Erekaa Nguan no

Christ nye Oguanhwɛfo Pa no. Nguan no mu kor biara som No bo. Ɔyɛɛ nguandohwɛ ho nhwɛdo na Ɔnam asɛm na ndwuma mu kyerɛkyerɛɛ hɛn nguanhwɛfo pa no su a irihu wo nguan hɔn dzin, iridɔ hɔn, irohwehwɛ hɔn a wɔayew, irenyɛn na ewiei koraa no iridzi hɔn enyim akɔ fie bio kã ho. Ɔpɛ dɛ yɛyɛ dɛmara dɛ yɛyɛ No nguanhwɛfo nkuma.

Yɛbotum esũa pii afa erosom wɔ Nyame No kwan do efi tsetse nkɔnhyɛnyi—na nguanhwɛfo soronko—Moroni hɔ. Ɔtsena ase wɔ ber a ɔyɛ dzen paa mu, a woennya mfaso a ɔwɔ cell foon, kɔmputa, na internet ho. Naaso otumii kaan nguan no. Kwan bɛn na ɔfaa do yɛɛ iyi? Yehu no kwan no a ɔfaa do yɛɛ kakra wɔ Moroni 6 Hɔ na yɛkenkan dɛ asɔr mba no “wɔkaan hɔn foraa Christ n’asɔrmba no; na wɔgyee hɔn edzin, ama wɔaakaa hɔn na wɔdze Nyankopɔn n’asɛmpa no anyɛn hɔn, na wɔahwɛ hɔn ma wɔaafa kwan pa no do” Na asɔrmba no “hyiaa mu mpɛn pii faa akɔnkye, na wɔbɔɔ mpaa, na wɔtwetwee nkɔmbɔ a ɔfa hɔn akra ne yieyɛ ho.”” (Moroni 6:4–5; woetsim mu aka ho).

Ma Moroni dze, nkorɔfo ho hia no papaapa—hɔn edzin! Ɔdze “erekan na irihu hɔn” fapem no dzii dwuma ama wɔakaa hɔn nyinara. Hɔn mu biara ɔreper anaa okyinkyin no wohun no, ɔmaa Ahotseweefo kwan ma wɔdwen hɔn yiedzi ho nsɛm wɔ abaguafo nhyiamu ase. Tse dɛ nguanhwɛfo no a ogyaa eduokron akron (a megye dzi dɛ wɔwɔ ahotɔ na bambɔ mu) na ɔkaa kor a wɔayew no do no,(hwɛ Luke 15:4–7) wɔaka akyerɛ hɛn dɛ yɛnkaa hɛn nguankuw no dɛmara—yenhu na yenkaa na yɛnkɔ yɛnkɛyɛ dɛmara.

Dɛ asɛmpakã dwuma baanodzinyi wɔ India no, mekaa dɛ mebisaa nkorbata ne president a ɔyɛ aberantse no fa no botae ahorow bi wɔ afe a ɔreba no mu: “Mbanyin dodow ahen na ibesiesie hɔn ma wɔagye Melchizedek Asɔfodzi?” No mbuae a ɔmaa no ntsɛmara nye “Esuon!”

Modwendwen bea a wɔ no nsusui mu no onyaa dɛm nkanee pɔtsee no! Ansaana mebeyi ano no, oyii krataa bi a wɔakyerɛw nkanee fi kor kesi esuon wɔ n’afa. Nna nsensaneeba enum a odzi kan no edzin wɔ do—nyimpa ankasa a ɔno na ne elderfo quorumno rokɔto nsa afrɛ hɔn na wɔahyɛ hɔn nkuran ma woenya asɔfodzi no ho nhyira wɔ hɔn abrabɔ mu. Nokwar, nna ɔwɔ dɛ mibisa fa nsensaneeba no a hwee nnyi mu no esia na esuon no. Oh, President ɔkãa dɛ, ber a ɔrowosow ne tsir wɔ tsema mu, “ekyingye biara nnyi ho dɛ yebonuma annyɛ yie koara mbanyin beenu wɔ afe n’ahyɛse mu a wobotum enya asɔfodzi wɔ afe n’ewiei.” Dɛm baanodzinyi nwanwanyi tsee erekan na iruhu fapem no ase.

Christ akyekyer N’Asɔr wɔ kwan bi do a ɔbɛyɛ dzen dɛ No werɛ befir ɔkra, osiandɛ kor biara ho hia No dodow. Ankorankor biara a ɔwɔ ward bi mu, mfe biara a oedzi anaa ɔyɛ banyin anaa ɔbaa no, wɔ ahwɛdofo pii—nguanhwɛfo—a wɔahyɛ hɔn dɛ wɔmfa nkaa nhwɛ hɔn do. Mfatoho, wɔama bishopric nuambanyin asomfo, mpanyinfo a wɔ tu mbabun fo, serminary akyerɛkyerɛfo, quorum president na n’apamfo na binom so kã ho—enya dwumadzi dɛ wɔnhwɛ aberantsɛ bi ne yiedze do a hɔn nyinara ayɛ dɛ bambɔ ma mbabun sɛ wohyia nkodzen a. Sɛ bambɔ yi kor pɛ mpo na osi yie a, dɛm babun no benya ahotɔ, wobohu na wɔakaa no. Na mpɛn pii no, yennhu dɛm bambɔ no. Nkorɔfo taa tɔ gon kɔ ehubɔhubɔw mu—na obiara nnhyɛ hɔn nsew. Yebesi dɛn botum ayɛ nguanhwɛfo apapa? Yebotum esũa akan na yehu hɔn.

Asɔr no dze amandzɛɛbɔ na edwindze ahorow ma hɛn ma yɛayɛ dɛmara—dze akaa. Abosoom anan ntamu amandzɛɛbɔ no yɛ mfatoho tsitsir. Ɔma hɛn kwan ma yɛkan na yehu asɔrba biara mpɛn pii na yɛhyɛ hɔn a wɔyew anaa wohia hɛn mboa na hɛn dɔ no nsew. Nkyerɛwee a ɔkyerɛ Dwumadzi na hɔn a wohia Mpɛnsɛmpɛnsɛmu na dwumadzi ahorow da hɔn a wohia hɛn mboa sesei dɛ mbrɛ Temple Nkɔree Krataa Gyinabew amandzɛɛbɔ na binom kyerɛ no. Dɛm edwindze a wɔdze kan na wɔdze kaa hɔn no ma yetsim wɔ nkorɔfo do. Woana na ohia ɔfrɛ, asɔfodzi mu kankɔ anaa mboa ma ɔdze ebusua dzin bi akɔ temple? Woana na nkyɛ yebotum aboa ma woesiesie noho akɔ etuhoakyɛ asɛmpakã dwuma? Woana na ɔyewee wɔ bosoom yi mu? Dɛm edwindze yi boa hɛn ma yɛkaa nkorɔfo.

Nna minyim ebusua bi wɔ America a wɔgyee som dwumadzi wɔ Africa. Hɔn Kwesida a odzi kan koraa no wɔnantseew kɔr Asɔr asoɛe kor pɛ a ɔwɔ man no mu, bea a wokyiaa hɔn enyigye mu ara. Anapa no bɔkɔ ewiei no nna wɔfrɛɛ banyin ne yer no dɛ Relief Society president na ɔno no dɛ Young Men baanodzinyi! Obisaa nkorbata president no a nna ɔabrɛ no young men no hɔn dodow Dɛm nokwafo, baanodzinyi a odzi kan wɔ n’ebusuasanten mu yi tsen ne nsa kyerɛɛ sacrament dan n’ekyir na ɔkãa dɛ, “Beenu no a wɔwɔ hɔ no.” Nna banyin no nngye ndzi ntsi ɔfaa nkorbata ne nkyerɛwee nwoma dze kɔr fie, na ntsɛm ara ɔhyɛ no nsew dɛ nna young men 20 na wɔwɔ nkyerɛwee no do. Ɔsanee kɔr nkorbata president no hɔ bisaa dɛ ɔmma no young adultfo beenu a wɔbɔhyew a wotum wɔkã kasa ebien ma wɔnsom dɛ n’apamfo na ɔnye hɔn na mbanyimba beenu no tsenaa hɔ bobɔɔ edzin no do.

Nkyii dɛm mbasirmba yi hyɛɛ edwuma ase. Bosoom kakra ntamu, wohun babanyin biara a nna ɔwɔ nkyerɛwee no do. Wɔdze no dzin kor dzin kor no, nguan a wɔayew yi hɔn anyɛnkofo twee hɔn sanee bae na wɔnyɛn hɔn sunsum mu na honandua mu. Afe kor ntamu no, nna young men 21 na wɔba asɔr Kwesida biara. Enyi sɔ dɛm young men a wɔkaan na wohunii hɔn no.

Me nyɛnko dɔfo bi a nna ɔyɛ adzesuanyi nye n’ebusua tui kɔr American kurow bi mu kɔtoaa n’adzesua do. Wɔfrɛɛ no ntsɛmara dɛ ɔnyɛ baanodzifo wɔ elderfo quorum. Nna ɔwɔ suro kakraa fa no kokoa mu mpɛnsampɛnsamu a odzi kan a ɔnye stake president no bɛyɛ ho, osii n’adwen pi dɛ ɔbɛyɛ ahoboa akɔ. Ɔkãa kyerɛ stake president no dɛ ɔwɔ botae ebiasa ma afe a ɔreba no: (1) ɔha nkyɛmu 90 som, (2) asɛmpa adzesua a odzi mu dapɛn biara, na (3) quorum dwumadzi a wɔahyehyɛ no yie bosom biara.

Stake president nyansafo yerɛɛw n’ano bisaa me nyɛnko no dɛ, “Ana ibotum abɔ wo quorumnyi bi a ɔayɛ akɔtrɔbɔdwe a ibotum aboa ma ɔnye n’ebusua akɔ temple afe yi?” Ɔno maa me nyɛnko no ho boww no. Ɔdwen ho ahwɛyie mu ara na onyaa dzin kor bi. Stake president kyerɛɛ dɛ,”kyerɛw to hɔ.” Dɛm baanodzifo a ɔwɔ suahu yi bisaa asɛm kor no ara mpɛn ebiasa—na kokoa mu mpɛnsampɛnsamu no baa ewiei. Banyimba yi puei fii kokoa mu mpɛnsampɛnsanmu no ase no nna woesua n’adzesuadze kɛse kor a ɔfa baanodzi na erosom ho. Ɔdze nhyehyɛɛ, adzesua, na dwumadzi kɔr kokoa mu mpɛnsampɛnsamu no ase. Dzin ahorow na ɔdze puei! Ekyir no ɔno na no quorum hɔn som no tsiimii wɔ dɛm edzin anan no do.

Meyɛ asɛmpasomafo baanodzifo no, mekɛseraa mo nkorbata kor Kwesida anapa bi. Mehyɛɛ no nsew dɛ nkorbata president no kɔ do ara yi krataasin bi fi no kotoku mu na ɔkyerɛw do. Misii gyinae dɛ mpaabɔ a odzi ewiei ekyir no mibebisa no ho asɛm. Nhyiamu no baa ewiei no, ansaana mubotum ebisa krataa no ho asɛm no, nkorbata asɛmpakã baanodzifo no dze mbirika baa asɛnkãdaka hɔ a ɔdze krataa no maa no. Ntsɛm ara midzii baanodzifo a enyigye ahyɛ no mã yi ekyir kɔɔ ne dapɛn dapɛn nkorbata asɛmpakã nhyiamu ase. Ansaana wɔbɛhyɛ ase no, oyii krataa no fii no kotoku mu. Nna ɔakyerɛw asɔrmba a nna wonnyi sacrament nhyiamu ase hɔn edzin. Sima kakra ntamu no, nna baguanyi biara eyi dzin kor anaa ebien, a wɔhyɛɛ dɛ wɔbɔkɔ akɛsera hɔn dɛm da no ara ehu dɛ hɔnho yie na wɔama woehu dɛ wɔafẽ hɔn. Afei ɔno nye erekan na iruhu hɔn.

Mekaa mansin bi, ɔda dɔnhwer pii a wɔdze wimhɛn kɔ temple a ɔbɛn, bea a ekitsa temple recommend a ɔmmpa ho yɛ adze hia papaapa, dɛ annhwɛ mpo a na eremmfa nndzi dwuma biara da. Bosoom biara mu Kwesida odzi kan, baanodzifo edwindze a wɔdze kan no dze hu hɔn asɔrmba a hɔn nsa aka hɔn endowmnent Sɛ wohu dɛ ɔnnkɛkyɛr na recommend bi bɛpa ho a, ɔkyerɛwfo panyin no yɛ kokoa mu mpɛnsampɛnsamu nhyehyɛɛ ma wɔdze ayɛ no fofor. Baanodzifo tu egyina fa hɔn a hɔn recommend ahorow apa ho, na wɔhwehwɛ dɛ wɔbɔboa hɔn ma wɔasan akɔ ahyɛmu anamɔnkwan no do. Mibisaa hɔn asɔr mba dodow ahen a hɔn nsa akã hɔn endowment na wokitsa recommend a ɔmmpaa ho. Mbuae yɛ ɔha nkyekyɛmu 98.6 a ɔyɛ nwanwa. Ber a mibisaa hɔn faa beesia no a hɔn recommend apa ho no, baanodzifo no tumii hun hɔn dzin na wɔkyerɛkyerɛ me mbɔdzembɔ a wɔreyɛ dze atwe hɔn aba!

Mfe kakra a abasen kɔ no, m’ebusua sanee kɔr America. Hɛn enyi gyee dɛ yɛ kɔr Asɔr wɔ ha mfe 26 ekyir a ɔyɛ nwanwa wɔ ekuw nketsektse a wɔatsew hɔnho mu. Wɔfrɛɛ me dɛ ward asɛmpakãfo. Nna yɛwɔ ward mission banodzifo okunyin bi na nna yɛreyɛ ndzɛmba a ɔyɛ enyigye pii na yɛkyerɛkyerɛ nkorɔfo nwanwafo. Meserɛɛ dɛ monkɔ ward abaguafo nhyiamu nkɔhwɛ na menya mboa ama m’ayɛnkofo a yeridzi hɔn ho dwuma no. Ɔyɛɛ me ahobow ber a dza wɔdwendwen ho ara nye ward dwumadzi bi a ɔreba do. Mokɔr ward asɛmpakã baanodzifo no nkyɛn na mekyerɛɛ m’adwen dɛ woennya kwan amma hɛn nkorɔfo no hɔn ho amandzɛɛbɔ. No mbuae? “O, minnyaa kwan mma amandzɛɛbɔ da.”

Medze totoo nkorabata abaguafo nhyiamu a mokɔree wɔ Lahore, Pakistan adapɛn kakra ara ekyir. Kuw kakraba yi bɔ mu tsenaa pon kakraba bi ho, na dza wɔkãe ara yɛ nkorɔfo ho nsɛm. Edzin. Banodzinyi biara maa hɔn dwumadzi ho amandzɛɛbɔ na ankorankor na ebusua a wɔhwɛ hɔn do. Hɔn nyinara nyaa kwan kyerɛɛ hɔn adwen wɔ kwan papa wobotum afa do ehyira nkorɔfo a wɔrekasa fa hɔn ho no. Wɔyɛɛ nhyehyɛɛ na wɔmaa dwumadzi ahorow. Adzesua odzi mu wɔ erekan na iruhu a ofi hɛn nuambanyin na nkyerɛbaa akandzifo wɔ ebusuasantsen mu.

Jesus Christ N’Asɔr mu no, wɔnam ndɛ da yi nkɔnhyɛfo na hɔn a woetwa mu kɔ, na Agyenkwa no nhwɛdo a Ɔayɛ do—akyerɛkyerɛ hɛn erosom kwan no. Yɛfa edzin, yɛkaa, na yɛfa apam wɔ akra hɔn yiedzi ho. Baanodzifo a wɔyɛ iyi no hɔn nhyehyɛɛɛ ronnkɔ famu wɔ hɔn abaguafo nhyiamu horow mu da! Erekan na iruhu hɔn fapem no yɛ edwuma. Ɔno nye Nyame no kwan. Yebotum ayɛ papa. Nyankopɔn a Ɔbɔɔ wiadze na Ɔhwɛ ne nyina do no, dɛm edwuma—N’edwuma na enyimnyam—no yɛ ankorankor. Na dɛm so na ɔwɔ dɛ ɔyɛ ma hɛn, dɛ edwindadze a wɔ Ne nsamu wɔ nkwagye ntowdo edwuma nwanwa no. Nsɛnkyerɛdze wɔ nkorɔfo ankasa hɔn abrabɔ mu bɛda edzi. Jesus Christ ne dzin mu, amen.