Ahobrɛadzefo Bu Ntwɛr Wɔ Afɔrmbukyia Ho

Elder Jeremy R. Jaggi ne Kasaa

Ɔkã Eduosuon no ho

Ber a yɛyɛ na yedzi hɛn ahyɛmudzi horow nyi no, yɛkyekyer hɛn ho fam Agyenkwa No ho, na yenya kwan kɛse gye N’ehumbɔbɔr, ahobambɔ, ahotsew, ayarsa na ahomgye.

Adwontokuw, meda hom ase, wɔ hom dasedzi a hom dze dua asɔr ndwom fofor no mu.

Sacrament ndwom fofor “Bread of Life, Living Water” hyɛ me kra mã. Nsensaneeba kor a ɔwɔ ndwom no mu kã dɛ, “Seseiara maba afɔrmbukyia enyim, dze m’akoma a ebubu rema No.”

Ntseasee a mowɔ wɔ dɛm nsɛm no ho no mu dɔe ber a hɛn ebusua fii Newbury Park, California, kɔsoom wɔ Utah Ogden Asɛmpakã mbew do afe 2015 mu. Me nsa kaa nsato krataa dɛ monkɔ nserahwɛ wɔ Hill Air Force Base a ɔbɛn Layton, Utah. Nna monnkɔr nsordaafo bea hɔ da, na nna minnhyiaa nsordaafo hɔn sɔfo anaa mbanyin na mbaa a wɔyɛ edwuma dze bambɔ ma hɔn man no da.

Ɔsɔfo Harp, tse dɛ asɔfo afofor abemfo mpempem pii a wofi hɔn pɛ mu som wɔ efiadze, asopitsi, na nsordaafo edwumayɛbea ahorow mu wɔ wiase nyinaa no, maa me nkenyan na ntowdo. Hɛn bea a odzi ewiei a yegyinae nye krɔnkrɔn bea no. Mibisaa sɔfo no sɛ ɔyɛ som edwuma ma nkorɔfo nyinara a wɔpɛ dɛ wɔdwendwen, wɔbɔ mpaa, na wɔsom a. Ɔkɔr asɔrdan ne fasu a ɔwɔ enyim hɔ no, na ɔtwee mbeamudua fii nkataho tam no ekyir. Ɔkãa dɛ ɔdze mbeamudua no yɛ Protestant na Catholic som edwuma. Mibisaa no dza ɔdze yɛ enuanom a wɔyɛ Jewfo hɔn som dwuma, na ɔkɔr enyim wɔ fasu no a ɔwɔ enyim hɔ no n’afa kor no ho na oyii David Nworaba bi puei.

Afei mibisaa dɛ, “Ebɛnadze na ɔyɛ ma Nda a Odzi Ekyir Ahotseweefo som?” Opiaa dɛm nsɛnkyerɛndze no fii hɔ na ɔdze ne nsa kyerɛɛ dua afɔrmbukyia kɛse no wɔ krɔnkrɔnbea no ne mfinimfin. Ɔkãa dɛ, Jesus Christ N’asɔr a ɔwɔ hɔ ma Nda a Odzi Ekyir Ahotseweefo asɔrmba siesie na wohyira paano na nsu no do wɔ afɔrmbukyia no do. Mibisaa sɛ woyi afɔrmbukyia kɛse a ɔyɛ dɛ ma otsim hɔ no fi hɔ ansaana hɛn Jewfo, Nkramofo, Catholicfo, anaa Protestantfo enuanom na nkyerɛbaa ayɛ hɔn som anaa. Ɔkaa dɛ afɔrmbukyia no si hɔ, na dɛm gyedzi ahorow no mu pii so dze afɔrmbukyia no dzi dwuma wɔ kwan bi do.

Abraham sii afɔrmbukyia, kyekyeer Isaac, na nna ɔayɛ krado dɛ ɔdze ne ba kortoo no bɔbɔ afɔr, naaso wokwetsiir ne nsa, na ɔkãa, dɛ mbrɛ Ewuradze akã no, dɛ, “Emi nye Yi”! Mpɛn ahen na Emi Mara Okokroko no anaa No nkɔnhyɛfo kor nntuu no ho mmae dɛ, “Emi nye yi“?

Ne Bepɔw do nkyerɛkyerɛ ber no, Agyenkwa No too nsa frɛɛ hɛn dɛ yɛnye hɛn enuanom na nkyerɛbaa nsan mbɔ mu ansaana yɛabɛn afɔrmbukyia no. Paul kyerɛkyerɛe dɛ wɔnam Jesus Christ No werdambɔ no do “atsew“ hɛnho wɔ afɔrmbukyia no ho.

Nkɔnyɛnyi Lehi “gyaa ne fie … na ne ndzɛmba a ɔsom bo. … [Na] osii afɔrmbukyia …⁠ na ɔbɔɔ afɔr … , na ɔdze ndaase maa Ewuradze.”

Bible no na Mormon Nwoma no kyerɛkyerɛ hɛn dɛ yɛnsom Nyankopɔn Ne ba no wɔ afɔrmbukyia ho. Dɛn ntsi a?

Hɛn awofo a wodzi kan, Adam na Eve, sisii na wɔsoom wɔ afɔrmbukyia ahorow ho. Ber a wɔpaam hɔn fii Eden Ture no mu na wɔasom “nda pii” no, ɔbɔfo bi bae na obisaa asɛmbisa a ɔdɔ bun mu yie a wobotum ebisa hɛn mu biara: “Ebɛnadze ntsi na ebɔ afɔr ma Ewuradze?”

Adam see no dɛ: “Minnyim.”

Bɔfo no mbuae ma Adam n’ahobrɛadze ngyentomu no yɛ hobow: “Dɛm adze yi gyina hɔ ma nyia Egya no Woo no Kortoo no no n’afɔrbɔ no. …” Dɛm ntsi, adze nyinara a ebɛyɛ no yɛ no wɔ Ɔba no ne dzin mu, na nu woho na bɔ Nyankopɔn ne dzin frɛ no wɔ Ɔba no ne dzin mu daapem.”

Sacrament pon na temple afɔrmbukyia no gyina hɔ ma Jesus Christ na No Werdambɔ afɔr a ɔmmbɔadze da no.

Ber a yɛyɛ na yedzi hɛn ahyɛmudzi horow nyi no, na yɛregye sacrament ayɛdze wɔ asɔrdan mu na endwoment no na nsɔwano wɔ temple mu no, yɛkyekyer hɛn ho fam Agyenkwa No ho, na yenya kwan kɛse gye N’ehumbɔbɔr, ahobambɔ, ahotsew, ayarsa na ahomgye.

Ehumbɔbɔr na Bambɔ a ɔnam Ahyɛmudzi horow do

Meyɛ aberantsɛ a m’edzi mfe 15 no, mibisaa me papa dɛ sɛ mubotum egya sacrament nhyiamu hɔ—Kwesida kor pɛ wɔ Sanda bosom no mu akɔ Amerika bɔɔlbɔ agordzi soronko bi anaa. Ɔkãa dɛ menyin yie dɛ mobotum esi dɛm gyinae no na ɔkãa kyerɛɛ me dɛ munsusu afotu kor bi ho. Ɔkãa dɛ, “Sɛ esan mu yi dɛ eronnkɔ kor a, ɔyɛ mberɛw dɛ ebɛsan mu eyi bio dɛ eronnkɔ kor so.”

Sɛ Agyenkwa no yɛ nkabɔmunyi kɛse no a, nna ɔtamfo no nye nyia ɔdze mpaapaamu ba. Abɔnsam daadaa hɛn dɛ yɛbɛtsetsew hɛnho efi hɛn mbeambea a woetu esi hɔ dɛ bea a wɔsom na dɛ yɛbɛtsew hɛnho efi Jesus Christ Ne bambɔ ho. Sɛ yɛsom Agyenkwa No a, yenya “tum a [yɛdze] bɔkɔ kan etsia wiadze ne mpemee.” Sɛ yegye mber nye No dzi nkitaho a, yɛwɔ bɔhyɛ dɛ wɔbɛgye hɛn efi Satan nsa.” ”Nkyii, yerisie hɛn ahyɛmu no, Ɔdze Ne dzenhyɛ tum no kyɛ hɛn.” Oh, mbrɛ m’ enyi sɔ suahu dɛ menye Agyenkwa no nya nkitahodzi ɔnam ahyɛmu ahorow a mayɛ wɔ afɔrmbukyia no ho.

Yerinya ntseasee afa Agyenkwa no Werdambɔ a ɔmmbɔ adze ho nsensaneeba tsia nsensaneeba, ahyɛdze tsia ahyɛdze no, ma sunsum mu bambɔ fi ɔtamfo no bɔr ho. Mbabun Elder Jaggi a ɔwɔ Mexico, Zuster Jaggi a ɔwɔ Belgium, na asɛmpasomafo nkaa a wɔwɔ wiadze nyinara bohu hɔn anyɛnkofo dɛ wɔregye nhyira a ɔwɔ enuma na eregye Sunsum Krɔnkrɔn akyɛdze no mu, sɛ hɔn anyɛnkofo kɔ sacrament nhyiamu wɔ dapɛn a odzi kan a wohyia hɔn no mu a.

Young adultnyi a ɔwɔ Tonga anaa Samoa taa sɔw hɔn ano wɔ Ewuradze fie sɛ wosiesiee hɔn ho na wɔgyee hɔn endowment ntsɛmara a ber a wowiee skuul. Endowment no mu no, wɔto nsa frɛ asɔrmba dɛ wondzi mbra enum a ɔdze ahoɔdzen na bambɔ ba no do. Ber a yɛnye Ewuradze dzi ahyɛmu no, Ɔnye hɛn nya nkitahodzi kor noara. Yɛkyerɛ hɛn nokwardzi na dɔ ma No. Hɛn ahoɔdzen na tum nyin wɔ bɔhyɛ biara a yɛyɛ na yesie no.

Ndwendwenho na Ntsewho

Sɛ yɛnam ahobrɛadze na nsɛnkyerɛdze kwan do bu ntwer wɔ Ewuradze n’afɔrmbukyia no ho a, ɔyɛ kwan ma adwendwen, “dɛ yɛdze hwɛ [hɛn] akoma n’ahantanyɛ, …[yɛbrɛ hɛnho adze] wɔ Nyankopɔn enyim.” Meyɛ babun no, nna ansaana menye m’anyɛnkofo bopue no, me maame taa kã dɛ, “Kae wo nyimpa ban, na meserɛ dɛ eba fie a fa wo ho bɛkyerɛ me.” Anafua binom wɔ hɔ a, menntum ammfa moho annkɛkyerɛ osiandɛ mammba fie ntsɛm. Mefe moho ekyir dɛ menntum menye me Mamme enndzi ehyia horow a ohia dɛm no.

Ndɛ, mohwɛ kwan dɛ medze moho bɛkyerɛ Ɔsor Egya nye no edzi nkitaho. Me daadaa som ho nyhehyɛɛ mu no mubu ntwer wɔ me mpa ho anaa menye m’ebusua bɔ mu wɔ mpaabɔ mu a, modwendwen hu moho dɛ mebu ntwer wɔ afɔrmbukyia no ho, rodwendwen na morohwehwɛ m’abrabɔ mu. Modwen sacrament no ho, paanoo no nyinara mpo, a woebubu na wɔatsetsew ama hɛn, kor biara gyina hɔ ma hɛn Agyenkwa No nyimpadua a obubui no. Mekaa President Dalin H. Oaks ne nkyerɛkyerɛ dɛ “paanoo kor biara yɛ soronko, dɛ mbrɛ ankorankor a wodzi bi no yɛ soronko no” Sɛ mubu ntwer wɔ mpaabɔ mu a, modwen mbrɛ medze me pɛ bɛma Nyankopɔn ho.

Elder David A. Bednar kyerɛkyerɛɛ dɛ “Sacrament ayɛdze no yɛ ɔfrɛ krɔnkrɔn a wosi do dɛ yennu hɛn ho nokwar mu na yɛnyɛ fofor wɔ sunsum mu. Yeridzi sacrament ne nyɛe, noara nnyi bɔn mmfi hɔ. Naaso ber a yɛdze enyidahɔ siesie hɛn ho na yɛdze akoma a abobɔ na sunsum a abotow dze yɛ ayɛdze krɔnkrɔn no, nna anohoba no nye dɛ aber nyina yebenya Ewuradze no Sunsum ma ɔnye hɛn atsena. Na ɔnam Sunsum Krɔnkrɔn n’ahotsew tum do dɛ hɛn daa daa nyɛnko no, aber nyina yebotum enya hɛn bɔn ho bɔnfakyɛ.”

Sɛ emi na Amy hwɛ hɛn abrabɔ mu sũahu horow a, yedzi Jesus Christ No dɔ mapã na afɔrbɔ akyɛdze ho ehurusi. Yehu mbrɛ woebue hɛl n’ebufuw so. Yɛbɛyɛ dɛn edzi atsɛmbu nhwɛ, ahoper, abagura, kokoram yarba, esikyire yarba, internet do ehunahuna, su a woewia, nyinsɛn a wɔasɛe, abofra, nua banyin, anaa papa a ɔahwer no do? Ɔnam dɛ Jesus faa kuraba wenwen, ebufuhyew kɔɔpow no—maa emi, m’ ebusuafo, hɛn nyinara!

Ɔnoom “kuraba wenwen no” wɔ Gethsemane Ture no mu no na N’amandzehu yɛɛ kɛse wɔ Calvary mbeamudua no do, ama yɛdze dza ɔyɛ dzen, enyiannsɔ, basabasayɛ, ebufuw, na ahopopo aato Ewuradze n’afɔrmbukyia no do, na Sunsum Krɔnkrɔn no a [yebenya no aatsew hɛnho],” dabiara.

Akyerɛba Patricia Holland kãa dɛ, “Me mpaabɔ dzendzen ma hom na moho ndɛ nye dɛ yɛdze bɛma koraa, yɛdze hɛn ho bɔto Nyankopɔn No bɔhyɛ na asomdwee afɔrmbukyia no do a ɔmmfa ho beebiara a yɛwɔ na dza yɛayɛ biara.”

Bea a Ayarsa na Ahomgye Wɔ

Sɛ yɛba afɔrmbukyia no ho a, yennya akatua; yesua fa Jesus Christ a Ɔma Akyɛdze no ho. Dɛm adzesua na ahyɛmudzi a ɔkyekyer no dze ayarsa ba. Nephi kãa dɛ, “Ɔdze no dɔ ahyɛ me mã araa dze ekodu mo honam ne nhyewee mpo.” Na hɛn Agyenkwa dɔfo maa nsato dɛ, “Ana hom rennsan mmba me nkyɛn, na hom nnu homho wɔ hom bɔn ho, ma wɔasakyer hom, ama maasa hom yarba?”

Ber a nna hɛn mbabaa mpanyimfo beenu, Mackenzie na Emma, susuar no, hɔn anansesɛm a nna wɔpɛ paa nye The Chronicles of Narnia: The Lion, the Witch and the Wardrobe. Hɛn nyina bɔdɔɔ awendadze kɛse, Aslan. Anafua kor a yɛkaa papaapa a yɛrekenkan buukuu no nye ber a awendadze kɛse no dze no nkwa too hɔ maa Edmund. Yɛkaa osiandɛ dɛ awofo na mbabaa sũi mber a Bayifo no kum awendadze no wɔ Boba Pon no do. Yɛkaa osiandɛ nna enyidado wɔ hɔ, esian no mmfa ho, kɛpem dɛ adze nwanwa no sii. Enyigyesɛm puei wɔ dɛm dan kakraba no mu ber a wonyaan Aslan na ɔkãa dɛ, “Sɛ Bayifo no nyim afɔrbɔ ne nkyerɛasee ankasa a, … nkyɛ [obohu] dɛ [sɛ] obi a nna onndzii bɔn biara fi ne pɛ mu wu ma dzebɔnyɛnyi a, [Boba] Pon no bɛpaapaa, na owu mpo ankasa [ahyɛ ase atsetsew].”

Jesus Christ siesie epirakur nyina. Jesus Christ ma ɔyɛ yie dɛ yebotum atsena ase bio.

Ne kasaa wɔ Ɔbɛsɛ 2022 wiadze mfɛndzanan ehyiadzi mu no, President Russell M. Nelson kasaa fa nserahwɛ kuw bi a wɔbaa temple mbue ano ho. Nna banyimba bi wɔ hɔ. President Nelson kyerɛkyerɛɛ dɛ:

“Ber a kuw no hɛɛn endowment dan mu no, banyimba no tseen ne nsa wɔ afɔrmbukyia a wobu nkotodwe wɔ ho nye Nyame dzi ahyɛmu no do, na ɔkãa dɛ, “O, ɔyɛ fɛw ai. Ha nye bea a nkorɔfo bɛgye hɔn ahom wɔ hɔn temple akwantu no mu.

“… Ɔbɛyɛ dɛ onnyim nkitahodzi akwantsen a ɔda enye Nyankopɔn ridzi ahyɛmu wɔ temple mu na Agyenkwa n’anohoba mapã no ntamu dɛ:

“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.

“Hom mfa mo kɔndua no nto hom do, na hom nsũa me; … na hom benya ahomgye ama hom akra.

“’Na mo kɔndua yɛ mberɛw, na m’adzesoa yɛ har’ [Matthew 11:28–30; woetsĩ mu akã ho].”

“Nyimpa Ba no nnyi mbrɛ ɔdze ne tsir to,” nanso Ɔtoo nsa frɛɛ N’esuafo, emi na ɔwo, baa sacrament pon no ho dɛ yɛnye no mbenya ahomgye wɔ hɔ. Sɛ “ahobrɛadzefo bu ntwɛr wɔ afɔrmbukyia ho” a, asomdwee bu do. Hɛn Agyenkwa atserɛw n’abasa mu; Ɔato No pon no. Bra bɔsom Nyame ne Ba no wɔ N’afɔrmbukyia krɔnkrɔn no ho. Wɔ Jesus Christ ne dzin mu, amen.