Nhyira akã Esiesiefo

Enye me nsusu dɛ eyɛ abasirba kumabaa wɔ Capernaum, a ɔbɛn Galilee Po, wɔ Jesus Christ no somdwuma ber mu. Rabbi—kyerɛkyerɛnyi—noho asɛm tserɛw a ne nsɛm no twe nyimpadodow. Anyɛnkofo yɛ nhyehyɛɛ dɛ wobotu kwan akɔ koko a ɔhwɛ po dɛ wobetsie No.

Ekã binom a wɔrenantsew Galilee huntuma kwan no do ho. Wodur hɔ no, nyimpadɔm no a wɔaboa hɔn ano dɛ wobetsie Jesus yi yɛɛ wo ahobow. Binom wasa bɔkɔɔ dɛ “Messiah.’’

Etsie. Ne nsɛm no kã w’akoma. Erenantsew kwan tsentsen akɔ fie no, esan mu yi dɛ ebɛyɛ dzinn kyɛn nkɔmbɔdzi.

Edwendwen ndzɛmba nwanwa ho—ndzɛmba a ɔbor Moses ne mbra no mpo do. Ɔkasae faa obiara a ɔbɛpaa w’aso nyimfa mu no, dan kor no so ma no na dɔ w’atamfo ho asɛm. Ɔbɔɔ anohoba dɛ, “Nhyira akã esiesiefo, na hɔn na wɔbɛfrɛ hɔn Nyankopɔn mba.”

Ɔwo ankasa no, ber a itse nkõdzen mber adzesoadze—ekyingye na suro no—asomdwee wɔ ekyirekyir.

W’anamɔntu yɛ hahaahar, ikodu fie a w’ahom nnsi do. W’ebusuafo boa ano, w’egya bisa dɛ, “Kã dza itsiei na etsee ho nkã kyerɛ hɛn.’’

Ekã dɛ Jesus Christ kyerɛkyerɛɛ wo dɛ ma wo kan nhyerɛn wɔ nyimpa enyim, dɛ hwehwɛ tseneneeyɛ mpo sɛ wɔtseetsee wo a. Wo ndze hinhim ber a isi do kã dɛ: “Nhyira akã esiesiefo, na hɔn na wɔbɛfrɛ hɔn Nyankopɔn mba.”

Ibisa dɛ, “Nokwar mu ara ana mubotum ayɛ siesiefo ber a wiadze yi ayɛ begyabegya, mber a suro ahyɛ me mã, na mber a ɔyɛ dɛ asomdwee wɔ ekyirekyir?’’

W’egya hwɛ wo nã na oyi ano berɛɛw dɛ, “Nyew. Yɛhyɛ ase wɔ bea a ohia ankasa mu—wɔ hɛn akoma mu. Nkyii na wɔ hɛn efiefi na ebusua ebusua mu. Ber a yesũasũa wɔ hɔ no, asomdwee dwuma botum atserɛw akɔ hɛn stiitsi stiitsi na nkurase nkurase mu.’’

Yɛnkɔ ntsɛntsɛm ndu mfe 2,000. Onnnhia dɛ yebosusu—iyi yɛ nokwar ampa. Mpo dɛ ndɛ mbasantsen hɔn adzesoa yɛ soronko fi mbabun a nna wɔwɔ Galilee hɔn dze no—mpapaamu, ntsetsewmu, awerdzi, akwantsen do ebufuw, emumuyɛ, na social media nkɔnkɔnsa—ama mbasantsen ebien no nye basabasayɛ na ahoper ridzi esi

Dɛmara na enyisɔ mu ara, hɛn young men na young women no wɔtwe hɔn kɔ hɔn Koko-do-Nkyerɛkyerɛ mber ho—seminary: For Strength of Youth [Ma Mbabun Enya Ahoɔdzen] ehyiadzi horow, na Bra, Bɛka Mo Do. Ha no wonya daapem nsato fi Ewradze hɔ dɛmara dɛ: na hom mma hom kan nhyerɛn wɔ nyimpa enyim, dɛ wɔnhwehwɛ tsenenee mpo sɛ wɔhaw hɔn a, na wɔndɔ hɔn atamfo.

Wɔsan so nya nkuranhyɛ nsɛm fi Nsanananmu nkɔnhyɛfo atseasefo hɔ: “Wohia Esiesiefo.’’ Erema nokwar nye abotar ayɛ pɛr. Fa bɔnfakyɛ na ɔdɔ hyɛ wentwiwentwi na ahantan ananmu. Yɛ koryɛ na ntseasee ndzɛmba, nnyɛ adwenbɔn anaa mpapaamu dze. Na anohoba kor noara dɛ: “Nhyira akã esiesiefo, na hɔn na wɔbɛfrɛ hɔn Nyankopɔn mba.”

Jesus Christ ho dase na ndaamba ho enyidado ahyɛ ndɛ mbasantsen a wɔreba no hɔn akoma mu mã. Naaso hɔn so wobisa dɛ, “Nokwar mu ara ana mubotum ayɛ siesiefo mber a wiadze yi ayɛ begyabegya, mber a suro ahyɛ me mã, na mber a ɔyɛ dɛ asomdwee nnyi hɔ?’’

Mbuae kɛse bio no yɛ nyew! Yɛgye Agyenkwa ne nsɛm no to mu dɛ: “Asomdwee na medze gya hom. … Mma hom akoma nntutu, eso mma ɔmmbɔ hu.”

Ndɛ, asomdwee dwuma da ho hyɛ ase wɔ bea a ohia ankasa mu—wɔ hɛn akoma mu. Nkyii na wɔ hɛn efiefi na ebusua ebusua mu. Ber a yesũasũa wɔ hɔ no, asomdwee dwuma botum atserɛw akɔ hɛn stiitsi stiitsi na nkurase nkurase mu.’’

Hom mma yɛnkɔ do nhwɛ mbea mbea ebiasa yinom a ndɛ-da yi Latter-day Saintnyi “ma asomdwee ba’’ hɔ.

Odzi kan nye wɔ hɛn akoma mu. Adze a ɔda Christ no somdwuma ho edzi kyerɛ mbrɛ mbofra sii twee bɛn No. Hɔ na ngyinado no wɔ. Erohwɛ abofra a n’akoma mu asomdwee krɔngyenn na afɔbu nnyi mu no botum ayɛ nkenyan ama hɛn akoma. Iyi yɛ mbrɛ primary mbofra beberee sii yii ano dɛ “Ebɛyɛ esiesiefo no tse dɛn?’’

Merekyɛ hɔn mbuae a ofi hɔn akoma mu pɛɛ! Luke kãa dɛ, “Boa nkorɔfo aber nyina.’’ Grace kãa mbrɛ osi hia dɛ yɛdze bɔn kyɛ hɛnho nkorkor, mpo sɛ ɔyɛ nsisi a. Anna kãa dɛ, “Muhun obi a nna onnya biara a ɔnye no bedzi agor, ntsi menye no kedzii agor.’’ Linda dwendween ho dɛ ebɛyɛ esiesiefo nye dɛ eboa binom. “Nkyii enye binom kyɛ. Na ɔbɔkɔ do ara na wɔatserɛw. Liam kãa dɛ, “Ma w’enyiwa nsɔ nkorɔfo mpo sɛ hɔn enyiwa nnsɔ wo a.’’ London tsẽaa mu dɛ, “Sɛ obi si wo atwetwe anaa ɔyɛ enyiannsɔ kyerɛ wo, ekã dɛ, ‘Meserɛ gyae.’” Trevor hun dɛ, “Sɛ ɔaka bofrot kor na hɔn nyinara pɛ a, wɔkyɛ.’’

Mbofra yinom hɔn mbuae no da edzi kyerɛ me dɛ wɔdze pɛ krɔnkrɔn ma ayamuyie na ayamuhyehye woo hɛn nyinara. Jesus Christ n’asɛmpa no tsetse na ɔkã su krɔnkrɔn yinom bɔmu kor, a asomdwee dwuma, wɔ hɛn akoma mu a ohyira hɛn wɔ abrabɔ na dza odzi do no kã ho.

Otsĩa ebien, yɛrekyekyer asomdwee dwuma wɔ hɛn efiefi ber a yɛdze Ewuradze no nhwɛdo ridzi dwuma ma oenya nhyɛdo wɔ yɛnye hɛnho nkorkor nkitahodzi do: ndzɛfɛdzɛfɛw, penkyɛr, ayamuyie, nye ɔdwe mu, na ɔdɔ a ndabraba nnyi mu mu.

Nkenyan asɛm bi nye yi a ɔkyerɛ mbrɛ ebusua kor bi sii dze asomdwee dwuma yɛɛ ebusua asɛm, wɔdze fapem horow yinom dzii dwuma.

Nna mbofra a wɔwɔ ebusua yi mu no ridzi aper a wɔ wɔnye banyin panyin bi, a nna ɔwɔ ebufuwhyew, ɔyɛ ahomemado, na ommbu adze suban nkitahodzi ho. Mbofra no a nna wodzi yaw na wɔtseetsee no hyɛɛ ase dwendween ho dɛ sɛ kwan kor ara nye dɛ wɔbɛkyerɛ suban noara bi akyerɛ no a.

Ewimbir bi, ebusua no twae hyiaa edzidzi pon no ho na wɔkãa hɔn akoma mu nsɛm fa ɔhaw na nsunsuando a nna ɔdze reba no ho asɛm. Nkyii na adwenkyerɛ bi puei—nnyɛ dɛ worisiesie ara mbom nhwehwɛmu bi.

Nkyɛ wɔdze dzinnyɛ anaa awerdzi bobua no, mbofra no yɛɛ dza enyi nnda ho kwan: wɔdze ayamuyie buae. Nnyɛ enyidzi ahohyɛdo ara, mbom wɔgye hɔn enyim ara kyerɛɛ no nokwar ayamuhyehye na ayamuyie, a nna adzebiara a ɔbɛsan dze ayɛ hɔn no annhaw hɔn. Hɔn nyinara peen do dɛ wɔdze mber bi bɔsɔ ahwɛ, na ekyir no wɔasan ehyia na wɔadwendwen ho.

Mpo dɛ nna ahyɛse no hɔn mu binom ammpɛ dɛ wɔbɛyɛ no, wɔdze nokwar akoma sii emyimpi dɛ wɔbɛyɛ.

Dza osii no yɛɛ ahobow na nwanwa.

Suban twintwann no hyɛɛ ase dɛ ɔrogow. Nyerɛwano hyɛɛ emunamuna anan mu. Banyin panyin no, nkyɛ mber bi ɔyɛ yerɛwyerɛw na no bo nndwe no, hyɛɛ ase dɛ ɔresesa. Mbofra no, wɔnam hɔn nsan mu yi do dɛ wɔmfa ɔdɔ ndzi kan no, nyaa enyigye wɔ nsesa no mu. Nna nsesa no mu dɔ ara ma dɛ nkyɛ ɔwɔ dɛ wohyia bio no ennkehia. Ayamuyie ayɛ n’edwuma dzinn.

Annkyɛr, na wɔkyekyer anyɛnkoyɛ mapã, a wɔdze kenyaan obiara. Yɛbɛyɛ esiesiefo a, yɛdze obiara no bɔn kyɛ no na yɛgye enyim ara pegya hɔn sen dɛ yɛbɛsɛɛ hɔn.

Otsĩa ebiasa, asomdwee dwuma wɔ hɛn sɔn horow mu. Wiadze Ɔsatu II ɔhaw mber mu no, Elder John A. Widstoe kyerɛkyerɛɛ dɛ: “Kwan kor pɛ a yebotum akyekyer sɔn a asomdwee wɔ mu nye yɛbɛtsetse mbanyin na mbaa a wɔpɛ asomdwee na wɔma asomdwee ba. Ankorankor biara, nam Christ nkyerɛkyerɛ no do … kitsa wiadze [nyina] asomdwee wɔ ne nsamu.’’

Asɛm no a odzi do no kyerɛ dɛm adwenkyerɛ no ahomka mu ara.

Mfe beberee a wɔabasen kɔ no, mbanyin beenu—Muslim imamnyi bi na Christiannyi sɔfo bi a ofi Nigeria—ɔnam nyamesom yaayaw nkyekyɛmu ntsi a obiara kedzii afã. Nna hɔn mu kor biara ehu amandze yayaayaw. Eso, ɔnam bɔnfakyɛ n’ayarsa tum do no, wɔsaan mu yii dɛ wɔbɔbɔmu anantsew anamɔn kor do.

Imam Muhaammad Ashafa na Pastor James Wuye bɛyɛɛ anyɛnkofo na asomdwee mu etsipɛmfo wɔ wɔnnsɛ. Wɔbɔɔ mu no, wɔkyekyeer gyedzi asorɔtow nsiesie asoe. Sesei no wɔkyerɛkyerɛ nkorɔfo ma wɔdze enyidado hyɛ ɔtan anan mu. Woyii hɔn mpɛn ebien ma wɔgyee Nobel Peace Prize no, na wɔabɛyɛɛ Commonwealth Peace Prize n’ahyɛse agyefo a ɔnnkyɛree no.

Afei nkaano atamfo yinom bɔmu tu kwan a worisiesie dza obubui, atseasefo adasefo dɛ Agyenkwa nn ne nsato dɛ yɛnyɛ esiesiefo no nyɛ yie ara nko—tum wɔ mu.

Sɛ yɛba bohu Nyankopɔn n’enyimnyam a, nkyii “yennkenya adwen bi dɛ yemmpira hɛn ho nkorkor, na mbom yɛntsena asomdwee mu ara.’’ Hɛn mboanofo na hɛn sɔn horow mu no, nkyɛ yɛnsan mu nyi nhu hɛnho nkorkor dɛ Nyankopɔn ne mba.

Medze nsato yi bɔ no tɔw. Asomdwee dwuma hia nyɛe—ebɛnadze na obotum abɛyɛ, ma hɛn mu kor, biara, a yɛhyɛ ase ɔkyena? Ana ibotum esusu dapɛn-kor, anamɔntu ebiasa esiesiefo nhyehyɛɛ?

1. Fie a wentwiwentwi nnyi mu: Sɛ wentwiwentwi hyɛ ase a, tweɔn kakra na fa nsɛm na ndzeyɛe apapa hyɛ ase bio.

2. Abaɛfor kwan do esiesiefo: Ansaana ibopost, ebɛgye do, anaa ebɛkã asɛm bi online no, bisa dɛ, “Ana iyi dze nsiesie bɛba a?’’ Sɛ ɔnnkɛfa aba a, gyae. Mma mmfa nnkɔ. Mbom, kã asɛm papa. Hom ngyina gyinabew a wɔdze hom esisi no.

3. Siesie na kã bɔmu: Ebusua mu ba kor biara botum ahwehwɛ nkitahodzi a wɔasɛɛ ama wɔapa kyɛw, wɔasom, woesiesie na wɔasan akã abɔmu.

Abosoom kakra yi na metsee nkenyan a ekyingye biara nnyi ho a ogya me maa asɛm yi dɛ: “Nhyira akã Esiesiefo.’’ Muruwie no, hom mma menye hom nkyɛ nkenyan a menyaa no dzendzenndzen mber yi.

Asomdwee dwuma yɛ Christ-su suban. Ɔtɔfabi a nkorɔfo pii wogyina gyinabew bi hu esiesiefo dɛ wɔyɛ mberɛw. Naaso, ebɛyɛ esiesiefo nnkyerɛ dɛ eyɛ mberɛw, mbom dɛ ebɛyɛ dzen wɔ kwan bi mu a wiadze no nnkɛtse wo ase. Asomdwee dwuma hia akokodur na nsiesie na onnhia dɛ ebɛyɛ adze estĩa wo suban gyinapɛn. Asomdwee dwuma nye dɛ edze ayamuyie na ayamuhyehye bedzi baano, na nnyɛ dɛ nnketsie obi n’adwenkyerɛ. Ɔno nye dɛ yɛbɛtserɛw hɛn nsamu ama hɛn ho nkorkor, na nnyɛ dɛ yebenya ebufuw. Asomdwee dwuma nnyɛ adze fofor koraa, nnyɛ afei na ɔreba. Jesus Christ Nankasa na ɔkyerɛkyerɛe, maa hɔn a wɔwɔ Bible na Mormon Nwoma nyina mu. Ofi tsetse na ndɛ nkɔnhyɛfo fi Nsanananmu n’ahyɛse ber kesi ndɛ mpo na wɔakyerɛkyerɛ asomdwee dwuma.

Yɛbɛhyɛ hɛn asɛdze krɔnkrɔn mã dɛ Ɔsor Egya dɔfo ne mba ber a yɛper dɛ yɛbɛyɛ esiesiefo. Megye Jesus Christ a ɔyɛ Asomdwee Hen, Nyankopɔn tseasefo ne Ba, ho dase, wɔ Jesus Christ ne dzin mu, amen.