Hu Wo Nyimpa Ban A Eyɛ Ankasa
Ɔmmfa ho bea a yɛwɔ wɔ hɛn osuanyiyɛ anamɔnkwan no do, hɛn abrabɔ ne fapem bɛsesa sɛ yenya ntseasee mapã fa hɛn nyimpa ban a yɛyɛ ho a.
Mfe pii a abasen kɔ no, hɛn babaa nyaa sũahu nwawason bi wɔ n’asɛmpakã edwuma mu. Medze ne mpendo no, mekyɛ ɔfã kakra fi dza ɔkyerɛwee brɛ hɛn dɛm dapɛn no:
“Ndeda, asɔrba bi a wɔasan n’ekyir aba gyedzi no ho serɛɛ hɛn dɛ yɛmbra no hɔ ntsɛmara. Ber a yekodurii no, yehun dɛ ɔtsena famu, rusũ a wɔpata no a ɔnnyɛ yie. Ne nyinsuwa mu no, yehun dɛ nna ɔahwer n’edwuma, worubotu no efi fie a ɔtse mu no, na bio no, ɔabɛyɛ bi a onnyi bea a ɔdze ne tsir to.”
Hɛn babaa no toaa do dɛ: “Enyiber ahoɔhar mu ara mehyɛɛ ase dɛ morohwehwɛ me kyerɛwsɛm mu, robɔ mbɔdzen dɛ mubohu biribi—adze biara dze aboa no. Ber a morohwehwɛ nyiyimu a odzi mu no, modwenee, Ebɛnadze na mereyɛ yi? Iyi nnyɛ dza nkyɛ Christ bɛyɛ. Iyi nnyɛ ɔhaw a mubotum edzi ho dwuma, mbom iyi yɛ Nyankopɔn ne babaa a ohia mo mboa. Ntsi, motoo me kyerɛwsɛm no mu, buu ntwɛr wɔ ne nkyɛn, na musuoo no mu ber a yɛbɔɔ mu sũi.
Ɔkyekyee ɔbaa yi no werɛ wiei no, nkyii hɛn babaa yi bɔɔ mbɔdzen dze kyerɛwsɛm no boaa no ma ɔtsee no bo krɔnkrɔn a ɔsom ase na ɔkyerɛɛ no hɛn asetsena mu nokwar fapem kor—dɛ yɛyɛ Nyankopɔn ne mba mbanyin na mbabaa dɔfo, Nyankopɔn a ɔtse ayamuhyehye mapã ma hɛn sɛ yehu amandze a na ɔayɛ krado dɛ ɔbɔboa hɛn ber a yɛsoɛr gyina hɛn anan do.
Ɔyɛ nyansadze tsitsir ankasa dɛ nkyerɛkyerɛ a odzi kan a hɛn asɛmpasomafo no kyerɛ nye dɛ Nyame yɛ hɛn Ɔsor Egya dɔfo. Nokwar biara a ɔtoa do no si wɔ fapem ntseasee fa hɛn nyimpa ban a yɛyɛ ankasa no do.
Susan H. Porter, Wiadze Mfɛndzanan Primary President, kyerɛkyerɛɛ dɛ: “Sɛ ihu na etse mbrɛ osi dɔ wo koraa dɛ eyɛ Nyankopɔn ne ba ase a, ɔsesã biribiara. Sɛ efom a ɔsesã kwan a edze hu woho. Sɛ nkõdzen sisi a ɔsesã kwan a edze hu woho. Ɔsesã mbrɛ isi hu Nyankopɔn ne mbrasɛm. Ɔsesã mbrɛ isi hu binom, na w’ahom dɛ edze bɛyɛ adze soronko.”
Nsesã yi da edzi ber a yɛkenkan Moses no sũahu a onyae ber a ɔnye Nyankopɔn rekasa enyim na enyim ho asɛm. Dɛm nkɔmbɔdzi no mu no, Nyankopɔn sii do kyerɛkyerɛɛ Moses faa n’awosu krɔnkrɔn ho, kãa dɛ “Moses, eyɛ me babanyin.” Nyankopɔn kyerɛɛ mu dɛ nna Moses yɛ Nyia Ɔwoo no Kortoo no ne saso. Moses benyaa ntseasee pefee fa nyia ɔyɛ ho, dɛ ɔwɔ edwuma yɛ, na dɛ ɔwɔ Sor Egya dɔfo.
Sũahu yi ekyir no, abɔnsam bae bɔsɔɔ no hwɛe na ntsɛmara ɔfrɛɛ no “Moses, nyimpa ba.” Iyi yɛ abɔnsam n’edwindadze a ɔyɛ hu a ɔtaa dze dzi dwuma. Ber a hɛn Ɔsor Egya wɔw do ɔdɔ mu ara kaa hɛn dɛ yɛyɛ Ne mba no, abɔnsam bɔbɔ mbɔdzen aber biara dze hɛn mberɛwyɛ horow ahyɛ hɛn nsew. Naaso nna Moses esũa dɛ ɔkyɛn “nyimpa ba” ara nko. Ɔpaa mu kãa kyerɛ Satan dɛ, “Ɔwo nye woana? Na hwɛ, meyɛ Nyame ne ba.” Dɛmara, sɛ yehyia ɔnnkyebo abrabɔ yi mu taferbanyinmbɔmu horow anaa sɛ yenya nkãtse dɛ obi pɛ dɛ ɔdze hɛn mberɛwyɛ horow yɛ hɛn ahyɛnsewdze a, ohia dɛ yegyina pinstinn wɔ nyimdzee fa hɛn nyimpa ban a yɛyɛ ankasa mu ho. Otwar dɛ yɛhwehwɛ ngyetomu fi sor, nnyɛ fi adasa hɔ. Na ber a yɛyɛ dɛm no, hɛn so yebotum dze akokodur apaa mu akã dɛ, “Meyɛ Nyame Ne Ba.”
Wiadze mpaabɔsom ma young adultfo ase bi no, President Russell M. Nelson kyerɛkyerɛɛ dɛ: “Ntsi ɔwo nye woana? Odzi kan, eyɛ Nyankopɔn ne ba, ahyɛmu ba, na Jesus Christ no osuanyi. Ber a egye nokwar yinom to mu no, hɛn Ɔsor Egya bɔboa wo ma wo nsa akã wo botae tsitsir dɛ ebɛtsena No krɔnkrɔn bea afebɔɔ.”
Ɔnnyɛ nwanwa dɛ wɔ kyerɛwsɛm a wɔtaa si do mu no, Nyankopɔn kaa hɛn fa Ɔno na hɛn ntamu nkitahodzi ho. Edzin ahorow a nkyɛ Obotum dze ato no ho do wɔ sacrament mpaa mu no, Ɔaserɛ dɛ yɛbɛfrɛ no “Nyankopɔn, Onnyiewiei Egya.”
Ber a nokwar mu ara yebohu nyia yɛyɛ no, yɛbɛgye edzi ankasa dɛ hɛn Ɔsor Egya dɔfo ama hɛn nhyehyɛɛ a yɛdze bɛsan nye No akɛtsena bio. Elder Patrick Kearon kyerɛkyerɛɛ dɛ, “Hɛn Egya ne nhyehyɛɛ fɛɛfɛw no, mpo Ne nhyehyɛɛ a ɔyɛ “nwanwa” no, woesiesie dɛ ɔdze wo bɛba fie, nnyɛ dɛ obegya wo abɔntsen. … Nyame rohwehwɛ nye wo enya nkitahodzi daa daa.” Dwen ho mber kumaa bi mu—hɛn otumfo, dɔfo Egya “rohwehwɛ nye wo enya nkitahodzi daa daa.”
Ɔmmfa ho bea a yɛwɔ wɔ hɛn osuanyiyɛ anamɔnkwan no do, hɛn abrabɔ ne fapem bɛsesa sɛ yenya ntseasee mapã fa hɛn nyimpa ban a yɛyɛ ho a. Ma monsusu akwan ebien a yebotum ama dɛm ntseasee yi akɔ bun mu.
Odzi kan, Mpaabɔ
Ber a Agyenkwa no rehyɛ Ne ɔnnkyebo asetsena mu ɔsomdwuma ase no, ɔkɔr sar no do “nye Nyankopɔn kedzii nkitaho.” Ibia, ɔsɛ dɛ yɛtwe hɛn ntɔyɛɛ adwendwen fi yɛrese hɛn mpaa ara kɔ yeridzi mber ara yie “nye Nyankopɔn edzi nkitaho“ dabiara.
Meehu dɛ me mpaabɔ ne papayɛ tu mpon ber a midzi sima kakra ara dze yɛ ahoboa dɛ menye m’Egya bɛkasa. Kyerɛwsɛm no kyerɛkyerɛ hɛn dɛ dɛm nhwɛdo yi yɛ dza ɔyɛ edwuma. Dɛ ɔyɛ Joseph Smith; Nephi, Helaman ne ba no; anaa Enos o, ne nyinara wɔ ndwendwenho kɔ bun mu a ɔkɔr do ansaana wɔnye Nyankopɔn nkɔmbɔdzi no a wɔakyerɛw no kyerɛwsɛm mu no baa do. Enos see dɛ ɔkɔm dzee ne kra ber a n’egya ne nsɛm no hyɛɛ n’akoma mã. Mfatoho yinom mu kor biara kyerɛkyerɛ hɛn hia a ohia dɛ yɛyɛ sunsum mu ahosiesie ma aber biara a yɛnye “Nyankopɔn dzi nkitaho.”
Nephifo no, Agyenkwa no kyerɛkyerɛɛ hɔn dɛ, “Sɛ erosɔr a, hɛn wo pia mu, na atow w’abow mu no, sɔr ma w’Egya.”
Dɛ ɔwɔ pia mu anaa nsumaamu, nkyerɛkyerɛ no nye dɛ ebɔhwehwɛ bea a ibotum ayɛ ankonam na abɔ mpaa, ma wo kra ataa dzinn, na atse “ndze ketseaba bɔkɔɔ no ne nkenyan.” Yebotum esiesie hɛn ho ber a yɛrodwendwen ndzɛmba a yɛwɔ enyisɔ ma ho na nsɛmbisa anaa nsɛnhia a yɛbɛpɛ dɛ yɛdze kɔ hɛn Egya n’enyim. Ɔsɛ dɛ yɛbɔ mbɔdzen dɛ yɛnnkenya kwan kor pɛr a yɛfa do bɔ mpaa, mbom dɛ yɛnye hɛn Egya kasa mpo dɛ yebobue hɛn ano, sɛ ɔbɛyɛ yie a.
Muhu dɛ wɔ hɛn abrabɔ ne begyabegyayɛ mu no, ber a yɛnye mbofra ridzi aper anaa yɛrokɔ nhyiamu horow no, bia na yennya nsumae bea dzinn na ahosiesie mapã—mbom dɛm komm, ntsɛmdo, na ahoɔhar mpaa no botum ayɛ mfaso sɛ yɛabɔ mbɔdzen dɛ yɛnye “Nyame benya nkitaho“ dadaw a.
Binom wɔ hɔ a wɔbɔɔ mpaa akyɛr anaa binom wɔ hɔ a wonnyaa nkãtse dɛ wotsie hɔn mpaa. Mobɔ wo anohoba dɛ wo Ɔsor Egya nyim wo, Ɔdɔ wo na Ɔpɛ dɛ Ɔtse wo nka. Ɔpɛ dɛ ɔnye wo kasa. Ɔpɛ dɛ ekaa wo nyimpa ban a eyɛ.
President Jeffrey R. Holland ndaansa yi mu kyerɛkyerɛɛ dɛ, “Mpɛn dodow ahen a erobɔ mpaa biara, bɔ bi kã ho. Ma wo mpaabɔ no mu dzen tse biara no, mia mu.”
Ɔkã mpaabɔ ntaataado na enyimia mpaabɔ ho no, yerusũa Mormon Nwoma no dabiara na yɛrosɔr wɔ temple no bɔboa esiesie hɛn adwen ama nyikyerɛ. Ber a yɛper dɛ yebotu hɛn nkitahodzi a yɛnye hɛn Ɔsor Egya wɔ mpon no, Obehyira hɛn ma yeenya nkãtse pefee dɛ yɛyɛ Ne mba.
Otsia ebien, Bra Bohu Dɛ Jesus nye Christ no.
Ɔsor Egya no dɔ ma hɛn dɛ Ne mba no da edzi kɛsenara wɔ nokwar no dɛ Ɔsomaa Ne Ba, hɛn ankasa hɛn ankorankor Agyenkwa, dɛ ɔmboa hɛn ma yɛmbra fie mu. Ntsi, ohia dɛ yɛba bohu No.
Mfe bi abasen kɔ, ber a morosom dɛ stake president no, medze onuabanyin bi ne nkamfo dɛ ɔbɔsom dɛ temple edwumayɛnyi no kɔr temple. Mekyerɛkyerɛ mbrɛ obesi bɛyɛ ayɛdze edwumayɛnyi ahomka mu wiei ekyir no, mfom mu ara mekemiaa “ma nngye nto mu” a ɔdze nkamfo yi kɔreee. Mo mbɔdzembɔ dɛ medze bɛdan asɛm yi ne nyina ekyir annyɛ yie no, mefrɛɛ temple president no na mekãa dɛ, “maayɛ mfomdo kɛse nara.” Temple president nyimpa papa yi see dɛ, “President Eyre, biribiara nnyi hɔ a ayɛ a innkotum enya ho bɔnfakyɛ na ewiei no atsentsen no.” Nokwarsɛm ankasa bɛn nye yi. Ampaara, Jesus Christ “wɔ tum a ɔdze gye nkwa.”
Afe 2019 mu no, nsesa kɛse baa temple recommend nsɛmbisa no mu. Nkanno no, nna asɛmbisa kor nye dɛ ana ewɔ dasegye fa Jesus Christ no dwumadzi dɛ hɛn Agyenkwa na Pomfo ho. Sesei obisa dɛ ana ewɔ dasegye fa Jesus Christ no dwumadzi ho dɛ w’ Agyenkwa na Pomfo. Jesus Christ No Werdambɔ no nndzi dwuma mma adasa binom nko, odzi dwuma ma ɔwo na emi. Ɔyɛ m’Agyenkwa. Ɔyɛ w’Agyenkwa. Ankorankor. Ɔnam Ɔno do nko na emi na ɔwo botum asan nye hɛn Egya akɛtsena.
Ntsi, nuambanyin na nkyerɛbaa, hom mma yɛnhwehwɛ No. Hom mma yensũa Ne nkitahodzi krɔnkrɔn a ɔnye Egya no na hɛn mu kor biara wɔ no. Hom mma yennya ɔpon ndwom no a ɔba ankorankor biara hɔ no ɔnam hɛn Pomfo do ber a yenu hɛnho no ho sũahu. Ber a yebohu “ɔno a ɔwɔ tum a ɔdze gye nkwa no,” yɛba benya ntseasee dɛ hɛn, dɛ Nyankopɔn ne mba, yɛ N’enyigye, N’adze tsitsir, na ampaara hɛn mu kor biara fata ɔgye.
Megye dase dɛ yɛwɔ Ɔsor Egya dɔfo. Ber a yedua enyimia mpaabɔ, ankorankor nyikyerɛ na yɛreba Jesus Christ hɔ do dze hu onnyiewiei nokwar yi no, sesei na aber nyinara yebotum dze akokodur apaa mu akã dɛ “Meyɛ Nyame Ne Ba.” Wɔ Jesus Christ ne dzin mu, amen.