Jesus Christ na W’Ahyɛse Fofor

Jesus “kyinii yɛɛ yie.” Yɛkenkan dɛm amandzɛɛbɔ tsiabaa no wɔ Ndwuma nwoma mu. Asɛm no wɔannkã ne nyina koraa! Nokwar ara Jesus kyinii yɛɛ yie! Papayɛ—ne farbaa—nye Ɔno ankasa! Ɔdze No ɔnnkyebo abrabɔ nyina mae dze yɛɛ papa. Ɔyɛ “mbɔbɔrhufo na yamuyiefo, Ɔwɔ penkyɛr, na adom ahyɛ no mã,’’ papayɛ na daapem wɔ mbɔbɔrhu mu.

Mbɔdzembɔ biara a yɛbɛyɛ dɛ yɛbɛkã Ne papayɛ ho asɛm anaa yɛbɔbɔ no tɔw no bɛyɛ asɛm a wɔnnkã ne nyina! Nokwar ara, Ɔsomafo John bɔɔ mbɔdzen dɛ ɔbɛkyerɛ no, sɛ nna ɔwɔ dɛ yɛbɔ mbɔdzen kyerɛw Agyenkwa no ne papayɛ ho ndaedzi kor biara a, “nkyɛ nwoma a wɔbɛkyerɛw no rennsen wiadze mpo.’’

Wɔakyerɛw fasusu etsitsir wɔ kyerɛwsɛm mu a yɛkaa no afebɔɔ fa Jesus a orikyin “yɛ yie’’ ho a ɔyɛ ahobow na nwanwa kɛse, nkanka sɛ yesusu ankasa dɛ nkyɛ yɛwɔ hɔ na yetumii hun dza nna ɔtse, dze agye N’anwanwadze ho dase, dze agye Ne nkyerɛkyerɛ, na yenya N’ayarsa a. Ɔnye hɔn a wɔapoow hɔn wɔ fekuw mu no dzii nkɔmbɔ, Osuoo nyia yarba akã no na noho nntsew no mu, Ɔmaa dza wɔatɔ bahaw no awerɛkyekyer, Ɔkyerɛkyerɛɛ nokwar a ɔma fahodzi, na Ɔfrɛɛ ndzebɔnyɛfo dɛ wonnu hɔnho. Kwatanyi, onyifuranyi, na ɔbaa dwamanbɔnyi biara no; apakye no, tsitsifo no, na mmum no; enã biara a odzi yaw, egya a onnyi enyidado, na kunafo a osi nkrum; nyia a oebu no fɔ no, nyia a oegu n’enyim ase no, nyia oruhu amandze no; nyia oewu honandua mu na sunsum mu no, dza Ɔyɛe nye dɛ ɔmaa ahyɛse fofor. Nyew, asɛm kor so a wɔannkã ne nyina koraa!

Asɛm biara a Ɔkãe na ɔyɛɛ maa hɔn a Ɔsaa hɔn yarba, Ohyiraa hɔn, Ɔkyerɛkyerɛɛ hɔn, na Ɔmaa hɔn ahotɔ fi bɔn mu no mu kor biara ahyɛse fofor. Ɔanntwe Noho emmfi hɔnho, na nokwar ara Ɔronntwe Noho mmfi woho. Susu mber yi mu dɛ eretse nkwa nsɛm yinom mu biara fi No hɔ dɛ:

“Ɔba, wɔdze wo bɔn akyɛ wo.”

“Akataaasia, mese wo dɛ, Nyan.”

“Wo ho nsan.”

“Mo so mummbu wo fɔ: kɔ na mma nnkɛyɛ bɔn bio.”

“Babaa, wo gyedzi agye wo: kɔ asomdwee mu.”

Nna Agyenkwa ne nsɛm ma ankorankor yinom yɛ tsiabaa, naaso hɔn dze Ɔkyerɛɛ bɔnfakyɛ, ayarsa, nsananamu, asomdwee, na onnyiewiei nkwa, hɔn nhumu fofor. Na enyimnyam nsɛmpa no nye dɛ, Ɔdze ahyɛse fofor kor noara ma emi na ɔwo. Ɔnam Jesus Christ do, na osian Ɔno ntsi hɛn nyinara yebotum yenya ahyɛse fofor. Ɔwo mpo. Ahyɛse fofor yɛ adze tsitsir a ɔkã Egya ne nhyehyɛɛ ho ma Ne mba. Iyi nye ahyɛse fofor horow asɔr no! Iyi nye erehyɛ ase bio asɔr no!

Yenya nsu na Sunsum enuma no, “[wɔwo] hɛn fofor’’ na yebotum “yɛanantsew nkwa fofor mu.’’ Enyidado dodow bɛn na ahyɛse fofor no dze brɛ nyia no a osian bɔn adzesoa anaa amandzehu a ɔnam nkitahodzi na abrabɔ a ndzɛmba nnkɔ yie? Nna Jesus nnhia bɔnfakyɛ anaa Ɔbɛhyɛ ase bio wɔ abrabɔ mu, naaso Ɔno no wonumaa No, dze kyerɛ hɛn ahyɛse fofor no kwan a ɔda edzi na Oetwa ama hɛn mu kor biara no.

Na hɛn ahyɛse fofor no nnsi prɛko pɛr ara. Ɔyɛ a yɛdwen dɛ hɛn enuma no nye hɛn kwan kor pɛr wɔ ahyɛse fofor no. Ɔnntse dɛm. Nnyɛ kwan kor pɛr na yɛwɔ. Ahyɛse fofor yinom botum esi da biara! Na nokwar ara dapɛn biara ber a yedzi paanoo sin ketseketse na yɛnom nsu kɔɔpow kakraba dze kaa hɛn Agyenkwa a odzi mu n’akyɛdze no, Ɔno a Owui wɔ botae tsitsir bi ntsi dɛ ɔbɛma hɛn ahyɛse afofor pii dɛ mbrɛ yehia no! Jesus ma hɛn ahyɛse afofor pii dɛ mbrɛ yehia no!

Yɛdze enyimpisi na ehurusi mu hɛn ɔbra fofor wɔ Christ mu no, yebotum yɛabɛyɛ “abɔdze fofor,’’ ma ndzɛmba adadaw no etwa mu na ndzɛmba nyina ayɛ fofor. Ebɛn ahomgye na ahyɛse a otsĩa ebien no dze brɛ ɔkra no a ɔkɔ do bɔ mbɔdzen, ɔnam dɛ ɔkɔ do san mu yi gyedzi wɔ hɛn Pomfo no tum do a ɔdze sa yarba na osiesie, a wiadze a ɔahwe ase a yɛtse mu mpo no nkõgu hyɛ hɛn do no? Agyenkwa no ammbrɛ wɔ N’enyimpisi ho dɛ ɔbɛhyɛ Egya no Ne pɛ mã na Oewie No werdam somdwuma krɔnkrɔn no, mpo wɔ yaw mu a ɔmaa [Noho] popoe, na bɔgya fii [no] honandua enyi nyina kyii, na [ohun] amandze wɔ honam nye sunsum, na dɛ Ɔbɔbɔ mpaa dɛ nkyɛ wobeyi kuraba no efi hɔ. Bio no, nna Ɔrekyerɛ hɛn dza yɛnye Nyankopɔn sɔɔw no nokwar mu a ɔtse.

Ahyɛmudzi biara a yɛyɛ na mbɔdzembɔ biara yɛdze ma dɛ yebesie no, yebotum yenya “akoma fofor’’ na “sunsum fofor’’ mbordo. Nkakrankakra no, mpɛn dodow a yɛyɛ dza oye dze tse Ne papayɛ nkã na yɛpow adwenbɔn ndze wɔ hɛn etsir mu no, yɛbɛyɛ No nkorɔfo osiandɛ yɛyɛ No hɛn Nyankopɔn nokwar mu ara . Enyigye mu ara Jesus pɛ dɛ Ɔyɛ hɛn Hen na hɛn Guanhwɛfo na hɛn Asomdwee Hen, na yebotum yɛasan mu eyi ayɛ No dɛmara wɔ hɛnara hɛn akoma na adwen mu.

Nnuhu bue kwan ma hɛn ahyɛse fofor, yɛhyɛ ase bio, na akwan a otsĩa ebien. Hɛn dɔfo President Russell M. Nelson ne nkyerɛkyerɛ eyiyi dza ɔnnyɛ nokwar fa nnuhu n’akyɛdze krɔnkrɔn ho, na muhu dɛ afei yɛrehyɛ ase atse ase.

Ɔyɛ enyigye dɛ ibɛtse hɛn mbabun rekã dza nnuhu ase kyerɛ ma hɔn ho asɛm. Ɔnnkyɛree na metsee akataasia bi a ɔdze anoyerɛw wɔ n’enyim kã dɛ, “Sɛ modwen nnuhu ho, daa daa nnuhu ho a, metse dɛwdzi na enyidado nwanwa nkã. Metse mo Ɔsor Egya na m’Agyenkwa hɔn ɔdɔ na enyigye nkã. Munnsuro dɛ mebɛba Ɔsor Egya hɔ wɔ mpaabɔ mu na mibisa No mboa wɔ adzebiara a miridzi ho aper ho. Minyim dɛ Wɔrommbɔ mbɔdzen dɛ wɔbɛkye me dɛ mereyɛ biribi bɔn. Wɔatserɛw hɔn abasa mu. Ɔkãa dɛ, Ɔno nye nnuhu ma me.’’ Akataasia yi tse ase dɛ osian Jesus Christ ntsi, obotum enya ahyɛse afofor!

Ana ihia ahyɛse fofor? Ibotum ahyɛ ase bio, ɔwo mpo a? Dwen nkorɔfo a Agyenkwa no soom hɔn, nkorɔfo a Ɔkyerɛkyerɛɛ hɔn, Ɔsaa hɔn yarba, Onyaan hɔn fi owu mu, Ɔdze hɔn bɔn kyɛɛ hɔn, na osiesiei hɔn no ho. Ana Oyiyii mu fi hɔn a wɔwɔ sika anaa gyinabew soronko bi mu a? Ana Ɔdze nsonsonenee too ɔtseneneenyi na ɔdzenbɔnyɛnyi ntamu a? Ana oyiyii nyimpa no nkorkor osiandɛ nna wɔfata anaa nna ɔdɔ hɔn mbordo a? Oho.

Binom dze gyedzi kɛse baa No hɔ, a nna wɔgye No tum a ɔdze sa yarba no dzi—tse dɛ ɔbaa no a nna oenya bɔgyaa gu no, Roman ɔhamupanyin no a nna n’abofora ruwu no, kwatanyi no, Jairus, na onyifurafo Bartimaeus. Hɔn mu kor biara kyerɛɛ hɔn gyedzi, a nna wɔwɔ enyidado dɛ rabbi no a ofi Nazareth ne papayɛ na tum no bɛsesa hɔn abrabɔ na hɔn ndaamba. Na Ɔyɛe! Ɔdze n’ayarsa tum no dzii dwuma kwa.

Na Jesus sanee so hyiraa hɔn a nna hɔn gyedzi hihim, tse dɛ abofra yarfo no a n’egya kaa mu no, ibia tse dɛ ma ayɛ da no dɛ, “Ewuradze, megye midzi; boa m’ekyingye.’’ Na mpo Ɔkyerɛɛ ayamuhyehye kwa dze maa hɔn a nna wɔnnhwehwɛɛ No koraa, tse dɛ ɔbaa no a wɔkyeer no wɔ awarto mu no, Nain okunafo no, banyin no a nna ɔda n’ahoɔmberɛw mu wɔ Bethesda nsutaae ho no, na banyin no a wɔwoo no onyifurafo no. Ana atse Ne nkã dɛ orikyin yɛ yie wɔ w’abrabɔ mu mpo mber a nnhwehwɛɛ No anaa nnkaa No do?

Sunsum mu nsɛm yinom mu kor biara no, na obiara a obetsie na wɔagye do no, Ɔmaa ahyɛse fofor, sɛ nna ɔyɛ bɔn ho bɔnfakyɛ ɔbra fofor, anaa ahomberɛw ho ayarsa ɔbra fofor, anaa ɔbra fofor a wonyaan fi owu mu o.

Iyi n’asekyerɛ nye dɛn ma emi na ma ɔwo? Ne papayɛ na ehumbɔbɔr na ɔdɔ ayamuyie nnsa da. Ahyɛse fofor yɛ adze tsitsir wɔ Egya ne nhyehyɛɛ mu! Erehyɛ ase bio nye Ɔba no somdwuma no! Awoo fofor, anamɔn fofor, na kwan fofor nye nsɛmpa n’asɛmpa n’adze tsitsir.

Ntsi no, atsew woho efi w’ahyɛmudzi horow ho akyɛr dodow dɛ ebenya ahyɛse fofor a? Oho. Ana ayɛ iyi anaa dɛm mpɛn pii dɛ wɔbɛma wo kwan fofor a? Oho. Ana atsew woho efi Christ ho ara ma dɛ Ɔnnkɔboa wo ma akyerɛw asɛm fofor fi ha dze kɔ a? Oho. Ɔsɛɛfo no nko nye nyia onya mfaso fi adwen no dɛ edzi nkõgu ho. Nnyɛ ankonam.

Na ahyɛse afofor horow no hɔ mma hɛn bɔn na mfomdo ara nko. Ɔnam hɛn Agyenkwa ne papayɛ na n’adom do no, yebotum yɛahyɛ ase bio a okenyan nsesa wɔ suban dadaw, suban bɔn, ebufuwhyew, akomabo, mberɛwyɛ, na su no ho dɛ yɛnnkɛfa dze ahyɛ nkorɔfo na yɛbɛgye hɛnankasa hɛn asodzi ato mu. Nokwar ara ibotum asesa ndzɛmba a ɔfa woho na ɔbrɛ wo adze wɔ sunsum mu. Ibotum ahyɛ ase bio edua ahyɛse fofor horow Wura no no tum do. Ɔmmberɛ da dɛ ɔma hɛn ahyɛse afofor.

Hɔn a wɔdze bɔn kor noara anaa akwansidze kor noara ridzi aper no, hom nkɔ do. Ɔmmfa akwansidze nsi hom enyim. Onntwa w’akwan a otsĩa ebien do no tsia. Ɔwo kɔ do. Kɔ do per. Ɔwo hwehwɛ mboa fi hɔn a woetwa woho ehyia no hɔ. Na w’awerɛhyɛmu wɔ ahyɛse fofor mu wɔ hɔ ma wo mber biara a edan kɔ w’Egya hɔ a edze nokwar akoma no. Yengyaa bɔn a yɛgye enyim yɛ, yɛyɛ bɔn kor noara bio, na ahantan etuatsew no a wɔmmfata wo no wɔ ekyir. Onnhia dɛ ebɛyɛ nyia a nkyɛ etse dadaw no. Fua wo asehyɛ bio, wo kwan a otsĩa ebien anaa ebiasa anaa ɔtɔ do anan—anaa ɔtɔ do ɔha—kwan no to mu, a ɔnam Jesus Christ no werdam bɔgyaa no do dze maa wo no.

Munnhu dza menkã mfa nkyerɛ m’enyisɔ ma ahyɛse afofor a wɔdze ama me na dza wɔdze rebɛma me no ho.

Hɛn Agyenkwa kãa asɛm kor a odzi ewiei a ɔannkã asɛm ne nyina a sɛ ɔnnkã ho a nnkyɛ siantsir biara nnyi hɔ ma enyidado anaa dɛwdzi ndɛ yi. Amandze a Ohun wɔ Gethsemane ekyir na okowiee wɔ mbeamudua do no, ma Ɔkãe ara nye dɛ, “Oewie.’’ Nkɔnhyɛsɛm krɔnkrɔn ahyɛ mã, na adasamba hɔn bɔn ho kaw na amandzehu no woetua no emu. Ɔpaa mu kãa dɛ “woewie’’ N’afɔrbɔ a onnyiewiei na ɔmmbɔadze da no. Mbom nkyɛ Werdambɔ no nnkedzi mu kɛpem dɛ Ɔnoara Ankasa nyaa nkwa fofor wɔ da a otsĩa ebiasa no, ahyɛse fofor no dɛ nyimpa a enyimnyam ahyɛ no mã na ɔnam Egya no tum do Ɔasoɛr efi owu mu.

Osiandɛ daa Ɔyɛɛ dza ɔsɔɔ N’Egya n’enyi ntsi, na osiandɛ “Ɔyɛɛ Egya ne pɛ ho wɔ adze nyinara mu ntsi’’ emi na ɔwo yebotum enya ahyɛse fofor. Meserɛ gye w’ahyɛse fofor, ndɛ, seseiara mpo. Jesus Christ nye hɛn gyedzi ne Dzikamfo nye no Wiefo, a ɔnye hɛn rekyerɛw nsɛm afofor a wonnkotum akan. Ɔno nye Ahyɛse na Ewiei no—hɛn enyimguase na amandzehu n’ewiei, na nkwa fofor ahyɛse wɔ No mu, ɔma yenya N’adom, yegya dza wɔabasen no ekyir na yɛhyɛ ase bio a yɛdze awoo fofor mpɛn dodow biara a yebehia. Nokwar ara “N’adom na Ne yie bɛka [hɛn] do [hɛn nkwa] nda nyinara.’’ Wɔ Jesus Christ ne dzin mu, amen.