Lanmou Ekspyatwa Jezikri a

Si ou te komèt peche grav epi ou nan pwosesis repantans la oswa genyen dezi pou w repanti konplètman epi santi lajwa endeskriptib padon an, tanpri konnen ke mirak sa a ap tann ou. Sovè a kontinye ap rele, “Vini jwenn mwen.”

Fòtifye lafwa nan Sovè nou, Jezikri, pral vivifye dezi nan nanm nou pou nou konnen Li, kwè nan Li, epi lage kè nou ba Li. Enòs te poze kesyon konsènan padon an pou tèt pa li: “Senyè, kijan sa fèt?” Senyè a te reponn, “Poutèt lafwa w nan Kris la, ou pa t janm tande oubyen wè anvan sa.”

Epi Mowoni te ajoute, “Si nou debarase kò nou anba tout endiyite, e si nou renmen Bondye avèk tout pouvwa nou, panse nou, ak fòs nou, lèsa a gras li ap ase pou nou.”

Vire do bay peche, vire jwenn Bondye, ak fòtifye lafwa nou nan Jezikri se yon bèl kòmansman. Soumèt volonte w enbleman devan Bondye enkli rekonèt peche grav yo devan evèk oswa prezidan branch ou, men padon konplè ou ap vini de Sovè a. Padon se yon kado diven ki ofri atravè gras nan Jezikri.

Yon dezi pou vrèman retounen jwenn Bondye akonpaye pa detèminasyon pou rete konplètman onèt avèk Pè Selès ou a, avèk moun ou te blese yo, epi avèk dirijan prètriz ou. Bondye konnen panse ak entansyon ki nan kè w epi Li rejwi devan gwo dezi ou genyen pou w vin jwenn Li avèk yon kè brize ak yon espri kontri a. Yon espri kontri se remèt tèt ou enbleman nan men Bondye; yon kè brize pote sa Apot Pòl dekri kòm “tristès selon Bondye,” gwo dezi nan nanm nou pou n retounen al jwenn Li kèlkeswa pri a.

Gwo aspirasyon w yo mennen w nan vle repare sa w te kraze. Men, lè w reyalize ke gen kèk bagay ou pa gen pouvwa pou w repare, ou dwe priye avèk fèvè pou ke Senyè a, atravè lagras Li, ede geri moun ki te blese kòm konsekans aksyon w yo.

Ramifikasyon peche grav yo sou lòt moun souvan douloure epi difisil pou simonte. Èske efò w ap suiv egzanp pitit gason Mozya yo, ki te “eseye avèk gwo efò pou repare tout tò yo te fè yo?” Pale avèk moun ou gen respè pou yo konsènan sa ou gendwa pa reyalize.

Pandan m t ap prepare diskou sa a, mwen te resevwa yon imél inatandi ki soti de yon moun ki nan pwosesis repentans la ak dezi pou l retounen nan Legliz la. Ansyen madanm li toujou ap soufri dèske yo te pèdi “maryaj etènèl [yo] a, pou [difikilte avèk timoun yo], yo te pèdi sekirite finansyè, … ke yo [pa] preske kapab kouvri depans yo, [epi] emosyon entans kòm viktim yon trayizon.”

Li te pataje avèk mwen kijan dirijan prètriz li “te santi enpresyon pou yo te [mande li] pou l konsidere nan lapriyè kisa [li ta ka fè anplis pou ansyen madanm li ak pitit li yo].” Avèk pèmisyon li m ap pataje yon pati nan imél li a:

“Mwen [dabò] te panse [lajan] m te oblije bay selon dekrè divòs la te plis ke jenere, men prezidan branch mwen te ankouraje m pou m te jene ak priye konsènan sa. …

“Odepa, m pa t alèz avèk ide pou m te fè plis restitisyon an. Puiske peche m yo pa t finansye, mwen t ap mande m kisa ‘restitisyon plen jenewozite’ te vrèman vledi … [men] mwen te tousuit reyalize se pa t pou lajan an.

“Dirijan prètriz mwen yo te rankontre avèk [ansyen madanm mwen] ak timoun mwen yo epi yo te reyalize ke yo te toujou nan difikilte epi yo pa t geri. …

“Nouvo objektif mwen sete pou m te kontinye pwogrese nan lafwa. … Mwen te senpleman eksprime dezi m pou te ede san atann anyen an retou. … Mwen te deside [voye bay ansyen madanm mwen yon montan spesifik] sou chak chèk m te touche, ki te yon gwo pòsyon nan lajan apre taks mwen. Jis avan m te fè premye peman an, Senyè a [te fè l klè nan lespri m ke m te bezwen] peye defwa montan an].

“Mwen aprann ke restitisyon pa jis gen pou wè ak lajan. Sa li ye vrèman se konsakre lavi m enbleman pou Senyè a. … Lajan an se pou ede ranplase sa mwen te retire nan men fanmi mwen akoz move chwa mwen yo. Li gen pou wè avèk fè ak kenbe pwomès san atann anyen an retou epi ede li pa fè sousi konsènan bòdwo yo ankò pou li ka chèche jwenn Lespri a.”

Efò ou yo pou restore sa ou te kraze gendwa pa gen anyen pou wè avèk lajan, men lè ou sipliye Senyè a enbleman, ou gendwa wè gen plis bagay ou ka fè.

Lè ou remèt tout kè w bay Senyè a nan chèche padon Li, rete pasyan pandan w ap tann apwobasyon konplè Li. Konsidere ekriti sa a:

“Yo te imilye tèt yo jouk nan fon imilite; e yo te kriye anpil bay Bondye; wi, yo te kriye tout lajounen. … [Men] Senyè a te pran tan pou l tande kriye yo poutèt inikite yo.”

“Men Senyè a te tande kriye yo, e Li te kòmanse … fè chay yo pi lejè; … epi … yo te kòmanse pwospere gradyèlman.”

Rete pasyan, pandan Senyè a ap ba ou benediksyon ak apwobasyon Li gradyèlman.

Nan lè Senyè a fikse, ou pral santi vwa Li k ap di ou, “Pa kite bagay sa yo annwiye w ankò.” Yon jou, pandan w ap kontinye vin jwenn Sovè a, Pè Selès ou a pral retire “remò nan kè [w], pa mwayen merit Pitit Gason Li a.”

Pou ou menm ki te enjisteman blese akoz peche grav yon lòt moun, mwen vle pataje lanmou ak konpasyon Sovè a, rekonfò ak lapè Li.

Tristès ou te santi a, chagren an, pèt la, emosyon entans kòm viktim yon trayizon an, chanjman nan lavi w ki kontrè avèk jan w te imajine l la—Mwen ba ou asirans absoli mwen, Sovè a konnen ou epi Li renmen ou. Lonje lamen ba Li. Li pral vin konsolatè ak fòs ou; Li pral voye zanj Li yo pou soutni w. Kilè doulè w yo pral disparèt, chagren w yo apeze, souvni endezirab yo efase? Mwen pa konnen. Men sa a mwen konnen: Li gen pouvwa pou L konpanse pèt ou yo epi ranplase sann soufrans ou yo ak bagay plezan.

Frè ak sè byenneme nou yo nan Grand Blanc, Michigan, avèk lafwa endontab yo nan Jezikri, avèk kouraj ak altriiyis yo, te resevwa epi pral, nan semèn ak mwa k ap vini yo, resevwa an abondans lanmou ak gras enkonparab Sovè a.

Pandan ou kontinye mete konfyans ou nan Li, nyaj obskirite yo ak sanglo angwas lannuit ou yo pral transfòme an kaskad dlo je lajwa ak lapè lè limyè devanjou klere. Lapenn nou pral tounen kè kontan. … Pesonn p ap ka wete kontantman sa a nan kè nou.” Moman sa a pral rive. Mwen temwaye ke l ap rive.

Nou kapab jwenn lanmou ekspyatwa Jezikri a nan sitiyasyon ki pi difisil yo, men nou tout toujou bezwen lagras ekspyatwa Sovè nou an. Prezidan Dallin H. Oaks te anseye: “Gras ak Sakrifis Ekspyatwa L la nan mòtalite a, Sovè nou an kapab konsole, geri, ak fòtifye tout gason ak tout fi toupatou, men mwen kwè l ap fè sa sèlman pou moun k ap chèche Li e ki mande èd Li. Apot Jak te anseye, ‘Desann nou devan Bondye, Bondye va leve nou’ (Jak 4:10). Nou kalifye pou benediksyon sa a lè nou kwè nan Li e nou priye pou n jwenn èd Li.”

Mwen te resevwa pèmisyon de bon zanmi mwen ak Otorite Jeneral emerit, Eldè Robert E. Wells, ki gen 97 ane kounyea, pou m pataje eksperyans li ki gen plis pase 60 ane:

Pandan l t ap viv nan Paraguay an 1960 epi anplwaye kòm yon bankye entènasyonal, Robert Wells, laj 32 ane lèsa a, ak madanm li, Meryl, t ap pilote de avyon diferan, ki t ap vole tounen lakay yo soti Uruguay pou ale Paraguay. Anfas gwo nyaj epè, Robert ak Meryl te pèdi kontak vizyèl ak kontak radyo youn avèk lòt. Robert te ateri rapidman, kote li te aprann ke avyon madanm ni an te kraze. Ni madam li ni de zanmi yo ki te nan vòl avèk li a pa t sove. Pitit li yo, lakay yo nan Asunción, te gen laj sèt, senk ak de zan.

Eldè Wells te pale de chagren li:

“Pawòl pa p janm sifi pou eksprime doulè ki t ap wonje andedan m nan, ki te redui kapasite pou m panse ak reflechi klèman. Mwen te tou senpleman pa t ka sispann kriye. Pou rann bagay yo pi difisil, pandan lespri m t ap eseye dijere reyalite dechiran lanmò madanm mwen an, m te vin kòmanse santi kilpabilite ekstrèm ke mwen te responsab pou aksidan an.”

Robert te repwoche tèt li paske li pa t fè enspeksyon pi apwofondi nan avyon an epi paske li pa t bay madanm li enstriksyon adekwat sou zouti ak ekipman pou byen manevre avyon an. Li te santi li te koupab pou neglijans li.

Robert te di:

“Lespri m te plonje nan yon zòn gwo tenèb. … Mwen te tousenpleman egziste—[pou byennèt timoun yo], san lòt rezon.”

“Mwen … te pèdi dezi pou m te kontinye avanse.”

Lè moman an te rive, Robert te jwenn benediksyon yon eksperyans pwofondeman spirityèl. Li te rakonte:

“Yon jou swa, anviwon yon ane apresa, pandan m te ajenou nan lapriyè, yon mirak te pwodui. Pandan m ap priye ak sipliye Pè Selès mwen an, m te santi tankou Sovè a te vini sou kote m epi m te tande yon vwa klè ki t ap pale pawòl sa yo nan nanm mwen ak nan zòrèy mwen: ‘Robert, sakrifis ekspyatwa m nan te peye pou peche w yo ak erè w yo. Madanm ou padone w. Zanmi w yo padone w. Mwen pral retire fado w la. …‘

“Apati moman sa a, fado kilpabilite a [ak dezespwa a] te soti etonaman sou do m. Mwen te jwenn sekou! Mwen te imedyatman konprann pouvwa inivèsèl Ekspyasyon Sovè a epi … ke li aplike direkteman pou mwen. … Mwen … te fè eksperyans limyè ak lajwa ke m pa t janm konnen avan. Mwen te resevwa yon kado m pa t merite—kado lagras Senyè a. … Mwen pa t merite l—Mwen pa te fè anyen pou m te merite l, men Li te ban mwen l kanmèm.”

Frè ak sè, se pou nou chak “sanktifye nan Kris la atravè gras Bondye, nan san Kris la ki te koule a, … [pou nou vin] sen, san tach.”

Mwen temwaye de lanmou, mizerikòd, ak gras Sovè ak Redanmtè nou an. Li vivan. Nou se pa Li; nou se pitit alyans la. Si nou kwè nan Li, suiv Li, epi fè L konfyans, L ap wete nou anba mizè ak peche nou yo. Apresa, odela lavi mòtèl sa a, nan kay Papa an, na va viv avèk Li pou tout tan e ajamè. Nan non Jezikri, amèn.