Fa W’Akoma Nyina Yɛ W’Afamudze
Nya awerɛhyɛmu wɔ Agyekwa no mu na fa woho hyɛ mu yie, abotar mu ara na enyiberdo, dɛ edze w’akoma nyina reyɛ w’afamudze.
Mfeda m’akwantu kor mu kɔ Europe no, mekɛseraa nkaano m’edwumayɛ bea, Lufthansa German Wimuhɛn Dwuma wɔ Frankfurt Wimuhɛn Gyinabea.
Ama wɔdze atsetse hɔn wimuhɛnkãfo no wɔyɛ abaɛfor wimuhɛn ntui simulator edwindze ahorow a wobotum ayɛ wimu akwantu no ne gyinabew biara ho nsũasũa, ma ɔkɔ yie nye ma owie mpofirmu. Me mfe pii mu dɛ wimuhɛn ɔsahen no, nna ɔwɔ dɛ meyɛ abaɛfor wimuhɛn ntui simulator ho nsɔhwɛ ma midzi konyim bosoom esia biara ama mo wimuhɛnkanyi license no aayɛ edwuma. Mekaa yie dɛm ahokyer na atseetsee mber no mbom atsenkã so dɛ edzi konyim wɔ nsɔhwɛ no do yɛ nkamfodze kɛse. Nna musuar na modɔ taferbanyinmbɔmu no.
Me nserahwɛ ber mu no, Lufthansa edwuma mpanyimfo mu baako bisaa sɛ mebɛpɛ dɛ mobɔ mbɔdzen tu abaɛfor 747 wimuhɛn ntui simulator no bio a?
Ansaana merebenya mber adwen asɛmbisa no ho yie no, metsee ndze bi—ɔregyegye nwanwa mu ara tse dɛ medze—rekã dɛ, “Nyew, mebɛpɛ no papaapa.”
Mekãa dɛm no ara no, adwendwen buu do wɔ m’adwen mu. Mber egu mu ara yie fitsi ber a mutuu 747 bi. Dɛm ber no nna meyɛ ɔsahen aberantsɛba a megye moho dzi. Afei ɔsɛ dɛ mekyerɛ me dzibew dɛ meyɛ nkaano wimuhɛnkanyi ɔsahen no. Ana murubogu m’enyim ase wɔ nkorɔfo yinom a wɔawea hɔn enyim a?
Naaso nna wɔapa ho koraa dɛ mebesianka, ntsi metsenaa ɔsahen n’egua no mu, na medze me nsa too mfir nkakraba ahorow a minyim na modɔ no do, na metsee dɛw kɛse ber a wimuhɛn kɛse no twuwii faa famu na otui faa wimu.
Ɔyɛ me enyigye dɛ mebɛkã dɛ ntui no yɛɛ yie, na wimuhɛn no ho annkekã na dɛm ara na m’enyim so enngu ase.
Dɛm mpo no, ɔyɛɛ ahobrɛadze sũahu maa me. Ber a nna mowɔ do no, nna wimuhɛn ntui ayɛ dɛ me nsa ekyir adze. Sesei, ahyɛse ndzɛmba mpo gyee m’adwen nyina.
Osuanyiyɛ Gye Nhyɛdo
Mo sũahu wɔ abaɛfor wimuhɛn ntui simulator no yɛɛ nkaa sũahu dɛ ebɔwea wɔ biribiara ho no—sɛ ɔyɛ wimuhɛn ntui, erokwan, adze dua, erodɔw, anaa iruhu adze—gye ahohyɛdo a wɔkɔ do yɛ na dwumadzi.
Bia ebɔhwer mfe pii dze enya nsaano dwuma anaa etu wo talent mpon. Ibotum emia woho ayɛ ho edwuma ara ma wɔaka wo nsa ekyir. Mbom sɛ edwen dɛ ɔno kyerɛ dɛ ibotum egyaa edwumayɛ na adzesũa a, nkakrankakra no ebɛyew nyimdzee na nsaano ndwuma a ebɔɔ ho kaw dze nyae no.
Iyi fa irusũa kasa bi, erobɔ ndwom edwindadze bi, na irutu wimuhɛn ho nyimdzee. Ɔfa erebɛyɛ Christ osũanyi ho.
Yɛrekã no sin ara, osũanyiyɛ gye ahohyɛdo.
Ɔnnyɛ adzebi adzebiara, na ɔmmba mpofirmu.
Gyedzi wɔ Jesus Christ mu yɛ akyɛdze,mbom eregye no yɛ adwendahɔ nsanmuyi a ohia enyimpisi a yɛdze hɛn “ahom, adwen, na ahoɔdzen” nyina yɛ. Ɔyɛ daa daa ndzeyɛɛ. Dɔnhwer biara. Ɔgye daa daa adzesũa na enyimpisi a wɔgye enyim yɛ. Hɛn gyedzi, a ɔyɛ hɛn nokwardzi ma Agyenkwa no, ba bɛyɛ dzen yie ber a dza ɔkõ tsia hɛn wɔ ɔnnkyebo abrabɔ yi mu no sɔ hɛn hwɛ. Otsim osiandɛ yɛkɔ do nyɛn no, yɛkɔ do ara dze bɔ bra na yenngya dabiarada.
N’afã no, sɛ yɛammfa gyedzi na no nkuranhyɛ tum no enndzi dwuma a, afei yennhu ndzɛmba a nkaano yesuoo mu krɔnkrɔn mu no yie—hɛn awerɛhyɛmu pa wɔ ndzɛmba a mber bi nna yenyim dɛ wɔyɛ nokwar no.
Nsɔhwɛ horow a nkyɛ mber bi ɔnnkɔtwetwe hɛn koraa no hyɛ ase yɛ dɛ ma wɔnnyɛ bɔn na wɔyɛ akɔndɔ yie.
Ndeda ogya dasee ne hyew no nnkotum nye hɛn atsena akyɛr. Ohia daa daa nyɛnee ama wɔaakɔ do aadzɛw hyerɛɛn.
Ahyɛmu Fofor mu no, Agyenkwa no kyerɛkyerɛɛ abɛbusɛm a ɔfa Owura bi a ɔmaa no nkowaa mu biara asodzii krɔnkrɔn—sika dodow bi a wɔfrɛ no talent horow. Nkowaa no a wɔdze hɔn talent horow dzii dwuma enyiberdo no wonyaa bi kãa ho. Akowaa no a ɔdze ne talent sumae no ewiei no ofii ne nsa.
Adzesuadze no? Nyankopɔn ma hɛn akyɛdze horow—nyimdzee, tum, kwan—na Ɔpɛ dɛ yɛdze dzi dwuma na yɛma ɔdɔɔ sõ ama woeetum eehyira hɛn na woeehyira Ne mba nkaa no. Dɛm no mmba do sɛ yɛdze dɛm akyɛdze horow no si sorsor beebi dɛ abawdobɔdze a yɛhwɛ no ofi ber to ber a. Hɛn akyɛdze no bɔkrɔn na wɔayɛ mbɔho a gyedɛ yɛdze dzi dwuma.
Ewɔ Akyɛdze Mapã
Bia ebɛkã dɛ, “O, Elder Uchtdorf, minnyi akyɛdze anaa talentbiara—annyɛ yie koraa no, nnyɛ ma ɔwɔ mfaso biara.” Bia ehwɛ binom a hɔn akyɛdze horow no da edzi yie na ɔyɛ ɔkrabɔhwɛ na ɔma ihu dɛ nnsɛ bi. Bia ibosusu dɛ wɔ abrabɔ ansaana yɛreba asaase yi do no, da no wɔrekyekyɛ akyɛdze akɛse na talenthorow wɔ aponto kɛse n’ase no, wo prɛtse do yɛɛ kɔnn awerɛhow mu ara—sɛ edze toto binom a hɔn prɛtse ayɛ amãamã ebu do no.
O, mubotum a nkyɛ mebɛpɛ dɛ mufua wo na moboa ma etse nokwar kɛse yi ase: Eyɛ kan abɔdze, ɔdomankoma Nyankopɔn no sunsum mu ba! Na ewɔ wɔ wo mu no hyɛber a wankasa innkotum esusu ho.
Dɛ mbrɛ awensɛm kyerɛwfo akã no, ebaa asaase yi do a “enyimnyam fua dzi w’ekyir”!
W’ahyɛse asɛm yɛ krɔnkrɔn, na dɛm so na wo ndaamba tse. Ifii sor baa ha, mbom ɔsor nngyaa wo hɔ dabiarada.
Nnyɛ obiara kwa.
Ewɔ akyɛdze mapã!
Nkyerɛkyerɛ na Ahyɛmudzi mu no, Nyankopɔn paa mu kãa dɛ:
Akyɛdze no dɔɔ sõ, na Nyame no Sunsum no ma [nyimpa] biara akyɛdze.
“Binom ɔma hɔn kor, binom so ɔma hɔn kor bi so ma no ho aaba mfaso [ama] hɔn nyinara.”
Wɔakyerɛw hɛn akyɛdze horow binom wɔ kyerɛwsɛm mu. Wɔnnkyerɛɛw dodowara.
Dɛ ma nkɔnhyɛnyi Moroni kãa no, ”Mma hom mmpow Nyankopɔn n’akyɛdze, na ɔdɔɔ sõ, na ne nyina fi Nyame kor noara.” Wɔda edzi wɔ “akwan ahorow … ; do na mbom ɔyɛ Nyame kor noara na odzi dwuma wɔ ne nyina mu.”
Bia ɔbɛyɛ nokwar dɛ hɛn sunsum mu akyɛdze no nnyɛ ber biara na ɔyɛ hyɛnhyɛn, naaso ɔno nnkyerɛ dɛ no ho nnhia kɛse. Menye hom nkyɛ sunsum mu akyɛdze binom a mahyɛ no nsew wɔ asɔrmba dodow a wɔwɔ wiadze nyina mu ho? Susu ho sɛ wɔdze akyɛdze yi mu kor anaa ebien bi ehyira wo a:
-
Erekyerɛ ayamuhyehye.
-
Erehyɛ nkorɔfo a woebu enyi egu hɔn do no nsew.
-
Erenya siantsir dze enya enyigye.
-
Ereyɛ siesiefo.
-
Erehyɛ anwanwadze nkumabaa nsew.
-
Erekamfo obi nokwar mu.
-
Edze bɔn rekyɛ.
-
Irunu woho!
-
Erosɔw akɔ ewiei.
-
Erekyerɛkyerɛ ndzɛmba mu ma wɔada famu.
-
Enye mbofra rinya nkitahodzi.
-
Erema Asɔr banodzifo tsĩpia.
Bia nnkohu akyɛdze horow yinom dɛ wɔada no edzi wɔ ward talent show agodzi ase. Naaso mowɔ enyidado dɛ hom tum hu mbrɛ wosi som bo wɔ Ewuradze n’edwuma mu na bia mbrɛ esi dze w’akyɛdze akã obi, ehyira no, anaa agye Nyankopɔn ne mba mu ɔbaako. Hom nkaa: “Ɔnam akwan nketsenketse do nna ndzɛmba akɛse dua ba.”
Yɛ Wo Kyɛfa Kakraba no
Mo nuanom na nkyerɛbaa adɔfo, anyɛnkofo adɔfo, mobɔ mpaa the Sunsum no bɔboa wo ma ehu akyɛdze na talent horow a Nyankopɔn dze ama wo. Nkyii, hom ma, tse dɛ asomfo anokwafo no a wɔwɔ Ewuradze n’abɛbusɛm mu no, yɛama wɔadɔɔ sõ na yɛayɛ no kɛse.
Da no bɛba a yebegyina hɛn Egya yamuyiefo a ɔwɔ Sor N’enyim na yebu hɛn edwumayɛ ho nkontaa. Ɔbɛpɛ dɛ Obohu dza yɛdze akyɛdze horow a Ɔdze maa hɛn no yɛɛ—nkankara, mbrɛ yesii dze hyiraa Ne mba. Nyame nyim hɛn nyimpa ban ankasa, nyimpa a wɔawen hɛn dɛ yɛmbɛyɛ, na ntsi N’enyidakwan a Ɔwɔ ma hɛn no yɛ kɛse.
Mbom N’enyi nnda hɛn kwan dɛ yebodua akatakyi nyɛe bi, anaa anamɔntu kɛse a ɔbor nyimpa do ekodu hɔ. No wiadze a Ɔbɔe mu no, nkakrankakra na abotar mu na yɛdze nyin—nna nkɔ do a yɛnngyaa so.
Hom nkaa dɛ, ɔyɛ Jesus Christ na Ɔayɛ afamudze a ɔbor nyimpa do ber a Odzii owu na bɔn do konyim.
Hɛn afamudze nye yɛbɛka Christ do. Ɔyɛ hɛn afamudze dɛ yɛbɛdan efi bɔn no, yɛadan akɔ Agyenkwa No do, na yɛnantsew No kwan do, anamɔn kor, anamɔn kor. Yɛreyɛ dɛm no, enyiberdo na nokwar mu ara no, ewiei no yɛtow esintɔ na mfomdo mpokyerɛ horow no gu na brɛww mu ara hɛnho ba bɛtsew, kesi dɛm da a odzi mu no ber a yebedzi mu wɔ Christ mu.
Nsa botum aka nhyira horow no. Anohoba horow no atahye. Woebue abobow no hann ato hɔ. Ɔyɛ hɛn nsanmuyi dɛ yɛhɛn mu na yɛhyɛ ase.
Ahyɛse no bosuar dze. Mbom Oye.
Bea a gyedzi yɛ har no, hom mfa enyidado wɔ Christ Jesus mu na wɔ No tum dɛ Ɔhohor na Ɔtsew hɛnho no nhyɛ ase.
Hɛn Ɔsor Egya serɛ hɛn dɛ mma yennhyia gyedzi na esũafoyɛ ho ɔhaw yi dɛ bɔhwɛadzefo ara mbom dɛ agyedzifo a wɔdze hɔn akoma nyina, a woegya no ekyir na woefi Babylon na wɔdze hɔn akoma, adwen, na anamɔntu esi nketse reba Zion.
Yenyim dɛ hɛn mbɔdzembɔ nko nnkotum ayɛ hɛn celestial. Mbom obotum ama yɛayɛ nokwafo na yeetu hɛn ho esi hɔ ama Jesus, Christ no, na Ɔno na Obotum ayɛ hɛn celestial.
Osian hɛn Agyenkwa dɔfo ntsi, nkõgu biara nnyi hɔ. Sɛ yɛdze hɛn enyidado na gyedzi to No do a, hɛn konyimdzi si pi. Ɔbɔ hɛn anohoba wɔ N’ahoɔdzen, No tum, na N’adom mbordo ho kwan. Anamɔn kor anamɔn kor, nkakrankakra no, yebenyin abɛn dɛm da kɛse a odzi mu no ber a yɛnye No na hɛn adɔfo bɛtsena wɔ onnyiewiei enyimnyam mu.
Ama yeedur hɔ no, otwar dɛ yɛyɛ hɛn afamudze ndɛ na dabiara. Hen enyi sɔ anamɔntu a yetuu no ndeda, mbom yenngyina hɔ. Yenyim dɛ yɛda ho wɔ kwan tsentsen twa, mbom yɛmma ɔno nngya hɛn abagura.
Iyi nye hɛn nyimpa ban tsitsir—dɛ Christ akadofo.
Mutu Asɔrba biara fo na mihyira no na hɔn a wɔpɛ dɛ wɔdze hɔnho bɛhyɛ mu dɛ nya awerɛhyɛmu wɔ Agyekwa no mu na fa woho hyɛ mu yie, abotar mu ara na enyiberdo, dɛ edze w’akoma nyina reyɛ w’afamudze—ama w’enyigye ahyɛ mã na dɛ, dakor, ibenya dza Egya no wɔ nyina. Megye iyi ho dase wɔ Jesus Christ ne dzin mu, amen.