Na Afei Muhu Adze

Yɛdze ɔdɔ a ndabraba nnyi mu yesi do kã President Oaks ne tribute no nyina a ɔdze ama President Russell M. Ballard a oefi mu no. Na yɛdze ɔdɔ na awerɛhowdzi dɛmara no, hɛn nyina hɛn enyi tua ayakayakadze a ndaansa yi ɔkɔr do wɔ Michigan na wiadze nyina mu daa daa mpo. Yɛdze dɔ na awerɛhyɛmu wɔ Ewuradze Jesus Christ mu hwɛ ndzɛmba yinom nyina.

John tsir akron no kyerɛw sũahu bi a Jesus na N’esuafo rutwa mu wɔ ohuafo bi a ɔyɛ onyifurafo fi n’awoo nkyɛn no wonyae ho asɛm. Iyi gyaa esuafo no ma wobisaa Jesus nyamesom ho nsɛmbisa a ɔdzen pii a ɔfa bea a banyin no ne sintɔ no fi bae. Owura no yɛɛ biribi a ɔda famu koraa na ɔyɛ ahobow dze buae. Ɔtoo ntafi guu famu na ɔdze dɛtse kakra forae. Nkyii Ɔdze seraa banyin no n’enyiwa do na Ɔhyɛɛ no dɛ ɔnkɔ nsutaae Siloam nkɔhohor. Iyi nyina banyin yi a onnhu adze yi yɛɛ no setsie mu ara na “ɔbae no nna ohu adze” dɛ ma kyerɛwsɛm no kã no. Mbrɛ adanse si ho hia, kyɛn apɛdze anaa ekyingye anaa adwenbɔn a otsia nokwar no.

Oye, osiandɛ Agyenkwa n’atamfo no suro dɛ anwanwadze yi bɛma Jesus no tumdzi akyɛn hɔn dze a wɔdween dɛ wɔwɔ no ntsi, wohyiaa nyia afei ohu adze no na wɔdze ebufuw kãa dɛ, “Yenyim dɛ [Jesus] yɛ dzebɔnyɛnyi.” Banyin no tsie hɔn mber kakra na nkyii obuaa dɛ, “Sɛ ɔyɛ dzebɔnyɛnyi a … , minnyim: [mbom] adze kor na minyim, … nkyɛ meyɛ onyifurafo, na afei dze muhu adze.”

Jesus maa nyiyiano yi ho asekyerɛ a odzi kan, Ɔrekã kyerɛ N’esuafo no dɛ dza woesi nyina ama “Nyankopɔn ndwuma bɛda edzi wɔ no mu ntsi a.” Hom nkaa dɛ mpɛn ebien wɔ asɛnkã yi mu no dza Agyenkwa no yɛe no wɔkãa ho asɛm dɛ “ɔseraa” onyifurafo no n’enyiwa do, ndzeyɛɛ a ɔbɔhohor dze ewie yɛ. Asɛm yi dɛ “Nyankopɔn no ndwuma [reda] edzi no” botum ama nsusui dɛ ayɛdze bi rokɔ do.

Nokwar kor so a ɔda edzi wɔ ha nye edwindadze a ɔsor na asaase Bɔfo no nye dza ɔwɔ mu nyina dze yɛɛ anwanwadze yi: ntafi na dɛtse nsapuw! Ndzɛmba yinom a enyi nnda ho no bɔ no dawur dɛ Nyankopɔn botum dze biribiara na kwan biara a Ɔsan mu yi no do ehyira hɛn. Tse dɛ Naaman ropow Esutsen Jordan anaa Israel mba ropow dɛ wɔbɔhwɛ abowatsena no a ɔsɛn dua do no, mbrɛ osi yɛ mberɛw dɛ yɛbɔpow hɛn mponee ne fibea osiandɛ ndzɛmba na edwindadze a wɔdze yɛe no yɛ enyiguase dodow.

Yɛkaa fi Mormon Nwoma no dɛ ndzɛmba binom a ɔda edzi pefee na ɔsom bo na ansaana Jesus n’awoo no, wɔbɛhyɛ nkɔm dɛ “na sɛ yehu no a; onnyi ahoɔfɛw a ɔbɛma no ho ayɛ akɔndɔ.” Mpɛn ahen na Nyankopɔn asoma N’adehyesɛm edua Relief Society president a mbrɛana wɔafrɛ no fofor a ɔrehaw anaa banyimba a onnyi nwomasũa a ɔwɔ New York haban mu anaa asɛmpasomafo fofor koraa anaa abodomaba a ɔda mbowa edzidzidaka mu.

Ntsi sɛ hɛn mpaabɔ ho mbuae ba wɔ kwan a ɔda famu, anaa ntõtoe mpo mu ɛ? Ana yebenya pɛ dɛ yebetsim na yɛabɔ mbɔdzen dze Christ n’asɛmpa no abɔ bra ɔmmfa ho ntafi na dɛtse dodow a ɔbɛgye biara a? Bia dza wɔreyɛ anaa ne siantsir no nnkɛyɛ pefee ama hɛn aber biara, na fi ber to ber no, hɛn nyina yebenya atsenkã dɛ akyerɛbaa panyin no a ɔkãa dɛ, “Ewuradze, nkyɛ ama nhyira a ɔnnyɛ nsumae?

Hom nsusu nokwar kor so ho adanse, iyi ɔfa asɔfodzi krɔnkrɔn no ho. Ɔrekyerɛw berano asɔr ne nkyekyeree ho asɛm no, Luke ne kyerɛpɛn a odzi kan no kenkan dɛ: “Na ɔfrɛɛ duebien no boaa ano, na ɔmaa hɔn ahoɔdzen na tum,” akyɛdze horow a onngyina abawdobɔdze no dodow do anaa ɔnnyɛ amambra anaa awoo mu panyin na ɔkyerɛ. Ɔnnyɛ nyamesom skuul anaa sunsum mu nyimdzee seminary na wɔdze ma. Wɔnam nsa a wɔdze gu do dze ma, a onyia no oenya tumdzi efi nyia ɔdze maa no hɔ a ɔtoado a wɔnntsetsew mu kesi ɔsor tumdzi fibea no do, Ewuradze Jesus Christ.

Na wɔ asɔr a ɔtse ehumbɔbɔr akyɛdze ase no, ɔnnkɛyɛ adanse nwanwa wɔ asɔr no no nokwaryɛ dɛ yebohu nhyira na ahyɛmudzi horow no bɔkɔ hɛn ewuakɔr, hɔn a wɔwɔ hɛn ebusua ebusua mu a woedzi hɛn kan akɔ no hɔn hɔ a? Ana ɔsɛ dɛ wɔtsẽa hɔn osiandɛ woennya asɛmpa no ho kwan anaa osiandɛ mber na mbea a wɔwoo hɔn no nna ɔsor ayɛdze na ahyɛmudzi horow no hɔn nsa nntum nkã? Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no wɔ Ewuradze adan krɔnkrɔn a woetu ahyɛ Nyame nsa a wogyina ananmu reyɛ ehumbɔbɔr ayɛdze anapa na anafua biara ama ewuakɔr yinom, na ɔma kwan so ma atseasefo sɔr na wɔyɛ ayɛdze horow? Me nyimdzee mu no, iyi yɛ Nyankopɔn no nokwar, n’amansantsen dɔ na ehumbɔbɔr ho adanse tsitsir a wonnhu no wɔ Christianfo wiadze mu beebiara—gyedɛ asɔr kor a ɔkã dɛ ɔkyerɛ nokwar wɔ iyi ho tsitsir no: Jesus Christ N’Asɔr a ɔwɔ hɔ ma Nda a Odzi Ekyir Ahotseweefo.

Ber a odzi kan a menye nokwar ho adanse mapã no hyiae a ɔmaa me kan na nkwa no oenndua dɛtse a wɔdze sera do anaa wɔ Siloam nsutaae do. Oho, nokwar edwindadze a ɔdze m’ayarsa a ofi Ewuradze hɔ no baa dɛ nwoma bi ne nkrataafa mu, nyew, Mormon Nwoma no: Jesus Christ N’Ahyɛmu Kor so! Nwoma yi mu nsɛm no hɔn a wɔnngye nndzi etu ahyɛ do, hɔn ebufuw ɔtɔfabi a ɔyɛ pɛr tse dɛ hɔn a wɔdze ano yaayaw kãa kyerɛɛ banyin no a wɔasa no yarba no dɛ dza onyim dɛ oenya ho sũaho no nnkotum esi no.

Wɔatow no ɔhyew mu ara ama me dɛ kwan a nwoma yi duaa do bae no ɔnntɔ asowa mu, wɔnngye nndzi, ɔyɛ enyimguase, na ho nntsew mpo. Afei, dɛm no yɛ kasadzen a ofi obi a ɔgye to no do dɛ onyim kwan a nwoma no nam do bae, susuampara dɛ dza wɔakã afa ho ara nye wɔdze “Nyankopɔn akyɛdze na tum” kyerɛɛ ase. Ɔno nye no! Na ɔno ye. Kwan biara do no, Mormon Nwoma enya nsunsuando wɔ m’abrabɔ do tse dɛ anwanwadze no a wɔdze ntafi na dɛtse yɛɛ banyin nyifuranyi no n’enyiwa no. Ɔayɛ bambɔ poma ma me kra ama me, nyikyerɛ kan a, ɔkrɔn na ɔhɛn mu, ɔhyerɛn anamɔnkwan a otwar dɛ menantsew do ber a sum ehubɔhubɔw ba. Na ampaara wɔaba, na ampaara wɔbɛba.

Na adzehu a ɔdze ama me wɔ Agyenkwa n’amansantsen ɔdɔ na mponee adom no, menye hom kyɛ me dasegye, midzi bem tse dɛ banyin no a oehyira no fofor n’awofo kãa dɛ hɔn babanyin no ɔsɛ dɛ wotsie no osiandɛ “oenyin.” Nyew, mara so dɛmara. Na wɔkyerɛɛ dɛ ɔayɛ panyin ara yie a wɔbɛgye n’asɛm. Nyew, mara so dɛmara. Wɔaka me abosoom ebien na medzi m’awoda a otsĩa 85. Meekodu owu n’egyaa na masan ekyir. Menye ahemfo, na nkɔnhyɛfo, nye presidentfo na asomafo anantsew. Dza oye koraa no, ɔto mber bi a Nyame No Sunsum Krɔnkrɔn no hyɛ mo do mbordo. Mowɔ awerɛhyɛmu dɛ annyɛ yie kora no hom bosusu me dasegye no ho kakra.

Afei, enuanom na nkyerɛbaa, minyaa me kra nyina mu gyedzi a osi pi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo yɛ Ahyɛmu Fofor asɔr no ne nsanananmu—na mbordo—osiandɛ menntum anngye dɛm nsanananmu ho adanse no. Fitsi dɛm sũahu a odzi kan no, mususu dɛ menya mpem—anaa mpemdu?—adanse binom so dɛ dza ndɛ makasa afa ho yɛ nokwar. Ntsi, sesei medze enyigye kɛkã me nyɛnko no ho wɔ Jerusalem stiitsi mu, bea a medze me ndze a ɔrofɔn motow ndwom:

Jesus Christ ne dzin mu, amen.