Resèt Bòn Nouvèl la

Si ou te janm vizite Louisiana eta kote m ap viv la, ou pwobableman familye avèk anpil nan bon manje nou yo—gumbo, jambalaya, étouffée, epi lis la ka kontinye toujou.

Detanzantan, mwen konn santi m brav ase pou m kuit youn nan resèt bongou sa yo. Etap final ki pa dokimante a apre melanje tout engredyan yo epi suiv tout enstriksyon detaye yo se fè dènye goute a pou wè si gen kèk bagay ki manke. Nan pwen sa a, m ka tande lejand kuizin Kreyòl yo k ap mimire nan zorèy mwen, “Mete plis Tony‘s ladann.” Tony‘s se yon epis kreyòl ki fèt nan Opelousas, Louisiana, vil natal mwen. Nou souvan itilize li kòm “engredyan sekrè” a pou konpanse enpèfeksyon ki te fèt nan suiv resèt la.

Madanm mwen, Michelle, ak mwen te gen onè sèvi antanke dirijan misyon nan Louisiana. Nou te gen yon tradisyon pou anseye misyonè yo kijan pou kuit resèt jambalaya espesyal li a nan dènye sware yo nan kay misyon an anvan yo retounen al jwenn fanmi yo. Ajoute a temwayaj yo sou levanjil retabli Jezikri a, misyonè nou yo te kite misyon an avèk yon apresyasyon pou resèt yo.

Sa gen kèk mwa, m t ap navige nan Libreri Medyatèk Legliz la epi mwen te wè yon lyen pou yon koleksyon tibout videyo ki rele Restoration Conversations with Prezident Russell M. Nelson [Konvèsasyon sou Retablisman yo avèk Prezidan Russell M. Nelson] an. Tit youn nan tibout videyo yo nan lis la te kapte atansyon mwen epi fè m souri. Li te rele “Scriptures Are God‘s Recipes for Happy Living [Ekriti yo se Resèt Bondye pou Viv ak Kè Kontan].” M te imedyatman klike sou tibout videyo de-minit sa a epi gade Prezidan Nelson k ap anseye yon gwoup timoun Primè yon mesaj senp ak puisan sou kijan pou nou gen kè kontan. Li te anseye: “Si w ap fè yon gato, ou suiv enstriksyon yo, pa vre? Epi w ap jwenn bon rezilta chak fwa, pa vre?

Li te kontinye, an palan de limenm ki avan lontan pral genyen 95 ane: “Moun di, ‘Kisa w manje? Ki sekrè ou?‘” Li te reponn, “Sekrè a rele ekriti yo. Ou gendwa li yo epi eseye yo.”

Ebyen, nou jwenn repons la. Sekrè senp pou nou viv ak kè kontan an se jis suiv resèt Bondye a jan li detaye nan ekriti yo. Mwen rele li “Resèt Bòn Nouvèl la.”

Kisa w fè si yon bagay mal pase lè w ap suiv yon resèt? Ebyen, andedan Resèt Bòn Nouvèl la w ap jwenn yon “engredyan sekrè” pou asire ke ou toujou fè bagay yo byen alafen. Repons la se toujou Jezikri.

Mwen kwè nou tout gen moman kote nou santi engredyan nou yo pa bon ase, oubyen nou gen difikilte pou n suiv direksyon yo, oubyen petèt nou fè yon bagay nan move lòd la, oswa yon bagay rive ki pa sou kontwòl nou, eksetera.

Kisa remèd la ye? Se tou senpleman ajoute plis nan sa ki envite Jezikri nan lavi nou.

Alò, kisa li ta ka sanble pou ajoute plis Jezikri nan lavi nou?

Pandan m t ap sèvi kòm prezidan misyon, mwen te gen plezi pou m te rankontre pèsonèlman avèk chak nan jèn misyonè nou yo chak sis semèn. Nan reyinyon fas-a-fas sa yo, li te kouran pou misyonè yo chèche gidans sou fason pou yo te amelyore efikasite yo kòm konpayon.

Nan yon okazyon, yon misyonè te vini nan entrevi pèsonèl li a, epi li te chita. Mwen te remake apati langaj kòporèl li ke te gen yon bagay ki t ap peze lou nan lespri li. Mwen te mande li, “Èldè, de kisa w ta renmen pale jodia?” Li te kòmanse dekri kèk nan pwoblèm yo li t ap rankontre avèk konpanyon li ak kijan sa t ap afekte abilite pou fè travay misyonè a. Ak dlo nan je, li te gade m epi mande, “Prezidan, kisa m ta dwe fè?

Nan moman sa a, mwen onètman pa t konnen kijan pou m reponn. Apre yon ti tan, mwen te mande li si li te ok pou nou mete ajenou ansanm nan lapriyè pou gidans Lespri a. Li te dakò, epi nou te ajenou ansanm epi priye pou enspirasyon.

Aprè priyè a, nou te kontinye rete ajenou pou yon ti tan epi apresa nou te chita sou chèz nou youn anfas lòt. Mwen te mande si nou te kapab li yon ekriti ansanm. Lè nou te ouvri ekriti nou yo, mwen te fè yon ti pòz epi di li, “Èldè, pandan n ap li ekriti sa a, tanpri poze tèt ou kesyon sa a: Si m aplike atribi sa yo, èske sa ap amelyore m kòm konpayon epi travay misyonè nou?”

Apresa, nou te ouvri Mowoni 7:45 epi li awotvwa: “Epi charite gen pasyans, li janti, li pa gen anvi, li pa chaje avèk lògèy, li pa chèche enterè pa l, li pa fache fasil, li pa panse mal, li pa pran plèzi nan inikite, men, li pran plèzi nan verite, li sipòte tout bagay, li kwè tout bagay, li espere tout bagay, li andire nan tout bagay.”

Èldè a te leve gade m avèk dlo nan je li epi di, “Wi prezidan, men sa difisil pou fè.” Mwen te dakò epi raple li ke li se yon pitit gason Bondye, avèk yon potansyèl diven pou l fè sa ansanm avèk Senyè a.

Apresa nou te pale de parabòl pant Èldè Clark G. Gilbert la nan Swasanndis yo te anseye a, ki te raple nou ke nou dwe derape kote nou ye a epi, ansanm avèk Senyè a, nou va avanse ak pwogrese nan yon direksyon pozitif. Mwen te remake ke li te toujou santi l depase pa pwochen etap yo, konsa, mwen te mande l pou l dekri sa li konprann nan ekriti ki di “avèk ti bagay senp yo, gwo bagay rive fèt” la. Li te kòmanse dekri konsèp ki di lè nou fè ti bagay ki senp, gwo bagay kapab rive a. Mwen te mande l pou l pran yon minit pou idantifye de bagay piti ak senp li te kapab fè pou l te janti avèk konpanyon li.

Apre kèk moman, li te pataje panse li yo. Apresa, mwen te mande l pou l pran yon minit pou idantifye de bagay piti ak senp li te kapab fè pou l te gen pasyans avèk konpayon li. Li te preske pataje de panse l yo imedyatman. Li te klè ke li te deja ap panse sou sa anvan reyinyon nou an. Mwen te envite l pou l te pote pwen sa yo devan Bondye nan lapriyè epi pou l mande konfimasyon, direksyon, ak enspirasyon sou kijan pou l egzekite plan l lan avèk entansyon reyèl. Li te dakò. Pandan nou t ap fini, mwen te mande l pou l bay yon brèf mizajou nan lèt li chak semèn nan.

Amezi semèn yo t ap pase, mwen te kapab konstate kijan bagay yo t ap amelyore. Men, non sèlman mwen te kapab wè amelyorasyon nan lèt chak semèn li yo, men mwen te ka wè sa tou nan lèt konpayon l yo chak semèn. Nan pwochen reyinyon nou fas-a-fas, mwen te wè yon diferans tankou jou-ak-nuit nan figi l ak nan lespri li. Mwen te mande l, “Ebyen, Èldè, èske se vre charite pa janm peri?” Li te reponn avèk yon gwo souri: “Wi, epi avèk bagay senp, gwo bagay rive fèt.”

Pandan n ap suiv Resèt Bòn Nouvèl pou viv ak kè kontan an, sonje ansèyman Prezidan Nelson an: “Kèlkeswa kesyon oswa pwoblèm nou genyen, n ap toujou jwenn repons la nan lavi ak ansèyman Jezikri yo.” Aprann plis konsènan Ekspyasyon Li, lanmou Li, mizèrikòd Li, doktrin Li a, ak levanjil gerizon ak pwogresyon retabli Li a. Vire jwenn Li! Suiv Li!”

Lè w bezwen “tande Li” epi konnen kijan pou w envite Jezikri nan lavi ou, konsidere suiv etap Prezidan Nelson te anseye nou konsènan revelasyon pèsonèl yo:

“Chèche yon kote trankil kote w ka ale regilyèman. Bese w devan Bondye. Devèse kè w bay Pè Selès ou a. Vire jwenn Li pou repons ak rekonfò.

“Priye nan non Jezikri konsènan sousi ou yo, krent ou yo, feblès ou yo—wi, menm pou aspirasyon yo nan kè ou. Epi apresa koute! Ekri panse yo ki vin nan lespri ou. Anrejistre santiman ou yo epi fè suivi sou aksyon ou enspire pou w fè yo. Pandan w ap repete pwosesis sa a jou aprè jou, mwa aprè mwa, ane aprè ane, w ap ‘pwogrese nan prensip revelasyon an.’”

Mwen temwaye ke Jezikri se Sovè ak Redanmtè nou. Li te “akonpli tout bagay nou bezwen pou nou kapab retounen al jwenn Pè Selès [nou an]. Nan non Jezikri, amèn.