Tum a ɔwɔ Erosom Ankorankor no mu

Nkyerɛbaa na nuambanyin, meda hom ase wɔ hom tu a hom etu hom ho esi hɔ nokwar mu dze aba Jesus Christ hɔ wɔ ɔhaw mber yi mu. Hom yɛ anwanwafo; homho yɛ fɛw, hom mu kor biara yɛ Nyame Ne ba. Me mpaabɔ nye dɛ yɛbɛtse Sunsum Krɔnkrɔn ne nhyɛdo ber a yɛbɛyɛ, na yɛboa hɛnho nkorkor ma yɛbɛyɛ, Jesus Christ n’esũafo mapã nokwar mu ara na yɛatse Ne dɛw ber a yɛsɔr wɔ Ewuradze ne fie.

President Russell M. Nelson akã dɛ: “Mber yi nye mber a emi na ɔwo wɔdɛ yɛbɛyɛ ahosiesie ama hɛn Ewuradze na Agyenkwa, Jesus Christ ne Mbae a Otsĩa Ebien no. Mber yi nye ber a yɛbɛyɛ hɛn osũanyiyɛ dza ohia hɛn papaapa. Wiadze yi a ndanenyi ndzɛmba ahyɛ mu mã no, yebesi dɛn bɛyɛ iyi?”

Ɔmaa nyiano no: “Yɛtaa sɔr wɔ temple mu a ɔbɔboa hɛn. Ewuradze ne fie mu no, yetsim wɔ Jesus Christ do. … Yɛba bohu No. … Obiara a ɔhwehwɛ Jesus Christ nokwar mu no bohu No wɔ temple mu.”

Ntsi, yɛyɛ dɛn bɛyɛ na yɛboa hɛn ho nkorkor ma yɛbɛyɛ Jesus Christ n’esũafo a yeetu hɛn ho esi hɔ? Yɛsom ankorankor no. Yɛrosom wɔ Agyenkwa no no kwan do no gye ayamuhyehye, ayamuyie, abotar, na ɔdɔ a atsɛmbu nnkã ho. Ber a yɛsom kor no, yɛto nsa frɛ nyia no dɛ ɔmbra Christ hɔ na ɔmbɔsom wɔ Ewuradze ne fie na ɔngye No ɔpon tum no. Anaaso dɛ, yɛboa hɛn ho nkorkor ma yɛbɛyɛ esuafo a yeetu hɛnho esi hɔ ber a yɛsom ankorankor no wɔ akwan a obegya akɔ Ewuradze ne fie.

Yesũa fi Jesus Christ hɔ tum a ɔwɔ mu dɛ yɛdze ɔdɔ a atsɛmbu nnka ho rosom ankorankor. Ekaa Samarianyi ɔbaa no a ɔwɔ bura no ho no. Bia na ɔbaa yi tse nkã dɛ no ho nnhia, ɔyɛ ankonam, n’abaw mu egura, na wonnhu no. Bia nna ɔtse nkã dɛ ɔnnkã ho. N’abrabɔ mu nyina onyaa kunnom enum, na banyin a nna ɔnye no tse no nnyɛ no kun. Bia binom buaa no atsɛnkyew a wonnyim n’abrabɔ ne tsebea. Bia iyi ntsi na ɔnoara nko baa bura no ho ewiaber a ɔhew wɔ mu papaapa no. Eso, ɔno nye hɔn a wodzi kan a Jesus Christ paa mu kãa kyerɛɛ hɔn dɛ Ɔno nye Messiah no hɔn mu baako. Ma Ɔno no, nna ɔbaa yi yɛ Nyankopɔn Ne babaa.

Jesus Christ kyerɛkyerɛɛ ɔbaa no dɛ ɔnam No do no obi botum enya nkwa a onnyiewiei ber a ɔnom nkwa nsu no. Ɔkãa dɛ, “Na nyia ɔbɔnom nsu a mebɛma no no, nsukɔm nnkɛdze no da, na nsu a mebɛma no no bɛyɛ no mu nsubura a opuw nsu kɔ onnyiewiei nkwa mu.”

Samarianyi ɔbaa no tsee Agyenkwa no no dɔ nkã na onyaa dase a ɔnam Sunsum no do dɛ Ɔno nye Messiah no. Dɛm dase yi ekyir no, ɔsanee kɔr kurow no mu na ɔtoo nsa frɛɛ afofor dɛ wɔmbra mbɔhwɛ, na pii gyee dzii dɛ ampa, Jesus “nye Christ no, wiadze Agyenkwa.” Christ dze ɔdɔ soom ankorankor no; dɛm ntsi, afofor bɛyɛɛ N’esuafo mapã.

Edze ayamuhyehye rosom ankorankor no tum a ɔwɔ mu no yesũa fi Christ n’Asomafo Peter na John hɔ. Ibotum akaa barimba bi a, ɔyɛ bubuafo fi ne nã yamu a, nna daa ɔda asɔrfi abow no ano a ɔserɛserɛ sika. Bia na ɔtse nka dɛ no ho nnhia, ɔyɛ ankonam, n’abaw mu egura, na wonnhu no. Bia nna ɔtse nka dɛ ɔnnkã ho.

“Na Peter see dɛ, Sika nye dwɛɛtɛɛ dze, minnyi bi, na dza mowɔ na medze rema wo yi: Nazarethnyi Jesus Christ ne dzin mu, nantsew.”

Peter suoo barimba no ne nsa nyimfa mu na ɔmaa no do, na barimba no no ho yɛɛ dzen. Anwanwadze n’ekyir noara, ɔbarimba no nye Peter Na Paul hɛn asɔrfi no mu, “ɔnam na oruhuruhuruw, na oriyi Nyankopɔn ayɛw.” Peter na John soom ankorankor no wɔ kwan a ogya kɔ Ewuradze ne fie do, na barimba yi bɛyɛɛ Christ no suanyi mapã.

M’anyɛnkofo, menya mber bi wɔ m’abrabɔ mu a emi so m’atse nka dɛ moho nnhia, meyɛ ankonam, m’abaw egura, na wonnhu me. Matse nka dɛ ɔyɛ dɛ ma mennkã ho. Wonumaa me na wosii me pi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba ber a medzi mfe 19. Afe kor ekyir, meygyee ɔfrɛ no too mu dɛ mobɔsom etuhoakyɛ asɛmpasomafo dwuma, naaso nna pii wɔ hɔ a minnyae nsũae fa Asɔr no n’abakɔsɛm ho.

M’asɛmpakã som n’ahyɛse no, musũaa dɛ saana mber bi wɔ hɔ a nna Ebibir Africa Man asefo no wɔmma hɔn kwan ma wonnya nhyira nyinara a ɔwɔ erosɔr wɔ Ewuradze ne fie mu no. Muruhu iyi mber a odzi kan no dze ebufuw, adwensɛɛ, ekyingye, na suro atsenka bae. Nna nkãtse yinom yɛ dzen ara dɛ mo tum a medze tse Sunsum Krɔnkrɔn ne nkã no yewee mber kakra.

Me tsir yɛɛ nkokwa dɛ, nna mowɔ asɛmpasomafo nyɛnko nwanwafo, Kevin Vick a, ɔdze ɔdɔ, abotar, na ayamuyie soom me. Ewimbir biara ber a nna ohu m’ekyingye atsenka na si a minnsi pi no, ɔkã no bɔkɔɔ ara kyerɛ Elder Johnson a osuar no dɛ, “Modɔ wo.” Bɛyɛ adapɛn ebien ekyir no, memaa moho kwan dze tsee Kevin no dɔ nkã. Minyaa akokodur bɔɔ mpaa maa Ɔsor Egya wɔ Jesus Christ dzin mu. Ber a mobɔɔ mpaa no, biribi twee me kɔr Nkyerɛkyerɛ na Ahyɛmudzi ne fa a otsĩa 6, nyiyimu 21–23, a ɔkã dɛ:

“Hwɛ, emi nye Jesus Christ, Nyame ne Ba no. … Emi nye kan a ɔhyerɛn sum mu. …

“… Tow w’adwen to anago no a isui wɔ w’akoma mu frɛɛ me, dɛ ibohu nokwar a ɔfa iyinom ho no.

“Ana mammfa asomdwee ho asɛm annhyɛ w’adwen mu a ɔfa dɛm asɛm no ho? “Ebɛn dasegye kɛse na ibotum enya akyɛn dza ofi Nyame hɔ?”

Ber a mekanee no, mekaae. Mekaa da no a mekyen kɔm bɔɔ mpaa dɛ mubohu sɛ Mormon Nwoma no yɛ Nyame n’asɛm a na dɛ Joseph Smith nye Nsanananmu Nkɔnhyɛnyi no a. Mekaa ahyɛmudzi a mayɛ wɔ Ewuradze ne fie a ɔdze me fam Jesus Christ ho wɔ ankorankor na dɔ kwan do no. Metsee Agyenkwa no no dɔ, N’ehumbɔbɔr na Ne taduasi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo nye N’ahenman wɔ asaase do na ohia ama oeesiesie hɛn ama Ne Mbae a Otsĩa Ebien no. Ɔnam dɛ mekae ntsi, mutumii tsee Sunsum Krɔnkrɔn ne nkã bio na metsee ase yie ara dɛ Jesus nye Christ no na meyɛ No sũanyi.

Ɔtɔ mber bi a, yebenya nsɛmbisa a yerinnya ho nyiano na nkãtse dɛ hɛn ho nnhia, hɛn abaw mu egura, yɛyɛ ankonam, na wonnhu hɛn. Naaso, m’anyɛnkofo, ɔwɔ dɛ yɛdze gyedzi wɔ Jesus Christ mu per kɔ kan na yɛkaa Ne nsɛm:

“Mma hom akoma nntutu.”

“Wiadze mu dze, hom wɔ ahohia: naaso hom nhyɛ dzen; medzi wiadze do konyim.”

Meyɛ dasefo wɔ dɛm nokwar yi ho, na wɔ Agyenkwa no n’anohoba nhyira ho.

Ntsi, ebɛnadze na yɛbɛyɛ dze ahwɛ dɛ hɛn som a yɛrosom ankorankor no wɔ Agyenkwa no kwan do no yɛ edwuma papaapa? Yɛdze Christ ne nkyerɛkyerɛ robɔ bra no bɔboa hɛn. “Yɛdze Christ ne nkyerɛkyerɛ robɔ bra,” dɛ mbrɛ President Nelson kyerɛe no, “botum ama ahotsew kɔntɔnkrɔn a ɔyɛ ndam, a ɔbɛma sunsum mu ahoɔhar aba hɛn abrabɔ mu.

Ber a yɛper dɛ yɛdze Jesus Christ ne mbra a ɔkrɔn no bɔ bra no, … Agyenkwa no pegya hɛn fi wiadze yi a ɔahwe ase no mu na ɔdze ayamuyie kɛse, ahobrɛadze, adɔyɛ, ayamuyie, ahohyɛdo, asomdwee, na ahomgye hyira hɛn.”

Elder Dale G. Renlund kyerɛkyerɛ mu dɛ, “[dɛm sunsum mu] ahoɔhar a edze Christ ne nkyerɛkyerɛ Erobɔ bra dze ba no, nnyɛ hɛn awosu krɔnkrɔn nko na ɔsesa bɛyɛ hɛn onnyiewiei nkrabea, mbom ɔhyɛ hɛn nkuran ma yɛboa nkaafo wɔ akwan a ɔfata do.” Elder Renlund kaa hɛn dɛ “Agyenkwa no n’edwuma nye dɛ ɔsa yar [ma yedzi mu]. Hɛn edwuma nye dɛ yɛdɔ—yɛdɔ na yɛsom wɔ kwan a ɔbɔtwe binom aba Christ hɔ do.”

Hɛn tum a yɛdze dzi Christ ne nkyerɛkyerɛ do no botu mpon ber a yesũa Mormon Nwoma no daa daa na yedzi sacrament no dapɛn dapɛn. President Nelson kãa dɛ Mormon Nwoma no “kyerɛkyerɛ Christ ne nkyerɛkyerɛ … [na] ɔma Jesus Christ no Werdambɔ no ho ntseasee wɔ mãhyɛ mu na pefeeyɛ mapã mu a, wonnkohu no beebiara.” Modɔ nwoma yi. Na mpaabɔ mu ara yɛrefa sacrament ayɛdze no dapɛn biara bɔto hɛn ntseasee wɔ Jesus Christ no Werdambɔ mu na ɔbɛma sunsum mu foforyɛ, awerɛkyekyer, na nyamesu mu tum aba hɛn abrabɔ mu. Kaa, “wɔ [asɔfodzi] ayɛdze yi mu na nyamesu mu tum no da edzi,” na dɛm tum yi, a ofi Jesus Christ No hɔ no, hyɛ hɛn pɛ na ahom dzen dɛ yɛbɔsom ankorankor no.

Mo Mormon Nwoma nsũae na sacrament a mefa no brɛ abagura atsenkã adze, ɔma m’enyimia dɛ mobɔsom ankorankor no wɔ Agyenkwa no kwan do tu mpon, na ɔboa me ma mefa osuanyiyɛ yɛ m’adze tsitsir.

M’anyɛnkofo, mehyɛ bɔ dɛ sɛ yɛdze Christ ne nkyerɛkyerɛ bɔ bra na yɛsom ankorankor no wɔ akwan a ogya kɔ Ewuradze ne fie a, yɛdze gyedzi wɔ Jesus Christ mu Bɛper akɔ kan mpo wɔ nsɛmbisa a yennyaa ho nyiano mu na atsenka dɛ hɛnho nnhia, yɛyɛ ankonam, hɛn abaw mu egura, na wonnhu hɛn mu. Yɛbɔto nsa afrɛ ankorankor no dɛ ɔmbra Jesus Christ hɔ na ɔnsom wɔ Ewuradze ne fie mfa ngye N’ɔpon tum na No dɔ. Ewuradze ne fie mu no, “yɛbɛtse [Agyenkwa no] n’ehumbɔbɔr nka. [Yebenya hɛn] nsɛmbisa a ɔkyer adwen mu kɛse ho nyiano. [Na yɛbɛtse] N’asɛmpa mu dɛwdzi no ase ara yie.” Jesus Christ ne dzin mu, amen.