გული იესო ქრისტესკენ მიმართეთ: დაწყებითი მუსიკის წმინდა ნიჭი

დაწყებითი საზოგადოების სიმღერები შეიძლება ასევე დოქტრინის სწავლების ძლიერი იარაღი გახდეს. ზოგიერთი სიმღერა გვიყვება ამბებს მხსნელის ცხოვრებისა და მსახურების შესახებ. სხვა სიმღერები გვასწავლის მისი თვისებების შესახებ, როგორიცაა რწმენა, იმედი და გულმოწყალება. და ყველაზე წმინდა სიმღერები მოწმობს უფლის უსასრულო გამოსყიდვისა და სიყვარულის შესახებ, რომელიც ხსნიდან გამომდინარეობს.

უფლის წინასწარმეტყველი, პრეზიდენტი რასელ მ. ნელსონი, ასწავლიდა: „[მუსიკა] სიკეთისთვის უწყვეტ გავლენას ახდენს მაშინაც კი, როცა ბავშვები უკვე პატარები არ არიან. … [მას] აქვს სულიერი საკვების უზრუნველყოფის ძალა. მას აქვს განკურნების ძალა. მას აქვს ძალა, ხელი შეუწყოს თაყვანისცემას; ის საშუალებას გვაძლევს, ვიფიქროთ [მხსნელის] გამოსყიდვასა და სახარების აღდგენაზე, მისი ხსნის პრინციპებითა და ამაღლების წეს-ჩვეულებებით. მუსიკა გვაძლევს ძალას, გამოვხატოთ ლოცვით აღვსილი აზრები და დავამოწმოთ წმინდა ჭეშმარიტებანი.

ჩვენი, როგორც მშობლების, ხელმძღვანელებისა და მასწავლებლების ძალისხმევა ეხმარება ბავშვებს დაპირებული კურთხევების მიღწევაში, ვასწავლით რა მათ მუსიკაში ჩადებულ სახარების ჭეშმარიტებებს. პრეზიდენტი ნელსონი ასევე გვასწავლიდა, რომ „ბავშვებს შეუძლიათ ისწავლონ დოქტრინა სიმღერის პროცესში ისევე, როგორც ისინი მას კლასში სწავლობენ“. ამ სიმღერებს შეუძლია უზრუნველყონ რწმენით სავსე ქადაგებების რეზერვუარი, რომელიც ბავშვებს მხსნელისკენ მიმართავს და დაეხმარება მათ, უფლის სახარებისადმი ერთგულების განვითარებაში.

წმინდა წერილი გვასწავლის, რომ გულიდან ამომავალი მართალთა სიმღერა ახარებს მხსნელს. უბრალოდ გაოცებული ვარ იმ სიხარულით, რასაც მხსნელის ყველაზე ახალგაზრდა მოწაფეების ხმებს მოაქვს. მე ვიცი, რომ მათი ლოცვით აღსავსე სიმღერები აღწევს ზეცას, როგორც გამოსახულება რწმენისა, რომელიც იწვევს სულიწმინდას, დაამოწმოს მარადიული ჭეშმარიტება და ფაქიზად იწვევს სხვებს, მიიღონ მხსნელის მოწვევა – გამოჰყვნენ მას და შინ დაბრუნდნენ. როგორც უხუცესმა ჰენრი ბ. აირინგმა შეგვახსენა, სწორედ სულიწმინდის შეგრძნების ამ მომენტებში გვაქვს ცხოვრებაში მხსნელის გამოსყიდვის მოქმედების დასტური.

დაწყებითი საზოგადოების მუსიკა შეიძლება იყოს სასწაული, რომელიც ჩვენი შვილების მოწაფეობის გზაზე მთელი ცხოვრების მანძილზე გაგრძელდება. ექვსი წლის ასაკში ნასწავლ სიმღერას აქვს ძალა, ჩვენთან დარჩეს და შეიძლება ათწლეულების შემდეგაც დაგვიბრუნდეს გადაწყვეტილების, ცდუნების, მწუხარების ან სიხარულის მომენტებში. შესაძლოა, რომ წამოვიზრდებით, სიმღერის „მე მივყვები ღვთის გეგმა“ -ს ტექსტი იმ სულიერ საყრდენად გამოდგეს, რომელიც პავლე მოციქულის მოწმობას იმეორებს, ღვთის მიერ ჩვენთვის მოცემული აღთქმების უტყუარობის შესახებ. ან შეიძლება შეგვახსენონ, რომ რადგან ღმერთი თავის დაპირებებს ასრულებს, მისი აღთქმები გვთავაზობს ძლიერ ნუგეშსა და თავშესაფარს და მოგვიწოდებს, ჩვენი იმედი და ნდობა იესო ქრისტესა და მის გამომსყიდველ ძალაზე მტკიცედ დავამყაროთ.

ზრდასრული წევრები მთელ მსოფლიოში, სირთულეების ჟამს ხშირად იხსენებენ და გულს მიმართავენ დაწყებითი საზოგადოების სიმღერებისკენ, რომლებიც ბავშვობაში ისწავლეს. ეს სიმღერები მრავალ ადამიანს იესო ქრისტესადმი რწმენის საძირკველს უმაგრებდა და ხშირად ხდებოდა მათი სახარებისადმი მოქცევის პირველი ადგილი. მშობლები, ხელმძღვანელები და მასწავლებლები წლების განმავლობაში სწავლებით, სიმღერითა და დამოწმებით კვებავდნენ ამ რწმენას.

ერთ-ერთმა დამ გამიზიარა, რომ ძალიან უყვარდა დაწყებითი საზოგადოების მუსიკა და ახლა, 20 წლის შემდეგ, ის თვლის, რომ ზუსტად იმ სიმღერებმა დააჩქარა მისი იესო ქრისტეს სახარებაზე მოქცევა. კიდევ ერთმა წევრმა დაამოწმა, რომ დაწყებითმა საზოგადოებამ მასში ბავშობაშივე რწმენის მდოგვის მარცვალი ჩათესა და სწორედ ეს გახდა მიზეზი, რომლის გამოც ის 30 წლის ასაკში უფლის ეკლესიაში დაბრუნება შეძლო. მხსნელი დაგვპირდა: „სულიწმინდ[ა] … ყველაფერს გასწავლით და ყველაფერს გაგახსენებთ, რაც თქვენთვის მითქვამს“. დაწყებითი საზოგადოების მუსიკა შეიძლება იყოს ამ დაპირების ასრულების ერთ-ერთი გზა.

დაწყებითი საზოგადოების კიდევ ერთი საყვარელი სიმღერა ასახავს უბრალო რწმენისა და მტკიცე მოწმობის ძალას:

როცა ბავშვები მღერიან, ისინი მოწაფეობის სურვილს გამოხატავენ და აღთქმის გზით ცხოვრების მაგალითს იღებენ. სულიწმინდას შეუძლია გამოიყენოს მუსიკა იმისთვის, რომ ბავშვების ნაზ გულებზე მარადიული ჭეშმარიტება ამოტვიფროს. და დროთა განმავლობაში ბავშვები შეძლებენ აირჩიონ, რომ უფალთან წმინდა აღთქმების დადებითა და დაცვით გული და ცხოვრება იესო ქრისტესკენ მიმართონ.

სულიერ მუსიკას შეუძლია დაგვეხმაროს ქრისტეს მოძღვრების სულში ჩაბეჭდვაში და უფლის წეს-ჩვეულებების მიღების მომზადებაში. ის აკავშირებს მხსნელის დოქტრინას ჩვენს მეხსიერებასთან და ამ მეხსიერებას ჩვენს მოწაფეობასთან მასში.

ჩვენ, როგორც დაწყებითი საზოგადოების ხელმძღვანელებს, გვაქვს შესაძლებლობა და წმინდა პასუხისმგებლობა უზრუნველვყოთ, რომ დაწყებითი საზოგადოების მუსიკა ისწავლებოდეს სიხარულით, დოქტრინალური გაგებით და სულიწმინდით. ეს მოიცავს ბავშვების მოწვევას შეამჩნიონ, რას გრძნობენ სიმღერის დროს და ეხმარება მათ იმის გაცნობიერებაში, რომ ეს გრძნობები სულიწმინდისგან მოდის. ეს ძალისხმევა გვეხმარება მოვამზადოთ ბავშვები ისეთი წმინდა წეს-ჩვეულებებისთვის, როგორიცაა ნათლობა და წევრად დამტკიცება, აგრეთვე შთააგონებს მათ, ახსოვდეთ მათმიერ დადებული აღთქმები, როცა ისინი რეგულარულად ანახლებენ ღმერთთან დადებულ პირობებს.

ბოლო სერობაზე, მას შემდეგ, რაც მხსნელმა ზიარება წარადგინა, მათეს ჩანაწერების მიხედვით, მათ „იგალობეს და გასწიეს ზეთისხილის მთისაკენ“. ყოველ კვირას უფლის აღდგენილი ეკლესიის დამტკიცებული წევრები, მათ შორის, სულ მცირე 8 წლის ასაკის მონათლული ბავშვები, უფლის ზიარების მიღებისთვის ემზადებიან. წმინდა მუსიკის შესრულებით, ღვთის შვილთა მრევლს ეძლევა შესაძლებლობა, მოამზადონ გულები ამ წმინდა წეს-ჩვეულებისთვის, რათა აიღონ საკუთარ თავზე მისი სახელი, ყოველთვის ახსოვდეთ იგი და დაიცვან მისი მცნებები.

ძვირფასო მეგობრებო, მე ვმოწმობ, რომ დაწყებითი საზოგადოების სიმღერები გვასწავლის მარადიულ ჭეშმარიტებას და მოძღვრებას, რომელსაც იესო ქრისტესკენ და მის სახარებისკენ მივყავართ. გიწვევთ დაფიქრდეთ, რა ფუნდამენტური ჭეშმარიტებები ჩაიწერა თქვენს გულებში ამ სიმღერების მარტივი სწავლებების მეშვეობით და დაუმოწმოთ ამ ჭეშმარიტებების შესახებ მხსნელის ყველაზე ახალგაზრდა მოწაფეებს, როდესაც მათ სახარების სასიხარულო ამბავს სიმღერის საშუალებით ასწავლით.

მე ვიცი, რომ ღმერთმა, ჩვენმა მამამ, უსაზღვრო სიყვარულით გამოგზავნა თავისი საყვარელი ძე დედამიწაზე, რათა ესწავლებინა ჩვენთვის, ეჩვენებინა გზა და გამოვესყიდეთ თავისი გამოსყიდვის მეშვეობით.

მე ვიცი, რომ მხსნელის ცხოვრება და მზრუნველობა რეალური და პირადია. წმინდა წერილში უამრავი ამბავია ჩაწერილი უფლის მიერ განკურნების, მისი სიკეთისა და სასწაულების შესახებ.

მე ვიცი, რომ მამაზეციერს ესმის თავისი შვილების გულწრფელი ლოცვები, მათი ასაკის, ვითარებისა და ენის განურჩევლად. მას ესმის ჩვენი გულის ჩუმი ვედრება.

მე ვმოწმობ, რომ გეთსიმანიაში იესო ქრისტემ იზიდა ჩვენი ცოდვების, მწუხარებისა და ტკივილის ტვირთი. ის ნებაყოფლობით, ჩვენ მიმართ თავისი სიყვარულის გამო, ეწამა და შესაძლებელი გახადა ჩვენთვის მიტევება და შინ დაბრუნება.

მე ვიცი, რომ ჩვენ, პირდაპირი გაგებით, ღვთის შვილები ვართ, მისი ხატითა და მსგავსით შექმნილნი, ღვთიური პოტენციალით შემოსილნი და ჩვენ გვიწვევენ, დავბუნდეთ მასთან საცხოვრებლად, თუკი იესო ქრისტეს მიმდევრობას ავირჩევთ.

მე ვიცი, რომ იესო ქრისტე არის ჩვენი სრულყოფილი მაგალითი და როცა მსახურებით, მიტევებითა და სხვების მიმართ სიყვარულით მას მივდევთ, ჩვენ ყოველ დღე უფრო და უფრო მეტად ვემსგავსებით მას.

მე ვიცი, რომ უფლის წმინდა ტაძრები მის სახლს წარმოადგენენ დედამიწაზე. იქ ჩვენ ვდებთ წმინდა აღთქმებს, ვიღებთ მარადიულ კურთხევებს, მეტს ვიგებთ უფლის შესახებ და უფრო კარგად ვგრძნობთ მის სუფევას. ტაძარი არის ჩვენი ცხოვრების სწავლის, სიმშვიდისა და მომზადების ადგილი.

მე ვმოწმობ, რომ დაწყებითი საზოგადოების ბავშვებისთვის სიმღერების შესწავლაზე და შესრულებაზე გაწეული ძალისხმევა არ არის უბრალოდ ჩვენი რელიგიური ტრადიციის ნაწილი. ეს სიმღერები არის იესო ქრისტეს მოწაფეების ქადაგებანი, აღდგენილი სახარების ჭეშმარიტების მოწმობები და მუსიკაზე დადებული ლოცვები. სულიერ მუსიკას შეუძლია, მსმენელს ქრისტეს ნათელი მოჰფინოს, შემსრულებელს კი იგი გულში ჩაუღვაროს. ძვირფასო მეგობრებო, იესოს სურს, მისთვის მზის სხივები ვიყოთ. მე ამას ვმოწმობ იესო ქრისტეს წმინდა სახელით, ამინ.