Asɛmpa Nyɛbea Kwan no

Sɛ akɔ Louisiana me man a mifi mu no da a, nna bia inyim hɛn edziban adɛɛdɛw no mu pii—gumbo, jambalaya, étouffée, na dza ɔkekã ho.

Fi ber to ber, minya gyedzi wɔ mo mu dze yɛ edziban adɛɛdɛw yinom mu kor. Akeka ndzɛmba a wɔdze yɛ edziban ne nyina abɔ mu ekyir no, na edzi nhyehyɛɛ a ɔwɔ ho no do ara kɔ ewiei no, dza ɔka ekyir koraa a wɔnnkyerɛw nye dɛ ebɛka w’ano ahwɛ dɛ sɛ biribi nnkɔ yie a. Dɛm aber no, mutum tse Creole edzibanyɛfo a wɔawea no dɛ wɔrekã gu m’asowa mu dɛ, “Fa Tony’s pii gu mu.” Tony’s yɛ Creolefo adze a wɔdze gu edziban mu ma ɔyɛ dɛw a wɔyɛ no wɔ Opelousas, Louisiana, mo kurow mu. Ɔtaa dɛ ɔyɛ “nsumaamu adze wɔdze yɛ edziban” a ɔtsentsen sintɔ bi a wɔyɛɛ ber a iridzi nyɛbea kwan no do no.

Emi na Michelle, nyaa kwan soom dɛ asɛmpasomafo banodzifo wɔ Louisiana. Nna asɛmpasomafo no hɔn anafua a odzi ekyir wɔ asɛmpasomafo fie ana wɔasan akɔ hɔn ebusua ebusua hɔ no, yɛwɔ amambra bi dɛ yɛkyerɛ asɛmpasomafo no mbrɛ wosi yɛ me yer ne jambalaya wɔ nyɛbea kwan soronko do. Hɛn asɛmpasomafo fii asɛmpakã bea no a wɔwɔ enyisɔ ma nyɛbea kwan ahorow ho dze kã hɔn dasegye wɔ Jesus Christ n’asɛmpa a wɔdze asan ananmu aba no ho.

Abosoom kakra a abasen, nna morohwehwɛ hwehwɛ Asɔr Media Library mu na muhun link a ɔdze wo kɔ video ntsiatsiamba horow a wɔfrɛ no Restoration Conversations with President Russell M. Nelson [Nsanananmu ho Nkɔmbɔdzi horow a Yɛnye President Russell M. Nelson Nyae]. Muhun video ntsiatsiamba horow no mu kor ne dzin a ɔmaa meyerɛɛw m’ano. Wɔfrɛ no “Scriptures Are God’s Recipes for Happy Living [Kyerɛwsɛm no Yɛ Nyankopɔn ne Nyɛbea Kwan ma Enyigye Abrabɔ].” Ntsɛmara me miaa dɛm sima-ebien video no do na mohwɛɛ President Nelson a ɔrekyerɛkyerɛ Primary mbofra asɛm a ɔda famu eso ɔyɛ ndam fa mbrɛ ibesi benya enyigye ho. Ɔkyerɛɛ dɛ: “Sɛ ereyɛ cake a, idzi mbrɛ wosi yɛ no kwankyerɛ do, nnyɛ dɛm bi a? Na aber nyina ibenya nsunsuando pa, nnyɛ dɛm bi a?”

Ɔtoaa do a ɔrekasa fa mfe 95 a ɔrennkyɛr na oedzi ho: “Nkorɔfo bisa, ‘Ebɛnadze na idzi? W’esumasɛm nye dɛn?” Oyii ano dɛ, “Esumasɛm no wɔfrɛ no kyerɛwsɛm no. Hom botum akenkan na hom asɔ ahwɛ.”

Oye, ɔno nye no. Esumasɛm a ɔda famu a edze benya enyigye abrabɔ nye ibedzi Nyankopɔn ne nyɛbea kwan a wɔakyerɛw pefee wɔ kyerɛwsɛm no mu no do. Mefrɛ no “Asɛmpa Nyɛbea Kwan no.”

Ebɛnadze na eyɛ sɛ biribi annkɔ yie ber a iridzi nyɛbea kwan no do? “Nsumaamu adze a wɔdze yɛ adze” bi hyɛ Asɛmpa Nyɛbea Kwan no mu a ɔma aber nyina obowie wo yie. Aber nyina nyiano no nye Jesus Christ.

Modwen dɛ hɛn nyinara yɛwɔ mber a ɔyɛ a yɛtse nkã dɛ ndzɛmba a yɛdze reyɛ adze no nndzi mu papa, anaa ɔyɛ dzen dɛ yebedzi akwankyerɛ no do, anaa yɛnnyɛ biribi yie, anaa biribi si a yennyi tum wɔ do, nna dza ɔkeka ho.

No nsɔwano nye ebɛnadze? Ɔno nye dɛ edze dza ɔto nsa frɛ Jesus Christ ba w’abrabɔ mu no pii bɛkã ho.

Ntsi, edze Jesus Christ rekã w’abrabɔ ho pii no tse dɛn?

Morosom dɛ asɛmpakã president no, minyaa kwan dɛ menye hɛn asɛmpasomafo mbarantsɛ na nkataasia no hɔn mu kor biara hyia adapɛn esia biara ntamu. Ankorankor nhyiamu ber no, nna ɔtaa si dɛ asɛmpasomafo no bisa kwankyerɛ fa mbrɛ wobesi etu hɔn adamfoyɛ horow no nkɔdo no mpon.

Ber bi, asɛmpasomafo bi baa n’ankorankor mpɛsampɛnsamu na ɔtsenaa ase. Nna mohwɛ no su a mutum hu dɛ biribi duudur kyer n’adwen. Mibisaa no dɛ, “Elder, ebɛnadze na epɛ dɛ ekã ho asɛm ndɛ?” Ɔkɔr do kãa haw horow a ɔnye n’adamfo no wɔ ho asɛm na mbrɛ osi rinya nsunsuando wɔ hɔn tum a wɔdze yɛ asɛmpakã dwuma no do. Nyinsuwa wɔ n’enyiwa mu no, ɔhwɛɛ me na obisaa me dɛ, “President, menyɛ dɛn?”

Aber no mu no, nna nokwar ara minnyim mbuae a memma. Mber kakra ekyir no, mibisaa no sɛ obeye dɛ yɛbɔbɔ mu ebu ntwɛr abɔ mpaa agye akwankyerɛ fi Sunsum no hɔ a. Ɔpeen do, na yebuu ntwɛr bɔɔ mu bɔɔ mpaa dze nyaa nkenyan.

Mpaabɔ n’ekyir no, yɛkɔr do buu ntwɛr mber kakra ana yɛretsena hɛn ngua a ɔhwɛ enyim na enyim mu. Mibisaa no sɛ yebotum akenkan kyerɛwsɛm bi abɔ mu a. Ber a yebuee hɛn kyerɛwsɛm mu no, migyinae na mekãa kyerɛɛ no dɛ, “Elder, ber a yɛkenkan dɛm kyerɛwsɛm yi, meserɛ bisa woho dɛm asɛm yi: Sɛ medze su yinom bɔ bra a, ana obotu m’adamfoyɛ mpon na hɛn asɛmpakã dwuma no mpon?”

Nkyii yebuee Moron 7:45 na yebuee hɛn ano kenkanee: “Na ayamuyie wɔ penkyɛr, ne yamu ye, na ɔnnyɛ ahoɔyaw, ɔnnhyehyɛ noho, ɔnnhwehwɛ nonko nedze, no bo nnhaw no, ommbu emumuyɛ ho akontaa, onndzi dɛw wɔ dza ɔnntsen ho, na mbom odzi dɛw wɔ nokwar ho, ɔsoa adze nyina, ɔgye adze nyina dzi, ɔwɔ adze nyina mu enyidado, ɔsɔw adze nyina.”

Elder no hwɛɛ me a nyinsuwa wɔ n’enyiwa mu na ɔkãa dɛ: “Nyew, President, naaso ne yɛ yɛ dzen.” Megyee too mu na mekaa no dɛ ɔyɛ Nyame ne ba a ɔwɔ tum krɔnkrɔn dɛ obotum dze Ewuradze no mboa ayɛ.

Nkyii yɛkasaa kakra faa nsianee ho abɛbu a Elder Clark G. Gilbert a ɔkã Eduoson no ho kyerɛkyerɛɛ no, a ɔkaa hɛn dɛ ɔwɔ dɛ yɛhyɛ ase wɔ bea a yegyina no na, yɛnye Ewuradze abɔ mu no, yɛkɔ hɛn enyim kɔ sor wɔ kwan pa do. Nna mutum hu dɛ anamɔn a odzi do a ɔwɔ dɛ otu no da ho hyɛ no do, ntsi mibisaa no dɛ ɔnkã ne ntseasee wɔ kyerɛwsɛm “ɔnam akwan nketsenketse do nna ndzɛmba akɛse dua ba” ho nkyerɛ me. Ɔkyerɛɛ adwen no dɛ yɛreyɛ ndzɛmba nketsenketse a ɔda famu no, ndzɛmba akɛse tum si. Mibisaa no dɛ ɔmfa sima kor mfa nhwehwɛ ndzɛmba nketsenketse ebien a obotum ayɛ dze akyerɛ ayamuyie ama n’adamfo no.

Mber kakra ekyir no, ɔkyɛɛ n’adwenkyerɛ. Nkyii mibisaa no dɛ ɔmfa sima kor nhwehwɛ ndzɛmba nketsenketse ebien a obotum ayɛ dze enya abotar ama n’adamfo no. Ntsɛmara ɔkyɛɛ n’adwenkyerɛ ebien. Nna ɔda edzi pefee dɛ nna ɔrodwendwen nsɛm yi ho dadaw ana ɔreba hɛn nhyiamu yi ase. Motoo nsa frɛɛ no dɛ ɔmfa dɛm ndzɛmba kakra no nkɔ Nyame hɔ wɔ mpaabɔ mu na ombisa mpendo, kwankyerɛ, na nkenyan wɔ mbrɛ obesi apra n’akoma mu dze ne nhyehyɛɛ no ayɛ edwuma. Ɔgyee too mu. Yewiee no, mibisaa no dɛ ɔnkyerɛw ma ɔbɔkɔ ekesi ho asɛm kakra wɔ ne dapɛn dapɛn krataa a ɔkyerɛw no mu.

Adapɛn kakra bɛsenee, na muhun no wɔ ne dapɛn dapɛn krataa a ɔkyerɛw no mu dɛ ndzɛmba rutu mpon. Mennhu mpontu no nko wɔ ne dapɛn dapɛn krataa mu, mbom mesan so hun mpontu no wɔ n’adamfo no ne dapɛn dapɛn krataa mu. Hɛn enyim-na-enyim mpɛnsampɛnsamu a odzi do no, muhun nsesa kɛsenara wɔ n’enyim na no sunsum mu. Mibisaa no dɛ, “Ntsi Elder, ana ɔyɛ nokwar dɛ ‘ɔdɔ mmbɔ adze da?’” Ɔdze anoyerɛw kɛse buaa dɛ, “Nyew, na ɔnam akwan nketsenketse do nna ndzɛmba akɛse dua ba.”

Ber a idzi Asɛmpa Nyɛbea Kwan a ɔma enyigye abrabɔ do no, kaa President Nelson ne nkyerɛkyerɛ dɛ: “Asɛmbisa anaa ɔhaw biara a hom wɔ no, aber nyina mbuae no wobohu no wɔ Jesus Christ ne bra na ne nkyerɛkyerɛ mu. Sũa No Werdambɔ, No dɔ, N’ehumbɔbɔr, Ne nkyerɛkyerɛ, na N’ayarsa, na mpontu asɛmpa nsan-ananmu ho nsɛm mbordo. Dan kɔ No hɔ! Ka No Do!”

Sɛ ihia dɛ “itsie No” na ihu mbrɛ ebɔto nsa afrɛ Jesus Christ aba w’abrabɔ mu a, hwɛ dɛ ibedzi President Nelson n’anamɔn a ɔkyerɛkyerɛe fa nyikyerɛ ho:

“Hwehwɛ bea bi a hɔ yɛ komm a ibotum ataa akɔ hɔ. Brɛ woho adze wɔ Nyankopɔn enyim. Hue w’akoma gu wo Ɔsor Egya do. Dan kɔ No hɔ fa hwehwɛ nyiano na awerɛkyekye.

“Bɔ mpaa fa w’akɔdadwen, wo suro, wo mbrɛwyɛ—nyew w’akoma ahwehwɛdze ankasa no ho. Na nkyii tsie! Kyerɛw adwen no a ɔba wo tsir mu no. Kyerɛw wo nkã-tse na dzi ndzeyɛɛ a okenyan wo no do. Erokɔ do fa dɛm kwan yi do adzekyee kesi adzekyee, bosoom kesi bosoom, afe kesi afe no, ‘ibenyin wɔ nyikyerɛ nkyerɛkyerɛ mu.’”

Megye dase dɛ Jesus Christ nye hɛn Agyenkwa na Pomfo. “Ɔayɛ dza yehia biara a ɔbɛma yeetum asan akɔ [hɛn] Ɔsor Egya ne nkyɛn no ewie. Wɔ Jesus Christ ne dzin mu, amen.