Dan W’Akoma kɔ Jesus Christ do: Primary Ndwom N’Akyɛdze Krɔnkrɔn
Primary ndwom yɛ nkyerɛkyerɛ ma Jesus Christ n’esũafo, dasegye ma asɛmpa a wɔdze asan ananmu no nokwaryɛ ho, na mpaabɔ nhyehyɛɛ ma ndwom.
Mosom wɔ Primary ne nhyira horow kor nye dɛ m’akoma esũa adɔ kasa a me tɛkyerɛma nnkã. Menya dɛwdzi dɛ menye mfɛfo Ahotseweefo nya nkitahodzi dua ndwom krɔnkrɔn ne kasaa a yɛtow mu. Na nkanka yedua Primary ndwom a ɔnnyɛ dzen do no, Sunsum Krɔnkrɔn no atra kasa akwansiwdze biara na ɔdze N’awasa no ahyɛ m’akoma mu mã. Mbofra hɔn ndze horow mu no, wɔabɔ Nyankopɔn no dɔ na Ne ba Jesus Christ ho dawur wɔ nokwar pefee a ohwirom mu.
Mpo dɛ mennyin wɔ Primary no, ntsɛmara Sunsum no akyerɛkyerɛ me no ndwom no krɔnkrɔnyɛ, na wɔabɛkã mankasa m’asɔryɛ ho. Primary ndwom no enya nhyɛdo krɔnkrɔn wɔ m’abrabɔ mu na wɔama me dɛwdzi na awerɛkyekyer, wɔakyerɛkyerɛ me onnyiewiei nokwar, na wɔatwe me abɛn Agyenkwa no na N’asɛmpa no yie.
Mber bi President Dallin H. Oaks kyerɛkyerɛɛ dɛ: “asɔr ndwom no ntowee no yɛ akwan a oye papaapa mu kor a yɛdze bosũa asɛmpa a wɔdze asan ananmu aba no ne nkyerɛkyerɛ.” Dɛm nsɛm no yɛ nokwar ma hɛn nyinara na tsitsir ara so ma mbofra. Primary ndwom yɛ Nyankopɔn no dɔ edwindadze horow no mu kor a ɔboa Agyenkwa n’esũafo nkumabaa no ma wonya dasegye. Awofo, banodzifo, na akyerɛkkyerɛfo nyɛn aba no ber a wɔgye dase kyerɛ hɔn na wɔma mbofra no gye hɔn dasee fa dza wonyim nyinara a woebohu wɔ Ɔsor Egya; Ne Ba Jesus Christ; na Sunsum Krɔnkrɔn no ho.
Mfe yinom a wɔabasen kɔ wɔ mo som dwuma mu no, menya mber atow ndwom na mesũa fi Primary ndwom mu ber a morodwendwen nsɛmbisa kakra bi ho dɛ:
-
Primary ndwom a wosũaa no wɔ mbafober mu no si dɛn bɛyɛ sunsum mu kasa a mbofra dze gye dase wɔ hɔn abrabɔ nyina mu?
-
Wɔrotow asɛmpa nokwar ndwom no si dɛn boa mbofra no ma wɔkaa Ewuradze dɛ ɔkã hɔn ahyɛmudzi ho na osiesie hɔn ma N’ayɛdze horow no?
-
Na Primary ndwom no besi dɛn aboa ma wɔakyerɛw Nyankopɔn ne mbra no wɔ esũafo nkumabaa yinom hɔn akoma do?
Mber a wɔhyɛɛ Primary ase wɔ afe 1878 mu no, ne president a odzi kan, Aurelia Spencer Rogers, hun dɛ “ndwontow hia.” Aber nyina no ndwom ayɛ mbofra hɔn asɛmpa ne nkyerɛkyerɛ n’adze a ohia ankasa. Primary ndwom botum abɛyɛ abofra no sunsum mu kasa osiandɛ hɔn ndze nwanwa no kyerɛkyerɛ asɛmpa nokwar. Ndwom yinom wɔ tum a ɔkã mbofra no ho mber tsentsenntsen, a ɔbɛkã hɔn osuanyiyɛ awosu na ntɔyɛɛ kwan ho ma hɔn dɛ wɔgye Agyenkwa no ho dase.
Enam Ndwom Do Rekyerɛkyerɛ Jesus Christ ne Nkyerɛkyerɛ no.
Primary ndwom botum so ayɛ asɛmpa nkyerɛkyerɛ edwindadze a tum wɔ mu. Ndwom binom kã Agyenkwa n’abrabɔ na somdwuma ho nsɛm. Binom so kyerɛkyerɛ No su horow, tse dɛ Ne gyedzi, N’enyidado, na N’ayamuyie ho nsɛm. Na ndwom krɔnkrɔn dodow no gye No Werdambɔ a ɔmmbɔ adze da na dɔ no a ɔpem fi dɛm nkwagye nyɛe mu ba no ho dase.
Ewuradze no nkɔnhyɛnyi, President Russell M. Nelson, kyerɛkyerɛɛ dɛ: “[Ndwom] botum ama dza oye ho nhyɛdo a ɔbɛkyɛr papaapa dze atra mber a mbofra susuar koraa. … [Ɔwɔ] tum [no] dɛ ɔma sunsum mu edziban. Ɔwɔ ayarsa tum. Ɔwɔ tum [dɛ] ɔboa asɔryɛ; ɔma hɛn kwan ma yɛdwendwen [Agyenkwa no] Werdambɔ na asɛmpa ne Nsananamu a no nkwagye fapem horow na nkwagye ntowdo ayɛdze horow kã ho no ho. Ndwom ma hɛn tum ma yɛkyerɛ mpaabɔ adwendwen na yɛgye nokwar krɔnkrɔn ho dase.”
Dɛ awofo, banodzifo, na akyerɛkyerɛfo no, yɛregye enyim akyerɛkyerɛ asɛmpa nokwar a yehu no wɔ ndwom mu no kã hɛn mbɔdzembɔ ho dɛ yɛbɔboa mbofra ma woenya anohoba nhyira horow yinom ho kwan. President Nelson sanee kyerɛkyerɛɛ so dɛ “mbofra botum esũa kyerɛwsɛm no mber a worusũa dɛ wɔbɔtow ndwom dɛmara dɛ wobotum esũa nkyerɛkyerɛ no wɔ adzesũabea.” Ndwom yinom botum ama adzesũadze horow a ɔbɔboa ma mbofra no enya gyedzi a ɔkyerɛ hɔn akɔ Agyenkwa no na ɔboa hɔn ma wotu hɔnho si hɔ ma N’asɛmpa no.
Kyerɛwsɛm no kyerɛkyerɛ dɛ Agyenkwa no n’enyi gye atseneneefo ndwom a ofi akoma mu ho. Moho bow me wɔ enyigye a Agyenkwa n’esũafo nkumabaa no hɔn ndze horow dze ba no ho. Minyim dɛ hɔn mpaabɔ ndwom no du ɔsor dɛ wɔdze kyerɛ gyedzi a ɔto nsa frɛ Sunsum Krɔnkrɔn no ma osi onnyiewiei nokwar no pi na bɔkɔɔ na ɔdɔ muara ɔto nsa frɛ binom dɛ wɔngye hɛn Agyenkwa no ɔfrɛ nto mu dɛ wɔbɛka No do na wɔaba fie. Dɛ mbrɛ Elder Henry B. Eyring abɔ hɛn nkaa no, ɔyɛ mber a yɛtse Sunsum ne nkã na yenya Agyenkwa no Werdambɔ ho dase dɛ ɔreyɛ ewduma wɔ hɛn abrabɔ mu.
Yeritsintim Nokwar wɔ Akoma no do
Primary ndwom botum ayɛ anwanwadze wɔ hɔn abrabɔ nyina mu dɛ esuafo, na mber a worinyin no ɔbɛyɛ mfaso ama hɔn. Ndwom a yesũaa no ber a nna yeedzi mfe esia no wɔ tum dɛ ɔka hɛn hɔ—na obotum asan aba mfe du mfe du ekyir no wɔ gyinaesi, nsɔhwɛ, yaw, anaa dɛwdzi mber mu. Ibia wɔ hɛn mpanyinyɛ mu no, “I Will Follow God’s Plan” [Mibedzi Nyankopɔn ne Nhyehyɛɛ do] mu nsɛm no botum ayɛ dɛ sunsum mu sekyɛ a osi Ɔsomafo Paul ne dasegye do fa Nyankopɔn n’anohoba horow ma hɛn no nokwaryɛ ho. Anaa wɔbɔ hɛn nkaa dɛ osiandɛ Nyankopɔn sie N’anohoba horow ntsi, N’ahyɛmudzi horow ma awerɛkyekyer a no mu yɛ dzen na guandɔbea na ɔto nsa frɛ hɛn dɛ yɛmfa hɛn enyidado na awerɛhyɛmu nto Jesus Christ na No werdam tum do pintsinn.
Asɔrmba mpanyimfo a wɔwɔ wiadze nyina mu no, nkõdzen mber mu no, taa kaa na wɔdan kɔ Primary ndwom a wosũae ber a nna wɔyɛ mbofra no do. Ma nkorɔfo pii no, ndwom yinom boaa hɔn wɔ hɔn gyedzi nkyekyeree n’ahyɛse wɔ Jesus Christ mu na nna ɔtaa dɛ hɔ yɛ beebi a odzi kan a hɔn nsakyeree ma N’asɛmpa no hyɛɛ ase. Awofo, banodzifo, na akyerɛkyerɛfo tsetsee dɛm gyedzi no ber a wɔkyerɛkyerɛe, tow ndwom na wɔdze ahwɛyie gyee dase kyerɛɛ mbofra no mber nyina.
Akyerɛbaa kor nye me kyɛɛ dɛ Primary ndwom som no bo, na mfe 20 ekyir no, ɔdze ndwom no kã ne nsakyeree a ɔkɔr do ntsɛntsɛm wɔ Jesus Christ n’asɛmpa no ho. Asɔrba bi so gyee dase dɛ Primary tsɛɛw sinape gyedzi ho aba mber a nna wosuar no na ɔno nye siantsir a otumii sanee ba Ewuradze N’Asɔr wɔ ne mfe 30 ber mu no. Agyenkwa no bɔɔ anohoba dɛ, “Okyigyinafo no, … ɔno na ɔbɛkyerɛkyerɛ hom ndzɛmba nyina, ɔbɛkaa hom dza makã akyerɛ hom nyina.” Primary ndwom botum ayɛ kwan kor a wɔhyɛ dɛm anohoba mã.
Primary ndwom kor so a mepɛ kasa fa gyedzi a ɔda famu na dasegye a otsim ho tum:
Sɛ mbofra rotow ndwom a, nna wɔrekyerɛ osũanyi ne pɛ na worusũa ahyɛmudzi bra nhwɛdo. Sunsum no botum dze ndwom dze ekrukye onnyiewiei nokwar horow wɔ hɔn akoma a ɔgow do. Na ɔnnkɛkyɛr, mbofra no botum asan mu eyi ndwom na wɔadan hɔn akoma na hɔn abrabɔ akɔ Jesus Christ hɔ ber a wɔnye No reyɛ na worisie ahyɛmudzi krɔnkrɔn horow.
Yɛrekaa Hɛn Ahyɛmudzi horow na Yɛreyɛ Ayɛdze horow ho Ahoboa
Ndwom krɔnkrɔn botum akyerɛw Christ ne nkyerɛkyerɛ wɔ ɔkra no mu na oesiesie hɛn ma yɛagye N’ayɛdze horow no. Ɔdze Agyenkwa ne nkyerɛkyerɛ to hɛn adwendwen do na dɛm adwendwen no fam hɛn osuanyiyɛ wɔ No mu ho.
Dɛ Primary banodzifo no, yɛwɔ kwan na asodzi krɔnkrɔn dɛ yɛhwɛ no pefee dɛ wɔdze enyigye kyerɛkyerɛ ndwom, a nkyerɛkyerɛ ntseasee wɔ mu, na Sunsum no kã ho wɔ Primary. Erema mbofra no woehu nkãtse a wonya sɛ wɔrotow ndwom a na eroboa hɔn ma woehu dɛm nkãtse no dɛ ofi Sunsum Krɔnkrɔn no hɔ ba no kã ho. Mbɔdzembɔ yinom boa siesie hɛn mbofra ma ayɛdze krɔnkrɔn horow tse dɛ enuma na pisi, dɛmara dɛ okenyan hɔn ahyɛmudzi nkaadze ber a daa daa wɔsan yɛ hɔn anohoba horow fofor ma Nyankopɔn.
Edzidzi a Odzi Ewiei n’ase no, Agyenkwa no hyehyɛɛ sacrament wiei no, Matthew kyerɛw dɛ “na wɔtoow ndwom no wofir edzi kɔr Ngo Bepɔw no do.” Dapɛn biara no, Ewuradze N’Asɔr a wɔdze asan ananmu aba n’asɔrmba a woenuma hɔn na woesi hɔn pi, a mbofra a wosuar a woedzi mfe awɔtwe a woenuma hɔn kã ho no, yɛ ahoboa dzi Ewuradze ne sacrament. Ɔnam ndwom krɔnkrɔn no tow do no, wɔma mboanofo a wɔyɛ Nyankopɔn ne mba no kwan ma wosiesie hɔn akoma ma dɛm ayɛdze krɔnkrɔn dɛ wɔdze Ne dzin bɔto hɔn do, dze akaa No aber nyina, na woesie Ne mbrasɛm.
Me Dasee a Medze Wie
Anyɛnkofo adɔfo, megye dase dɛ Primary ndwom kyerɛkyerɛ onnyiewiei nokwar horow na nkyerɛkyerɛ a ogya hɛn kɔ Jesus Christ na N’asɛmpa hɔ. Moto nsa frɛ hom dɛ hom nhwɛ nokwar horow fapem a wɔakyerɛw no wɔ hom akoma mu a ɔnam ndwom yinom nkyerɛkyerɛ a ɔnnyɛ dzen do, na ɔgye dase fa nokwar horow no ho kyerɛ Agyenkwa no osuanyi nkumabaa no ber a idua ndwom do kyerɛkyerɛ hɔn asɛmpa ne nsɛmpa no.
Minyim dɛ Nyankopɔn hɛn Egya, wɔ No dɔ a ɔmmbɔ adze da mu no, somaa No Dɔba baa asaase do dɛ ɔnkyerɛkyerɛ hɛn, ɔnkyerɛ hɛn kwan, na ondua No Werdambɔ no do mpon hɛn.
Minyim dɛ Agyenkwa n’abrabɔ na somdwuma no yɛ nokwar na ankoankor dze. N’ayarsa, N’ayamuyie, na N’anwanwadze ho nsɛm ahyɛ kyerɛwsɛm no mu mã.
Minyim dɛ Ɔsor Egya tse na oyi Ne mba hɔn nokwar mpaabɔ ano, a hɔn mfe, gyinabew, anaa kasa mmfa ho. Otsie hɛn akoma mu ntotɔserɛ dzinn no.
Megye dase dɛ wɔ Gethsemane no, Jesus Christ soaa hɛn bɔn, awerɛhow, na yaw no dur. Ohun amandze ne pɛ mu ara osian No dɔ ma hɛn ntsi na ɔmaa ɔyɛɛ yie ma hɛn dɛ yebenya bɔnfakyɛ na yɛasan akɔ fie.
Minyim dɛ ɔyɛ nokwar dɛ yɛyɛ Nyankopɔn ne mba, ɔbɔɔ hɛn wɔ No su do, a ɔdze ndaamba krɔnkrɔn akyɛ hɛn, na ɔato nsa afrɛ hɛn dɛ yɛnsan nye No nkɛtsena sɛ yɛsan mu yi dɛ yɛbɛka Jesus Christ do a.
Minyim dɛ Jesus Christ nye hɛn fasusu a odzi mu, na sɛ yɛka No do ber a yɛrosom, yɛdze bɔn rekyɛ, na yɛrodɔ binom a, yɛbɛyɛ tse dɛ Ɔno yie ofi da to da.
Na minyim dɛ Ewuradze ne temple horow krɔnkrɔn no yɛ Ne fie wɔ asaase do ha. Hɔn mu no, yɛyɛ ahyɛmudzi horow krɔnkrɔn, yenya onnyiewiei nhyira horow, na yesũa No ho asɛm yie na yɛtse N’enyim nkã no yie. Temple no yɛ adzesũa, asomdwee, na hɛn abrabɔ n’ahosiesie bea.
Megye dase dɛ mbɔdzembɔ a yɛyɛ dze kyerɛkyerɛ na yɛtow Primary ndwom yinom kyerɛ hɛn mbofra no nnyɛ dza ɔyɛ fɛw a ɔkã hɛn nyamesom amambra ho ara. Wɔyɛ nkyerɛkyerɛ ma Jesus Christ n’esũafo, dasegye ma asɛmpa a wɔdze asan ananmu no nokwaryɛ ho, na mpaabɔ nhyehyɛɛ ma ndwom. Ndwom krɔnkrɔn botum ahyerɛn Christ ne Kan wɔ tsiefo no do na obotum ehue egu ɔdwontonyi no n’akoma mu. Anyɛnkofo adɔfo, Jesus daho pɛ dɛ yɛkyɛ Ne kan no. Megye ho dase wɔ Jesus Christ ne dzin krɔnkrɔn no mu, amen.