Kópa láti Gbáradì fún Ìpadàbọ̀ Krístì

Nínú “ọlánlá àkókò yìí,” nígbàtí ìjọba Ọlọ́run ngbòòrò sí i tí àwọn tẹ́mpìlì sì káàkiri ilẹ̀ ayé, àìní npọ̀ sí i fún àwọn ọkàn tó nfẹ́ láti kópa nínú iṣẹ́ Ọlọ́run. Iṣẹ́ ìsìn àìmọtara-ẹni-nìkan gan-an ni jíjẹ́ ọmọlẹ́hìn ìwà bíi Krístì. Ṣùgbọ́n sísìn kìí sábà rọrùn. Èrèdí nìyí tí mo fi ní ìfẹ́sí ẹ̀yin ọmọ-ẹ̀hìn olùpamọ-májẹ̀mú, pẹ̀lú àwọn olùfẹ́ òjíṣẹ́ ìhìnrere wa, ẹ̀yin tí ẹ fi àwọn ìfẹ́-inú àti ìpèníjà yín sẹ́gbẹ̀ẹ́ kan láti sin Ọlọ́run nípa sísìn àwọn ọmọ Rẹ̀. Ọlọ́run “ní ìdùnnú láti bu ọlá fún [yín fún sísìn Ín] nínú òdodo.” Ó ṣe ìlérí pé, “Títóbi ni èrè [rẹ] yíó jẹ́ àti ayérayé ni ògo [rẹ] yíó jẹ́.” Nígbàtí a bá sọ bẹ́ẹ̀ni sí sísìn, a nsọ bẹ́ẹ̀ni sí Jésù Krístì. Àti nígbàtí a bá sọ bẹ́ẹ̀ni sí Krístì, a nsọ bẹ́ẹ̀ni sí ìgbé ayé tí ó pọ̀ jùlọ tí ó ṣeéṣe.

Mo kẹ́kọ̀ọ́ yí lákokò tí mo nṣiṣẹ́ tí mo sì nka ìmọ̀-ẹ̀rọ kẹ́míkálì ní kọ́lẹ́jì. A pè mí láti jẹ́ olùṣètò ìṣe fún wọ́ọ̀dù ọ̀dọ́ àdánìkanwà kan. Èyí ni àlá-burúkú ìpè mi. Síbẹ̀, mo tẹ́wọ́ gbàá, àti ní àkọ́kọ́ ó jẹ́ ìdààmú. Lẹ́hìnáà níbi ìṣe ṣíṣe kan ọmọbìnrin arẹwà kan ní ìkọlù nípa ọ̀nà tí mo fi pín wàrà dídì. Ó padà nígbà mẹ́ta, ní ìrètí láti gba àkíyèsí mi. A wọnú ìfẹ́, àti pé ó dábàá àti fẹ́ mi ní ọ̀sẹ̀ méjì lẹ́hìnnáà. Ó dára, bóyá kò yára tó bẹ́ẹ̀ rárá, áti pé èmi ní ẹni tí ó dábàá àti fẹ, ṣùgbọ́n òtítọ́ ni pé: mo bẹ̀rù láti ronú pípàdánù Heidi kánípé mo sọ pé rárá sí ìpè náà.

A nkópa nínú iṣẹ́ Ọlọ́run kìí ṣe nítorí pé Ọlọ́run nílò wa ṣùgbọ́n nítorí a nílò Ọlọ́run àti àwọn ìbùkún nlá Rẹ̀. Ó ṣèlérí, “Nítorí, kíyèsí i, èmi yíò bùkún gbogbo àwọn tí nṣiṣẹ́ nínú ọgbà àjàrà mi pẹ̀lú ìbùkún nlá.” Ẹ jẹ́ kí nṣe abápín àwọn ìlànà mẹ́ta tí ó nkọ́ni bí ìkópa wa nínú iṣẹ́ Ọlọ́run ṣe nbùkún tí ó sì nrànwá lọ́wọ́ láti múra sílẹ̀ láti pàdé Olùgbàlà.

Àkọ́kọ́, bí a ṣe nkópa, a ntẹ̀síwájú sí ìhà “ìwọ̀n ìṣẹ̀dá [wa]”

A kọ́ àpẹrẹ yìí nínú àkọsílẹ̀ ti Ìṣẹ̀dá. Lẹ́hìn iṣẹ́ ọjọ́ kọ̀ọ̀kan, Ọlọ́run jẹ́wọ́ ìlọsíwájú tí a ṣe nípa wíwípé “ó dára.” Kó wípé iṣẹ́ náà ti parí tàbí ó pé. Ṣùgbọ́n ìlọsíwájú wà lójoójúmọ́, àti pé ní ojú Ọlọ́run, èyíinì jẹ́ dídára!

Àwọn ìpè kìí ṣe ìpinnu tàbí ìfọwọ́sí iye tàbí yíyẹ ènìyàn. Dípò bẹ́ẹ̀, bí a ṣe nṣiṣẹ́ pẹ̀lú Ọlọ́run ní ọ̀nàkọnà tí Ó bá bèèrè, a ndàgbà sínú òdiwọ̀n ìṣẹ̀dá tiwa.

Ọlọ́run máa nyọ̀ nínú ìlọsíwájú wa, bẹ́ẹ̀ ló sì yẹ kí àwa náà, àní nígbàtí a ṣì ní iṣẹ́ láti ṣe. Nígbà míràn a lè ma ní okun tàbí ọ̀nà láti sìn nínú ìpè kan. Síbẹ̀, a lè kópa nínú iṣẹ́ náà kí a sì dáàbò bo ẹ̀rí wa nípasẹ̀ àwọn ọ̀nà tó nítumọ̀ bíi àdúrà àti ṣíṣe àṣàrò ìwé mímọ́. Olùfẹ́ni Baba wa Ọ̀run kìí dá wa lẹ́bi nígbàtí a bá fẹ́ ṣùgbọ́n tí a kò lè sìn.

Èkejì, iṣẹ́ ìsìn ngbé àwọn ilé àti àwọn ìjọ wa ga sí àwọn ibi mímọ́ níbití a ti lè ṣe ìgbé ayé májẹ̀mú.

Fún àpẹrẹ, májẹ̀mú wa láti rántí Krístì nígbàgbogbo ni a ṣe bí ẹnìkọ̀ọ̀kan, ṣùgbọ́n májẹ̀mú yí ni à ngbé bí a ṣe nsin àwọn ẹlòmíràn. Àwọn ìpè yí wa ká pẹ̀lú àwọn ànfààní láti “gbé … ẹrù ọmọnìkéjì wa, àti nípa bẹ́ẹ̀ a mú òfin Krístì ṣẹ.” Nígbàtí a bá sìn nítorí pé a fẹ́ràn Ọlọ́run tí a sì fẹ́ gbé ìgbé ayé àwọn májẹ̀mú wa, iṣẹ́ ìsìn tí ó dàbí ojúṣe àti tí ó gba agbára ndi aláyọ̀ àti ayínipadà.

Àwọn ìlànà ìgbàlà àti ìgbéga kò gbàwálà nítorí wọn mú àtòkọ àyẹ̀wo ọ̀run ṣẹ. Dípo bẹ́ẹ̀, nígbàtí a bá ngbé ìgbé ayé àwọn májẹ̀mú tó so mọ́ àwọn ìlànà wọ̀nyí, a ndi irú ènìyàn tí ó fẹ́ láti wà níwájú Ọlọ́run. Òye yìí borí àwọn iyèméjì láti sìn tàbí àwọn fífẹ́ láti má ṣe ìránṣẹ́. Ìmúrasílẹ̀ wa láti pàdé Krístì máa nyára kánkán nígbàtí a bá jáwọ́ bíbéèrè ohun tí Ọlọ́run yíò fàyè gbà tí a sì bẹ̀rẹ̀ sí béèrè ohun tí Ọlọ́run yíò fẹ́.

Ìkẹta, kíkópa nínú iṣẹ́ Ọlọ́run nrànwá lọ́wọ́ láti gba ẹ̀bùn oore-ọ̀fẹ́ Ọlọ́run kí a sì nímọ̀lára ìfẹ́ nlá Rẹ̀.

A kìí gba owó ìsànpadà fún sísìn. Dípò bẹ́ẹ̀, Ìwé Mímọ́ kọ́ni pé fún “iṣẹ́ [wa a] ní láti gba oore-ọ̀fẹ́ Ọlọ́run, kí [a] lè lágbára nínú Ẹ̀mí, [ní] ìmọ̀ Ọlọ́run, [àti] láti kọ́ni pẹ̀lú agbára àti àṣẹ láti ọ̀dọ̀ Ọlọ́run.” Eyíinì jẹ́ ìṣòwò tí ó dára púpọ̀!

Nítorí oore-ọ̀fẹ́ Ọlọ́run, àwọn agbára tàbí àìlágbára wa kìí ṣe ìpìlẹ̀ àkọ́kọ́ fún nínawọ́ tàbí gbígba ìpè kan. Ọlọ́run kò retí ìṣe pípé tàbí tálẹ́ntì àràọ̀tọ̀ láti kópa nínú iṣẹ́ Rẹ̀. Bí ó bá rí bẹ́ẹ̀, Ẹ́stérì Ayaba kì bá ti gba orílẹ̀-èdè rẹ̀ là, Pétérù kì bá ti ṣe aṣáájú-ọ̀nà Ìjọ àkọ́kọ́, Joseph Smith kì yíò sì jẹ́ wòlíì Ìmúpadàbọ̀sípò.

Bí a ṣe nṣe ìṣe pẹ̀lú ìgbàgbọ́ láti ṣe ohun kan tí ó kọjá agbára wa, àìlera wa farahàn. Èyí kò tunilára rara, ṣùgbọ́n ó pọn dandan láti “mọ pé nípasẹ̀ oore-ọ̀fẹ́ [Ọlọ́run] … pé a ní agbára láti ṣe àwọn nkan wọ̀nyí.”

A yíò ṣubú ní ọ̀pọ̀lọpọ̀ ìgbà bí a ṣe nkópa ní iṣẹ́ Ọlọ́run. Ṣùgbọ́n nínú ìyànjú wa, Jésù Krístì mú wa. Ó sì gbé wa sókè díẹ̀díẹ̀ láti ní ìrírí ìgbàlà kúrò nínú ìjákulẹ̀ àti ìbẹ̀rù àti láti inú ìmọ̀lára bí ẹnipé a kì yíò tó láé. Nígbàtí a bá ya aápọn wa kékeré ṣùgbọ́n dídára jùlọ sí mímọ́, Ọlọ́run nsọ ọ́ di títóbi. Nígbàtí a bá ṣèrúbọ fún Krístì, Òun nsọ wá di mímọ́. Èyí ni agbára ìyínipadà ti oore ọ̀fẹ́ Ọlọ́run. Bí a ṣe nsìn, a ndàgbà nínú oore-ọ̀fẹ́ títí tí a ó fi múra sílẹ̀ láti “di gbígbé sókè nípasẹ̀ Baba, láti dúró níwájú [Jésù Kristi].”

Èmi kò mọ gbogbo ohun tí Olùgbàlà yíò bèèrè lọ́wọ́ mi nígbàtí mo bá dúró níwájú Rẹ̀, ṣùgbọ́n bóyá ìbèèrè kan yìó jẹ́, “Ta ni o mú wá pẹ̀lú rẹ?” Àwọn ìpè jẹ́ àwọn ẹ̀bùn mímọ́ láti ọ̀dọ̀ olùfẹ̀ni Baba Ọ̀run láti ṣe ìrànlọ́wọ́ láti mú àwọn míràn wá pẹ̀lú wa sọ́dọ̀ Krístì. Nítorínáà mo pe àwọn olórí àti oúkúlùkù wa láti mọ̀ọ́mọ̀ wá àwọn tí kò ní àwọn ìpè. Ẹ gba wọ́n níyànjú kí ẹ sì ràn wọ́n lọ́wọ́ láti kópa nínú iṣẹ́ Ọlọ́run láti múrasílẹ̀ fún ìpadàbọ̀ Krístì.

Jòhánnù kò wá déédé sí Ilé ìjọsìn nígbàtí bíṣọ́pù rẹ̀ ṣàbẹ̀wò tí ó sì sọ fún un pé Olúwa ní iṣẹ́ kan fún un láti ṣe. Ó pe Jòhánnù láti jáwọ́ nínú sìgá mímu. Bíótilẹ̀jẹ́pé Jòhánnù ti gbìyànjú lọ́pọ̀lọpọ̀ ìgbà láti dáwọ́ dúró, ní àkókò yìí ó nímọ̀lára agbára àìrí kan tí ó nràn án lọ́wọ́.

Lẹ́hìn ọ̀sẹ̀ mẹ́ta péré, ààrẹ èèkàn náà bẹ Jòhánnù wò. Ó pè é láti sìn ní bìṣọ́príkì. Ó ya Jòhánnù lẹ́nu. Ó wí fún ààrẹ èèkàn náà pé òun ṣẹ̀ṣẹ̀ jáwọ́ sìgá mímu. Bí èyí bá túmọ̀ sí pé yìó ní láti kọ àṣà wíwà nínú àwọn eré bọ́ọ̀lù alámọ̀dájú ní ọjọ́ Ìsinmi, ní dídára, èyíinì jẹ́ púpọ̀ jù láti bèèrè. Ìdáhùn onímìísí ààrẹ èèkàn náà rọrùn: “Jòhánnù, èmi kò béèrè lọ́wọ́ rẹ; Olúwa ni.”

Sí èyí tí Jòhánnù dáhùn pé, “Ó dára bí ó bá rí bẹ́ẹ̀, èmi yíò sìn.”

Jòhánnù wí fún mi pé àwọn ìrúbọ wọ̀nyí láti sìn ní àwọn ọ̀gangan ìyípadà ti ẹ̀mí fún òun àti ẹbí rẹ̀.

Ó yàmílẹ́nu bóyá a ní ààyè ìfọ́jú kan, ní kíkùnà láti nawọ́ àwọn ìpè sí àwọn ènìyàn tí wọ́n, dàbí ẹnipé wọn kò lè ṣeé tàbí kò yẹ, sí ìwò àye ikú wa. Tàbí a lè ní àníyàn díẹ̀ síi pẹ̀lú àṣà ìmúṣe ju pẹ̀lú ẹ̀kọ́ ìlọsíwájú lọ, ní àìbìkítà láti ri bí Olùgbàlà ṣe nmú agbára pọ̀ si nínú àìríbẹ́ẹ̀ àti àìdánwò nípa fífún wọn ní àwọn ànfààní láti sìn.

Alàgbà David A. Bednar kọ́ni ní pàtàkì àṣẹ Ìwé Mímọ́ láti “jẹ́ kí gbogbo [obìnrin àti] ọkùnrin kọ́ ojúṣe [wọn], àti láti gbé ìgbésẹ̀.” Njẹ́ a nṣe èyí? Nígbàtí àwọn olórí àti àwọn òbí bá jẹ́ kí àwọn ẹlòmíràn kọ́ ẹ̀kọ́ kí wọ́n sì ṣe ìṣe fúnra wọn, wọ́n ntan wọ́n sì ngbilẹ̀. Nígbàtí ipa ọ̀nà tó rọrùn jù le jẹ́ láti fún àwọn olóotọ́ ọmọ ìjọ ní ìpè kejì, ọ̀nà tí ó dára jùlọ ni láti pe àwọn tí kò ríbẹ́ẹ̀ láti sìn kí wọ́n sì jẹ́kí wọn ó kẹ́kọ̀ọ́ kí wọn ó sì dàgbà.

Bí Krístì bá wà níhìn nípa ti ara, Òun yíò ṣàbẹ̀wò sí àwọn aláìsàn, yíò kọ́ kíláàsì Ilé Ẹ̀kọ́ Ọjọ́ Ìsinmi, yíò jókòó pẹ̀lú ọ̀dọ́mọbìnrin onírora ọkàn náà, yíò sì bùkún àwọn ọmọdé. Òun lè ṣe iṣẹ́ ti ara Rẹ̀. Ṣùgbọ́n o ngbé ayé ẹ̀kọ́ ìpìlẹ̀ yí láti jẹ́ kí á gbé ìgbésẹ̀ kí a sì kẹ́kọ̀ọ́, nítorínáà Ó rán wa ní ipò Rẹ̀.

Pẹ̀lú kíkópa nínú iṣẹ́ Ọlọ́run ni “ẹ̀tọ́, ànfààní àti ojúṣe láti ṣe aṣojú fún Olúwa [Jésù Kristi] nwá.” Nígbàtí a bá sìn láti gbé Krístì ga kìí ṣe ara wa, iṣẹ́ ìsìn wa ndi aláyọ̀. Nígbàtí àwọn ẹlòmíràn bá kúrò ní kíláàsì, ìpàdé, ìbẹ̀wò iṣẹ́ ìránṣẹ́ wa, tàbí ìṣe ṣíṣe ní rírántí Krístì ju bí wọ́n ṣe nrántí wa lọ, iṣẹ́ náà nfúnni ní agbára.

Ní wíwá pẹ̀lú ìtara láti ṣe aṣojú Krístì, a ndàbí Rẹ̀ síi.” Èyíinì ni ìmúrasílẹ̀ tó dára jùlọ fún àkókò mímọ́ náà nígbàtí ẹnìkọ̀ọ̀kan wa yíò kúnlẹ̀ tí a ó sì jẹ́wọ́ pé Jésù ni Krístì náà, èyítí mo jẹ́ ẹ̀rí pé Ó jẹ́, àti pé Ààrẹ Russell M. Nelson ni “ohùn Rẹ̀ … títí dé òpin ilẹ̀ ayé” láti ràn wá lọ́wọ́ láti “múrasílẹ̀ … fún èyí tó nbọ̀.” Ní orúkọ mímọ́ Jésù Krístì, àmín.