Onnyiewiei Akyɛdze a Ɔyɛ Dasegye

Onyim adze nyina na Ɔyɛ tumfo. Ɔnam Christ ne Kan na Sunsum Krɔnkrɔn no som do no, Ne nhyɛdo wɔ beebiara. Ɔyɛ Nankasa No su dɛ Ohyira hɛn.

Ohu dza etwa mu kɔ, dza ɔwɔ hɔ, na hɛn onnyiewiei nkrabea. Biribiara nnkotum esuma No

President Russell M Nelson ne nsato dɛ “yɛndwen celestial adwen” no ɔhyɛ hɛn nkuran dɛ yɛnsũasũa hɛn Ɔsor Egya N’enyido adzehu na No su.

Osian No suban krɔnkrɔn ntsi, hɛn Ɔsor Egya ma hɛn akyɛdze a oye, kor biara no N’onnyiewiei nhumu na enyido-adzehu da N’adwen do.

Ɔsan so yɛ asodze dɛ yɛsan mu yi dza oye.

Jesus Christ dze No bɔgyaa a ɔsom bo tuaa akatua a odzi ewiei maa dɛm ndzinoa yi.

Ɔtafabi a yɛbɛgye edzi dɛ Nyimpa ne pɛ ase kyerɛ nye yɛreyɛ dza yɛpɛ biara. Naaso nokwar dɛ woetua no ho bo kyerɛ dɛ Nyimpa ne pɛ yɛ akyɛdze krɔnkrɔn.

Yɛyɛ ananmusifo, na ananmusifo wɔ asodzi ma biribi. Iyi mu no yɛ wɔ asodzi wɔ nsan mu yi biara a yedua hɛn nyimdzee na akyɛdze a wɔdze ama hɛn do dze yi. Yennkotum ayɛ nsan mu yi a yɛnnye asodzi wɔ nsunsuando a ɔdze ba ho.

Dɛn ntsi na Nyimpa ne pɛ wɔ hɔ?

Ama yɛaasan mu eyi dza oye.

Ama yɛaasan mu eyi Christ.

Ama yɛaasan mu eyi onyiewiei nkwa—mpɛn pii.

Dase a ofi Sunsum Krɔnkrɔn mu no yɛ kɛse kyɛn dza yehu wɔ enyi do. Ɔyɛ Egya nye Ɔba no ho dasegyenyi a ɔkrɔn. President Nelson kyerɛkyerɛɛ dɛ, “Nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnkã ho.’’

Enuanom na nkyerɛbaa, dɛm ntsi na yehia Sunsum Krɔnkrɔn no tum no ndɛ da yi.

Dasegye a ɔnam Sunsum Krɔnkrɔn mu no botum aba wɔ akwan pii mu. Tse dɛ kandzea a ɔwɔ dan a no mu ayɛ sum no, obotum aba nwanwa na mpofir mu. Obotum aba nkakrankakra tse dɛ wipuei. Obotum aba tse dɛ kan hyerɛn ahorow, ɔda edzi nkakrankakra ma nyansa no ho tsew. Kwan biara a ɔbɛfa do no, dza ohia nye dɛ ɔnam Sunsum Krɔnkrɔn no do na ɔba.

Minyinii wɔ Jamaica kurow fɛɛfɛw mu; nna ɔyɛ enyigye na nwanwa. Mbom ber a mehyɛɛ nsɔwdo skuul ase no, m’esuafo kuw na anyɛnkofo a wɔnntse m’adwenpɔw dɛ mebɛyɛ Jesus Christ N’Asɔr ba ase no hyɛɛ ase bisaa me nsɛm a nna ɔyɛ dzen. Wobisaa dɛ, “ɔyɛ dɛn na itum kɔ dɛm asɔr no?” “Ɔyɛ dɛn na itum gye dɛm nsɛm no dzi?”—wɔrekã Enyido-Adzehu a Odzi Kan no. “Ɔyɛ dɛn na itum kenkan dɛm nwoma no?”—wɔrekã Mormon Nwoma no. “Ana egye iyi nyinara dzi ampara?” Na “Dɛn ntsi na eresɛɛ wo nkwa yi?”

Nna ɔyɛ yaw, tsitsir ber a ofi nkorɔfo a modwen hɔn ho hɔ.

Naaso dza nna wonnyim nye iyi: Mowɔ sũahu wɔ Sunsum Krɔnkrɔn no ho. Ber a dɛm dasedzi no hyɛɛ m’akoma mã no, oduum nda pii yaw, na “wɔ mber simabaa mu no, ɔsor mfonyin [puee] m’enyi do.”

Bia woebisa wo nsɛm yi bi a binom ka ho. Bia, sesei mpo woribisa wo ntaataado dɛ mbrɛ wɔdze yɛɛ emi no.

Sunsum Krɔnkrɔn akyɛdze na dase no wɔhɔ ma obiara.

Ma emi no Jamaica tse dɛ ma Palmyra tse ma Joseph Smith. Ɔyɛ mo Kwaa Krɔnkrɔn. Minnyim bia pɔkyee a nna Joseph gyina wɔ Kwaa Krɔnkrɔn no mu ber a obuu ntwɛr dze bɔɔ mpaa, mbom minyin bea pɔkyee a nna mo wɔ—na nda na mber pɔkyee—a me Kwa Krɔnkrɔn bɛyɛɛ hɔ ampaara. Osii wɔ Four Grove Road, Mandeville, Jamaica, wɔ m’eguaree, da Wukuda ber a wɔabɔ anapa 6:00 ɔyɛ mfe ebiasa wɔ mo nnuma ekyir. Sũahu krɔnkrɔn yi sii osiandɛ adapɛn ebien a odzii kan no akyerɛbaa asɛmpasomafo bi a ɔsor kenyaan no to nsa frɛɛ me dɛ menkenkan Mormon Nwoma no. Akyerɛbaa Audrey Krauss nye n’ebusua reba ehyiadze yi ase, na modɔ no afebɔɔ.

Dɛm sũahu no sesãa me.

Enuanom na nkyerɛbaa, wɔmmfa dasedzi mma dɛ wɔmfa ndzi dwuma mber tsiabaa. Akyɛdze yi a ofi hɛn Ɔsor Egya dɔfo yi hɔ yɛ daapem osiandɛ ɔmafo no yɛ daapem. Ɔnnsɛ dɛ dase ne nda pa ho. Ɔnnsɛ dɛ ɔyɛ mberɛw anaa no do tsew osian biribi a wɔasesa wɔ w’abrabɔ mu anaa biribi a wɔasesa wɔ wiadze mu. Ɔwɔ dɛ ɔyɛ dzen osiandɛ, tse dɛ akowaa no a ɔwɔ talent ahorow ho abɛbu mu no, me ankorankor dasedzi yɛ akyɛdze a ɔsɛ dɛ ɔdɔr—ɔnnsɛ dɛ wɔdze sie.

Sɛ mohwɛ m’ekyir wɔ mber a ɔyɛ dzen wɔ nsɔhwɛ na atseetse a mefaa mu mber a meyɛ abofra no aboa me ma maakɔ bea no a siesie minyim ankasa ma mo ho Nnyɛ gyedzi, enyidado, anaa awerɛhyɛmu nko na mowɔ, mpo dɛ iyinom yɛ gyedzi ho ndzɛmba a ohia wɔ kwan dze kɔ dasegye mapãho. Mekamfo hom dɛ hom nam nsɛmbisa, adzesua, mpaabɔ, akɔnkyen na ndwendwen ho do enya dasedzi. Meserɛ mma hom nngyaa. Ɔfata mbɔdzembɔ biara yɛdze fa anamɔnkwan yi do dze nya dasedzi. Woana anaa ebɛnadze na ebɛma no kwan ma woeyi iyi efi hɔ? Ebɛn dase kɛse na ibotum enya akyɛn dza ofi Nyame hɔ?”

Nyankopɔn Ne babanyin anaa babaa biara botum enya nyimdzee a no mu dɔ ama hɔn ho. Tse dɛ Joseph Smith a, osii ne dasedzi do pi ɔmmfa ho dza otsia no, yebotum aka no akokodur mu dɛ “minyim dɛm, na minyim so dɛ Nyame nyim, na munnkotum apow, na munnkotum ayɛ so.”

Mo nuanom na nkyerɛbaa adɔfo, hom mma dɛm dasedzi eduadzewa no nyɛ edwuma wɔ hom mu kesi dɛ obefifir daapem abɛyɛ enyimnyam nyimdzee mapã.

Sɛn woenuma hɛn na woesi hɛn pi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrba naaso yɛda ho kã dɛ “Minnyim sɛ mowɔ dasedzi a,” meserɛ kaa dɛm bɔhyɛ yi a ɔwɔ sacrament mpaabɔ no mu “Ama aber nyina woenya no Sunsum ma ɔnye hɔn atsena”” Osian bɔhyɛ yi ntsi, hɛn mu kor biara botum afa anamɔnkwan yi do dze enya dasedzi na nyimdzee mapa.

Afe nokwar nwanwa no nye iyi: Kwan biara a wɔfa do gye dase no—dɛ ɔsosɔ tse dɛ wipuei anaa enyido adzehu-enyimnyam mu o—ɔda ho ara hia nsan mu yi a wɔdze gye akyɛdze a ɔsom bo yi.

Erekã dɛ “Mesanmu yi dɛ mebɛgye edzi” no ma ɔyɛ mberɛw dɛ ebɛgye dasegye a ofi Nyankopɔn hɔ. Sɛ yehu dɛ hɛn dasedzi ayɛ mberɛw a, kaa dɛ hɛn nsanmu yi ahorow no na ɔhwer dasedzi tum no. Naaso dase no nnkɔr beebiara. Dza yehia ara nye yɛbɛsan mu eyi dɛ yɛnye no bɔbɔ mu bio.

Nsan mu yi dɛ yɛbɛgye edzi yɛ kwan a nyansa na tum wɔ mu a wɔdze nyimpa ne pɛ dzi dwuma.

Munnkotum ehu kwan pa a wɔfa do dze nyimpa ne pɛ dzi dwuma sen wɔdze bɔ dase ho ban.

President Nelson kyerɛkyerɛɛ dɛ “Mototɔ serɛ hom nhwɛ hom dasegye do. Yɛ ho edwuma. Ma ɔnyɛ wankasa wo dze. Hwɛ do yie. Tsetse no ama oeenyin. Fa nokwar nyɛn no.”

Emi dze, nsɛm Hwɛ do, edwuma, ahwɛyie, ɔnyɛ wo dze, tsetse, na nyɛn gyegye tse dɛ ɔhwɛfo a wɔama no ɔhwɛfo dwuma wɔ biribi a ɔsom bo na ho hia ho.

Asɔpɔkan Asɔr mu no Parley P. Pratt tse nka dɛ n’enyi anngye Nkɔnhyɛnyi Joseph Smith ho na ɔsan mu yii dɛ ɔbɛ kasa etsia ɔno na Asɔr no. “Ber a John Taylor a Parley kyerɛkyerɛɛ no asɛmpa no baa kurow no mu no, Parley faa no kɔr nkyɛn na ɔbɔɔ no kɔkɔ dɛ ma onndzi Joseph ekyir. John Taylor see Parley dɛ:

“Ansaana ibefi Canada no, idzii dase kɛse kyerɛɛ Joseph Smith dɛ ɔyɛ Nyame No nkɔnhyɛnyi, na ekaa dɛ ɔnam nyikyerɛ na Sunsum Krɔnkrɔn akyɛdze do na inyim dɛm nsɛm yi.

Seseiara mo wɔ dasedzi kor noara a idzii ehurusi wɔ mu no. Sɛ nna edwuma no yɛ nokwar abosoom esia abasen kɔ no a, ɔyɛ nokwar ndɛ. Sɛ nna Joseph Smith yɛ nkɔnhyɛnyi dɛm mber no a, ɔyɛ nkɔnhyɛnyi sesei.””

Megye dase dɛ Joseph Smith nna ɔyɛ Nyame no nkɔnhyɛnyi, na dɛ nkɔnhyɛnyfo akatakɔnmu a ɔgyee no kɔdo wɔ mberano yi mu. Jesus Christ na Odzi edwuma yi enyim.

Moto nsa frɛ wo dɛ dwen w’akwantu kɔ dasegye mapã wɔ Jesus Christ na N’asɛmpa no ho. Hwɛ wo dasedzi do; fa nyimpa ne pɛ no dzi dwuma wɔ nyansa mu na hu ɔmafo no na N’enyimnyam su nyina. Megye dase dɛ tum no wɔ wo mu. Obiara nnyi hɔ a obotum asan mu eyi ama wo. Obiara nnkotum agye dɛm akyɛdze yi efi hɛn hɔ. Ibotum asan mu eyi dɛ egye dzi.

Mehyɛ bɔ dɛ ber a hom yɛ no, hom dasegye na dasedzi bɛyɛ “nkwa nsubura, na ɔapem akɔ nkwa a ɔwɔ daapem mu.” Ɔbɛyɛ sekyɛ na nkuranhyɛ dze, na ɔbɔ kura hom do wɔ mber a ɔyɛ dzen mu. Ɔbɔ boa hom ma hom enya sunsum mu akyɛdze horow. Ɔbɔ boa wɔ hom ankorankor somdwuma na som mu. Ɔbɛyɛ akodze etsia Satan na hɔn a wotsia hom. Hom dasedzi bɛyɛ enyigye ber a ihu wɔ wo mba, mbanana, na nanasum na hɔn a idɔ na isom hɔn mu. Ɔbɛyɛ kɛse ber a ekyekyɛ na edze gye dase.

Sɛ ewɔ dasegye a inyim. Minyim dɛ mo wɔ dasegye. Yehia dasegyefo mapã fa Jesus Christ na N’asɛmpa no ho no pii. Nya dasegye mapã! Hwehwɛ! Ɔyɛ ehiadze tsitsir!” Iyi nye mberano a odzi ewiei—mber ne mãhyɛ mberano mu.

Jesus Christ akã nokwar yi, “Ɔsor nye asaase botwa mu akɔ na me nsɛm dze, orunntwa mu.”

Enuanom na nkyerɛbaa, wɔannyɛ dɛ dase a ɔfa Jesus Christ ho nnyɛ mber tsiabaa akyɛdze. Biribiara nnyi hɔ a ɔyɛ tsiabaa—nnyɛ nyia ɔdze ma, nnyɛ akyɛdze no ankasa, nnyɛ dza ɔdze akyɛdze no ba, nnyɛ nyia akyɛdze no fa no ho. Wɔmfa dɛm kwan noara do nka hom dasegye ho asɛm. Mpo, “Ɔsor nye asaase botwa mu akɔ” hom dasedzi na dasegye fa Jesus Christ N’ asɛmpa ho no orunntwa mu. Sesei nye mber a wɔdze suo dɛm akyɛdze a ɔsom bo yi mu. Jesus Christ ne dzin mu, amen.