Erefa Jesus Christ ne Dzin Ato Wo do

Afe 2018 mu no, wɔ Utah Sũapɔn mu, wɔtseew ɔbemfo dzibew soronko bi a wɔfrɛ no “Dr. Russell M. Nelson and Dantzel W.Nelson Presidential Chair wɔ Cardiothoracic Surgery”—cardio, asekyerɛ nye “akoma,” na thoracic, asekyerɛ nye “akoko.” Wɔdze enyimnyam hyɛɛ President Nelson n’edwuma a ho hia dɛ akoma ɔprehyɛn ho datser na abamba a onyae fii ne yer Dantzel a oewu hɔ. Wɔdze foto a wɔahyehyɛ dɛ ɔbɛkyɛr akɔ daakye mu na wɔdze tuaa dɛm ɔbemfo dzibew soronko yi ho kaw. Ankorankor a woyi no dɛ ɔngye dɛm ɔbemfo dzibew soronko yi nya abɔdzin, akatua ho mboa, na nhwehwɛmu foto.

Ɔprehyɛn datser a wodzii kan yii no ma ɔgyee ɔbemfo dzibew soronko yi nye Dr. Craig H. Selzman, datser a ɔawea akoma ɔprehyɛn ho a ɔnnyɛ hɛn Asɔrba. Ayɛdze a wɔdze dɛm ɔbemfo dzibew yi bɛma Dr. Selzman, ahɔho etsitsir pii bae a nna President Nelson na ne yer Akyerɛbaa Wendy W. Nelson kã ho. Nhyiamu n’ase no, President Nelson kasa ahobrɛadze mu faa ne oprehyɛn datser dwumadze a odzii kan yɛe no ho.

Nna Dr. Selzman kyɛɛ bo a ɔsom no dɛ wɔama no dɛm ɔbemfo dzibew soronko yi. Ɔkãa dɛ nda anan a wɔabɛsen kɔ no, da a ɔkyɛɛr wɔ oprehyɛn dan no mu no, ohun dɛ n’ayarfo no mu kor wɔdɛ ɔsan kɛyɛ oprehyɛn. Nna wɔabrɛ na n’abaw mu ebu, onyim dɛ ɔwɔ dɛ odzi anafua bio wɔ asopitsi hɔ.

Ewimbir yi, Dr. Selzman nye noho dzii nkɔmbɔ bi a ɔsesaa n’abrabɔ. Dɛm mber noara mu no, ɔdween ho dɛ, “Fida yi, wobeyi me akɔ ɔbemfo dzibew soronko a wɔdze ato Dr. Nelson. Ɔyɛ obi a wonyim no dɛ ɔhyɛ n’atsenka do, ɔdze obu ma obiara, na no bu emmfuw da. Siesiera wɔdze me dzin bɔtoto ne dzin ho no otwar dɛ mobɔ mbɔdzen yɛ tse dɛ ɔno yie.” Dr. Nna Selzman yɛ ɔprehyɛn datser a ɔdwen afofor ho dadaw. Naaso nna ɔpɛ dɛ ɔyɛ yie mpo.

Selzman no oprehyɛn kuw hu ne brɛ na haw osiandɛ ɔdaa edzi wɔ ne ndzeyɛɛ na kasa kwan do. Naaso wɔ ɔprehyɛn dan no mu dɛm anafua no, Dr. Selzman bɔɔ mbɔdzen dɛ ɔbɛgye enyim aboa na ɔatse no oprehyɛn kuw mba ase. Ɔtsee nkã dɛ iyi dze nsonsonoe bae na ɔyɛɛ n’adwen dɛ ɔbɔkɔ do abɔ mbɔdzen abɛyɛ dɛ Dr. Nelson.

Mfe enum ekyir no President Nelson dze n’edwumayɛ nkrataa kyɛɛ Utah Sũapɔn no. Etsitsir a wofi Sũapon no mu baa bagua mu bɛdaa President Nelson ase. Dwumadzi yi mu no, Dr. Selzman kasaa bio. Ɔdze President Nelson ne dzin akyerɛwamba a odzi kan, RMN no, ɔkãa dɛ “Nkorɔfo wɔ Utah Sũapon Cardiothoracic Surgery Asoɛe hɔ a wɔafa ‘RMN’ no su a ɔda no edzi dɛ datser no dze bɔ bra.”

Ɔhaw ber mu no, Dr. Selzman kyerɛɛ mu dɛ, “Meyɛ dza ndɛ yɛkyerɛkyerɛ hɛn esuafo no dɛ wɔnyɛ—tsim, gyae dza woesi mu, na yɛ dza ibotum biara papaapa. Dɛm suban yi tse hɛn mu dabiara. Yɛdze ahyɛnsewdze ma obiara a ɔka hɛnho na dza ɔwɔ ntsetsee ase. Ahyɛnsewdze no n’ase wɔakyerɛw akyerɛwamba ‘RMN.’ RMN suban yi yɛ hɛn nkyerɛkyerɛ nyina ne fapem; yɛdze kyerɛkyerɛ obiara.” Dr. Selzman ayɛ nsesa wɔ ne ahyɛse su na ahwehwɛdze ho osiandɛ sesei ne dzin bata President Nelson dze ho.

Dɛm nsɛm a osisii ahorow a Dr. Selzman ka ho no maa mibisaa moho, “Ebɛn nsesa na menya fitsi ber a medze me dzin fam Jesus Christ dzin ho? Aso mafa Christ su ɔnam dɛm ntsi? Aso mabɔ mbɔdzen papaapa dɛ mebɛyɛ tse dɛ mbrɛ Ɔtse ara yie?”

Dr Selzman no suahu mu no, yebotum ehu annyɛ yie koraa nsɛdze enum a yɛfa do fa Jesus Christ ne dzin no to hɛn do. Ɔwɔ mu dɛ dɛm nhyehyɛɛ no fi ase wɔ enuma mu, onnwie kesi dɛ yɛbɛyɛ krɔnkrɔn na ahotseweefo yie na yɛabɛyɛ tse dɛ Ɔno ara yie.

Nsɛdze a odzikan nye Ahyɛnsewdze Dr. Selzman ne nyii kɔ Nelson ɔbemfo dzibew soronko no dze ne dzin bataa President Nelson dzin ho, na Dr Selzman hyɛɛ ase dze noho too President Nelson ho. Sɛ yɛfa Jesus Christ ne dzin to hɛn do a , yɛdze hɛn dzin bata Ne dzin ho. Yɛnye No to hɛn ho. Enyigye mu ara wohu hɛn dɛ Christianfo. Yɛgye Agyenkwa no tum na yɛka no ndamyɛ mu dɛ yɛyɛ Ne dze

Dza ɔbɛn ahyɛnsewdzi nye nsɛdze kor so—nkaa. Sɛ Dr. Selzman kɔ n’edwumayɛbea, n’enyiwa kɛda medallion a onyae ber wɔmaa no Nelson ɔbemfo dzibew soronko no. Dɛm medallion yi kae no RMN su no daa daa. Hɛn dze, yeridzi sacrament dapɛn biara boa hɛn ma yɛkaa Jesus Christ dapɛn mu no nyina. Yɛrefa sacrament no, yedzi dze kaa bo a Otuae dze pon hɛn no. Yekenyan hɛn ahyɛmu no dɛ yɛbɛkaa No, ehu Ne keseyɛ, na yɛakyerɛ enyisɔ ama Ne papayɛ. Yɛgye to mu mpɛn pii dɛ ɔnam N’adom nko do na wɔnam agye hɛn efi honam na sunsum mu owu mu”

Nkaa kyerɛ dɛ yedzi afotu a Mormon Nwoma nkɔnhyɛnyi Alma dze maa no do. Yɛmma “biribiara a [yɛbɛyɛ] biara, [yɛnyɛ] mma Ewuradze, na beebiara a [yɛbɔkɔ] biara [yɛnkɔ] wɔ Ewuradze mu;…[yɛmma] [hɛn] adwendwen nyina nkɔ Ewuradze do; …[na yɛmma hɛn] akoma ndɔ Ewuradze afebɔɔ.” Sɛ ndzɛmba afofor hyɛ hɛn do mpo a , yɛma hɛn enyi da hɔ ma No, dɛ mbrɛ yɛkae hɛn ankasa hɛn dzin a, adze fofor biara a yetsim do mmfa ho.

Dza ofi yɛrekaa dza Agyenkwa no ayɛ ama hɛn mu nye nsɛdze a ɔtɔ do ebiasa—esuasua. Dr. Selzman hyɛɛ ase suasuaa President Nelson na RMN su no. Megye dzi dɛ President Nelson no su no yɛ dza ɔkyerɛ no nkwa nda nyina dɛ Jesus Christ osuanyiyɛ Hɛn dze, mpɛn dodow a yehu na yɛkaa Jesus Christ no, nna yɛpɛ dodow dɛ yɛyɛ tse dɛ Ɔno. Dɛ N’esuafo no, yɛsesa bɛyɛ papa ber a yetsim wɔ No do, sen dɛ yetsim wɔ hɛnara hɛnho do. Yɛbɔ mbɔdzen dɛ yɛbɛyɛ dɛ Ɔno na yɛhwehwɛ dɛ wɔdze No su ahorow behyira hɛn. Yɛbɔ mpaa enyiber do dɛ ayamuyie bɛhyɛ hɛn mã, Christ no dɔ mapã no.

Dɛ mbrɛ President Nelson kyerɛkyerɛ wɔ Ebɔbira no: “Ber a ayamuyie bɛkã hɛn su ho no, yebegyae dza ɔhyɛ hɛn dɛ yembu binom enyimtsia no. Yebegyaa dɛ yebua nkaafo atsɛn. Yebenya ayamuyie ama hɔn a wɔwɔ abrabɔ mu gyinabew nyina mu. Ayamuyie ma nyimpa nyina no … ohia papaapa ma hɛn mpontu. Ayamuyie yɛ nyame-su ne fapem.” Ɔka ayamuyie ho no, yɛhwehwɛ, “yɛtsetse, na yɛtserɛw” sunsum mu akyɛdze ahorow binom a ofi Agyenkwa No hɔ a ɔbra pa, emudzi, abotar, ahobrɛadze na mbɔdzembɔ ka ho.

Yerusuasua Jesus Christ gya hɛn kɔ nsɛdze a otsĩa anan do—yɛdze hɛnho rebata No botae ahorow ho . Yɛkã Noho wɔ N’edwumayɛ mu. Dɛ oprehyɛn datser no, nna Dr. Nna wonyim Nelson dɛ ɔyɛ kyerɛkyerɛnyi, ɔyarsafo na nhwehwɛmunyi. Ahyɛnsewdze a wɔdze bɔ akoko no a wɔdze dzi dwuma wɔ Dr. Selzman n’afã wɔ Sũapɔn no mu no dze nsɛmfua yi si dɛm mbɔdzembɔ yi do kyerɛkyerɛ, sa yarba, na kopue do. Hɛn afã mu no, dza ɔka yɛrefa Jesus Christ ne dzin ato hɛn do ho nye yebefi hɛn pɛ mu , na yɛbɛhyɛ da, ahoɔdzen mu dze hɛn botae abata Ne dze ho. Yɛkã Noho wɔ N’edwumayɛ mu ber a ”[yɛdɔ, yɛkyɛ, na yɛto nsa frɛ].” Yɛkã Noho wɔ N’edwumayɛ mu ber a yɛsom binom, tsitsir hɔn a wɔnntum ngye hɔn ho na hɔn a oepira, asaase suahu ahorow ebubu anaa anyam hɔn.

Yɛnam ahyɛnsewdze, nkaa, esuasua, na mbataho do na yɛfa Jesus Christ ne dzin to hɛn do yie. Yɛreyɛ dɛm ndzɛmba anan yi gya hɛn kɔ nsɛdze a otsĩa enum do—dzenhyɛ. Yenya Nyankopɔn No tum na nhyira horow wɔ hɛn abrabɔ mu. Nelson ne ɔbemfo dzibew soronko ma Dr. Selzman abɔdzin na foto mboa a ɔdze resesa amambra wɔ ne fa wɔ sũapɔn hɔ. Ɔdze dɛm “tum a wɔdze ama” no no roboa binom. Dɛm ara na sɛ yɛfa Agyenkwa No dzin to hɛn do a, hɛn Ɔsor Egya dze No tum hyira hɛn ma yedzi hɛn dwumadzi wɔ ɔnnkyebo asetsena mu.

Ber a yɛnye Nyankopɔn dzi ahyɛmu bi ka ho no, yɛfa Jesus Christ ne dzin krɔnkrɔn no to hɛn do yie ankasa. Dɛm ntsi Nyankopɔn dze No tum pii hyira hɛn. Dɛ mbrɛ President Russell M. Nelson kyerɛyerɛ no “nyimpa kor biara a odzi ahyɛmu wɔ enuma nsubura mu na wɔ temple mu no: na osie no: nya Jesus Christ no tum ho kwan ntowdo. … “Irisie ahyɛmudzi a enye Nyame dzi n’akatua nye ɔsorsor tum … a ɔhyɛ hɛn dzen ma yetum gyina hɛn haw, nsɔhwɛ, na akomayaw ano yie.”

Hɛn sunsum mu nkã-tse pegya yie. Yenya akokodur pii a yɛdze begyina tsebea a ɔyɛ dɛ ɔnnyɛ yie ano. Wɔhyɛ hɛn dzen pii wɔ hɛn pisi dɛ yebedzi Jesus Christ ekyir. Yɛyɛ ntsɛm pii dze nu hɛnho na yɛsan ba Ne nkyɛn sɛ yɛfom a. Yetum dze No tum na tumdzi kyɛ N’ asɛmpa no yie. Yɛboa ehiafo a yemmbua hɔn atsɛn, yemmbua hɔn atsɛn koraa. Yenya hɛn bɔn ho bɔnfakyɛ. Yɛnya asomdwee kɛse, na hɛn enyi gye kɛse osiandɛ yebotum edzi ehursi ber nyina. N’enyimnyam botwa hɛn ho ehyia, na N’abɔfoe bɔhwɛ hɛn do.

Agyenkwa no to nsa frɛ hɛn, “Hom mbra Egya no hɔ wɔ me dzin mu, na hom nsa akã ne mãhyɛ no wɔ ne mber mu.” Mutu hom fo dɛ hom nyɛ iyi. Bra hɛn Ɔsor Egya hɔ. Fa Jesus Christ ne dzin to wo do. Enye No nnya nkitahodzi. Kaa No Aber Nyina Per bɛyɛ tse dɛ Ɔno. Kã Noho wɔ N’edwumayɛ mu. Nya No tum na nhyira horow wɔ w’abrabɔ mu. Krukye Ne dzin wɔ w’akoma mu, ɔpɛ mu ara na enyidaho mu ara. Iyi ma wo “gyinabew” wɔ Nyankopɔn N’enyim na iyi ma efata dɛ Agyenkwa No bɛyɛ wo dzimafo Ebɛyɛ adzedzifo a ɔkrɔn wɔ Ɔsor Egya N’aheman mu, enye N’abakan, hɛn Agyenkwa dɔfo na Pomfo n’afɛ-adzedzifo.

Ɔtse ase. Minyim no yie. Ɔdɔ wo. Ɔdze No nkwa too hɔ maa wo. Ɔserɛ wo dɛ fa No do bra Egya No hɔ. Wɔ Jesus Christ ne dzin mu, amen.