იცოდეთ, ვინ ხართ სინამდვილეში

მხსნელი, თავისი მიწიერი მსახურების დასაწყისში, უდაბნოში მიდიოდა, რათა „ღმერთთან ყოფილიყო.“ შესაძლოა ჩვენ უნდა შევცვალოთ აზროვნება და უბრალოდ ლოცვის ნაცვლად ყოველდღიურად საკმარისი დრო დავუთმოთ „ღმერთთან ყოფნას“.

მე აღმოვაჩინე, რომ ჩემი ლოცვების ხარისხი უმჯობესდება, თუ რამდენიმე წუთს ვუთმობ ჩემს მამასთან საუბრისთვის მომზადებას. წმინდა წერილი გვიჩვენებს, რომ ეს არის ის მაგალითი, რომელიც მუშაობს. ვინც არ უნდა იყოს ეს, ჯოზეფ სმითი, ნეფი, ჰელამანის ძე, თუ ენოსი, ყველას, ღმერთთან ჩაწერილი საუბრის დაწყებამდე, გავლილი აქვს ფიქრის და თვითგანხილვის გარკვეული გზები ენოსმა თქვა, რომ მისი სული შიმშილობდა, როცა მამამისის სიტყვები ღრმად ჩასწვდა გულში. ყოველი ეს მაგალითი გვასწავლის, რომ არსებობს საჭიროება, ყოველდღე სულიერად მოვემზადოთ „ღმერთთან ყოფნისთვის“.

მხსნელმა დაავალა ნეფიელებს: „როდესაც ლოცულობთ, შედით თქვენს ოთახში, ჩაიკეტეთ კარი და ილოცეთ თქვენი მამისადმი, დაფარულში მყოფი.“

თქვენს ოთახში იქნებით თუ საძინებელში, იპოვეთ ადგილი, სადაც განმარტოვდებით ლოცვისთვის, სადაც თქვენი სული დამშვიდდება და უსმინეთ „ჩუმი, ნაზი ხმის“ კარნახს. ჩვენ შეგვიძლია მოვემზადოთ იმ საკითხებზე ფიქრით, რისთვისაც მადლიერები ვართ და იმ კითხვებსა თუ შეშფოთებაზე, რომელზეც საუბარი მამასთან გვსურს. ჩვენ უნდა ვეცადოთ, ჩვენი ლოცვის წესი მექანიკური კი არ იყოს, არამედ ვესაუბროთ მამაზეციერს, თუ შესაძლებელია, ხმამაღლა.

მესმის, რომ ჩვენი ცხოვრების ქაოსში, როდესაც პატარებს ვუმკლავდებით ან შეხვედრიდან შეხვედრაზე დავრბივართ, შეიძლება არ გვქონდეს სიჩუმეში განმარტოებისა და გააზრებული მომზადების საშუალება — მაგრამ ეს ჩუმი, სწრაფი და დაჟინებული ლოცვები შეიძლება ბევრად უფრო მნიშვნელოვანი იყოს, როდესაც დღის დასაწყისშივე ვცდილობთ „ღმერთთან ყოფნას.“

შეიძლება იყვნენ ისეთებიც, ვისაც დიდი ხანია არ ულოციათ ან სხვები, რომლებსაც არ უგრძვნიათ, რომ მათი ლოცვები მოსმენილია. მე გპირდებით, რომ თქვენი მამაზეციერი გიცნობთ, უყვარხართ და სურს თქვენი მოსმენა. მას სურს თქვენთან საუბარი. მას სურს, გახსოვდეთ ვინ ხართ.

უხუცესმა ჯეფრი რ. ჰოლანდმა არცთუ ისე დიდი ხნის წინ გვასწავლა: „რამდენსაც არ უნდა ლოცულობდეთ, კიდევ უფრო მეტი ილოცეთ“. რამდენად ძლიერადაც არ უნდა ლოცულობდეთ, კიდევ უფრო ძლიერად ილოცეთ.“

უფრო ხშირად და მხურვალედ ლოცვის გარდა, მორმონის წიგნის ყოველდღიური შესწავლა და ტაძარში თაყვანისცემა დაგვეხმარება მოვამზადოთ გონება გამოცხადებისთვის. როცა ვცდილობთ, გავაუმჯობესოთ ჩვენი ურთიერთობა მამაზეციერთან, ის დაგვლოცავს, უფრო მკაფიოდ ვიგრძნოთ, რომ მისი შვილები ვართ.

ზეციერი მამის სიყვარულის უდიდესი გამოვლინება ჩვენდამი, როგორც მისი შვილების მიმართ, არის ის რეალობა, რომ მან გამოგზავნა თავისი ძე, ჩვენი პირადი მხსნელი, რათა დაგვხმარებოდა შინ დაბრუნებაში. ამიტომ, ჩვენ უნდა შევიცნოთ იგი.

წლების წინ, როცა პალოს პრეზიდენტად ვმუშაობდი, მე ერთ-ერთი ძმისთვის ტაძარში წეს-ჩვეულებების შემსრულებლის რეკომენდაცია გავეცი. მას შემდეგ, რაც ავუხსენი, რა შესანიშნავი წეს-ჩვეულებების შემსრულებელი იქნებოდა, მე შემთხვევით დავაჭირე ღილაკს „არ ვუჭერ მხარს“ და რეკომენდაცია წარვადგინე. გზავნილის გაუქმების მცდელობის შემდეგ ტაძრის პრეზიდენტს დავურეკე და ვუთხარი: „საშინელი შეცდომა დავუშვი.“ ტაძრის ამ კეთილმა პრეზიდენტმა, ყოველგვარი ყოყმანის გარეშე, თქვა: „პრეზიდენტო აირ, არაფერი გაგიკეთებიათ ისეთი, რაც არ მოგეტევებათ და რისიც საბოლოო ჯამში გამოსწორებაც არ მოხერხდება. რამხელა ჭეშმარიტებაა! მართლაც, იესო ქრისტეს აქვს „ხსნის ძალა.“

2019 წელს ტაძრის რეკომენდაციის კითხვებში დიდი ცვლილება მოხდა. ადრე, ერთ-ერთი შეკითხვა იყო, გაქვთ თუ არა მოწმობა იესო ქრისტეს, როგორც ჩვენი მხსნელისა და გამომსყიდველის როლის შესახებ? ახლა, შეკითხვაა: გაქვთ თუ არა მოწმობა მისი როლის შესახებ, როგორც თქვენი მხსნელისა და გამომსყიდველის? იესო ქრისტეს გამოსყიდვა მოქმედებს არა მხოლოდ სხვებისთვის, არამედ ჩემთვის და თქვენთვის. იგი არის ჩემი მხსნელი. იგი არის თქვენი მხსნელი. თითოეული ჩვენგანის. მხოლოდ მისი მეშვეობით მე და თქვენ შევძლებთ დავბრუნდეთ და ვიყოთ მამასთან.

ასე რომ, ძმებო და დებო, მოდით ვეძიოთ იგი. მოდით, შევისწავლოთ მისი ღვთიური ურთიერთობა მამასთან და ყოველ ჩვენგანთან. მოდით, შევიგრძნოთ გამომსყიდველი სიყვარულის სიმღერა რომელიც, ჩვენი გამომსყიდველის მეშვეობით მოდის პირადად თითეულ ჩვენგანთან, როცა ვინანიებთ. როცა შევიცნობთ მას, რომელსაც აქვს „ხსნის ძალა“, ჩვენ გავიგებთ, რომ როგორც ღვთის შვილები, ვართ მისი სიხარული, მისი ყველაზე მნიშვნელოვანი საზრუნავი და რომ ყოველი ჩვენგანი არის ხსნის ღირსი.

მე ვმოწმობ, რომ ჩვენ გვყავს მოსიყვარულე ზეციერი მამა. როცა შევიცნობთ ამ მარადიულ ჭეშმარიტებას ძლიერი ლოცვის, პირადი გამოცხადებისა და იესო ქრისტესთან მისვლის მეშვეობით, ჩვენ შევძლებთ ახლა და ყოველთვის, თამამად გამოვაცხადოთ: „მე შვილი ვარ ღვთისა“. იესო ქრისტეს სახელით, ამინ.