Mormon Nwoma no—Akoradze a Yennkotum Esusu wɔ Hɛn Abrabɔ Akwantu mu
Ber a yɛmee wɔ Christ ne nsɛm a ɔwɔ Mormon Nwoma no mu mu no, Sunsum no bɔboa hɛn ma yɛaatse onnyiewiei nokwar ase.
Ibotum akaa mber bi a obi maa wo adzekyɛdze a ɔsesaa w’abrabɔ? Ɔbɛsɛ yi nye mfe 40 a me nsa kãa akyɛdze akɛse a ɔwɔ m’abrabɔ mu no mu kor. Ber a mowɔ nsɔwdo skuul no, muhun dɛ hɔn a menye hɔn gyina pɛ wɔ adzesũabea no hɔn mu kor wɔ kan bi a ɔyɛ soronko fi dza mbabun nkaafo pii wɔ no ho. Nna mowɔ ne nkyɛn a m’enyi gye. Dakor ɔkãa kyerɛɛ me dɛ ɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu ba. Nkyii ɔmaa me akyɛdze bi: Mormon Nwoma no bi. Ɔtoo nsa frɛɛ me dɛ menkenkan krataafa kakraabi na menye n’anyɛnkofo beenu bi nhyia a wobotum eyi me nsɛmbisa ano. Nna dɛm anyɛnkofo no nye asɛmpasomafo no.
Menye asɛmpasomafo no hyiae no, wɔkyerɛkyerɛɛ me Christ ne nkyerɛkyerɛ na wɔtoo nsa frɛɛ me dɛ mindzi nkɔnhyɛnyi Moroni ne nsato no do: “Ber a hom nsa bɛkã dɛm ndzɛmba yi no, mutu hom fo dɛ hom mbisa Nyankopɔn, Onnyiewiei Egya no wɔ Christ ne dzin mu, dɛ sɛ dɛm ndzɛmba yinom nnyɛ nokwar a; na sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom” (Moroni 10:4).
Me kenkaan Mormon Nwoma no ne krataafa pii na mobɔɔ mpaa. Ɔwɔ mu dɛ nna minnyi ntseasee a ɔkɔ bun mu wɔ ndzɛmba nyinara a nna asɛmpasomafo no rekyerɛkyerɛ me ho, eso metsee no wɔ m’akoma mu dɛ dza merekenkan no ye na ofir Nyankopɔn. Minyaa Moroni n’anohoba no ho pisi: “Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu” (Moroni 10:5).
Wonumaa me baa Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu no, anyɛnkofo binom bɔɔ mbɔdzen dɛ wobotu m’aso dɛ mesi gyinae bɔn. Naaso aber biara a mihyiaa adwensɛɛ anaa etsiafo a wɔtsetse dɛm no, minyaa pisi fofor ber a murusũa kyerɛwsɛm no na morobɔ mpaa dɛ mibedzi nokwar wɔ ahyɛmu a menye Nyankopɔn ahɛn mu no mu. Fitsi dɛm mber no, Mormon Nwoma no ayɛ m’adamfo na ɔabɛyɛ akoradze a wonntum nnsusu wɔ mo ɔnnkyebo akwantu mu.
Mormon Nwoma no kyɛn dɛ ɔyɛ buukuu ara. Ɔyɛ Jesus Christ N’Ahyɛmu kor so, a tsetse nkɔnhyɛfo pii a wɔnam nkɔnhyɛ sunsum na nyikyerɛ do kyerɛwee.
Dza osii a ɔkrɔn papaapa a wɔkyerɛwee wɔ Mormon Nwoma no mu no nye Ewuradze Jesus Christ nankasa no somdwuma wɔ Nephifo no mu No Wusoɛr ekyir ara no. Mormon Nwoma no “da asɛmpa no ne nkyerɛkyerɛ no edzi, ɔda nkwagye ho nhyehyɛɛ edzi na ɔkã dza sɛ nyimpa yɛ a ɔnam do benya asomdwee wɔ dɛm asetsena yi mu na oenya nkwagye a onnyiewiei wɔ asetsena a ɔreba no mu” (Mormon Nwoma no ne Mbueienyi).
Mormon Nwoma no: Jesus Christ N’Ahyɛmu Kor So ne dza odzi kan no wotsintsimii wɔ ekuroba bi mu wɔ New York wɔ Ebɔw 1830. Nna Nkɔnhyɛnyi Joseph Smith edzi mfe 23 ara ber a owiee buuku no ne nkyerɛase wɔ afe 1829 mu. Ɔdze nda a onndu nda 75 dze kyerɛɛ bukuu ne nyinara ase, na ntsintsimii no gyee bɛyɛ abosoom esuon.
Ndɛ, asɛmpasomafo bɛyɛ 80,000 wɔ amanaman bɔbor 150 mu a wɔrosom dɛ etuhoakyɛfo, a woetu hɔn abrabɔ esi hɔ dɛ wɔbɛgye dase dɛ Mormon Nwoma no yɛ nokwar na dɛ ɔgye Jesus Christ no ho dase.
Ndaansa yi asɛmpakã dwuma banodzifo afoforfo hɔn nhyiamu a wɔyɛɛ no afe yi Obiradzi bosoom n’ase no, President Russell M. Nelson, kyɛɛ ne dasee a tum wɔ mu wɔ Mormon Nwoma no ho dɛ: “Mormon Nwoma no yɛ … Nyankopɔn n’asɛm. Ɔkyerɛkyerɛ Christ ne nkyerɛkyerɛ no na ɔma nkyerɛkyerɛmu yie fa Agyenkwa no no Werdambɔ ho kyɛn ma buukuu biara yɛ.”
Mebɛpɛ dɛ mema adwenkyerɛ ebiasa a obotum aboa hɛn nsakyeree ma Jesus Christ a ɔnam Mormon Nwoma no nsũae do:
1. Ma W’enyi Mber na Ma Wo Daa Daa Adzesũa no Nyɛ Nkɔdo
Tse dɛ Alma na Mosiah ne mbabanyin no ara, hɛn so wɔ dɛ “[yɛpɛnsampɛnsam] kyerɛwsɛm no mu ara yie, ama [yeehu] Nyame n’asɛm no” na yɛaahyɛ dzen wɔ nokwar no mu. (Alma 17:2).
Ber a yɛrosom dɛ banodzifo wɔ Georgia Atlanta Mission no, emi na me yer hyɛɛ asɛmpasomafo kor biara nkuran dɛ onsũa Mormon Nwoma no annyɛ koraa sima 30 dabiara. Dɛm enyimpisi no pegyaa hɛn gyedzi mu na ɔboaa hɛn ma yɛhwehwɛɛ na hɛn enyi daa anwanwadze kwan.
Otum si dɛ asɛmpasomafo dwuma ekyir no yerinnya mber dodow dɛm ara ma daa daa kyerɛwsɛm adzesũa, naaso mobɔ anohoba dɛ sɛ nokwar mu ara edze Mormon Nwoma no nsũae a mpaabɔ kã ho to w’ehiadze no sor daa daa a, ibenya sunsum mu ahoɔdzen na awerɛhyɛmu kɛse ara yie wɔ Ewuradze na N’anohoba horow mu.
2. Ma Ntseasee Mbra W’adzesũa no mu Yie ber a Eremee wɔ Christ ne Nsɛm mu.
Nephi kyerɛkyerɛɛ dɛ, “Hom mmee wɔ Christ ne nsɛm mu, na hwɛ, Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom” (2 Nephi 32:3).
Eremee bor erekenkan ara do—ɔkyerɛ iritsim nsɛm no do, erodwendwen ho, na edze robɔ bra. Ber a isũa Mormon Nwoma no, hwɛ akwan a ebɛfa do ma ntseasee aba wo kyerɛwsɛm adzesũa mu yie. Mfatoho:
-
Fa adzesũa mboa horow a ɔwɔ Asɛmpa Nwoma Korabea app no mu no dzi dwuma.
-
Hwehwɛ onnyiewiei nokwar horow a ɔboa hɛn ma yɛtse Nyankopɔn ne nhyehyɛɛ ase na ogya hɛn ma yesie ahyɛmudzi a yɛnye hɛn Ɔsor Egya ayɛ no.
-
Hyɛ nsɛmfua a ohia nsew na kyerɛw wo nkenyan ama aakora dza esũa wɔ w’adzesũa mu no do.
Mormon Nwoma no wɔ tum a oyi hɛn kra ne nsɛmbisa ano. Dɛ mbrɛ Nephi kãa no, otwar dɛ “[yɛ]dze kyerɛwsɛm no nyinara [to] hɛnara hɛnho, ama ɔaayɛ mfaso na esuadze ama hɛn” (1 Nephi 19:23).
Ber a yɛmee wɔ Christ ne nsɛm mu no, wobobuee nyikyerɛ kwan na wɔakyerɛ hɛn dza yehia dɛ yɛyɛ wɔ hɛn abrabɔ ne gyinabew horow mu ama yɛaatwe abɛn No yie.
3. Gye Wo Dasee fa Mormon Nwoma no no Nokwar ho.
Dɛ mbrɛ Lehi pɛɛ dɛ ɔnye n’ebusua kyɛ nkwa dua n’eduaba no (hwɛ 1 Nephi 8:12), sɛ yenya dase wɔ Mormon Nwoma no ho a, yenya pɛ dɛ yɛbɛkyɛ enyigye a ofi iruhu Jesus Christ n’asɛmpa mu ba no.
Akyerɛbaa Benson a nna ɔyɛ hɛn asɛmpasomafo no mu kor, a ɔnye hɛn wɔ nhyiamu yi ase, nye me kyɛɛ ne pɛ dɛ ɔbɔboa no nuabanyin kakraba. Dɛm aber no, nna nuabanyin no reyɛ ahoboa akɔ suapɔn mu, na nna onnsi pi dɛ ɔbɔsom asɛmpasomafo dwuma. Minyaa nkenyan dɛ monto nsa mfrɛ Akyerɛbaa Benson dɛ ɔnkenkan Mormon Nwoma no wɔ abosoom anan a odzi kan wɔ n’asɛmpakã dwuma no mu, na ɔnhyɛ nyiyimu horow a ɔyɛ no dɛw no nsew, na nkyii ɔmfa dɛm Mormon Nwoma no mmona no nuabanyin no.
Akyerɛbaa Benson dze Mormon Nwoma no a ɔayeyɛ ahyɛnsew wɔ mu no monaa no nua no na ɔtoo nsa frɛɛ no dɛ ɔnkenkan mfi mu anafua biara. Ekyir no ɔnye me kyɛɛ dɛ: “Ansaana mereba asɛmpasomafo dwuma mu no, nna mo nuabanyin nnsi pi dɛ ɔbɔkɔ asɛmpasomafo dwuma. Bɔkɔɔ ara, mber guu mu no, ber a ɔkenkaan Mormon Nwoma no, onyaa dɛw a ɔkɔ do yɛ kɛse wɔ n’abrabɔ mu na ɔhyɛɛ ase nyaa adwen dɛ ɔbɔkɔ asɛmpasomafo dwuma.”
Aka adapɛn ebien ma Akyerɛbaa Benson ewie ne asɛmpasomafo dwuma no, no nuabanyin no ne nsa kãa ne frɛ kɔ asɛmpasomafo dwuma mu. Seseiara ɔrosom wɔ Mexico Tuxtla Gutiérrez Mission. Ɔnam Mormon Nwoma no do, Elder Benson dze sunsum mu enyidahɔ bohun n’abrabɔ mu, a ogyaa no ma ɔsoom Ewuradze na onyaa awerɛhyɛmu dɛ ndzɛmba bɔtotɔ yie. Dɛm gyinaesi no yɛ anwanwadze— a Christ ne nsɛm mu tum no dze bae.
Mo nuambanyin na nkyerɛbaa adɔfo, mehyɛ hom mu kor biara nkuran dɛ hom mma hom Mormon Nwoma no nsũae no mu ndɔ. Minyim dɛ ber a yɛmee wɔ Christ ne nsɛm a ɔwɔ Mormon Nwoma no mu mu no, Sunsum no bɔboa hɛn ma yɛaatse onnyiewiei nokwar ase na yɛdze ahotodo nye hɔn a Ewuradze esiesie hɔn dɛ wobetsie Ne nsɛm no akyɛ hɛn dasee. Ewuradze kãa dɛ, “M’apamufo tsie me ndze na wommpirim hɔn akoma” (Nkyerɛkyerɛ na Ahyɛmudzi 29:7). Megye dase dɛ hɔn a wobisa Nyame wɔ gyedzi mu no nam Sunsum Krɔnkrɔn no tum do benya Mormon Nwoma no no nokwar na no krɔnkrɔnyɛ ho dase. Iyi na megye ho dase wɔ Jesus Christ ne dzin mu, amen.