛn mba wɔ kan na nokwar mu. Ɔdze asodzi no hyɛɛ hɛn nsa dɛ yɛnkyerɛkyerɛ hɛn mbofra no ma wɔnsũa asɛmpa ho nokwar ahorow no. Sɛ yɛannyɛ a, wiadze no rennyɛ.

Adɔfo nkumaa, mowɔ nsato ma hom: nda ɔreba yi, moto nsa frɛ hom dɛ hom mbu ntwɛr, mbue hom akoma mu, na hom mfa gyedzi mbɔ mpaa nkyerɛ Ɔsor Egya dɛ Onsi no pi dɛ no nkɔnhyɛnyi na Asomafo a wɔasan mu eyi hɔn no yɛ Ne ndze wɔ asaase do ndɛ.

Shunem ɔbaa no kyerɛkyerɛɛ hɛn dɛ yebotum anam Sunsum Krɔnkrɔn no do enya dɛm dase no. Mehyɛ hom bɔ dɛ sɛ yehu dɛ wɔyɛ Nyankopɔn no nkorɔfo a wɔasera hɔn ngo a, hɛn asetsena bɛyɛ mberɛw ɔmmfa ho ɔhaw a ɔrokɔ do nyinara no, dɛ yɛdze gyedzi, na enyidado betsie hɔn ndze. Dɛ yebetsie na yɛbedzi nkɔnhyɛnyi no ne ndze do hia ma yɛakɔ do esuo adze papa biara mu kesi dɛ hɛn Agyenkwa ne Mbae a ɔtɔ do Ebien no bɛba.

Wiadze n’emumuyɛdze rokɔ sor, naaso Jesus Christ N’Asɔr no na N’ahenman no ho yɛ dzen kyɛn da biara. Zion rehyɛ ne ntar fɛɛfɛw, na Christ N’ahengua ronnhwe ase. Ewuradze hwɛ kwan dɛ hɛn dase mu bɛyɛ dzen, yɛbɛhyɛ hɛn gyedzi mã, na yebonu hɛnho daa daa. Hɛn Agyenkwa Jesus Christ rohwɛ kwan dɛ hɛn mu biara bɛyɛ N’edwuma.

Mpɛn bi, Nkɔnhyɛnyi Joseph Smith kãa dɛ, “Enuanom, ana ɔnnsɛ dɛ yɛkɔ do boa wɔ dɛm dwumadzi kɛse yi mu?” Mbom, osiandɛ m’asɛm yi no dodowara kɔ ma hom, mbabun no ntsi, mebɛpɛ dɛ medze asɛmfua mbabun dzi dwuma kyɛn medze enuanom. Hom ayɛ Krado?

“[Mbabun], ana ɔnnsɛ dɛ yɛkɔ do boa wɔ dɛm dwumadzi kɛse yi mu? Hom nkõ nkɔ hom enyim na mma hom nnsan hom ekyir. Hom nnya akokodur, [mbabun]; na wɔnkɔ do, nkedzi konyim! Hom mma hom akoma ndzi dɛw, na hom enyi ngye kɛse.”

M’enyi sɔ nkɔnhyɛfo hɔn akwankyerɛ na mbɔdzembɔ afɔrbɔ ahorow. Mema me dasegye krɔnkrɔn dɛ, Nyankopɔn na Ɔfrɛɛ hɔn dɛ wɔmfa nkɔ kan, wɔnhyehyɛ, na wondzi N’ahenman enyim wɔ asaase do ndɛ yi. Na ɔbɛyɛ dɛm dabiara. Ɔbɛyɛ Ewuradze na ɔsan mu yi N’asomfo dabiara. Jesus Christ ne dzin mu, amen.