Pèsonn Pa Chita Poukont Li

Mwen pase 50 ane, ap etidye kilti, enkli kilti levanjil la. M te kòmanse avèk fortune cookie (ti bonbon ki gen mesaj ladan) yo.

Nan Chinatown San Francisco, dine kay fanmi Gong yo te fini avèk yon fortune cookie epi yon pwovèb saj tankou “Tout gran vwayaj kòmanse avèk yon premye pa.”

Kòm yon jèn gason, m te konn fè fortune cookies. Avèk gan blan an koton, m te konn vlope epi pliye bonbon yo pran fòm won an lè yo tou cho fèk soti nan fou a.

Mwen te etone lè m te aprann ke ti bonbon sa yo pa fè pati kilti Chinwa a orijinalman. Pou distenge ant kilti ti bonbon Chinwa, Ameriken, ak Ewopeyen an, mwen te chèche jwenn ti bonbon sa yo sou plizyè diferan kontinan—menmjan yon moun ta ka itilize plizyè pwen yon triyang pou sène dife nan yon forè. Restoran Chinwa yo nan San Francisco, Los Angeles, ak New York sèvi ti bonbon sa yo, men se pa sa w jwenn yo nan Beijing, Lond, oswa Sydney yo. Se sèlman Ameriken yo ki selebre Jounen Nasyonal “Fortune Cookie”. Se sèlman reklàm Chinwa yo ki ofri “Fortune Cookies Ameriken Otantik.”

Fortune cookies yo se yon egzanp amizan, senp. Men menm prensip pou konpare pratik nan diefran kontèks kiltirèl yo ka ede nou diferansye kilti levanjil la. Epi kounyea Senyè a ap ofri nouvo opòtinite pou aprann kilti levanjil la pandan pwofesi nan alegori Liv Mòmon an ak parabòl Nouvo Testament yo ap akonpli.

Tout kote moun ap deplase. Nasyon Zini rapòte 281 milyon migran entènasyonal. Sa reprezante 128 milyon moun anplis ke an 1990 epi twa fwa estimasyon ane 1970 yo. Tout kote, yon kantite konvèti san presedan ap dekouvri Legliz Jezikri pou Sen Dènye jou yo. Chak Saba, manm ak zanmi ki nan 195 peyi ak teritwa rasanble nan 31.916 kongregasyon Legliz la. Nou pale 125 lang.

Resaman, nan Albani, Nò Masedwàn, Kosovo, Lasuis, ak Almay, mwen te temwen nouvo manm ki t ap akonpli alegori pye olivye a ki nan Liv Mòmon an. Nan Jakòb 5, Mèt jaden an ak sèvitè Li yo ranfòse rasin ak branch pye oliv la nan rasanble ak grefe ansanm souch ki te ki soti nan divès kote. Jodia pitit Bondye yo reyini fè yon sèl nan Jezikri; Senyè a ofri yon mwayen natirèl remakab pou etann plenitid levanjil retabli Li an ke n ap viv la.

An preparasyon nou pou wayòm syèl la, Jezi rakonte parabòl gran soupe a ak festen maryaj la. Nan parabòl sa yo, envite spesyal yo te kreye eskiz pou yo pa t vini. Mèt la te bay sèvitè L yo enstriksyon pou “desann nan tout kote nan vil la” epi “sou gran chemen ak vwazinaj yo” pou “mennen sou plas” pòv yo, estwopye, andikape, ak avèg yo. Nan langaj spirityèl, sa se chak nan nou.

Ekriti a deklare:

“Tout nasyon yo pral envite” nan “yon soupe nan kay Senyè a.”

“Prepare chemen Senyè a, … pou wayòm li a kapab ale sou tè a, pou abitan yo ki sou tè a kapab resevwa l, epi pou yo pare pou jou ki pral vini yo.”

Jodia, moun ki envite nan soupe Senyè a soti nan tout kote ak tout kilti. Granmoun ak jèn, rich ak pòv, lokal ak mondyal, nou fè kongregasyon Legliz nou yo sanble ak kominote nou yo.

Kòm Apot anchèf, Pyè te wè syèl la louvri nan yon vizyon sou “yon gwo dra mare nan kat pwent li … ladan te genyen tout kalite … bèt.” Pyè te anseye: “Mwen konprann sa se vre: Bondye pa gade sou figi moun. … Nan tout nasyon moun ki gen krentif pou [Senyè a] epi fè sa ki dwat, li aksepte yo.”

Nan parabòl bon Samariten an, Jezi envite nou pou nou vin rapwoche youn de lòt epi vin jwenn Li nan lòtèl Li a—Legliz Li a. Li envite nou pou nou se bon vwazen. Bon Samariten an pwomèt l ap retounen pou l peye pou swen moun yo ki nan lòtèl Li a. Viv levanjil Jezikri a enkli fè plas pou tout moun nan Legliz retabli Li a.

Lespri ide “chanm nan lotèl la” enkli “pèsonn pa dwe chita poukont li.” Lè nou vini legliz la, si nou wè yon moun poukont li, tanpri èske nou pral di alo epi chita avèk li? Sa gendwa pa abitid ou. Moun nan gendwa sanble oswa pale diferan de nou. Epi, evidaman, jan yon ‘fortune cookie’ gendwa di, “Yon vwayaj amitye ak lanmou nan levanjil la kòmanse avèk yon premye alo epi pa kite pèsonn chita poukont li.”

“Pèsonn pa dwe chita poukont li” vledi tou ke pèsonn pa dwe chita poukont li emosyonèlman oubyen spirityèlman. Mwen te akonpaye yon papa enkonsolab pou n al vizite pitit gason li. Kèk ane avan, pitit gason an te trè kontan pou l te vin yon nouvo dyak. Sete okazyon tou pou fanmi li te achte premye pè soulye nèf pou li.

Men nan legliz la, dyak yo te griyen dan sou li. Soulye l yo te nèf men yo pa t alamòd. Anbarase ak blese, jèn dyak la te di li pa t ap janm tounen legliz la ankò. Kè m toujou atriste pou li ak fanmi li.

Sou wout pousyè ki mennen Jeriko a, chak nan nou konn gen moun ki te griyen dan sou nou, anbarase ak blese nou, petèt menm meprize oswa abize nou. Epi, avèk degre entansyon diferan, nou chak konn egalman neglije, inyore oswa pa tande, e petèt delibereman blese lòt moun tou. Se presizeman paske nou te blese epi nou blese lòt ke Jezikri mennen nou tout nan lòtèl Li a. Nan Legliz Li a ak atravè òdonans ak alyans Li yo, nou youn rapwoche de lòt ak de Jezikri. Nou renmen e nou jwenn lanmou, nou sèvi e nou jwenn sèvis, nou padone e nou jwenn padon. Tanpri sonje, “pa gen okenn soufrans syèl la pa ka geri”; fado terès yo aleje—lajwa nan Sovè nou an reyèl.

Nan 1 Nefi 19, nou li: “Lèzòm pilonnen menm Bondye Izrayèl la anba pye [yo]; … yo pa pran l pou anyen. … Se poutèt sa yo bat li, li pa di anyen; epi yo frape li, e li pa di anyen. Wi, yo krache sou li, li aksepte sa.”

Zanmi mwen, Pwofesè Terry Warner di ke jijman, move tretman, kou, ak krache yo se pa te evènman okazyonèl ki te rive sèlman pandan lavi mòtèl Kris la. Fason nou youn trete lòt—espesyalman moun ki grangou, swaf, moun abandone yo—se konsa nou trete Li.

Nan Legliz retabli Li a, nou tout pi byen lè pèsonn pa chita poukont li. An nou pa senpleman fè konsesyon oswa tolere. An nou sensèman akeyi, rekonèt, sèvi, renmen. Se pou chak zanmi, sè, frè pa rete kòm yon etranje ni enkoni men yon timoun nan yon fwaye li.

Jodia anpil moun santi yo nan solitid ak izole. Rezo sosyal ak entelijans atifisyèl ka kite nou avèk swaf pou rapwochman imen ak kontak imen. Nou vle tande vwa youn lòt. Nou vle santiman apatenans ak jantiyès otantik.

Gen anpil rezon ki ka fè nou santi nou pa nan plas nou nan legliz la—ki vledi, nan sans figire, nou chita poukont nou. Nou petèt ka fè sousi pou aksan nou, rad nou, ak sitiyasyon familyal nou. Petèt nou santi nou enkapab; nou santi sigarèt; nou aspire a purte moral; nou te separe avèk yon moun epi santi nou blese ak anbarase; fè sousi konsènan yon règleman kèlkonk nan Legliz la. Nou ka petèt selibatè, divòse, oswa vèv. Timoun nou yo fè bri; nou pa gen pitit. Nou pa t sèvi yon misyon oubyen nou te tounen lakay avanlè. Lis la long.

Mozya 18:21 envite nou pou nou makonnen kè nou ansanm nan lanmou. Mwen envite nou enkyete mwens, jije mwens, fè lòt moun mwens egzijans—epi, lè sa nesesè, pou nou mete mwens egzijans sou tèt nou. Nou pa kreye Siyon nan yon sèl jou. Men chak “alo,” chak jès janti, mennen nou pi pre Siyon. An nou fè Senyè a plis konfyans epi chwazi jwayezman pou nou obeyi kòmandman Li yo.

Doktrinalman, nan fwaye lafwa ak fratènizasyon Sen yo, pèsonn pa chita poukont li gras a alyans apatenans nan Jezikri.

Pwofèt Joseph Smith te anseye: “Se responsablite nou pou nou wè, patisipe nan epi ede avanse laglwa nan Dènye-jou a, ‘dispansasyon plenitid tan yo … ,’ lè Sen Bondye yo pral rasanble fè youn soti nan chak nasyon, ak lang, ak pèp.”

Bondye “pa fè anyen si se pa pou benefis mond lan; … pou l kapab atire tout Jason ak [fi] sou li. …

“… Li envite tout moun pou vin jwenn li pou yo kapab goute nan bonte li; … e tout moun se menm pou Bondye.”

Konvèsyon nan Jezikri mande pou nou rejte lòm natirèl ak kilti mond lan. Jan Prezidan Dallin H. Oaks anseye, nou bezwen abandone tout tradisyon ak pratik kiltirèl ki kontrè ak kòmandman Bondye yo epi vin Sen Dènye-jou. Li eksplike, “Gen yon kilti levanjil unik, yon gwoup prensip ak atant ak pratik ki komen pou tout manm yo nan Legliz Jeziri pou Sen Dènye-jou yo.” Kilti levanjil la enkli chastete, asiste legliz chak semèn, rete lwen alkòl, tabak, te, ak kafe. Li enkli onètete ak entegrite; konprann ke nou progrese an avan men nou pa monte ni desann nan pozisyon nan Legliz la.

Mwen aprann nan men manm ak zanmi fidèl nan chak peyi ak kilti. Ekriti nou etidye nan plizyè lang ak pèspektiv kiltirèl yo apwofondi konpreyansyon nou sou levanjil la. Diferan ekspresyon atribi Kretyen yo apwofondi lanmou ak konpreyansyon mwen sou Sovè m nan. Tout moun beni lè nou defini idantite kiltirèl nou, jan Prezidan Russell M. Nelson te anseye, kòm yon pitit Bondye, yon pitit alyans lan, yon disip Jezikri.

Lapè Jezikri a te tabli pou nou pèsonèlman. Resaman, yon jèn gason te sensèman mande, “Eldè Gong, èske m toujou ka ale nan syèl?” Li t ap chèche konnen si li te ka janm jwenn padon. Mwen te mande l non li, m te koute l atantivman, m te envite l pale avèk evèk li, m te ba l yon bèl akolad. Li te ale avèk espwa nan Jezikri.

Mwen te pale de jèn gason an nan yon lòt kontèks. Nan apre, mwen te resevwa yon lèt san siyati ki te kòmanse, “Eldè Gong, mwen menm ak madam mwen te elve nèf pitit … epi sèvi de misyon.” Men “Mwen te toujou santi m pa t ap jwenn aksè nan wayòm selès la … paske peche nan jenès mwen yo te tèlman mal!”

Lèt la te kontinye, “Eldè Gong, lè w te pale konsènan jèn gason an ki te rejwenn espwa pou padon an, mwen te ranpli avèk lajwa, nan kòmanse reyalize ke petèt mwen te ka jwenn padon].” Lèt la te fini konsa, “Mwen renmen tèt mwen kounyea!”

Apatenans nou nan alyans lan apwofondi lè nou rapwoche youn de lòt epi vin jwenn Senyè a nan lòtèl Li a. Senyè a beni nou tout lè pèsonn pa chita poukont li. Epi, sa k konnen? Petèt moun nou chita akote l la gendwa vin tounen pi bon zanmi ‘fortune cookie’ nou. Se pou nou jwenn epi fè plas pou Li ak youn pou lòt nan soupe Ti Mouton an, mwen priye enbleman nan non sakre Jezikri, amèn.