Ama Hom Nyina Enya Ntowdo

Dɛ yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo n’asɔrmba a, wɔdze Nyametsir mu mba no mu kor n’anyɛnkoyɛ ehyira hɛn no, yebotum enya Kyerɛkyerɛnyi a odzi mu no no mboa. Sunsum Krɔnkrɔn no nyim ndzɛmba nyinara, gye nokwar ho dase, na “ɔbɛkaa [hɛn ndzɛmba] nyina.” Nna President Russell M. Nelson kasa mpɛn pii fa hia a ohia dɛ yɛtse Ewuradze ne ndze ho. Ɔkyerɛkyerɛɛ hɛn mbrɛ yɛbɔto nsa afrɛ Sunsum Krɔnkrɔn no n’akwankyerɛ na ɔkɔr do ara serɛɛ hɛn dɛ yɛnto hɛn sunsum mu tum a wɔdze nya nyikyerɛ no mu.

Ndɛ moto nsa frɛ wo dɛ hwɛ Sunsum Krɔnkrɔn no n’edwuma, nkanka wɔ asɛmpa nsũae na nkyerɛkyerɛ mu wɔ fie na wɔ asɔr. Sunsum Krɔnkrɔn no wɔnam gyedzi mpaabɔ do dze ma na ber a yɛrobɔ mbɔdzen abɔ bra a ɔfata dɛm akyɛdze krɔnkrɔn yi. Asɔr nkenyan mboa buukuu Teaching in the Savior’s Way kyerɛ fapem binom so a Ewuradze akyekyer ato hɔ a ɔbɔboa ato nsa afrɛ Sunsum Krɔnkrɔn no ne nkenyan.

Fapem yinom mu kor nye dɛ ehwehwɛ enyimia adzesũa. Mber a etwa mu kɔ, nna bia yɛdwen dɛ adzekyerɛ yɛ kwan ma ɔwofo anaa kyerɛkyerɛnyi dɛ ɔto nsa frɛ Sunsum no wɔ n’ahoboa dze kɛkyerɛ adze mu, na nkyii ɔnye mbofra anaa class mba no akyɛ dza oesũa a, adzesuafo no hɔn edwuma nye dɛ wobetsie. Mbom dza mfaso wɔ mu papaapa mpo nye ber a hɛn, adzesuafo, so dze ahosiesie ba na ber a akyerɛkyerɛfo so yɛ adzesuadze ho sũahu horow a ɔfrɛfrɛ ankorankor nyikyerɛ ba hɛn akoma na hɛn adwen do pɛɛ. Nkyii, ber a wɔma hɛn kwan dɛ yɛnkyɛ dza yerusũa a ɔnam adzesũa do na ofir Sunsum Krɔnkrɔn no, yɛboa hɛnho hɛnho ma yenya nkyerɛkyerɛ na ntowdo. Ber a yɛdze asɛmpa fapem horow no bɔ bra no, Sunsum no gye dase bio wɔ no nokwar ho.

Dɛ mbrɛ ɔtse wɔ ndzɛmba nyina mu no, Jesus Christ nye fasusu a odzi mu. Ɔato nsa afrɛ hɛn mu kor biara dɛ yɛnyɛ esuafo a yɛwɔ enyimia na yɛmfa hɛnara hɛn dasee ho asodzi nto hɛnho do. Ɔtoo nsa frɛɛ N’esuafo dɛ wonsiesie hɔn ho mfa nsũa adze, wɔnkyɛ dza worusũa, na wondzi dwuma wɔ gyedzi mu. Ɔbɔɔ mpaa maa hɔn, hun hɔn ndaamba krɔnkrɔn, tsiee hɔn, na ɔboaa hɔn ma wohun dɛ wɔdɔ hɔn na wohia hɔn.

Dɛ yɛyɛ akyerɛkyerɛfo no, yebotum etsim yie wɔ esuafo hɔn mpontu do, yɛrohwɛ hɔn ehiadze do, na yɛroboa hɔn ma woenya sunsum mu ntɔyɛɛ su a ɔfa osuanyiyɛ wɔ abrabɔ mber nyina mu ho. Dɛ yɛyɛ adzesuafo no, sɛ yɛdze hɛn pɛ dzi dwuma wɔ adzesũa nhyehyɛɛ no mu a, yɛkyerɛ Sunsum Krɔnkrɔn no dɛ yɛayɛ krado dɛ Ɔmbɛkyerɛkyerɛ hɛn adze.

M’enyi sɔ kyerɛkyerɛnyi a ɔtoo nsa frɛɛ me dɛ membɛyɛ osũanyi papa. Ber a mehyɛɛ sũapɔn ase no, mofomee dween dɛ skuul yɛ biribi a ɔwɔ dɛ mosɔw ama ɔaama me kwan ma maayɛ agodzi ahorow. Dakor, mo sũapɔn kyerɛkyerɛnyi kaan krataa bi a makyerɛw ekyir no, ɔkãa kyerɛɛ me dɛ meyɛ badwembanyi a mowɔ akyɛdze. Nna minnyim dza n’ase kyerɛ mpo. Ɔkãa dɛ mitsim wɔ mbɔdzembɔ do yie a, mubotum ayɛ osũanyi papa. Nna dɛm adwen no mmbaa m’adwen mu da. Dwen a ɔdwen moho, no nkuranhyɛ, na nsato sesaa mo skuul nkɔree n’enyi na ohyiraa m’abrabɔ papaapa.

Fapem kor so a ohia ma yɛdze afrɛ Sunsum Krɔnkrɔn no nye dɛ yɛbɛkyerɛ nokwar nkyerɛkyerɛ. Iyi kyerɛ dɛ hɛn asɛmpa adzesũa na nkyerɛkyerɛ gyina Nyankopɔn ne nsɛm do na yɛnnto mu nkyen anaa yɛmmbɔ hɛn tsir mu wɔ dza Ewuradze nnyii nnkyerɛe ho. Mbom, yetsim wɔ asɛmpa fapem horow a ohia na ɔyɛ onnyiewiei do a, ɔma Sunsum no kwan ma ɔgye nokwar ho dase. Bio, yedzi Agyenkwa no ne fasusu do. Ɔkãa dɛ, “Me nkyerɛkyerɛ nnyɛ medze, na nyia ɔsomaa me no dze a.”

Nokwar nkyerɛkyerɛ wohu no wɔ kyerɛwsɛm mu na ndɛ nkɔnhyɛfo hɔn nkyerɛkyerɛ mu. Ewuradze n’afotu dɛ yensũa kyerɛwsɛm no dɛ ankorankor ara na dɛ ebusua ebusua na dɛ yɛnkɔ asɔr dapɛn biara nkosũa N’asɛmpa no ma nhyehyɛɛ a ɔda nsew a yɛdze sũa Ne nkyerɛkyerɛ na yɛdze tse Ne ndze. Yɛhwehwɛ kyerɛwsɛm no mu dze tse nsɛm no ase, fapem horow a ɔkyerɛkyerɛ, na mbrɛ yɛdze dɛm nokwar no bɔbɔ hɛn bra. Ɔyɛ nhyira dɛ yɛwɔ kyerɛwsɛm no wɔ hɛn nsaano. Susu Adam na Eve, Abinadi, anaa mpo Kyerɛkyerɛnyi Panyin, Jesus Christ, a wɔreba hɛn efiefi anaa hɛn adzesũa mbea abɛkyerɛkyerɛ hɛn adze. Wobotum aba ber a yɛremee wɔ Nyankopɔn n’asɛm mu Yɛdze nwɔwdo mbɔdzembɔ no, yebotum esũa dze enya ntseasee na yɛadɔ kyerɛwsɛm no na yeenya awerɛhyɛmu dɛ wɔwɔ nyiano ma ɔkra no n’asɛmbisa horow.

Mber bi mu ansaana yɛrobɔwar no nna me yer, Kristi, reper dɛ ɔbɛtse Ɔsor Egya no dɔ nkã na ɔatse Ne nhyehyɛɛ ma no ase. Ber a ɔbɔɔ mpaa hwehwɛɛ akwankyerɛ no, nkenyan bi bae dɛ ɔnkɔ institute, ntsi ɔdze noho hyɛ Ahyɛmu Fofor adzesũa mu. Mbrɛ osi na ne institute kyerɛkyerɛnyi no kyerɛ adze fi kyerɛwsɛm no mu, mpo kwan a ɔfa do suo kyerɛwsɛm no mu no, kyerɛɛ mbrɛ osi dɔ Nyankopɔn n’asɛm. Ber a ɔkɔr adzesũa no, Sunsum Krɔnkrɔn no wasaa biribi kyerɛɛ no dɛ biribi wɔ kyerɛwsɛm no mu a ohia. Ne kyerɛkyerɛnyi no dɔ ma kyerɛwsɛm no nna Sunsum Krɔnkrɔn no ne nkenyan maa onyaa pɛ dɛ ɔbɛhyɛ Nyame n’asɛm nsũae ase enyiber do—a ɔbɛyɛɛ ɔbrasar akwantu a nsakyeree a no mu dɔ na etuhoakyɛ som wɔ mu.

Otwa ekyir no, dɛ ma Teaching in the Savior’s Way kyerɛ no, hɛn adzekyerɛ na adzesũa wɔ dɛ otsim wɔ Jesus Christ do daa daa. Yebotum akasa mpɛn pii afa No ho wɔ obu mapã mu ara na yɛahwehwɛ akwan pii dze agye hɛn dasee wɔ No ho, na yɛakyerɛ enyisɔ na dɔ ama No. Tsebea biara mu, ber a yɛkaa No no, yebotum enya “no Sunsum ma Ɔnye [hɛn] atsena.”

Kwan kor a yebotum ama Jesus Christ ayɛ hɛn nkyerɛkyerɛ n’adze tsitsir nye dɛ yebesi do dɛ Ɔno nye fasusu a odzi mu, Ogyina hɔ ma asɛmpa fapem nyinara na ne nyɛe. Mpo sɛ wɔannkã No ho asɛm pɔkyee wɔ kyerɛwsɛm asɛm bi mu a, yebotum akɔ do akyerɛ dɛ Ɔyɛ fasusu wɔ fapem a wɔrekyerɛ no ho. Yebotum ebisa ara dɛ, “Ana ibotum adwen ber bi a Jesus Christ yɛɛ dɛm fapem yi ho fasusu?”

Yebotum so etsim wɔ No do ber a yerusũa N’abɔdzin horow, No ndwuma, na No su, a yɛrohwehwɛ nnyɛ dɛ yesũa dza Ɔayɛ nko mbom yɛatse nyia Ɔyɛ ase yie. Mfatoho, sɛ yerusũa nnuho ho fapem a, ohia dɛ yɛtse kwan a wɔfa do nu ho ase. Mbom ohia dɛ ekaa dza Jesus Christ ayɛ ma ntsi yetum nu hɛnho na yɛtse dza nnuho kyerɛkyerɛ hɛn fa No ho na No nokwar su ase. Ebɛnadze na kwan a yɛwɔ dɛ yɛdze nu hɛn ho no kã fa No dɔ, abotar, na ehumbɔbɔr ho, Ne gyedzi wɔ hɛn ndaamba krɔnkrɔn mu, Ne pɛ dɛ ɔbɔbɔ werdam ama hɛn bɔn, na enyigye a Onya dɛ Ɔdze bɔn rekyɛ hɛn ho? Na yɛretse N’abɔdzin horow—tse dɛ Nyame Eguambaa, Pomfo, na Ɔyarsafo ase no—boa hɛn ma yehu nnuho dɛ Ne frɛ a ɔdze bɛsan hɛn ho, asesa hɛn, na Ɔasa hɛn yar. Yeritsim wɔ dza Ɔayɛ ama hɛn do na dza ɔkã fa No ho no botum aboa hɛn ma yeenya “gyedzi a ɔbɛma [yeenya] nnuho.”

Ɔtɔ mber binom a, yerunnhu Agyenkwa no su ahorow no dɛ wɔakyerɛw no wɔ kyerɛwsɛm asɛm bi mu ntsɛmara. Mfatoho, sɛ yɛrekenkan fa Nephi a ɔrepam hɛn ho a, bia yebetsim wɔ Nephi nko do. Mbom yeritsim wɔ Agyenkwa no do no botum aboa hɛn ma yeehu dɛ nkyerɛwee yi wɔannkora do dɛ ɔbɛkyerɛkyerɛ hɛn Nephi ne kɛseyɛ mbom Nyankopɔn ne kɛseyɛ ho asɛm—dɛ Ɔma hɛn ahoɔdzen ma yɛdze dzi Ne mbrasɛm do na Ɔgye hɛn wɔ ahohia mber mu.

Yebotum so etsim wɔ Jesus Christ N’edwuma tsitsir wɔ Ɔsor Egya n’enyigye ho nhyehyɛɛ a odzi mu no mu. Obotum asesa hɛn abrabɔ no kwan ma yɛahwɛ hɛn tsebew wɔ Nyame ne onnyiewiei nhyehyɛɛ kwan do, kyɛn dɛ yɛbɔhwɛ onnyiewiei nhyehyɛɛ no wɔ hɛn tsebew a ɔnnkye bo no kwan do. Asɛmpa no nnyɛ ehiadze ho nkyerɛwee; ɔyɛ asɛmpa dɛ Jesus Christ dzii bɔn na owu do konyim. Yerisie ahyɛmudzi a yɛnye Nyankopɔn wɔ ama hɛn nsa aakã N’adom nwanwa no na ɔbɛma yeetum atsena ase dɛwdzi mu seseiara na yeesiesie hɛn ho ama abrabɔ a yɛnye hɛn Egya a ɔwɔ Sor bɛtsena ase afebɔɔ. Ber a yesũa dɛ yebohu Ɔsor Egya na Agyenkwa no wɔ kyerɛwsɛm no mu no, yɛbɛba abohu Hɔn yie na yɛbɛtse hɔn dɔ na nkenyan ntaataado yie na ndamyɛ mu ara yie wɔ hɛnara hɛn abrabɔ mu.

Daa daa mebɛkaa Sunsum a metsee dɛ aberantsɛba ber a hɛn kyerɛkyerɛnyi kyerɛkyerɛe faa nda a odzi ewiei wɔ Agyenkwa no n’abrabɔ mu ho. Ɔboaa hɛn ma yehun ehiadze a ɔwɔ dza osisii wɔ dansor no mu hɔ, Gethsamane, Golgotha, na nda a ɔatɔ pan no mu. Ɔkyɛɛ n’enyisɔ kɛse maa Agyenkwa no na pɛ a ɔpɛ dodoodow dɛ ɔbɛka No do. Nna ne nkyerɛkyerɛ no yɛ nsato ma Sunsum Krɔnkrɔn no dɛ Ɔngye Jesus Christ ho dase. Na Sunsum a metsee no wɔ dɛm adzesũabea no maa me gyedzi no mu yɛɛ dzen na ɔmaa mo dɔ na enyisɔ ma Agyenkwa no kɔr sor. Dɛm kyerɛkyerɛnyi no ne nhyɛdo no nye me atsena wɔ m’abrabɔ nyina mu. Dɛ mbrɛ wɔkãa faa kyerɛkyerɛnyi kor so ho no, “Nna yetum kã hɛnho hyew wɔ ne gyedzi gya no ho.”

Hɛn efiefi na Asɔr nhyiamu mu no, sɛ yetsim wɔ Jesus Christ do, kyerɛkyerɛ ne nkyerɛkyerɛ, na yɛdze enyimia sũa adze a, yɛto nsa frɛ Sunsum Krɔnkrɔn no dɛ ɔnhyɛ hɛn gyedzi wɔ Jesus Christ mu dzen na ɔmboa hɛn ma yɛmbɛyɛ dɛ Ɔno yie, a ɔyɛ asɛmpa ne nkyerɛe na nsũae nyinara ho botae.

M’enyi sɔ akyerɛkyerɛfo a wɔwɔ m’abrabɔ mu, fi awofo pa na sɔn mu banodzifo na akyerɛkyerɛfo do dze kɔ mbanyin na mbaa a wɔafrɛ hɔn dɛ wɔnkyerɛkyerɛ na wɔngye dase fi asɛnkadaka yi do a, wɔboa hɛn ma yehu na yɛka Jesus Christ no do. Na m’enyi sɔ Sunsum Krɔnkrɔn no, Kyerɛkyerɛnyi a odzi mu no. Ɔnam Sunsum Krɔnkrɔn no do na minyim dɛ Ɔsor Egya dɔ hɛn na Ɔwɔ nhyehyɛɛ a odzi mu ma hɛn; na Jesus nye Christ no, Agyenkwa no na wiadze no Pomfo; na dɛ wɔdze N’asɛmpa na N’Asɔr asan ananmu aba. Medze enyisɔ gye nsɛm yinom ho dase wɔ Jesus Christ ne dzin mu, amen.