Ìmúrasílẹ̀ Araẹni láti Pàdé Olùgbàlà

Ẹ̀yin arákùnrin àti arábìnrin mi Ọ̀wọ́n, ní Oṣù kẹwa tó kọjá, Ààrẹ Russell M. Nelson kọ́ni pé, “ìsisìyí ni àkokò náà fún yín àti fún èmi láti múrasílẹ̀ fún Bíbọ̀ Ẹ̀ẹ̀kejì ti Olúwa àti Olùgbàlà wa, Jésù Krístì.” Nígbàtí Ààrẹ Nelson sọ̀rọ̀ nípa Bíbọ̀ Ẹ̀ẹ̀kejì, ó jẹ́ pẹ̀lú ìrètí ayọ̀ nígbàgbogbo. Bákannáà, ọmọdébìnrin kan nínú Alakọbẹrẹ láìpẹ́ wí fún mi pé òun ndi onítara nígbàkugbà tí a bá dárúkọ Bíbọ̀ Ẹ̀ẹ̀kejì. Ó wípé, “Ẹ̀rù bà mí nítorí àwọn ohun búburú tí ó máa ṣẹlẹ̀ ṣíwájú kí Jésù tó wá lẹ́ẹ̀kansi.”

Kìí ṣe àwọn ọmọ tí wọ́n lè ní ìmọ̀lára ọ̀nà yí lásán. Àmọ̀ràn tó dárajùlọ fún un, fún yín, àti fún mi ni láti tẹ̀lé àwọn ìkọ́ni Olùgbàlà. Àwọn ìkọ́ni Rẹ kìí ṣe ohun ìjìnlẹ̀ tàbí líle. Nígbàtí a bá tẹ̀le wọn, a kò níláti bẹ̀rù tàbí ní ìtara.

Síwájú òpin ti iṣẹ́ ìránṣẹ́ ayé ikú Rẹ̀, Jésù Krístì ni a bèèrè ìgbà tí Òun yíò wá lẹ́ẹ̀kansi. Ní dídáhùn, Ó kọ́ àwọn òwe mẹ́ta, tí a kọsílẹ̀ nínú Matteu 25, nípa bí a ó ti múrasílẹ̀ láti pàdé Rẹ̀—bóyá ní Bíbọ̀ Ẹ̀ẹ̀kejì tàbí ìgbàkugbà tí a bá fi ayé yí sílẹ̀. Àwọn ìkọ́ni wọ̀nyí jé pàtàkì nítorí ìmúrasílẹ̀ araẹni láti pàdé Rẹ̀ ní ààrin-gbùngbun sí èrèdí ayé.

Olùgbàlà kọ́kọ́ sọ òwe àwọn wúndíá mẹwa sọ. Nínú òwe yí, àwọn wúndíá mẹwa lọ sí ayẹyẹ ìgbeyàwó. Marun ọlọgbọ́n mú òróró wá láti kún inú fìtílà wọn, márun aláìgbọ́n kò sì ṣe bẹ́ẹ̀. Nígbàtí a ti kéde dídé ọkọ-ìyàwó; àwọn wúndíá aláìgbọ́n kúrò láti lọ ra òróró. Nígbàtí wọ́n padàdé, ó ti pẹ́ jù; a ti ti ìlẹ̀kùn ibi ayẹyẹ náà.

Jésù yẹ abala mẹ́ta ti òwe náà wò láti ràn wá lọ́wọ́. Ó ṣàlàyé:

“Àti ní ọjọ́ náà, nígbàtí Èmi ó wá nínú ògò mi, ni òwe èyí tí Èmi ti sọ nípa àwọn wúndíà mẹ́wa ó wá sí ìmúṣẹ.

“Nítorí àwọn tí wọ́n jẹ́ ọlọ́gbọ́n tí wọ́n sì gba òtítọ́, àti tí wọ́n ti fi Ẹ̀mí Mímọ́ ṣe atọ́nà wọn, tí a kò sì tíì tàn wọ́n jẹ—lootọ ni mo wí fún yín, wọn yíò … gbé ní ọjọ́ náà.”

Ní ọ̀rọ̀ míràn, wọ́n kò nílò láti bẹ̀rù tàbí ní ìtara, nítorí wọn yíò yè wọn yíò sì ṣe rere. Wọn yíò borí.

Bí a bá jẹ́ ọlọ́gbọ́n, a ó gba òtítọ̀ nípa títẹ́wọ́gba ìhìnrere Jésù Krístì nípasẹ̀ àwọn ìlànà àti májẹ̀mú oyè-àlùfáà. Tó tẹ̀le, a ntiraka láti dúró ní yíyẹ ti níní Ẹ̀mí Mímọ́ pẹ̀lú wa nígbàgbogbo. Lílèṣe yí ni a gbọ́dọ̀ gbà níkọ̀ọ̀kan àti níti araẹni, ní díẹ̀ díẹ̀. Ìṣe ìfọkànsìn lemọ́lemọ́, araẹni, ìkọ̀kọ̀, npe Ẹ̀mí Mímọ́ láti tọ́wasọ́nà.

Èròjà kẹ́ta tí Jésù fihàn ní yíyẹra fún ẹ̀tàn. Olùgbàlà kìlọ̀:

“Ẹ kíyèsára kí ẹnikẹ́ni kí ó máṣe tàn yín jẹ.

“Nítorí ọ̀pọ̀lọpọ̀ yíò wá ní orúkọ mi, wípé Èmi ni Krístì; wọn ó sì tan ọ̀pọ̀lọpọ̀ jẹ.”

Olùgbàlà mọ̀ pé àwọn ẹlẹ̀tàn yíò gbìyànjú láti tan àyànfẹ́ gan an jẹ àti pé ọ̀pọ̀lọpọ̀ àwọn ọmọẹ̀hìn ni a ó lù ní jìbìtì. A kò níláti gbà àwọn wọnnì tí wọ́n nfi irọ́ gba ìbáwí tọ̀run tàbí wọ inú àkàwé afinjù tàbí ibi ìkọ̀kọ̀ ìyẹ̀wù láti kọ́ni nípa ayédèrú.

Ìwé ti Mọ́mọ́nì kọ́ wa bí a ṣe lè mọ ìyàtọ̀ nínú àwọn ẹlẹ̀tàn kúrò nínú àwọn ọmọẹ̀hìn. Àwọn ọmọẹ̀hìn ngbé ìgbàgbọ́ nínú Ọlọ́run ga, sìn In, kí a sì ṣe rere nígbàgbogbo. A ó ni di títànjẹ nígbàtí a bá wá tí a sì gba àmọ̀ràn láti ọ̀dọ̀ àwọn olúkúlùkù tó ṣe gbẹ́kẹ̀lé tí wọ́n jẹ́ olóòtọ́ ọmọẹ̀hìn Olùgbàlà.

Bákannáà a lè yẹra fún ẹ̀tàn nípa jíjọ́sìn déédé nínú tẹ́mpìlì. Èyí nṣe ìrànwọ́ fún wa láti ṣe ìmúdúró ìrísí ayérayé kí ó sì dá ààbó bò wá kúrò nínú àwọn ipa tí ó lè dàláàmú tàbí yí wa kúrò ní ipa ọ̀nà májẹ̀mú.

Ẹ̀kọ́ pàtàkì nípa òwe wúndíá mẹwa yí ni pé a jẹ́ ọlọ́gbọ́n nígbàtí a bá tẹ́wọ́gba ihìnrere, wá láti ní Ẹ̀mí Mímọ́ pẹ̀lú wa, kí a sì yẹra fún ẹ̀tàn. Àwọn wúndíá marun kò lè ran àwọn tí kò ní òróró lọ́wọ́; kò sí ẹnití ó lè tẹ́wọ́gba ìhìnrere, gba Ẹ̀mí Mímọ́ bí atọ́nà kan, kí wọ́n sì yẹra fún ẹ̀tàn ní ìtìlẹhìn wa. A níláti ṣe èyí fún arawa.

Olùgbàlà lẹ́hìnnáà sọ òwe àwọn tálẹ́ntì. Nínú òwé yí, ọkùnrin kan fi àwọn iye yíyàtọ̀ ti owó, tí a tọ́ka sí bí àwọn tálẹ́ntì, fún àwọn ọmọ-ọ̀dọ̀ mẹ́ta. Sí ìránṣẹ́ kan ó fun ní tálẹ́ntì marun, sí òmíràn ó fun ní méjì, àti sí ìkẹ́ta ó fun ní ọ̀kan. Ní ìgbà díẹ̀, àwọn ọmọ-ọ̀dọ̀ méjì sọ ohun tí wọ́n gbà di ìlọ́po méjì. Ṣùgbọ́n ìránṣẹ́ kẹ́ta kàn ri tálẹ́ntì rẹ̀ ẹyọkàn mọ́lẹ̀. Sí àwọn ọmọ-ọ̀dọ̀ méjèèjì tí wọ́n sọ tálẹ́ntì wọn di ìlópọ̀ méjì, ọkùnrin náà wípé, “Káàbọ̀, … ìwọ ọmọ ọ̀dọ̀ rere àti olõtọ́: ìwọ ṣe olõtọ́ nínú ohun díẹ̀, èmi ó mú ọ ṣe olórí ohun púpọ̀: ìwọ bọ́ sínú ayọ̀ Olúwa rẹ.”

Nígbànáà ọkùnrin náà ba ọmọ-ọ̀dọ̀ náà tí ó ri tálẹ́ntì rẹ̀ mọ́lẹ̀ wí fún jíjẹ́ “ẹni búburú àti onilọra.” Tálẹ́ntì ọmọ-ọ̀dọ̀ yí ni a gbà kúrò, tí a sì le kúrò. Síbẹ̀, kání ọmọ-ọ̀dọ̀ yí sọ tálẹ́ntì rẹ di ìlọ́po méjì, òun ìbá ti gba irú oríyìn kannáà àti èrè bíi ti àwọn ọmọ-ọ̀dọ̀ míràn.

Ọ̀rọ̀ kan nípa òwé yí ni pé Ọlọ́run nretí wa láti gbé àwọn okun tí a ti fún wa ga, ṣùgbọ́n Òun kò fẹ́ kí a fi okun wa wé ti àwọn ẹlòmíràn. Ẹ ronú lórí ìwòye yí tí a pèsè nípasẹ̀ ọmọwé Hasidic scholar Zusya ti Anipol ní sẹ́ntúrì méjìdínlógún. Zusya ni olókìkí olùkọ́ tí ó bẹ̀rẹ̀ láti bẹ̀rù bí òun ti ndé ojú ikú. Àwọn ọmọẹ̀hìn Rẹ̀ bèèrè, “Olùkọ́ni, èéṣe tí ìwọ fi nbẹ̀rù? Ìwọ ti gbé ìgbésí ayé rere; dájúdájú Ọlọ́run yíò fún ọ ní èrè títóbi.”

Zusya wípé: “Bí Ọlọ́run bá wí fún mi pé, ‘Zusya, èéṣe tí ìwọ kìí ṣe Mósè míràn?’ Èmi ó wípé, ‘Nítorí ìwọ kò fún mi ní ẹ̀mí títóbi jùlọ tí ìwọ fún Mósè.’ Àti pé bí mo bá dúró níwájú Ọlọ́run tí Ó sì wípé, ‘Zusya, èéṣe tí ìwọ kìí ṣe Sólómọ́nì míràn?’ Èmi ó wípé, ‘Nítorí ìwọ kò fún mi ní ẹ̀mí títóbi jùlọ tí ìwọ fún Sólómọ́nì.’ Ṣùgbọ́n, wòó, kíni èmi yíò sọ bí mo bá dúró níwájú Aṣẹ̀dá mi tí Ó sì wípé, ‘Zusya, èéṣe tí ìwọ kìí ṣe Zusya? Èèṣe tí ìwọ kìí ṣe ọkùnrin tí mo fún ọ ní agbára láti jẹ́?’ Ah, ìdí ni èyí tí mo fi bẹ̀rù.”

Nítòọ́tọ́, Ọlọ́run yíò ní ìjákulẹ̀ bí a kò bá gbẹ́kẹ̀lé èrè, àánú, àti oore-ọ̀fẹ́ Olùgbàlà láti gbé àwọn okun ìfúnni-Ọlọ́run tí a ti gbà ga. Pẹ̀lú ìrànlọ́wọ́ ìfẹ́ni Rẹ̀, Ó nretí wa láti di ẹ̀yà dídárajùlọ ti arawa. Kí a lè bẹ̀rẹ̀ pẹ̀lú àwọn okun yíyàtọ̀ kìí ṣe pàtàkì sí I. Ó sì yẹ́ kí ó jẹ́ bẹ́ẹ̀ sí wa.

Ní òpin, Olùgbàlà sọ òwe àwọn àgùtàn àti ewúrẹ́. Nígbàtí Ó bá pada dé nínú ògo Rẹ̀, “níwájú rẹ̀ ni gbogbo orílẹ̀-èdè yíò kórajọ: òun ó sì ya wọ́n sọ́tọ̀ kúrò lọ́dọ̀ ara wọn, bí olùṣọ́-àgùtàn ti npín àwọn àgùtàn rẹ̀ kúrò lọ́dọ̀ ewúrẹ́: tí yíò si gbé àgùtàn sí ọwọ́ ọ̀tún rẹ̀, ṣùgbọ́n àwọn ewúrẹ́ ní ọwọ́ òsì.”

Àwọn wọnnì ní ọ̀tún Rẹ̀ di àwọn ajogún nínú ìjọba Rẹ̀, àti pé àwọn wọnnì ní òsì Rẹ̀ kò gba ogún. Ìhùwàsí yíyàtọ̀ ni bóyá wọ́n bọ́ Ọ nígbàtí ebi npa Á, fun Un ní ohun mímu nígbàtí ohungbẹ ngbẹ Ẹ́, fun Un nílé nígbàtí òun jẹ́ àlejò, fun Un laṣọ nígbàtí Òun wà ní ìhòhò, kí ó sì bẹ̀ Ẹ́ wò nígbàtí Ó nṣe àárẹ̀ tàbí wà ní àtìmọ́lé.

Ẹ̀rù ba gbogbo ènìyàn, méjèèjì àwọn wọnnì ní ọ̀tún àti àwọn wọnnì ní òsì. Wọ́n bèèrè ìgbà tí wọ́n ṣeé, tàbí ìgbàtí wọn kò, fún Un ní oúnjẹ, ohun mímu, àti aṣọ tàbí ràn Án lọ́wọ́ nígbàtí Ó wà ní àìlera. Ní ìdáhùn, Olùgbàlà wípé, “Lootọ ni mo wí fún yín, Níwọ̀n tí ẹ bá ti ṣé sí ọ̀kan tó kéréjù lára àwọn arákùnrin mi wọ̀nyí, ẹ ti ṣé sí mi.”

Ọ̀rọ̀ òwe náà hàn kedere: nígbàtí a bá sin àwọn ẹlòmíràn, à nsin Ọlọ́run; nígbàtí a kò bá sìn, a njá A kulẹ̀. Ó nretí wa láti lo àwọn ẹ̀bùn, tálẹ́ntì, àti okun wa láti bùkún àwọn ìgbésí ayé ti àwọn ọmọ Baba Ọ̀run. Ìrò tọ̀run láti sin àwọn ẹlòmíràn ni a júwe nínú ewì tí a kọ ní sẹ́ntúrì mọ́kàndínlógún láti ọwọ́ akéwì Finnish Johan Ludvig Runeberg. Àwọn tẹ̀gbọ́n-tàbúrò mi àti èmi ṣe àtúngbọ́ ewì náà “Àgbẹ̀ Paavo” ní gbogbo àwọn ìgbà èwe. Nínú ewì náà, Paavo ni àgbẹ̀ tálákà tí ó gbé pẹ̀lú ìyàwó rẹ̀ àti àwọn ọmọ mẹwa ní ẹ̀kún lake ti central Finland. Ọ̀pọ̀lọpọ̀ ọdún sẹ́hìn ní ọ̀nà kan, ni wọ́n ti pa èyí tó pọ̀ jù lọ lára ​​àwọn irè oko rẹ̀ run, yálà nípasẹ̀ ìṣàn omi tí yìnyín ìgbà ìrúwé máa nyọ́, òjò yìnyín ìgbà ẹ̀ẹ̀rùn, tàbí àtètèkọ́ yọ yìnyìn ìgbà ìwọ́wé. Ìgbà kọ̀ọ̀kan tí ìkórè kékere bá wọlé, ìyàwó àgbẹ̀ náà ó pohùnréré pé, “Paavo, Paavo, ìwọ aláìlóríre àgbàlagbà, Ọlọ́run ti pa wá tì.” Paavo, ní ìdáhùn, fi àìjìyan wípé, “Yí jolo pọ̀ pẹ̀lú wóró ìyẹ̀fun láti ṣe búrẹ́dì kí ebi má baà pa àwọn ọmọ. Èmi ó ṣiṣẹ́ àṣekára láti mú pápá Máṣì gbẹ. Ọlọ́run ndán wa wo, ṣùgbọ́n Òun yíò pèsè.”

Ìgbà kọ̀ọ̀kan tí àwọn ohun ògbìn bá di píparun, Paavo ó dárí ìyàwó rẹ̀ láti fi oye jolo tí ó nyípọ̀ sínú ìyẹ̀fun ṣe ìlọ́po méjì láti le ebi kúrò. Bákannáà ó ṣiṣẹ́ àṣekára, ní gbígbẹ́ àwọn àwọn yàrá láti mú ilẹ̀ gbẹ tí yíò sì dín àìlágbára pápá rẹ̀ kù sí orísun àyàngbẹ̀hìn àti ìrẹ̀dànù dídì kùtùkùtù.

Lẹ́hìn àwọn ọdún ìnira, ní òpin Paavo rí ìkórè ọ̀gbìn ọlọ́rọ̀. Ìyàwó rẹ̀ yọ̀, “Paavo, Paavo, ìwọ̀nyí ni ìgbà inúdídùn! Ó jẹ́ àkokò láti ju àwọn jolo nù, kí a sì béèkì búrẹ́dì tí a ṣe pẹ̀lú wóró nìkan.” Ṣùgbọ́n Paavo fi pẹ̀lú ọ̀wọ̀ mú ọwọ́ ìyàwó rẹ̀ ó sì wípé, “Yí ìlàjì ìyèfun pọ̀ pẹ̀lú joro, nítorí pápá aladugbo wa ti di dídì lórí.” Paavo rúbọ ẹ̀bùn ọpẹ́ tirẹ̀ àti ti ẹbí rẹ̀ láti ṣèrànwọ́ fún aladugbo rẹ̀ tó ṣòfò tí ó sì jẹ́ aláìní.

Ẹ̀kọ́ ti òwe Olùgbàlà nípa àwọn àgùtàn àti ewúrẹ́ ni pé a níláti lo àwọn ẹ̀bùn tí a fún wa—ti àkokò, tálẹ́ntì, àti àwọn ìbùkún—láti sin àwọn ọmọ Baba Ọ̀run, nípàtàkì àwọn aláìlera àti aláìní jùlọ.

Ìfipè mi sí ọmọ Alakọbẹrẹ onítara tí mo dárúkọ ṣíwájú, àti sí ọ̀kọ̀ọ̀kan yín, ni láti tẹ̀lé Jésù Krístì kí ẹ sì gbẹ́kẹ̀lé Ẹ̀mí Mímọ́ bí ẹ ó ti ṣe si ọ̀rẹ́ tímọ́tímọ́. Ẹ gbẹ́kẹ̀lé àwọn wọnnì tí wọ́n fẹ́ràn yín àti ẹnití ó fẹ́ràn Olùgbàlà. Ẹ wá ìtọ̀sọ́nà Ọlọ́run láti mu àwọn okun àìláfiwé yín gbèrú, kí ẹ sì ran àwọn ẹlòmírán lọ́wọ́, àní nígbàtí kò rọrùn. Ẹ ó ṣetán láti pàdé Olùgbàlà, ẹ ó sì lè darapọ̀ mọ́ Ààrẹ Nelson ní jíjẹ́ onírètí pẹ̀lú ayọ̀. Ní ṣíṣe bẹ́ẹ̀, ẹ nṣèrànwọ́ láti múra ayé sílẹ̀ fún Bíbọ̀ Ẹ̀ẹ̀kejì ti Jésù Krístì, ẹ ó sì di alábùkúnfún pẹ̀lú ìrètí tótó láti wọnú ìsinmi àti ayọ̀ Olúwa, nisisìyí àti ní ọjọ́ ọ̀la.

Bí a ti nkọrin nínú ọ̀kan lára àwọn orin titun wa:

Ní orúkọ Jésù Krístì, àmín.