Wɔyɛ Hɔnara Hɔn Atsɛmbuafo
Sɛ yɛdze gyedzi wɔ Jesus Christ mu edzi dwuma, yɛnye Nyankopɔn edzi ahyɛmu na yeesie, na yeenu hɛnho efi hɛn bɔn ho—nkyii, asɛndzipon no bɛyɛ enyigye.
Mormon Nwoma no dze nkenyan nsato a ofi Moroni hɔ wie dɛ “[yɛmbra] Christ hɔ,” “[yendzi] mu wɔ No mu,” “[yɛmpow] dza ɔnnyɛ Nyame su nyina,” na “[yɛmfa] [hɛn] ahom nye [hɛn] adwen na [hɛn] ahoɔdzen nyina [ndɔ] Nyankopɔn.” Enyigye mu ara, asɛntɔw a odzi ewiei wɔ ne nkyerɛkyerɛ mu no enyi da Wusoɛr na Atsɛmbu a Odzi Ewiei no ebien no nyina do.
“Ɔrennkyɛr na makɔhom wɔ Nyankopɔn ne paradise no mu ekodu dɛ mo sunsum nye me nyimpadua bɛsan akã abɔmu ayɛ kor, na wɔdze me afa wimu konyimdzi mu, ma menye hom ebehyia wɔ Jehovah kokroko, Onnyiewiei Ɔtsɛmbuafo no a obu enyikamfo nye ewufo atsɛn no n’enyigye asɛndzipon no enyim.”
Ɔyɛ me nwanwa dɛ Moroni dze kasafua “enyigye” bɛkã Atsɛmbu a Odzi Ewiei ho asɛm. Mormon Nwoma mu nkɔnhyɛfo binom no kã Atsɛmbu no ho asɛm dɛmara dɛ “enyimnyam da” na dɛ ɔsɛ dɛ “[yɛdze] gyedzi enyi hwɛ [no kwan].” Naaso ɔtaa dɛ ber a yɛhwɛ Atsɛmbu Da kwan no, nkɔnhyɛfo binom dza wɔakã afa ho na ɔba adwen mu, tse dɛ “enyimguase nye afɔdzi kɛse,“ “hu kɛse na suro,” na “awerɛhow a onnyi ewiei.”
Megye dzi dɛ nsɛm a wɔnnsɛ yinom no kyerɛ dɛ Christ nkyerɛkyerɛ no maa Moroni na nkɔnhyɛfo nkaa no enyi daa dɛm da kɛse no do wɔ enyigye na enyidado kwan do kyɛn hu no a wɔdze bɔɔ hɔn a wɔnnyɛɛ sunsum mu ahoboaboa no kɔkɔ no. Ebɛnadze na Moroni tse ase a ohia dɛ emi na ɔwo yesũa?
Mobɔ mpaa hwehwɛ Sunsum Krɔnkrɔn no mboa ber a yesusu Ɔsor Egya n’enyigye na ehumbɔbɔr nhyehyɛɛ no, Agyenkwa no werdambɔ dwuma wɔ Egya ne nhyehyɛɛ mu, na mbrɛ “[hɛn mu biara] bobu [hɛnara hɛn] bɔn ho nkotaa wɔ atsɛmbu da no mu.”
Egya no n’Enyigye ho Nhyehyɛɛ
Egya no ne nhyehyɛɛ no botae tsitsir nye dɛ Ɔbɛma No sunsum mu mba kwan ma woenya nyimpadua, woehu “papa na bɔn” woedua ɔnnkyebo abrabɔ sũahu mu, enyin sunsum mu, na woetu mpon afebɔɔ.
Dza Nkyerɛkyerɛ na Ahyɛmudzi no frɛ no “pɛ su” yɛ adze tsitsir wɔ Nyankopɔn ne nhyehyɛɛ mu dɛ Ɔdze Ne mbabanyin na mbabaa hɔn bɛkyebo na onnyiewiei nkwa bɔbɔ adze. Nkyerɛkyerɛ yi a ohia kɛse yi wɔkã ho asɛm wɔ kyerɛwsɛm mu dɛ nyimpa ne pɛ na fahodzi dɛ ebɛsan mu eyi na ayɛ biribi.
Asɛmfua “pɛ su” n’asekyerɛ mu dɔ. Nsɛmfua binom ma ”su” nye “papa,” “nokwardzi,” na “ɔbra pa” kã ho. Nsɛmfua binom ma ”pɛ” nye ”nyɛe,” “dwumadzi,” na “edwumayɛ.” Dɛm ntsi, yebotum atse “pɛ su” ase dɛ kwan na ndzinoa a yɛdze san mu fa na yɛdze yɛ biribi ma hɛnho wɔ akwan horow a ɔyɛ papa, nokwardzi, ɔbra pa, na nokwar do.
Nyankopɔn n’abɔdze nyina no “ndzɛmba a ɔyɛ biribi na ndzɛmba a wodua do yɛ biribi” kã ho. Na pɛ su yɛ “tum a yɛdze gyina hɛn anan do yɛ biribi” a ɔsor wenee na ɔma hɛn tum dɛ Nyame ne mba ma hɛnara yɛyɛ biribi na yɛnnyɛ adze bi a wodua hɛn do yɛ biribi ara.
Wɔbɔɔ asaase yi dɛ bea a Ɔsor Egya ne mba no wobotum asɔ hɔn ahwɛ dɛ sɛ “wɔbɔyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no.” Wiadze no Mbɔe na hɛn asetsena wɔ ɔnnkyebo abrabɔ yi mu no botae tsitsir nye dɛ ɔbɛma hɛn kwan ma yɛayɛ biribi na yɛabɛyɛ dza Ewuradze to nsa frɛ hɛn dɛ yɛmbɛyɛ no.
Ewuradze kyerɛkyerɛɛ Enoch dɛ:
“Hwɛ w’enuanom yinom; wɔyɛ mankasa me nsaano edwindze, na medze hɔn nyimdzee maa hɔn, wɔ da a mobɔɔ hɔn no no mu; na Eden Ture no mu, na medze nyimpa ne pɛ maa no;
“Na w’enuanom no mase hɔn, na mama hɔn mbrasɛm so, dɛ wɔndodɔ hɔnho nkorkor, na dɛ wɔnyɛ setsie mma emi, hɔn Egya.”
Botae tsitsir are yɛdze nyimpa ne pɛ dzi dwuma nye yɛbɔdodɔ hɛnho nkorkor na yɛbɛsan mu ayɛ setsie ama Nyankopɔn. Na botae ebien yinom nye mbrasɛm akɛse a odzi kan na ma otsĩa ebien dɛ yɛdze hɛn nkoma nyina, hɛn kra na hɛn adwen nyina bɔdɔ Nyankopɔn na yɛadɔ hɛn nyɛnko dɛ hɛnara hɛnho no nam papaapa.
Hom nsusu dɛ wɔahyɛ hɛn—nnyɛ dɛ wotu hɛn fo ara mbom wɔahyɛ hɛn—dɛ yɛmfa hɛn pɛ ndodɔ hɛnho nkorkor na yɛnsan mu nyɛ setsie mma Nyankopɔn. Munsusu dɛ wɔ kyerɛwsɛm no mu no, kasafua “su” a ɔkã ho no nnyɛ dzin tamsi ara, mbom bia ɔyɛ ahyɛdze a ofi sor a ɔkyerɛ hɛn mbrɛ yɛmfa hɛn pɛ ndzi dwuma.
Ndwom bi a yenyim, wɔato ne dzin “Choose the Right” ɔnam siantsir bi ntsi. Wɔammfa pɛ su enhyira hɛn dɛ yɛmfa nyɛ biribiara a yɛpɛ ber biara a yɛpɛ. Mbom, ɔnam Egya ne nhyehyɛɛ do no, yenya pɛ su dɛ yɛmfa nhwehwɛ onnyiewiei nokwar na yɛnyɛ ho edwuma. Osiandɛ “[yɛyɛ dza hɛnankasa yɛpɛ]” ntsi, “ɔsɛ dɛ yɛdze enyimpi yɛ adzepa, na ”[yɛdze hɛnankasa hɛn] pɛ yɛ ndzɛmba pii, ama [yeetum] ada ndzeyɛtsenenee pii edzi.”
Pɛ su ho onnyiewiei hia a ohia no wɔada no edzi wɔ kyerɛwsɛm mu nsɛm a ɔfa baguabɔ a ansaana yɛreba asaase ho. Lucifer tseew etua tsiaa Egya ne nhyehyɛɛ ma Ne mba na ɔhwehwɛɛ dɛ ɔbɛsɛɛ fahodzi ho tum a wɔdze yɛ biribi. Ɔyɛ adze tsitsir dɛ, abɔnsam dze n’etuatsew no tsiim pɛ su nkyerɛkyerɛ no do.
Nyame kyerɛkyerɛɛ mu dɛ, “ Dɛm ntsi, osiandɛ … Satan no tseew etua wɔ mo do no, na ɔpɛɛ dɛ ɔsɛɛ nyimpa ne pɛ no, … Memaa wɔtoow no kyeen famu.”
Otsiafo no ne pɛsɛankonya nhyehyɛɛ bɔn no nye obotwa tum a Nyankopɔn ne mba botum “ayɛ dza hɔnankasa wɔpɛ” na wobotum ayɛ biribi wɔ tseneneeyɛ mu do. No botae nye dɛ ɔbɛma Ɔsor Egya ne mba abɛyɛ dza wobotum edua hɔn mu ayɛ biribi nko.
Yɛreyɛ na Yɛrebɛyɛ
President Dallin H. Oaks etsĩ mu akã dɛ Jesus Christ asɛmpa no to nsa frɛ hɛn dɛ yembohu biribi na yendua pɛ su ne tsenenee dwumadzi do yɛmbɛyɛ biribi. Ɔsee dɛ:
“Bible na ndɛ mber yi kyerɛwsɛm pii kã atsɛmbu a odzi ewiei ho asɛm a nyimpa nyina benya akatua dɛ mbrɛ hɔn ndwuma anaa hɔn akoma mu apɛdze tse. Mbom kyerɛwsɛm binom so kyerɛ iyi mu dɛ wobobua hɛn atsɛn wɔ gyinabew a yegyina mu.
”Nkɔnhyɛnyi Nephi kã Atsɛmbu a Odzi Ewiei ho asɛm wɔ mbrɛ yɛabɛyɛ do: ’Na sɛ hɔn ndwuma yɛ efĩfĩdze a hɔn so bɛyɛ fĩ; na sɛ wɔyɛ fĩ a nna worunntum nntsena Nyankopɔn n’ahenman no mu’ (1 Nephi 15:33; woetsĩ mu akã ho). Moroni paa mu kã dɛ, ‘Nyimpa a ɔyɛ fĩ no bɛda ho ayɛ fĩ; na nyia ɔyɛ tseneneenyi no so bɛda ho ayɛ tseneneenyi’ [Mormon 9:14; woetsĩ mu akã ho].”
President Oaks sɔɔw do: “Fi nkyerɛkyerɛ a ɔtse dɛm mu no yesi gyinae dɛ Atsɛmbu a Odzi Ewiei no nnyɛ hɛn ndzeyɛɛ pa na ndzeyɛɛ bɔn ho nkontaabu ara—dza yɛayɛ no. Ɔyɛ hɛn ndzeyɛɛ na adwendwen no ho nsunsuando a woebodwir hɛn—onyia yɛaba abɛyɛ no.”
Agyenkwa no No Werdambɔ
Hɛn ndwuma na apɛdze nko nngye na onnkotum agye hɛn nkwa. “Dza yebotum ayɛ nyinara ekyir no,” yɛnye Nyankopɔn bɛkã abɔmu a gyedɛ yedua ehumbɔbɔr na adom a ɔwɔ hɔ ɔnam Agyenkwa no werdam afɔrbɔ a ɔmmbɔ adze na onnyiewiei no nko do.
Alma kãa dɛ, “Hom nhyɛ ase ngye Nyankopɔn ne Ba no ndzi, ama ɔaaba abɔpon no nkorɔfo, na ɔbɛba ebohu amandze na oewu dze noho abɔ werdam etua hɔn bɔn; na dɛ ɔbɔsoɛr bio efi owu mu a ɔbɛma owusoɛr aba, ama adasa nyina aaba ebegyina n’enyim, ma oebu hɔn atsɛn dɛ mbrɛ hɔn ndwuma tse wɔ atsɛmbu da a odzi ewiei no mu.”
“Yɛgye dzi dɛ ɔnam Christ No Werdambɔ do adasamba nyinara botum enya nkwa, ber a wɔyɛ setsie ma mbra no na Asɛmpa n’ayɛdze no.” Mbrɛ ɔsɛ dɛ ɔyɛ hɛn enyisɔ dɛ hɛn bɔn ahorow na emumuyɛdze no rinngyina dɛ dasegye nntsia hɛn sɛ nokwar mu ara “wɔwo hɛn fofor,” yɛdze gyedzi wɔ Pomfo no mu dzi dwuma, yɛdze “akoma a no mu tsew” na “nokwardzi“ nu hɛnho, na “[yetsim] kodu ewiei”.
Nyankopɔn ho Suro
Bia hɛn mu dodowara bɔwɔ enyidado dɛ yɛbɛba ebegyina Onnyiewiei Ɔtsɛmbuafo ne asɛndzipon no enyim no bɛyɛ tse dɛ dza ɔkɔ do wɔ wiadze asɛndzii bea. Ɔtsɛmbuafo bɔhwɛ do. Wɔdze adanse bɔto gua. Wobobua asɛm no. Na mbrɛ ɔtse biara no yennkohu dza ɔbɛba na suro bɛkye hɛn ber a yɛrotweɔn dza ɔbɛba no. Mbom megye dzi dɛ dza wɔakyerɛ yi nnyɛ nokwar.
Ɔsor suro a yɛtse no honandua mu mbom ɔsɛ dza kyerɛwsɛm kã ho asɛm dɛ “Nyankopɔn ho hu mu” anaa “Ewuradze ho suro.” Ɔnntse dɛ honandua mu suro a ɔdze akomatu na haw ba no, Nyankopɔn ho hu dze asomdwee, taduasi, na awerɛhyɛmu ba hɛn abrabɔ mu.
Tsenenee suro yɛ obu na enyidze kɛse ho atsenka ma Ewuradze Jesus Christ, setsie ma Ne mbrasɛm, na enyidakwan ma Atsɛmbu a Odzi Ewiei, na pɛrpɛrdzi wɔ Ne nsamu. Nyankopɔn ho suro fi Ewuradze Jesus Christ no su krɔnkrɔn na no ndwuma ho ntseasee mapã mu ba, nye kradoyɛ a yɛdze gyaa hɛn pɛ mu ma Ne pɛ, nye nyimdzee dɛ nyimpa biara bobu ɔnoara no honandua mu apɛdze, adwendwen, nsɛnkãa, na ndzeyɛɛ ho nkontaa wɔ Atsɛmbu Da no mu.
Ewuradze ho suro nnyɛ akomatu wɔ ereba N’enyim ma Oebu wo atsɛn ho ahotwetwe. Mbom, ɔyɛ adwen no dɛ ewiei no yebohu ndzɛmba a ɔfa hɛnho dɛ mbrɛ “wɔtse pɛpɛɛpɛr” na “mbrɛ wɔbɛtse.”
Nyimpa biara a ɔatsena ase, ɔtse ase sesei, na ɔbɛtsena ase wɔ asaase do no “wɔdze [no] bɛba ebegyina Nyankopɔn asɛndzipon enyim, ma woebu no atsɛn dɛ mbrɛ no ndwuma tse, dɛ oye anaa dɛ omuo no”
Sɛ hɛn apɛdze ayɛ tseneneeyɛ na hɛn ndwuma ayɛ papa a,—ɔkyerɛ dɛ yɛdze gyedzi wɔ Jesus Christ mu edzi dwuma, yɛnye Nyankopɔn edzi ahyɛmu na yeesie, na yeenu hɛnho efi hɛn bɔn ho—nkyii, asɛndzipon no bɛyɛ enyigye. Dɛ mbrɛ Enos paa mu kãa no, “yebegyina [Pomfo] no enyim; na [yɛdze] enyigye bɔhwɛ n’enyim.” Na da a odzi ewiei no wɔdze “tseenenee botua [hɛn] kaw.”
Naaso, sɛ yɛapɛ bɔn na hɛn ndwuma ayɛ emumuyɛ a, afei asɛndzipon no bɔbɔ hɛn hu. Yebenya “nyimdzee a odzi mu,” a “yɛbɛkaa hɛn afɔdzi nyinara pefee,” na “[yeehu hɛnankasa hɛn] afɔdzi.” “Yerunntum mma hɛn tsir do nnhwɛ hɛn Nyankopɔn; na nkyɛ yɛbɛpɛ dɛ yebotum ase abotan na mbepɔw dɛ wontutu mobɔhwehwe hɛn do mfa hɛn nsuma mfi Nyankopɔn enyim.” Na da a odzi ewiei no “yebenya [hɛn] akatua a omuo.”
Ewiei no, nkyii yɛyɛ hɛnankasa hɛn atsɛmbuafo. Onnkehia dɛ obiara bɛkã beebi a yɛbɔkɔ akyerɛ hɛn. Ewuradze n’enyim no, yɛbɛgye dza yɛasan mu eyi dɛ yɛbɛyɛ no wɔ honandua asetsena mu no ato mu na yebohu ama hɛnho bea a ɔsɛ dɛ yɛtsena daapem.
Anohoba na Dasegye
Yerinya ntseasee dɛ Atsɛmbu a Odzi Ewiei no botum ayɛ enyigye no nnyɛ nhyira a wɔdze esie ama Moroni nko.
Alma kãa nhyira a wɔabɔ ho anohoba a ɔwɔ hɔ ma Agyenkwa no n’osuanyi biara a oetu no ho esi hɔ no: Ɔsee dɛ:
“Kasafua nsanananmu no n’ase nye dɛ wɔbɛma bɔn abɛyɛ bɔn bio; anaa honam su abɛyɛ honam su; anaa mbɔnsamdze abɛyɛ mbɔnsamdze; papayɛ abɛyɛ papayɛ; tseneneeyɛ abɛyɛ tseneneeyɛ; pɛrpɛrdzi abɛyɛ pɛrpɛrdzi; mbɔbɔrhu abɛyɛ mbɔbɔrhu bio.
“… Dzi pɛrpɛr, bu atsɛntsenenee, na yɛ papa daa nyina; na sɛ eyɛ iyinom nyina a nna wo nsa bɛkã w’akatua; nyew, na wɔdze ehumbɔbɔr bɛsan ama wo bio; wɔdze pɛrpɛrdzi bɛsan ama wo bio; na wɔdze tsenenee atsɛmbu bɛsan ama wo bio; na wɔdze papa botua wo kaw.”
Megye dase enyigye mu ara dɛ Jesus Christ nye hɛn Agyenkwa tseasefo. Alma n’anohoba no yɛ nokwar na ɔfa emi na ɔwo ho—ndɛ, ɔkyena, na daapem nyina. Medzi ho dase wɔ Ewuradze Jesus Christ ne dzin krɔnkrɔn no mu, amen.