Ahohyɛdo Ɔbra Pa Su Ahyɛ No Mã

Esusow Aketseaba 2021 mu no, ber a ɔrokɔhwɛ Salt Lake Temple nsiesie edwuma no, President Russell M. Nelson no ho boow no wɔ edzikamfo no hɔn mbɔdzembɔ ho, a nna wɔdze sika a ɔnnsõ biara na gyedzi a onnhinhim no, sii dɛm dan krɔnkrɔn a, oegyina mber tsentsen no. Naaso, ɔsanee so hun nsu a oridzidzi ase no nsunsuando, a mber pii etwa mu no ɔdze abɔnabɔn abɛdeda temple asɔpɔkan ɔbotan fapem no mu a wɔama ntowee ahoɔdzen no hihim, sɛnkyerɛdze a ɔda edzi pefee dɛ ohia dɛ wɔhyɛ dan no n’ahoɔdzen no dzen.

Nkyii hɛn nkɔnhyɛnyi dɔfo kyerɛkyerɛɛ hɛn dɛ dɛmara dɛ ohia dɛ wodzi dwuma tsitsir dze hyɛ temple ne fapem no dzen ama woetum egyina ɔdomankoma esian no, hɛn so yehia dɛ yedzi dwuma soronko—ibi a dwuma a yenndzi bi da—dze ahyɛ hɛnara hɛn sunsum mu fapem wɔ Jesus Christ mu dzen. Ne nkaa asɛm mu no, ɔdze nsɛmbisa a no mu gyaa hɛn dɛ hɛnankasa yɛbɔdwendwen ho: “ Wo fapem ne dzen tse dɛn? Na ebɛn ndzɛmba horow na ibehia dze ahyɛ wo dasegye na asɛmpa ntseasee no dzen?

Jesus Christ n’asɛmpa no ma hɛn nkenyan krɔnkrɔn na akwanhorow a odzi mu dɛ yɛdze besiw hɛn akra mu sunsum mu nhohoree no, a tum mu ara ɔhyɛ hɛn fapem no dzen na ɔboa hɛn ma yekwetsir ntokur ntokur wɔ hɛn gyedzi mu na yennhihim wɔ hɛn dasee na asɛmpa no nokwar krɔnkrɔn no ho. Fapem a ohia tsitsir ara dɛ hɛn nsa bɛka botae yi, yehu no wɔ Nkyerɛkyerɛ na Ahyɛmudzi no ɔfã 12 mu no, nyikyerɛ a wɔnam Nkɔnhyɛnyi Joseph Smith do dze maa Joseph Knight, ɔbarimba tseneneenyi a ɔdze enyiber hwehwɛɛ dɛ ɔbɛtse Ewuradze ne pɛ ase, nnyɛ dɛ nkorɔfo bohu ara, na mbom dɛ obegyina a onnhihim wɔ n’osuanyiyɛ mu—dzendzen dɛ ɔsor fadum. Ewuradze apaamu akã dɛ:

“Na hwɛ, mekasa kyerɛ ɔwo nye hɔn a wɔwɔ pɛ dɛ wɔbɔboa ma dwumadzi yi epue guado no na woetsim yie;

“Na obiara nnkotum aboa dwumadzi yi, gyedɛ nyia ɔbrɛ noho adze na ɔdɔ ahyɛ no mã, ɔwɔ gyedzi, enyidado, na ɔyɛ ayamuyie, na ɔyɛ ntoboase wɔ ndzɛmba nyinara mu, ɔfa no biribiara a wɔdze bɛhyɛ ne nsa no.”

Agyenkwa no n’akwankyerɛ, a wɔkyerɛɛw wɔ nyikyerɛ krɔnkrɔn yi mu no, bɔ hɛn nkaa dɛ enyidahɔ yɛ adze a ohia tsitsir ma fapem a ɔyɛ dzen wɔ Jesus Christ mu. Ɔyɛ ɔbrapa su ahorow no mu kor a yennkotum ekwetsir, nnyɛ ma hɔn a wɔafrɛ hɔn dɛ wɔnsom nko, mbom ɔsan so dze ma obiara a ɔnye Ewuradze edzi ahyɛmu krɔnkrɔn horow na ɔgye to mu dɛ ɔbɛka No do nokwar mu ara. Ahohyɛdo kã Christ-su horow bɔ mu kor na ɔhyɛ nkaa no a wɔabobɔ edzin wɔ nyikyerɛ yi mu no dzen: ahobrɛadze, gyedzi, enyidado, ayamuyie, na ɔdɔ mapã no a ɔtsen fi No hɔ no. Yɛkɔ do a, yerinya enyidahɔ no yɛ mfaso kwan a yɛdze bɔ hɛn akra ho ban tsĩa daa daa sunsum mu nhohoree ndaadaa no a wiadze nhyɛdo no botum ayɛ ma hɛn fapem wɔ Jesus Christ mu ayɛ mberɛw no.

Dza ɔkã su ahorow a Christ n’esuafo nokwafo wɔ ho no, ahohyɛdo dzi akõtsen a ɔda Agyenkwa Nankasa, Sunsum n’eduaba a ɔsom bo, na ɔwɔ hɔ ma hɔn nyinara a wobegyaa hɔnho mu ama nhyɛdo krɔnkrɔn no, edzi. Ɔyɛ ɔbrapa su a ɔdze asomdwee ba na ɔdze nyansa na botooyɛ dzi dwuma nya nhyɛdo wɔ apɛdze na nkãtse do. Kyerɛwsɛm mu no, wɔda ahohyɛdo edzi dɛ hɛn sunsum mu akwantu ne kankɔ ne fã tsitsir a ohia, na ogya hɛn kɔ abotar, nyamesu, na ayamuhyehye ho, ber a ɔretsew hɛn nkãtse, hɛn nsɛm, na hɛn ndzeyɛe ho.

Christ n’esuafo a wɔper dɛ wobenya Christ-su suban yi kɔ do ara yɛ ahobrɛadze na ɔdɔ hyɛ hɔn mã. Wonya abotɔyamu ahoɔdzen bi, na wonya tum yie dze hyɛ ebufuw do, wonya abotar, na wɔkyerɛ abodwee, enyidzi, na enyimnyam ma binom, mpo sɛ atseetsee n’ehum rutu yerɛwyerɛw a. Wɔper dɛ wɔnnyɛ adze mpofir mu ara mbom wɔsan mu yi dɛ wɔdze sunsum mu nyansa bɛyɛ adze, a Sunsum Krɔnkrɔn no ne nhyɛdo bɔkɔɔ na botooyɛ akwankyerɛ kã ho. Kwan yi do no, wɔnnyɛ mmberɛw mma sunsum mu nhohoree no osiandɛ, dɛ mbrɛ Ɔsomafo Paul kyerɛkyerɛɛ no, wonyim dɛ wotum yɛ adze nyina wɔ Christ a ɔhyɛ hɔn dzen no mu mpo wɔ ber a woehyia nsɔhwɛ horow a obotum awosow hɔn dasee wɔ No ho no.

No nwoma a ɔdze kɛmaa Titus no, Paul dze afotu krɔnkrɔn mae a ɔfa hɔn a wɔwɔ pɛ dɛ wogyina ma Agyenkwa no na wɔdze gyedzi na etuhoakyɛ ayɛ Ne pɛ no hɔn su. Ɔkãa dɛ ɔwɔ dɛ wɔyɛ ahɔhoyɛ, hɔn enyi dwe, wɔtsen, na wɔtsew hɔn ho—su shorow a ɔkyerɛ enyidahɔ ne nhyɛdo pefee.

Naaso, Paul bɔɔ kɔkɔ dɛ “onnyi dɛ [wɔ]yɛ ntsintsiman, ebufuw ebufuw, … [na] wɔnyɛ pupopupo.“ Suban ahorow a ɔtsetse dɛm no nye Agyenkwa n’adwen nnsaa na osiw nokwar sunsum mu mpontu kwan. Kyerɛwsɛm mu asɛm no “ɔnnyɛ ntsintsiman“ no yɛ obi a ɔmmfa ahomemado anaa ahantan nnyɛ adze; “ɔnnyɛ ebufuw ebufuw’’ nye obi a okwetsir awosu nhyɛdo dɛ onnyi abotar na ɔwɔ ebufuw; na “ɔnnyɛ pupopupo’’ kyerɛ obi a okyir wentwiwentwi, nhyɛ, na etsirmɔdzen suban wɔ kasa, honandua na nkãtse mu. Sɛ yɛper dɛ yɛdze gyedzi na ahobrɛadze bɛsesa hɛn suban a, yebotum agye ndwow a ɔyɛ dzen afam N’adom botan tsim no ho na yɛabɛyɛ edwindadze krɔngyenn a wɔatsew hɛnho wɔ Ne nsa krɔnkrɔn no mu.

Morodwendwen hia a ohia dɛ yebenya enyidahɔ ɔbrapa no, mekaa Hannah ne nsɛm no, nkɔnhyɛnyi Samuel ne maame—ɔbaa a ne gyedzi yɛ nwanwa, a mpo wɔ nsɔhwɛ akɛse ekyir no, ɔtoow ndaase ndwom maa Ewuradze. Ɔkãa dɛ, “Mma hom nnkasa ahohyehyɛ mu pii dɛm bio; Mma hom mma ahopɔwsɛm mmfi hom anomu mmpue: Na Ewuradze nye Nyame a ohu adze nyinara, na ɔno na oker ndzeyɛɛ.“ No ndwom no kyɛn mpaabɔ—ɔyɛ nankasa ne nsato nsɛm dɛ ɔdze ahobrɛadze, ahohyɛdo, na ɔdwe yɛ adze. Hannah bɔ hɛn nkaa dɛ nokwar sunsum mu ahoɔdzen no wɔnnkyerɛ no wɔ mpofir mu ndzeyɛe a wɔnndwen ho mu anaa ahopɔwsɛm mu, mbom wɔkyerɛ no wɔ enyidahɔ, nyansa suban horow mu a Ewuradze ne nyansa bata ho.

Ɔtɔfabi a, wiadze no kamfo suban a ofi nhyɛ, ahopɔwsɛm, ahoper, na adzehwer mu ba no, na wɔtaa gye suban a ɔtsetse dɛm to mu dɛ daa abrabɔ ne nhyɛ na dza epɛ a egye to mu na wɔayɛ atsenkã. Sɛ yɛdan hɛn enyi fi ahohyɛdo ɔbrapa su ho na yɛpow Sunsum Krɔnkrɔn no no bɔkɔɔ na ɔdwe nhyɛdo no wɔ kwan a yɛdze yɛ adze na yɛkasa mu a, ntsɛmara yɛkɛhyɛ ɔtamfo n’efir no mu, a yenntum nnsiw kwan dɛ ogya hɛn ma yɛkekã nsɛm na yɛfa suban horow a yɛfe hɛn ho ekyir ara yie wɔ ho, sɛ wɔ hɛn afɛwdzi mu, ebusua, anaa mpo wɔ nyamesom nkitahodzi mu o. Jesus Christ n’asɛmpa no to nsa frɛ hɛn dɛ yɛmfa ɔbrapa su yi ndzi dwuma nkanka wɔ nsɔhwɛ ber mu, osiandɛ mber pɔkyee yinom mu na ankorankor nokwar suban no da edzi. Dɛ mbrɛ Martin Luther King Kakraba kãa no mpɛn bi no dɛ, “Nnyɛ dasanyi n’ahotɔ na n’ahomka ber mu na ɔkyerɛ no suban ankasa, mbom no nsɔhwɛ na ɔhaw mber mu no na ɔkyerɛ.“

Dɛ ahyɛmudzi nkorɔfo no, wɔfrɛ hɛn dɛ yɛmbɔ bra a hɛn akoma tsim dzendzenndzen wɔ anohoba krɔnkrɔn a yɛabɔ akyerɛ Ewuradze no mu, a ahwɛyie mu ara yedzi nhwɛdo a ɔnam Ne fasusu a odzi mu do akyekyer no do. Ne nyiano no, Ɔabɔ anohoba dɛ, “Nokwar, nokwar, mese hom dɛ, iyi nye me nkyerɛkyerɛ na nyia osi ne dan wɔ iyi do no si ne dan wɔ ɔbotan do, na hɛl mbobow rinndzi no do konyim.”

Agyenkwa no somdwuma wɔ asaase do no ahohyɛdo ɔbrapa su no da edzi wɔ No suban nyinara mu. Ɔnam Ne fasusu a odzi mu do no, Ɔkyerɛkyerɛɛ hɛn dɛ [ye]nya abotar wɔ amandzehu mu, mma nnkã kasa bɔn nntsia hɔn a wɔkã kasa bɔn tsia wo no.” Mber a Ɔkyerɛkyerɛɛ dɛ mma yennya ebufuw osian ekyingye na wentwiwentwi ntsi no, Ɔpaa mu kãa dɛ: “Hom nnu homho, na hom nyɛ dɛ abofra kakraba.“ Ɔsanee so kyerɛkyerɛɛ dɛ obiara a ɔpɛ dɛ ɔba No hɔ na ɔdze akoma pa no otwar dɛ ɔnye hɔn a no bo efuw hɔn no anaa ɔwɔ biribi tsĩa hɔn no kɔbɔ mu. Ɔdze ahohyɛdo na ayamuhyehye akoma no, Ɔma hɛn awerɛhyɛmu dɛ sɛ wɔdze etsirmɔdzen, enyimtsiabu, enyiannsɔ, anaa wommbu hɛn bi dzi hɛn a, N’ayamuyie no remmfi hɛn nkyɛn, na worunntutu N’asomdwee ahyɛmudzi no mmfi hɛn abrabɔ mu.

Mfe kakra a abɛsen kɔ no, emi na me yer nyaa ndzinoa krɔnkrɔn dze kehyiaa Asɔrmba anokwafo binom a wɔwɔ Mexico Kuropɔn mu. Hɔn mu dodow, sɛ ɔyɛ hɔnankasa anaa ɔnam hɔn adɔfo do no, asɔw nsɔhwɛ horow a wonntum mmbɔ edzin, a wɔrekyer nyimpa dze hɔn ekesie, nyimpakum, na esian horow yaayaw bi kã ho.

Mber a nna yɛhwɛ Ahotseweefo enyim no, yennhu ebufuw, ayawdzi, anaa werdzi ɔpɛ. Mbom, yehun kommyɛ ahobrɛadze. Hɔn enyim, a nna awerɛhow da edzi wɔ no, kyerɛɛ dɛ nokwar ayarsa na awerɛkyekyer kɔm dze hɔn. Mpo dɛ nna amandzehu ama hɔn akoma ridzi yaw dze, Ahotseweefo yinom dze hɔn gyedzi wɔ Jesus Christ mu peree kɔr kan, na wɔsan mu yii dɛ wɔnnkɛma hɔn haw no ayɛ ntokur ntokur wɔ hɔn gyedzi mu anaa wɔama hɔn dasee wɔ asɛmpa no ho ehihim.

Mboano krɔnkrɔn n’ewiei no, yekyiakyiaa hɔn mu kor biara. Nkyia biara, etuu biara, bɛyɛɛ kommyɛ dasegye dɛ yɛdze Ewuradze no mboa no, yebotum asan mu eyi dɛ yɛdze ahohyɛdo behyia abrabɔ n’atseetsee na nsɔhwɛ horow no. Hɔn kommyɛ na ahobrɛadze fasusu no yɛɛ dɛ nsato berɛɛw bi dɛ yɛmfa ahohyɛdo nnantsew Agyenkwa no n’anamɔnkwan do wɔ adze nyinara mu. Yɛtsee nkã dɛ nna ɔyɛ dɛ sor abɔfo kã hɛn ho.

Jesus Christ, a ɔsõ sen obiara no, hun amandze maa hɛn kɛpem dɛ bɔgya fii No honandua enyi nyina kyii, naaso, Ɔamma ebufuw kwan ma ɔammfram N’akoma, nna nhyɛ, ahorba, anaa kasa bɔn emmpue emmfi N’ano, mpo wɔ haw a ɔtse dɛm mu. Ɔdze ahohyɛdo a odzi mu na botooyɛ a ne saso nnyi hɔ no, Ɔanndwen Nankasa no ho na mbom Nyankopɔn ne ba kor biara ho—hɔn a wɔaba kɔ, wɔwɔ hɔ sesei, na ndaamba wɔbɛba. Ɔsomafo Peter gyee Christ n’enyimnyam suban ho dase mber a ɔpaa mu kãa dɛ: “Ɔno, na wɔyaaw no, na wɔannyaw bi; ohun amandze no, ɔammbɔ mpuw; na ɔdze noho hyɛɛ nyia obua atsɛn tsenenee no nsa.“ Mpo wɔ Ne yaw kɛsenara mu no, Agyenkwa no kyerɛɛ enyidahɔ krɔnkrɔn na odzi mu. Ɔpaa mu kãa dɛ, “Naaso, enyimnyam nkã Egya no, na monomee na muwiee mo mboaboa ho biara yɛ dze maa adasamba.”

Mo nuambanyin na nkyerɛbaa adɔfo, metserɛw enyiber nsato ma hɛn nyinara dɛ yɛmfa Christ saso ɔbrapa ahohyɛdo su nhyɛ hɛn adwen na akoma mu mã, dɛ mbuae krɔnkrɔn ma hɛn dɔfo President Russell M. Nelson no nkɔnhyɛsɛm ntotɔserɛ. Sɛ yɛgye enyim dze gyedzi na enyimia kã ahohyɛdo ho fa hɛn nsɛm na ndzeyɛe ho a, megye dase dɛ yɛbɛhyɛ dzen na yɛatow hɛn abrabɔ ne sekyɛ dzendzen wɔ hɛn Pomfo ne fapem tsim no do.

Medze enyidzi gye me dase dɛ yɛwɔw do hwehwɛ enyidahɔ a, osieise hɛn kra na ɔtsew hɛn akoma ho wɔ Agyenkwa n’enyim, a bɔkɔɔ mu ara ɔtwe hɛn bɛn No yie na ɔdze enyidado na asomdwee siesie hɛn ma enyimnyam da no a yebehyia No wɔ Ne Mbae a Otsĩa Ebien no. Mekã nsɛm krɔnkrɔn yinom wɔ hɛn Agyenkwa, Jesus Christ dzin mu, amen.