ለክርስቶስ ዳግም ምጽአት ለመዘጋጀት ተሳተፉ

በዚህ ‘’ታላቅ ጊዜ ውስጥ፣’’ የእግዚአብሔር መንግሥት በሚሰፋበት እና ቤተመቅደሶች በምድር በሚበዙበት ጊዜ፣ በእግዚአብሔር ሥራ ላይ ለመሳተፍ ፈቃደኛ የሆኑ ነፍሳት ፍላጎት እያደገ ነው። ያለ ራስወዳድነት ማገልገል የክርስቶስ ደቀመዝሙርነት ዋናው ጉዳይ ነው። ነገር ግን ማገልገል ብዙውን ጊዜ አመቺ አይደለም። ልጆቹን በማገልገል ከራስ ወዳጅነት ነፃ በሆነ መንገድ እግዚአብሔርን ለማገልገል ምኞቶቻችሁን እና ተግዳሮቶቻችሁን ወደ ጎን ያደረጋችሁትን እናንተን የቃል ኪዳን ጠባቂ ደቀመዛሙርትን፣ ውድ ሚስዮናችንንም ጨምሮ፣ አደንቃችኋለሁ። እግዚአብሔር “በፅድቅ … [የምታገለግሉትን እናንተን ያከብራል]።” “ዋጋ[ችሁ]ም ታላቅ እና ክብራ[ችሁ]ም ዘለአለማዊ ይሆናል” በማለት ቃል ገብቷል። ለማገልገል እሺ ስንል፣ ለኢየሱስ ክርስቶስ እሺ እያልን ነው። ክርስቶስን እሺ ስንል፣ ይበልጥ የተትረፈረፈ ሕይወትን እሺ እያልን ነው።

ይህንን ትምህርት የተማርኩት ኮሌጅ ውስጥ የኬሚካል ኢንጂነሪንግ ተማሪ ሆኜ በምሰራበት እና በምማርበት ጊዜ ነው። በአንድ አጥቢያ ውስጥ ላሉ ላላገቡ ወጣቶች የመሳተፊያ እቅድ እንዳወጣ ተጠይቄ ነበር። ይህ ለእኔ እንደ ቅዠት ሆኖብኝ ነበር። ቢሆንም፣ ተቀበልኩኝ፣ እናም በመጀመሪያ የማያስደስት ስራ ነበር። ከዚያም አንዲት ቆንጆ ልጅ የአይስ ክሬም መስተንግዶዬን አይታ በፍቅር ተነክታ ነበር። ቀልቤን ለመውሰድ ስትል ሶስት ጊዜ ትመላለስ ነበር። በፍቅር ወደቅን፣ እናም ከሁለት ሳምንት በኋላም የጋብቻ ጥያቄን አቀረበች። እንግዲህ፣ ምናልባት ያን ያህል የፈጠነ ላይሆን ይችላል፣ እና እኔ ነበርኩ ጥያቄውን ያቀረብኩት፣ ነገር ግን እውነታው ወዲህ ነው፣ ያን የተሰጠኝን ጥሪ እምቢ ብል ኖሮ ከሀይዲ ጋር የመገናኘት እድል አለማግኘቴ የሚሰቅቅ ሀሳብ ነበር።

በእግዚአብሔር ሥራ ውስጥ የተሰማራነው እግዚአብሔር ስለሚፈልገን ሳይሆን እግዚአብሔርን እና በረከቶቹን ስለምንፈልግ ነው። እንዲህም ቃል ገብቷል፣ “ስለሆነም፣ እነሆ፣ በወይኑ ስፍራዬ የሚሰሩትን በታላቅ በረከት እባርካቸዋለሁ።” በእግዚአብሔር ስራ መሳተፋችን አዳኝን ለመገናኘት እንዴት እንደሚባርክ እና እንድንዘጋጅ በመርዳት የሚያስተምሩንን ሶስት መርሆችን ላካፍላችሁ።

በመጀመሪያ፣ ስንሳተፍ ወደ “[ራሳችን] ተፈጥሮአዊ አቅም” እናድጋለን።

ይህንን ሂደት የምንማረው በፍጥረት ታሪክ ውስጥ ነው። ከእያንዳንዱ የሥራ ቀን ክንውን በኋላ፣ እግዚአብሔር የተገኘውን እመርታ “መልካም ነበር” በማለት ገልጿል።” ሥራው አልቋል ወይም ፍጹም ነው አልነበረም ያለው። ነገር ግን በእያንዳንዱ ቀን እድገት ነበር፣ እና በእግዚአብሔርም ዓይን፣ ያ መልካም ነበር!

ጥሪ የግል ብቃትን ለመወሰን ወይም ለማረጋገጥ አይደለም። ይልቁኑም፣ ከእግዚአብሔር ጋር በሚፈልገው ማንኛውም መንገድ ስንሰራ፣ ወደ ራሳችን ተፈጥሮአዊ ልክ እናድጋለን።

እግዚአብሔር በለውጣችን ይደሰታል፣ የምንሰራው ስራ እያለብንም እንኳ ቢሆን፣ እኛም እንዲሁ መሆን ይገባናል። አንዳንድ ጊዜ፣ በጥሪ ውስጥ ለማገልገል ጥንካሬን ወይም ዘዴ ይጎድለን ይሆናል። አሁንም፣ እንደ ጸሎት እና የቅዱሳት መጻህፍት ጥናት ባሉ ትርጉም በሚሰጡ መንገዶች በስራው መሳተፍ እና ምስክርነታችንን መጠበቅ እንችላለን። ፈቃደኞች ስንሆን ነገር ግን ለማገልገል ሳንችል ስንቀር አፍቃሪ የሰማይ አባታችን አይኮንነንም።

ሁለተኛ፣ ማገልገል ቤቶቻችንን እና ቤተክርስቲያናችንን የቃል ኪዳን ኑሮን የምንለማመድባቸው ቅዱሳን ቦታዎች እስከሚሆኑ ከፍ ያደርጋቸዋል።

ለምሳሌ፣ ክርስቶስን ሁል ጊዜ የምናስታውስበት ቃል ኪዳናችን በግለሰብ ደረጃ የሚፈፀም ነው፣ ነገር ግን ይህ ቃል ኪዳን ሌሎችን ስናገለግል ተግባራዊ ይሆናል። ጥሪዎች አንዳችን የአንዳችንን ሸክም በምንሸከምባቸው እድሎች ይከቡናል፣ በዚህም የክርስቶስን ህግ እንፈጽማለን። እግዚአብሔርን በመውደድ እና ቃል ኪዳኖቻችንን መኖር በመፈልግ ስናገለግል፣ አሰልቺ እና አድካሚ ይመስል የነበረው አገልግሎት አስደሳች እና አስደናቂ ለውጥን የሚያመጣ ይሆናል።

ስርዓቶች የሚያድኑን የሰማይን መቆጣጠሪያ ስለሚያሟሉ ብቻ አይደለም። ከዚያ ይልቅ፣ ከእነዚህ ስርዓቶች ጋር በተያያዙት ቃል ኪዳኖች ስንኖር፣ በእግዚአብሔር ፊት መሆን የምንፈልገውን አይነት ሰው እንሆናለን። ይህ ግንዛቤ ለማገልገል ማመንታትን ወይም ላለማገልገል ምርጫዎችን ያስወግዳል። እግዚአብሔር የሚፈቅደውን መጠየቅ አቁመን እግዚአብሔር የሚመርጠውን መጠየቅ ስንጀምር ኢየሱስ ክርስቶስን የመገናኘት ዝግጅታችን ይፋጠናል።

ሦስተኛ፣ በእግዚአብሔር ሥራ መሳተፍ የእግዚአብሔርን የጸጋ ስጦታ እንድንቀበል ይረዳናል።

ስናገልግል የገንዘብ ማካካሻን አንቀበልም። ይልቁንም፣ ቅዱሳት መጻሕፍት እንደሚያስተምሩት፣ “በመንፈስ እንድንበረታ፣ የእግዚአብሔርንም እውቀት እንዲኖረን [እና] … ከእግዚአብሔር በተገኘ ኃይልና ሥልጣን እናስተምር ዘንድ ለአገልግሎታችን [እኛ] የእግዚአብሔርን ጸጋ እንቀበላለን።” ያ በጣም መልካም ልውውጥ ነው!

በእግዚአብሔር ጸጋ ምክንያት፣ መቻል ወይም አለመቻላችን ጥሪን እንድንቀበል መሰረታዊ ነገሮች አይደሉም ወይም ክህሎት ላይ መሰረት ያደረጉ አይደሉም። እግዚአብሔር ፍጹም የሆነ ተግባርን ወይም በስራው ላይ በልዩ ችሎታ እንዲሰራለት አይጠብቅም። እንደዚያ ከሆነ፣ ንግሥት አስቴር ሕዝቧን አታድንም ነበር፣ ጴጥሮስም ቀደምት ቤተክርስቲያንን አይመራም ነበር፣ እናም ጆሴፍ ስሚዝ በዳግም መመለስ ጊዜ ነቢይ ባልሆነ ነበር።

ከአቅማችን በላይ የሆነ ነገር ለማድረግ በእምነት ስንሰራ፣ ድካማችን ይገለጣል። ይህ መቼም ምቾት አይሰጥም፣ ነገር ግን “[በእግዚአብሔር] ጸጋ፣ … እነዚህን ነገሮች የማድረግ ኃይል እንዳለን እናውቅ” ዘንድ ለእኛ አስፈላጊ ነው።

በእግዚአብሔር ሥራ ስንሳተፍ አብዛኛውን ጊዜ እንወድቃለን። ነገር ግን በጥረታችን፣ ኢየሱስ ክርስቶስ ይይዘናል። ቀስ በቀስ ከውድቀታችን እና ከፍርሃታችን እና መቼም በቂ የማንሆን መስሎ ሲሰማን መዳንን እንድንለማመድ ያደርገናል። ለእኛ ከሁሉም በላይ ጥሩ የሆነችውን ትንሿን ጥረት በቅድስና ስናደርግ፣ እግዚአብሔር ይህን ያጎላዋል። ለኢየሱስ ክርስቶስ መስዋዕት ስናደርግ፣ እርሱ ይቀድሰናል። ይህ የመለወጥ የእግዚአብሔር የጸጋው ኃይል ነው። ስናገለግል፣ “በአብ አማካኝነት [በመነሳት]፣ … [በኢየሱስ ክርስቶስ] ፊት ለመቆም [ለመቻል]” እስክንዘጋጅ ድረስ በጸጋ እናድጋለን።

በፊቱ ስቆም አዳኙ የሚጠይቀኝን ሁሉ አላውቅም፣ ነገር ግን ምናልባት አንድ ጥያቄ ሊጠይቅ ይችላል፣ “ማንን ይዘህ መጣህ? ጥሪዎች፣ ሌሎችን ከእኛ ጋር ወደ ክርስቶስ እንዲመጡ የሚረዳቸው ከአፍቃሪው የሰማይ አባት የተሰጡ ስጦታዎች ናቸው። ስለዚህ፣ መሪዎችን እና እያንዳንዳችንን ጥሪ የሌላቸውን ሆን ብለን እንድንፈልግ እጋብዛለሁ። አበረታቷቸው እንዲሁም በእግዚአብሔር ሥራም እንዲሳተፉ እርዷቸው።

ኤጲስ ቆጶሱ ጆንን ሲጎበኘው እና ጌታ የሚሠራው ሥራ እንዳለው ሲነግረው፣ በቤተክርስቲያኗ ውስጥ ንቁ ተሳታፊ አልነበረም። ጆንን ሲጃራ ማጨስን እንዲያቆም ጋበዘው። ጆን ለማቆም ብዙ ጊዜ ሞክሮ የነበረ ቢሆንም፣ በዚህ ጊዜ አንድ የማይታይ ኃይል እንደረዳው ተሰማው።

ከሶስት ሳምንታት በኋላ፣ የካስማ ፕሬዚዳንቱ ጆንን ጎበኘው። በኤጲስ ቆጶስ አመራር ውስጥ እንዲያገለግል ጠራው። ጆን ደንግጦ ነበር። ማጨስ እንዳቆመ ለካስማ ፕሬዚዳንቱ ነገረው። ይህም ማለት እሁድ የእግር ኳስ ጨዋታዎችን የመከታተል ባህሉን መተውም ነበረበት፣ እንግዲህ ያ ብዙ ሊያስቸግረው ይችላል። የካስማ ፕሬዚዳንቱ የመነሳሳት ምላሽ ቀላል ነበር፦ “ጆን፣ እኔ አይደለሁም የምጠይቅህ፣ እግዚአብሄር ነው እንጂ።”

ጆንም፣ “እንዲያማ ከሆነ እኔ አገለግላለሁ” ሲል መለሰ።

ጆን ለማገልገል እነዚህ መሥዋዕቶች ለእርሱ እና ለቤተሰቡ መንፈሳዊ የለውጥ መንገድ እንደሆኑለት ነገረኝ።

እንደ ሰዋዊ አመለካከታችን፣ የማይመጥኑ ወይም የማይገባቸው ለሚመስሉ ግለሰቦች ጥሪዎችን ለመስጠት ስንሞክር አሻግረን እንዳናይ የሚይዘን ነገር አለ ብዬ አስባለሁ። ወይም ደግሞ ከእድገት ትምህርት ይልቅ የአፈጻጸም ባህል ላይ በማተኮር፣ በማይመስሉ እና ባልተፈተኑ ሰዎች ውስጥ አዳኙ እንዴት አቅምን እንደሚጨምርላቸው ማየትን ቸል እንል ይሆናል።

ሽማግሌ ዴቪድ ኤ. ቤድናር “እያንዳንዱ [ሴት እና ወንድ] ግዴታቸውን እንዲማሩ እና እንዲተገብሩ ማስቻል፣” የሚለውን የቅዱስት መጻህፍት ትእዛዝ አስፈላጊነት ያስተምራሉ። ይህን እናደርጋለንን? መሪዎች እና ወላጆች ሌሎች እንዲማሩ እና ለራሳቸው እንዲሰሩ ሲፈቅዱ፣ ያብባሉ እናም ይለመልማሉ። ቀላሉ መንገድ ታማኝ አባላትን ሁለተኛ ጥሪ መስጠት ቢሆንም፣ ከሁሉ የተሻለው መንገድ ለማገልገል አይችሉም ብሎ የሚታሰብባቸውን መጋበዝ እና እንዲማሩ እና እንዲያድጉ ማድረግ ነው።

ክርስቶስ በአካል እዚህ ቢኖር ኖሮ፣ ሕሙማንን ይጎበኛል፣ የሰንበት ትምህርት ቤቱን ያስተምራል፣ ልቧ ከተሰበረች ወጣት ልጃገረድ ጋር ይቀመጣል እንዲሁምም ህጻናትን ይባርካል። እርሱ የራሱን ስራ መስራት ይችላል። ነገር ግን እርሱ እኛ እንድንተገብረው እና እንድንማረው የሚያደርገውን መርሕ ስለሚኖር እንድንሰራበት በእርሱ ቦታ እኛን ይልካል።

በእግዚአብሔር ሥራ መሳተፍ “እግዚአብሄርን የመወከል መብት፣ እድል እና ኃላፊነትን” ያመጣል። ራሳችንን ሳይሆን ክርስቶስን ለማጉላት ስናገለግል፣ አገልግሎታችን ደስታን የሚያመጣ ይሆናል። ሌሎች ከክፍላችን፣ ከስብሰባ፣ የአገልግሎት ጉብኝታችን ወይም ከእንቅስቃሴዎች ሲወጡ፣ እኛን ከማስታወስ በላይ ክርስቶስን ሲያስታውሱ ለስራው ሀይል የሚሰጥ ነው።

አዳኙን ለመወከል ከልብ በመሻት፣ እርሱን እየመሰልን እንመጣለን። አዳኙን ለመወከል ከልባችን በመፈለግ፣ ይበልጥ እርሱን እንመስላለን። ያን ጊዜ እያንዳንዳችን ተንበርክከን ኢየሱስ እርሱ ክርስቶስ ነው ብለን በምንመሰክርበት ጊዜ፣ በእርግጥም እንደሆነ አምናለሁ፣ ለተቀደሰው ወቅት ጥሩ መዘጋጃ ነው፣ እናም ፕሬዚዳንት ራስል ኤም. ኔልሰን “ጌታ ቅርብ ስለሆነ፣ ለዓለም ድርቻ በሙሉ” ለሚመጣው ነገር ይበልጥ “እንድንዘጋጅ” ዘንድ የእርሱ “… ድምጽ ናቸው።’’ ቅዱስ በሆነው በኢየሱስ ክርስቶስ ስም፣ አሜን።