Dzin a Wɔdze Frɛ Wo

President Russell M. Nelson akyerɛkyerɛ dɛ sɛ Ewuradze rekasa pefee akyerɛ hɛn a, adze a odzi kan a Ɔbɔhwɛ no pefee dɛ yɛbɛtse ase nye hɛn nokwar su: yɛyɛ Nyankopɔn ne mba, ahyɛmu mba, na Jesus Christ n’esuafo. Dzinfrɛ fofor biara nnkowie yie ama hɛn.

Musũaa iyi maa mo ho ber a hɛn babanyin panyin nyaa ne cell foon a odzi kan. Enyigye mu ara, ɔhyɛɛ ase dɛ ɔrobɔ n’ebusua na n’anyɛnkofo hɔn edzin egu foon edzin korabea no mu. Da kor, muhun dɛ ne nã refrɛ. Dzin “Nã” puei ahwɛdodze no do. Nna ɔyɛ nsanmuyi a ɔtɔ asoa mu, na odzi mu—na mebɛgye ato mu, ɔkyerɛ obu ma ɔwofo papa a ɔwɔ hɛn fie. Ntɔyɛɛ mu no, mepɛɛ dɛ mɛyɛ nhwehwɛmu. Ebɛn dzin na ɔdze ama me?

Mohwehwɛɛ edzin horow a ɔwɔ foon no do, a mususui dɛ sɛ Wendi yɛ “Nã” a, otwar dɛ meyɛ “Egya.” Onnyi hɔ. Mohwehwɛɛ “Dada.” Bio biribiara nnyi hɔ. Mo nhwehwɛmu yi dan asɛnhia kakra. Ana ɔfrɛ me ‘Corey’ a?” Oho. Mo mbɔdzembɔ a odzi ewiei mu no, modwendwenee, “Yɛyɛ bɔɔlbɔfo—ibia na ɔfrɛ me ‘Pelé.’” Adwendwen hun. Ekyir koraa no, mara mefrɛɛ no nɔmba no, na nsɛmfua ebien a opuei n’ahwɛdodze no do: “Nnyɛ Nã”!

Enuanom na nkyerɛbaa, dzin bɛn na wɔdze frɛ wo?

Jesus frɛɛ N’akãdofo edzin pii: Esuafo. Mbabanyin nye mbabaa. Nkɔnhyɛfo mba. Nguan. Anyɛnkofo. Wiadze no ne kan no. Ahotseweefo. No mu kor biara kitsa onnyiewiei nsunsuando na ɔkyerɛ ankorankor nkitahodzi a Agyenkwa no nye hɔn wɔ.

Naaso, edzin ahorow yi mu nyina no, kor krɔn kyɛn nkaa no—Christ ne dzin. Mormon Nwoma mu no, Ɔhen Benjamin dze tum kyerɛkyerɛɛ dɛ:

“Dzin biara nnyi hɔ a wɔdze ama a nkwagye bodua do aba; dɛm ntsi mebɛpɛ dɛ hom fa Christ ne dzin to hom do. …

“Na ɔbɛba dɛ obiara a ɔbɛyɛ iyi no wobohu no wɔ Nyankopɔn ne nsa enyimfa, na obohu dzin a wɔdze bɛfrɛ no; wɔdze Christ ne dzin bɛfrɛ no.”

Hɔn a wɔfa Christ ne dzin to hɔn do no bɛyɛ N’esuafo na adasefo. Ndwuma nwoma mu no, yɛkenkan dɛ Jesus no Wusoɛr ekyir no, wɔhyɛɛ adasefo a wɔasan mu eyi hɔn dɛ wɔngye dase dɛ obiara ɔgye Jesus dzi, woenuma no, na wɔagye Sunsum Krɔnkrɔn no benya bɔnfakyɛ. Hɔn a wɔgyee ayɛdze horow yinom no nye asɔr no boaa ano, bɛyɛɛ esuafo, na wɔfrɛɛ hɔn Christianfo. Mormon Nwoma no so kyerɛ agyedzifo wɔ Christ mu dɛ Christianfo na ahyɛmu nkorɔfo dɛ “Christ ne mba, ne mbabanyin nye ne mbabaa.”

Wɔdze Jesus Christ ne dzin bɛfrɛ wo no n’asekyerɛ nye dɛn? Ɔkyerɛ dɛ ereyɛ na irisie ahyɛmudzi horow, erekaa No aber biara, irisie Ne mbrasɛm, na irinya pɛ … dɛ igyina dɛ Nyankopɔn n’adasefo aber nyina wɔ adze nyina mu.” Ɔkyerɛ dɛ enye nkɔnhyɛfo na asomafo rigyina ber a wɔsoa Christ n’asɛm kɔ wiadze no nyinara, a ne nkyerɛkyerɛ, ahyɛmu, na ayɛdze horow kã ho. Ɔsan so kyerɛ erosom binom dze ama ahotɔ efi amandzehu ho, ereyɛ kan, na edze enyidado wɔ Christ mu rebrɛ nyimpa nyina. Ampaara, iyi yɛ nkwa nda nyina mu adze. Nkɔnhyɛnyi Joseph Smith kyerɛkyerɛɛ dɛ “iyi yɛ bea a nyimpa biara nnkodurii prɛkõ pɛr ara.”

Osiandɛ osuanyiyɛ akwantu no gye mber na mbɔdzembɔ a wosi no “nsensaneeba tsia nsensaneeba, ahyɛdze tsia ahyɛdze,” ntsi ɔyɛ mberɛw dɛ wiadze mu abɔdzin horow botum akyekyer wo. Iyinom ma mfaso a ɔnnkye bo na onnkedzi mu ama hɔnho mpo. Ɔpon na onnyiewiei ndzɛmba dua Messiah Krɔnkrɔn no do ba.” Dɛm ntsi, ereka nkɔnhyɛ afotu do dze ayɛ osuanyiyɛ adze tsitsir yɛ nyansadze na mber pa, nkanka wɔ nda a ndze na nhyɛdo horow dzi aper wɔ mu no. Nna iyi yɛ adze tsitsir wɔ Ɔhen Benjamin n’afotusɛm mu ber a ɔkãa dɛ, “Hom [n]kaa ama dzin no [Christ dze] a wɔakyerɛw wɔ hom akoma mu no eetsim hɔ daa, … ama hom eehu na hom aatse ndze no a wɔdze bɛfrɛ hom na dzin so a ɔdze bɛfrɛ hom.”

Meehu iyi wɔ mara m’ebusua mu. Me nanakansowa, Martin Gassner nyaa nsesa afebɔɔ osiandɛ nkorbata president ahobrɛadzenyi bi buaa Agyenkwa No ɔfrɛ. Germany afe 1909 mu no, nna mber no mu ayɛ dzen, na sika ho ayɛ nã. Martin yɛɛ edwuma dɛ bi a ɔsɔw ndaadze wɔ dadzebɛn nyɛe bea. Ɔnoara gye to mu dɛ, akatua da dodowara no wiei wɔ nsãnom, towanom, na nsãtɔ ma obiara ara a ɔwɔ nsãnom bea no. Ekyir no, ne yer bɔɔ no kɔkɔ dɛ sɛ ɔannsesã a, obegyaa no.

Da kor bi, Martin n’edwuma mu nyi kor hyiaa no wɔ nsãnom bea kwan no do a nna nyamesom buukuu kakraba bi a wɔamoamoa kitsa ne nsa mu. Ohun no kaar kwan no do na ɔkãa kyerɛɛ Martin dɛ onyaa nkãtse soronko ber a ɔkenkaan buukuu a ɔato no dzin Was wissen Sie von den Mormonen?, anaa Ebɛnadze na inyim fa Mormonfo no ho? no wiei no. Megye dzi dɛ dzin no asesã.

Address a ɔfam ekyir no daa bea a asɔr no wɔ no edzi. Nna ɔyɛ kwan tsentsen ara yie, naaso dza wɔkenkanee no kenyaan hɔn ntsi wosii gyinae dɛ wɔbɛfa keteke dɛm Kwesida no akɛyɛ mpɛnsampɛnsamu. Wokodurii no, wohun dɛ address no nnyɛ asɔr no a hɔn enyi da kwan no, mbom bea a wosiesie fun. Martin tweɔntweɔnee—osiandɛ, asɔr a ɔwɔ bea a wosiesie fun dze nna ɔyɛ nwanwa kakra.

Naaso dan no sor, wɔ bea a woetua ho sika no, wohun Ahotseweefo mboanofo kakrabaa bi. Banyin bi too nsa frɛ hɔn dɛ wɔmbra dasegye nhyiamu no. Sunsum no kãa Martin na nokwar dasedzi a ɔnnyɛ kyinkyinɛnn no kenyaan no ara ma ɔgyee ne dasee. Na hɔ no, bea a enyi nnda kwan no, na ɔkãa dɛ nna onyim dadaw dɛ otwar dɛ ɔyɛ nokwar.

Ekyir no, banyin no daa no ho edzi dɛ nkorbata no ne president na obisaa hɔn sɛ wɔbɛsan aba a. Martin kyerɛkyerɛɛ mu dɛ bea a ɔtse no kwan war na onnkotum etua dapɛn dapɛn kaar kaw no. Nkorbata president no kãa no tsiabaa ara dɛ: “Ka mo do.”

Wɔnansteew kakra ara kɔr edwin dan bi a ɔbɛn hɔn a nna president yi ne nyɛnko yɛ edwuma wɔ hɔ. Nkɔmbɔdzi tsiabaa ekyir no, wɔmaa Martin na ne nyɛnko edwuma. Nkyii, nkorbata president no dzii hɔn enyim kɛpɛɛ dan maa hɔn ebusua ebusua.

Iyi nyinara sii wɔ dɔnhwer ebien ntamu. Martin n’ebusua bɛtsenaa dan no mu dapɛn a ɔtoa do no. Abosoom esia ekyir no, wonumaa hɔn. Banyin a nna wonyim no dɛ kɔwensãnyi a enyidado biara nnyi no mu no bɛyɛɛ nokwafo wɔ ne gyedzi fofor no mu ara ma nkorɔfo a wɔwɔ kurow no mu hyɛɛ ase frɛɛ no, “ɔsɔfo no” dze dzii noho fɛw

Nkorbata president no dze, murunntum nnka ne dzin nnkyerɛ hom—mber ayew ne dzin ban. Mbom, mefrɛ no osuanyi, ɔsomafo, Christianyi, Samarianyi yamuyiefo, na nyɛnko. Yɛda ho nya ne nhyɛdo ho nsunsuando mfe 116 ekyir, na migyina n’osuanyiyɛ abatsir do.

“Asɛnka bi wɔ hɔ dɛ ibotum akan aba dodow a ɔwɔ aper mu, mbom nnkotum akan aper dodow a obefi aba kor mu aba.” Aba a nkorbata president no duae no asow eduaba a wonntum nnkan. Kumaabi na nkyɛ obohu dɛ mfe 48 ekyir no, wɔbɔsɔw Martin ebusuasantsen pii a wɔwɔ ntwamutam n’afã ebien no ano wɔ Bern Switzerland Temple mu.

Ibia nyamesɛm akɛse no nye dza yɛnntse mbom dza yehu no wɔ komm, ndzeyɛɛ na su a ɔnnyɛ kyinkyinɛnn wɔ nkorɔfo a wɔreper dɛ wɔbɛyɛ tse dɛ Jesus ntsi, wɔyɛ papa, hɔn abrabɔ mu. Dza nkorbata president mbɔbɔrhufo yi yɛe no nnka dwumadzi horow a ɔsɛ dɛ odzi ara na ɔtow n’adwen mu wɔ ho ara. Nna ɔdze asɛmpa no robɔ bra dɛ mbrɛ wɔakyerɛ wɔ Alma nwoma mu no: “Woennyi hɔn a … ɔkɔm dze hɔn, anaa nsukɔm dze hɔn, anaa wɔyaryar no edzi, … wɔyɛɛ ayamuyie maa obiara, mpanyimfo na mbofra, … mbanyin nye mbaa.” Na, adze tsitsir a ɔnnsɛ a yebu enyiwa gu do, woennyi obiara edzi “sɛ wonnyi asɔr no mu anaa wɔwɔ asɔr no mu o.”

Hɔn a wɔdze Christ ne dzin to hɔn do no nyim, dɛ mbrɛ Joseph Smith kãe dɛ “Nyimpa a Nyame ho dɔ ahyɛ no mã no, nnyɛ n’ebusua nko na ɔsɔ n’enyi dɛ ɔboa hɔn, mbom okyin wiadze mu nyina, dze ahoɔhar kɔboa adasamba nyina.”

Iyi na Jesus dze bɔɔ ne bra. Nokwar, Ɔyɛɛ piinara ma dɛ N’esuafo enntum annkyerɛw ne nyinara. Ɔsomafo John kyerɛwee dɛ: “Na ndzɛmba pii so wɔ hɔ a Jesus yɛe a, sɛ wɔrekyerɛw ne nyina nkorkor a, nkyɛ mususu dɛ nwoma a wɔbɛkyerɛw no ronnkɔ wiadze mu mpo.”

Hom mma yɛmper nka Christ ne fasusu do, nyɛ papa na yɛnyɛ osuanyiyɛ nkwa da nyina adze tsitsir ama aber biara a yɛnye binom dzi nkitaho no, wɔatse Nyankopɔn no dɔ na Sunsum Krɔnkrɔn no tum a osi pi no nkã. Na afei yɛabɛka me nanakansowa na adasa ɔpepe ɔpepe ho a wɔapaa mu akã, tse dɛ Andrew osuanyi no, “Yeehu Messias no.”

Ewiei no, nnyɛ wiadze no na ɔkyerɛ hɛn nyimpa ban a yɛyɛ. Mbom, ayɛdze horow a yɛgye, ahyɛmudzi horow a yesie, na ɔdɔ a yɛkyerɛ ma Nyankopɔn na nyɛnko ber a yɛreyɛ dza oye no na ɔbɛkyerɛ hɛn osuanyiyɛ. Dɛ mbrɛ President Nelson kyerɛkyerɛe no, yɛyɛ Nyankopɔn ne mba, ahyɛmu mba, Jesus Christ N’esũafo.

Me gye dase dɛ Jesus Christ tse ase na Ɔapon hɛn. Ɔno na Ɔkãa dɛ, Maabɔ wo … dzin afrɛ wo; eyɛ medze.” Jesus Christ ne dzin mu, amen.