Jesus Christ no Werdam Ɔdɔ

Sɛ ayɛ bɔn kɛse na ewɔ nnuhu kwan no do anaa ewɔ pɛ dɛ ibonu woho emudzi mu ma atse bɔnfakyɛ ne dɛwdzi a onnyi kabea nka a, meserɛ hu dɛ anwanwadze yi da hɔ rotweɔn wo. Agyenkwa no rokɔ do ara refrɛ, “Hom mbra mo hɔ.”

Erehyɛ wo gyedzi wɔ hɛn Agyenkwa, Jesus Christ mu dzen no, bekenyan wo kra n’ahwehwɛdze dɛ ibohu No, ebɛgye No edzi, na egyaa w’akoma mu ama No. Enos bisaa nankasa no bɔnfakyɛ ho asɛm: “Ewuradze, ɔyɛ dɛn yɛ?” Ewuradze buaa dɛ, Osian wo gyedzi a ɔwɔ Christ a enntsee ne nkã da na innhun no da no mu ntsi.”

Na Moroni dze kãa ho dɛ, “Sɛ hom pow dza ɔnnyɛ Nyame su nyina na hom dze hom ahom nye hom adwen nye hom ahoɔdzen nyina dɔ Nyankopɔn a, nna n’adom bɔdɔɔ sõ wɔ hom do.”

Eredan efi bɔn ho, na eredan akɔ Nyame do, na erehyɛ wo gyedzi wɔ Jesus Christ mu dzen no yɛ ahyɛse fɛɛfɛw. Ahobrɛadze mu ara irigyaa wo pɛ mu ama Nyame no, ereda wo bɔn akɛse horow no edzi akyerɛ wo bishop anaa nkorbata president no kã ho, mbom bɔnfakyɛ emudzi mu no fi Agyenkwa no hɔ ba. Bɔnfakyɛ yɛ akyɛdze krɔnkrɔn a wodua Jesus Christ n’adom do dze ma.

Dza ɔkã nokwar pɛ dɛ ebɛsan aba Nyame hɔ no ho nye enyimpisi dɛ ibedzi nokwar turɔdɔdɔ ama wo Ɔsor Egya, wankasa woho, nye hɔn a ehaaw hɔn no, na w’asɔfodzi banodzinyi. Wo Ɔsor Egya dzi dɛw wɔ wo pisi dɛ ibɛba No hɔ a edze akoma a abobɔ na sunsum a abotow. Enya sunsum a abotow nye dɛ ahobrɛadze mu ara edze woho roto Nyame nsamu; enya akoma a ebubu no dze dza Ɔsomafo Paul kãa ho asɛm dɛ “Nyame kwan do awerɛhow” no ba, ɔkra no n’ahwehwɛdze a ɔdɔ bun mu dɛ ɔbɛsan akɔ Ne nkyɛn dza ɔbɛgye biara.

W’akoma mu ahwehwɛdze gya ma ipɛ dɛ ibesiesie dza ebubu no. Naaso, ihu dɛ ndzɛmba binom wɔ hɔ a onnyi wo tum do dɛ ibesiesie, ibɔ mpaa enyiberdo dɛ Ewuradze, bodua N’adom do, aboa asa hɔn a wo ndzeyɛe no nsunsuando epira hɔn no.

Bɔn akɛse no nsunsuando wɔ binom do no ɔtaa dɛ ɔyɛ dzen yie ara dɛ wobedzi do konyim. Ana iridzi Mosiah ne mbambanyin hɔn fasusu do, hɔn a “wɔbɔɔ mbɔdzen dɛ ɔsɛɛ a wɔdze asɛɛ no wɔbɛyɛ no yie”? Enye hɔn a ibu hɔn no nkasa mfa dza bia ɔwo nnhu no ho.

Ber a mereyɛ asɛnkã yi ho ahoboa no, minyaa email bi a enyi nnda fi obi a ɔwɔ nnuhu kwan no do na ɔpɛ dɛ ɔsan ba Asɔr no hɔ. Ne yer dadaw no nna ɔda ho ara ruhu amandzehu wɔ “[hɔn] onnyiewiei awar a woegu no, [ɔhaw a onya wɔ mba no ho], ne sikasɛm ho bambɔ a wɔayew, … na onntum nntua noho akawakaw, [na] ɔreberɛ dzendzenndzen wɔ atsenka mu dɛ oeyi no ama.”

Ɔnye me kyɛɛ mbrɛ n’asɔfodzi banodzinyi “nyaa nkenyan dɛ [ombisa] no dɛ mpaabɔ mu ara onsusu dza [obotum ayɛ bio ama ne yer dadaw no na mbofra no].” Wɔama me ho kwan no, mekyɛ ne email no ne fã bi:

“[Ahyɛse no], modween ho dɛ sika a wɔhyɛɛ no wɔ awargyaa nkrataa mu no dɔɔ sõ ara yie, naaso mo nkorbata mu president no hyɛɛ me nkuran dɛ menyɛ akɔnkye na mombɔ ho mpaa. …

“Ahyɛse no, medze mpatadze bio no ho adwenkyerɛ dzii aper. Osiandɛ mo bɔn horow no nnyɛ sikasɛm no, modween ho dɛ ‘mpatadze a ɔsõ ara yie’ n’asekyerɛ ankasa nye dɛn … [mbom] annkyɛr na muhun dɛ ɔmmfa sika ho.

“M’asɔfodzi banodzifo nye [me yer dadaw] na me mba no hyiae na wohun dɛ wɔda ho ridzi aper na wonnyaa ayarsa. …

“Nna mo botae fofor nye dɛ medze gyedzi bɔkɔ kan. … Mekyerɛɛ me pɛ dɛ mobɔboa a biribiara nntae ekyir. … Mobɔɔ adwenpɔw dɛ [medze sika dodow bi bɛma me yer dadaw no] bosoom biara, a ɔyɛ m’akatua mu ne fã a ɔsõ ara yie. Ansaana murubotua dza odzi kan no, Ewuradze [dze hyɛɛ m’adwen mu dɛ [ohia dɛ] mutua [dɛm sika no mbɔho ebien].

“Mesũa dɛ mpatadze no nnyɛ sika ho asɛm ara. Ɔyɛ ahobrɛadze mu ara murutu m’abrabɔ esi hɔ ama Ewuradze. … Sika no robɔboa ahyɛ dza miyii fii m’ebusua mu ɔnam me nsanmuyi bɔn ho no ananmu. Ɔfa erobɔ anohoba na iridzi do a enyi nnda biribiara a ibenya do, na moroboa no ma ɔnnkɛhaw wɔ kaw ho ama oeetum ahwehwɛ Sunsum no.”

Bia wo mbɔdzembɔ dɛ ibesiesie dza asɛɛ no no mmfa sika ho, mbom ber a ahobrɛadze mu ara enye Ewuradze fa apam no, bia ibohu dɛ pii wɔ hɔ a ibotum ayɛ.

Ber a ihwehwɛ Ewuradze No bɔnfakyɛ no, sie abotar na tweɔn Ne nkamfo mãhyɛ no. Hom nsusu kyerɛwsɛm yi:

“Na … wɔbrɛɛ hɔnho adze … kɔr ahobrɛadze no bun mu; na … wosũi dzendzenndzen frɛɛ Nyame; nyew, adzekyee nyinara [mpo]. … [Naaso] Ewuradze yɛɛ nyaa dɛ obetsie hɔn sũfrɛ osian hɔn emumuyɛ ntsi.”

“Naaso Ewuradze tsiee hɔn sũ, na ɔhyɛɛ ase … goow [hɔn adzesoadze]; na … wɔhyɛɛ ase dɛ wɔreyɛ prɔmprɔm nkakrankakra.”

Sie abotar ber a Ewuradze ma wo Ne nhyira na ngyentomu nkakrankakra.

Ewuradze ne mber pa mu no, ebɛtse Ne ndze dɛ Ɔrekã kyerɛ wo, “[Mma] dɛm ndzɛmba yinom [nnhaw] wo bio.” Dakor, ekɔ do dan kɔ Agyenkwa no hɔ no, wo Ɔsor Egya “[bɛnam] ne Ba no ndwuma pa mu eyi [w’afɔdzi] efi [w’akoma] mu.”

Ma hom a ɔnnyɛ hom mfomdo koraa no a binom hɔn bɔn akɛse ahaw hom no, mepɛ dɛ mekyɛ Agyenkwa no dɔ na ayamuhyehye, N’awerɛkyekyer na asomdwee.

Awerɛhow a hom edzi, akomayaw, dza hom ayew, woeyi hom ama ho atsenka yayaayaw, hom abrabɔ a wɔatõtõ no—mema hom m’awerɛhyɛmu a osi pi dɛ, Agyenkwa no nyim hom na Ɔdɔ hom. Hom ntsen nkɔ No do. Ɔyɛ hom awerɛkyekyer na ahoɔdzen; Ɔbɔsoma N’abɔfoe ma wɔabɔsoa hom. Ebɛn mber na hom yaw no bɔkɔ, hom awerɛhowdzi no bɛbrɛ adze, adwendwen a hom mmpɛ no hom werɛ befir? Minnyim. Mbom iyi na minyim: Ɔwɔ tum dɛ ɔdze abɔtsir ahyɛ hom amandzehu ananmu.

Hɛn enuanom na nkyerɛbaa adɔfo a hom wɔ Grand Blanc, Michigan, a wɔdze hɔn gyedzi a onnhihim wɔ Jesus Christ mu no, wɔdze hɔn akokodur na etuhoakyɛ no enya na wobenya wɔ adapɛn na abosoom a odzi do mu no, Agyenkwa No dɔ a onnyi esusudze na adom mbordo.

Ber a hom kɔ do twer No no, hom sum mununkum no na awerɛhow sũ anago no, wɔbɛsakyer no ma wɔayɛ enyigye na asomdwee sũ a ɔpem sian anapa kan mu. Hɛn awerɛhow bɛdan enyigye. … Na hom enyigye no obiara nnkɛgye efi hom hɔ.” Dɛm ber no bɛba. Megye dase dɛ ɔbɛba.

Jesus Christ no werdam ɔdɔ no wobotum ehu no wɔ nkõdzen mber mu, mbom hɛn nyina yehia hɛn Agyenkwa no werdam adom no aber nyina. President Dallin H. Oaks akyerɛkyerɛ dɛ: “Ɔnam No werdam fasusu wɔ honandua mu no ntsi, hɛn Agyenkwa tum ma awerɛkyekyer, ayarsa, na ahoɔdzen ma mbanyin na mbaa wɔ beebiara, naaso megye dzi dɛ Ɔyɛ dɛm dze ma hɔn a wɔhwehwɛ No na wobisa No mboa. Ɔsomafo James kyerɛkyerɛɛ dɛ, “Hom mbrɛ homho adze wɔ Ewuradze enyim na ɔbɛma hom do.” (James 4:10). Yɛfata dɛm nhyira wɔ ber a yenya gyedzi wɔ No mu na yɛdze mpaabɔ bisa No mboa.”

Magye kwan efi me nyɛnko dɔfo na Wiadze Mfɛndzanan Eduosuon Tumdzifo a wɔapon no edwuma, Elder Robert E. Wells, a sesei oedzi mfe 97, hɔ dɛ menkyɛ no sũahu a onyae mfe 60 a wɔabɛsen no:

Ber a ɔtse Paraguay wɔ afe 1960 mu na ɔyɛ edwuma dɛ amansan sikakorafo no, Robert Wells, a nna oedzi mfe 32 no, na ne yer, Meryl, a biara rekã no wimuhɛn, a wofi Uruguay reba fie wɔ Paraguay. Wobehyiaa mununkum kusuu a, nna Robert na Meryl nnhu hɔnho na hɔn radio so nnyɛ edwuma. Robert besii famu ntsɛmara, hɔ na ɔtsee dɛ ne yer no wimuhɛn no abɔhwe famu. Ne yer no na anyɛnkofo beenu a wɔkã noho mu biara ennya nkwa. Ne mba a, wɔwɔ fie wɔ Asunción no, nna woedzi mfe esuon, enum, na ebien.

Elder Wells kãa n’awerɛhowdzi ho asɛm:

“Nkasafua nnkotum afebɔɔ mu akyerɛ yaw a ohuhuur mo mu, ɔhyɛɛ me nkãtse do ara ma nna munntum nnyɛ moho hwee. Nna awerɛhow nyinsuwa bebrebee mpo nngyaa gu. Ma ɔsɛɛ asɛm no koraa, ber a m’adwen robɔ mbɔdzen ehu dɛ ampaara mahwer me yer no, muhun dɛ afɔdzi kɛse bi abɛhyɛ mo do dɛ emi na meyɛɛ ma ne hɛn no hwee ase no.”

Robert dze mfom no too noho do dɛ ɔamma wɔannhwehwɛ wimuhɛn no mu yie na ɔanntsetse ne yer wɔ wimuhɛn nkyerɛkyerɛ a oye koraa mu. Ɔtsee nka dɛ odzi fɔ dɛ oebu n’enyi egu adze do.

Robert kãa dɛ:

M’adwen yɛɛ bɔɔm sunkamm. … Nna metse nkwa mu ara—[wɔ mbofra no ntsi,] nnyɛ biribiara ntsi.”

Meyeew me pɛ dɛ mobɔkɔ do.”

Mber rugu mu no, wɔdze sunsum mu sũahu a ɔdɔ bun mu hyiraa Robert. Ɔkãa dɛ:

”Dakor ewimbir bi, bɛyɛ afe kor ekyir no, ber a mebu nkotodwe wɔ mpaabɔ mu no, anwanwadze bi sii. Ber a morobɔ mpaa na morototɔ serɛ mo Ɔsor Egya no, metsee dɛ ɔyɛ dɛ ma Agyenkwa no ebegyina me nkyɛn a metsee Ne ndze a ɔrekã dɛm nsɛmfua yinom gu me kra na m’asowa mu dɛ: ‘Robert, mo werdam afɔrbɔ no tuaa wo bɔn na wo mfomdo ho kaw. Wo yer dze kyɛ wo. W’anyɛnkofo dze kyɛ wo. Mibeyi w’adzesoa. …’

“Fitsi dɛm aber no, afɔdzi adzesoa [na abagura] no woyii fii mo do nwanwa mu ara. Wɔagye me! Metsee ase ntsɛmara Agyenkwa no No Werdambɔ tum a ofua adze nyinara na … dɛ odzi dwuma ma mankasa. … Menyaa … kan na enyigye sũahu a munnhun bi da. … Wɔama me akyɛdze a mennyɛɛ ho edwuma—Ewuradze n’adom akyɛdze. … Mennsɛ mmfata—mennyɛɛ hwee a mebɛfata, naaso Ɔdze maa me dɛmara.”

Enuanom na nkyerɛbaa nkyɛ hɛn mu kor biara “anam Nyankopɔn n’adom a ofi Christ no bɔgyaa a wɔkãa gui, dza ɔtseew homho wɔ Christ mu, … [yɛabɛyɛ] krɔnkrɔn a nkekãa biara nnyi hɛn ho.”

Megye dase wɔ hɛn Agyenkwa na Pomfo No dɔ, ehumbɔbɔr na adom ho. Ɔtse ase. Yɛyɛ Nedze, yɛyɛ ahyɛmu mba. Ber a yɛgye No dzi, yɛka No do, na yɛtwer No no, Obepegya hɛn efi hɛn awerɛhow na hɛn bɔn horow mu. Nkyii, yɛtra ɔnnkyebo abrabɔ yi a, wɔ hɛn Egya fie no, yɛnye no bɛtsena afebɔɔ kesi afebɔɔ. Wɔ Jesus Christ ne dzin mu, amen.