Pa Abandone Pwòp Mizerikòd Ou

Yon pwofesè lekòl yon fwa te anseye ke yon balèn—malgre gwosè l—pa t ap kapab vale yon moun paske gòj balèn yo piti. Yon tifi te fè objeksyon, “Men yon balèn te vale Jonas.” Pwofesè a te reponn, “Sa enposib.” Toujou san chanje ide, tifi a te di, “Bon, lè m rive nan syèl la, ma mande li.” Pwofesè a te pase l nan betiz, “E si Jonas sete yon pechè epi li pa t ale nan syèl?” Tifi a te reponn, “Lèsa a, ou ka mande li.”

Nou ri, men nou pa ta dwe rate pouvwa istwa Jonas la ofri chak “moun enb k ap chèche lajwa,” espesyalman moun ki an difikilte yo.

Bondye te kòmande Jonas pou “ale Niniv” pou preche repantans. Men Niniv sete yon enmi fewòs ansyen Izrayèl la—konsa Jonas rapidman te pran direksyon opoze a, nan bato, pou ale Tasis. Pandan l t ap fè vwal pou l ale lwen apèl li a, yon tanpèt terib te devlope. Avèk sètitid ke se dezobeyisans li ki te lakoz tanpèt la, Jonas te dakò pou yo te voye l jete nan lanmè a. Sa te kalme lanmè ajite a, sa ki sove lavi manm ekipaj li yo.

Mirakilezman, Jonas te chape anba lanmò lè yon “gwo pwason” Senyè a “te prepare” te vale li. Men li soufri nan kote ki te enkwayableman sonb ak degoutan sa a pandan twa jou jiskaske finalman pwason an te krache l jete sou tè fèm. Apresa li te aksepte apèl li pou Niniv la. Men, lè vil la repanti epi epanye anba destriksyon, Jonas santi gwokè pou mizerikòd ènmi l yo te jwenn nan. Bondye te pasyaman anseye Jonas ke Li renmen e ap chèche delivre tout pitit Li.

Jonas, ki te trebiche plis pase yon fwa nan devwa li, ofri yon temwayaj frapan ke nan mòtalite a, “Nou tout dechi.” Nou pa pale souvan de yon temwayaj konsènan Chit la. Men lè nou gen yon konpreyansyon doktrinal ak yon temwayaj spirityèl sou rezon ki fè chak nan nou ap lite anba difikilte moral, fizik, ak sitiyasyonèl yo, sa se yon benediksyon. Isit sou tè a, move zèb pouse, menm zo ki solid kase, epi tout moun “vire do bay Bondye.” Men kondisyon mòtalite sa a—yon rezilta pou chwa Adan ak Èv te fè yo—esansyèl pou rezon fondamantal egzistans nou: “pou [nou] ka gen lajwa”! Jan premye paran nou yo te aprann, se sèlman nan goute amètim ak sansasyon doulè nan yon mond dechi ke nou ka rive imajine, e menm jwi, vrè bonè.

Yon temwayaj sou Chit la pa eskize peche oswa yon atitid neglijan devan devwa yo nan lavi a, ki toujou mande dilijans, vèti, ak responsablite. Men, sa ta dwe tanpere fristrasyon nou lè bagay yo jis pase mal, oswa nou wè yon feblès moral nan yon manm fanmi, zanmi, oswa dirijan nou. Twò souvan bagay tankou sa lakoz nou patoje nan kritik san fondman oswa move santiman ki wonje lafwa nou. Men yon temwayaj fèm sou Chit la kapab ede nou rete plis tankou Bondye jan Jonas dekri a, ki se, “mizèrikòdye, lan pou fè kòlè, epi plen jantiyès” pou tout moun—enkli noumenm—nan eta inevitableman enpafè nou an.

Pi plis menm pase manifeste efè Chit la, istwa Jonas la dirije nou avèk puisans vè Limenm ki ka delivre nou anba efè sa yo. Sakrifis pèsonèl Jonas pou l te sove manm ekipaj bato l yo se vrèman yon bagay Kretyen. Epi twa fwa lè yo te mande Jezi yon mirak kòm prèv divinite Li, Li te reponn ke “pa p genyen okenn lòt siy l ap bay … eksepte siy Jonas [Jonah] la,” pandan l deklare ke menmjan Jonas te pase “twa jou ak twa nuit nan vant balèn nan; konsa tou Pitit Gason lòm nan gen pou pase twa jou, twa nuit anba tè.” Kòm yon senbòl sou sakrifis lanmò ak rezirèksyon gloriye Sovè a, Jonas gendwa pa t pafè. Men se sa tou ki fè temwayaj pèsonèl ak angajman li pou Jezikri, ke l te ofri nan vant balèn nan, sitèlman touchan ak enspiran konsa.

Siplikasyon Jonas la se kri yon bon moun ki an kriz, yon kriz ki se rezilta pwòp chwa li. Pou yon sen, lè yon abitid, kòmantè, oswa desizyon regretab lakoz katastwòf frape, malgre anpil lòt bon entansyon ak efò sensè pou mache dwat, sa ka espesyalman devastan epi kite yon moun avèk santiman abandon. Men kèlkeswa rezon oswa dimansyon dezas w ap fè fas la, toujou gen yon tè fèm pou espwa, gerizon, ak kè kontan. Tande Jonas:

“Nan mizè mwen te ye a, Senyè, mwen te rele nan pye ou … ; fon nan peyi mò yo […] mwen te mande sekou I. …

“Paske ou te voye m jete byen fon, nan fon lanmè; …

“[Epi] Mwen te di, Ou voye m jete byen lwen Ou; men m ap toujou gade nan direksyon tanp ou an.

“Dlo yo kouvri m, yo te prèt pou nwaye nanm mwen: Lanmè a te fin vale m, zèb lanmè te mare nan tout tèt mwen.

“Mwen desann jouk nan rasin mòn yo; … men ou rale m soti nan twou a. …

“Lè m te santi mwen taprale vre … Mwen vin sonje Senyè a: epi m te priye … nan tanp ki apa pou ou a.

“Moun ki obsève vanite plen manti yo se moun ki vire do bay Bondye ki bay favè a.

“Men m pral ofri vwa rekonesans mwen an sakrifis pou ou; Mwen pral kenbe angajman mwen te pran an.. Se Senyè a ki delivrans nou.”

Malgre sa gen anpil ane, mwen ka di nou egzakteman ki kote m te chita, ak egzakteman kisa m te santi, lè, byen fon andedan vant yon lanfè pèsonèl, mwen te dekouvri ekriti sa a. Pou nenpòt moun ki jodia santi yo tankou janm te santi m lèsa a—ke yo rejte w, anglouti nan dlo ki pi pwofon yo, avèk zèb lanmè ki vlope tèt ou epi gwo vag lanmè k ap frape w tout kote—siplikasyon mwen, enspire pa Jonas, se: pa abandone pwòp mizerikòd ou. Ou gen aksè imedya nan asistans ak gerizon divin malgre feblès imen w yo. Mizerikòd enpresyonan sa a vini nan e atravè Jezikri. Paske Li konnen w ak renmen ou pafètman, Li ofri l ba ou kòm “pa ou,” sa ki vledi li pafètman adapte pou ou, li prepare pou soulaje agoni endividyèl ou yo epi geri doulè pèsonèl ou yo. Donk, pou lanmou syèl la ak tèt pa w, pa vire do w ba li. Aksepte l. Kòmanse pa refize tande “vanite plen mansonj” advèsè a ki ap tante w pou panse ke w ap jwenn soulajman nan fè vwal pou w ale lwen responsablite spirityèl ou yo. Olyesa, suiv egzanp repantans Jonas la. Kriye devan Bondye! Ale nan tanp. Akwoche a alyans ou yo. Sèvi Senyè a, Legliz Li a, ak lòt moun nan sakrifis ak aksyondegras.

Si w fè bagay sa yo, sa ap ba ou yon vizyon sou lanmou espesyal Bondye genyen pou ou pa alyans—sa Bib Ebre a rele hesed. W ap wè ak santi pouvwa lwayal, inepuizab, ak “mizerikòd plen tandrès” Bondye ki ka rann ou “fò … menm nan … pouvwa delivrans” anba nenpòt peche oswa nenpòt echèk. Angwas prekòs ak entans ka bloke vizyon sa a odepa. Men, si w kontinye fè “sa [ou] pwomèt pou w fè a,” kalite vizyon sa a pral briye pi klè e vin pi klè toujou nan nanm ou. Epi avèk vizyon sa a, ou pral non sèlman jwenn lespwa ak gerizon men, etonaman, ou pral jwenn lajwa, menm nan mitan eprèv ou yo. Prezidan Nelson te anseye nou sitèlman byen: “Lè lavi nou santre sou plan sali Bondye a … epi sou Jezikri ak levanjil Li a, nou ka santi lajwa kèlkeswa sa ki rive—oubyen sa ki pa rive—nan lavi nou. Lajwa vini nan Li epi gras a Li.”

Kit nou ap fè fas avèk yon gwo katastwòf, tankou pa Jonas la, oubyen defi kotidyen nan mond enpafè nou an, envitasyon an se menm nan: Pa abandone pwòp mizerikòd ou. Leve gade siy Jonas la, Kris vivan an, Limenm ki te leve apre twa-jou nan tonbo L la apre L te fin konkeri tout bagay—pou ou. Vire gade Li! Kwè nan Li. Sèvi Li. Souri. Paske nan Li, e nan Li sèlman, nou jwenn bonjan gerizon konplè anba Chit la, gerizon nou tout tèlman bezwen an ijans lan epi ap chèche enbleman an. Mwen temwaye sa se verite. Nan non sakre Jezikri, amèn.