Che Mborayhu Salvador rehe Ha’e Upe Che “Mba’érepa”

Pehechakuaámapiko sapy’areirõ g̃uarã ñande proféta jahayhuetéva, Presidente Russell M. Nelson, ñaneñekombida memeha oikóvo? Nañanemondyiva’erã, ha’e ñanekombidaha ñañemoarandu ha jajepy’amongeta hag̃ua umi mensáhe oñekompartiva’ekue rehe umi mokõi conferencia pahápe. Abril 2024-pe, he’i: “Aha’arõ peñemoarandu jeyjey umi mensáhe ko conferencia-peguápe umi mbohapy mése pukukue jave.” Upéi, octubre 2024-pe, he’i: “Ajerure peẽme peñemoarandu hag̃ua umi [oñe’ẽva] mensáhepe. Peiporu umíva prueba de fuego-ramo pehechakuaa hag̃ua mba’épa añetegua ha mba’épa ndaha’éi ko’ã seis mése oúvape.”

Ko’ã ñekombida ikatu oñembojoapy umi ñekombida profétiko jahupytyva’ekue rehe ñande rekove pukukue aja, ñamoingévo ipype ha ko’yteve umi jahupytyva’ekue umi ary ohasa ramoiteva’ekuépe. Ikatu ñañandu térã ñaimo’ã ko’ã ñekombida ha’eha ambue mba’e ñamoĩva’erãha umi ñane rembiaporã apytépe ñañekombida térã ojejerure haguérente ñandéve jajapo hag̃ua. Ha katu, oiménepa ambueve mba’e?

Ajepy’amongetávo ko mba’e rehe ha opa umi ñekombida jahupytyva’ekuére, chemandu’a peteĩ mba’e añemoaranduva’ekue ha aiporavo ajapo ymaite guive. Añeha’ã ajapo ko’ã mba’e oñeikotevẽvéva chéve g̃uarã ahayhúgui Chupe; che ahayhu ñande Salvador-pe. Kóva ha’e upe mba’érepa añetegua ha ipu’akapavéva che ajapoha upe ajapóva, ha oñembojoajúvo kóva ndive oĩ che mborayhu penderehe, che hermano ha hermana-kuéra.

Pene hermano ramo, aipota pehechakuaami umi che ñe’ẽ peteĩ ñekombida añetéramo peheka hag̃ua peikumby pe oportunida ñambojoaju hag̃ua opa mba’e jajapóva ñane mborayhu rehe pe Salvador-re.

Jajapóramo kóva ñanepytyvõta ñaikumby pe añetegua “mba’érepa” opa mba’e jajapóva rapikuéri pe Salvador discípulo ramo. Kóva ñanepytyvõta ñamombarete hag̃ua ñande joaju konvénio rupi Tupã ndive, ñaikumbývo umi Imba’e añetegua divína ha ijapyra’ỹva—umi Imba’e añetegua ha ijapyra’ỹ katuetéva araka’eve nokambiamo’ãiva. Añetegua ijapyrã´ỹva ha’eháicha “Tupã ohayhuetereígui ko yvórape, ome’ẽ Ita’ýra peteĩetéva, opavave ojeroviáva guive hese ani hag̃ua oñehundi, ha katu toguereko tekove ijapyra’ýva.”

Iñinteresante sapy’ánte jajapo memégui umi mba’e, og̃uahẽ oiko umívagui tradisiõ jepe, jaheja ko’ã tradisiõ térã tembiaporã tomboguata umi ñane ñeha’ã ñamopu’ã hag̃ua jerovia Jesucristo rehe. Ha’ete ku jajapóva ko’ã mba’e jajapógui heta ary pukukue aja, jahechakuaa’ỹre ohejaha ipypore ñande joaju rehe konvénio rupi pe Salvador ndive.

Ñande múndope, jepivéramo jajehesareko umi mba’e jajapóva rehe ha jahupyty meme hag̃ua umi tembiaporã ha méta. Ko ñande jerére espiritual-pe, jaguereko pe oportunida jahávo amo gotyove umi mba’e jejapo térã umi méta jehupyty añógui ñaikumbývo mba’érepa jajapo umíva. Ikatúramo ñaikumby ha ñambojoaju upe mba’erupivépa oĩva umi ñane rembiapo rapykuéri ojoajuha ñane mborayhu rehe upe Salvador ha ñande Ru Yvagaguáre, jaiporuporãramo ko’ã oportunida ñaikumbýta jajapóramo jepe umi mba’e hekojojáva jaguerekoháicha umi Tupaopegua tembiaporã térã tradisiõ ha jajapo umíva hekopete ha’eha peteĩ mba’e iporãva, upevére, ñambojoajúvo umíva upe “mba’érepa” ndive, jajehovasáta ñaikumby hag̃ua upe mba’erupivépa. Ndaha’emo’ãi jajapótava añónte umi mba’e iporãva térã jajapo porã; avei jajapopa porãta.

Tembiecharã, pemoĩvo peteĩ méta pemoñe’ẽtaha umi escritura, peikuave’ẽtaha ñembo’e añetegua térã pembosako’itaha peteĩ tembiaporã pende rogaygua térã barrio-pe g̃uarã, pe méta añetete ha’épa pehupyty hag̃uánte ko’ã tembiaporã? Térãpa ko’ã tembiapo ha’e umi tape, tembiporu oĩva pende poguýpe, pehupyty hag̃ua pe méta añetegua? Pe propósito ha’épa jajapo hag̃uánte peteĩ tembiaporã jajapo haguére upéva heta ary pukukue aja ha upéi ñamarka pe kasílla jajapopamaha? Térã, peteĩ jey, ha’épa ko’ãva umi tape jaipurúva jaikuaa, ñañandu ha ñañembojoaju hag̃ua pe Salvador ndive?

Ajeruremínte peẽme ani pentende vai upe che aimo’ãva umi tembiaporã ha tradisiõ ojeguerekova’erã rehe térã oñemoĩ umi méta ha oñemba’apo mbarete ojehupyty hag̃ua; ndaipóri mba’eve ivaíva ko mba’épe. Upevére, pokombida peipe’a hag̃ua pene korasõ ha pene apytu’ũ pe oportunida ha jehovasápe g̃uarã peikumby hag̃ua mba’érepa jajapo ko’ã mba’e ha mba’éichapa ñamomba’apo ñande religiõ.

Peteĩ tembiecharã iporãmbajepéva umi tradisiõ ojehesarekóva Cristo rehe ha’e pe desafío Presidente Dallin H. Oaks oipysova’ekue opavave ñandéve Primera Presidencia rérape. Presidente Oaks he’i: “Jaikévo ko ary pyahúpe, ñañembosako’i peteĩ Pascua Jesucristo jehasa’asy expiatorio rehegua jaguerohory hag̃ua. … Taha’eha’éva ambue tapichakuéra oguerovia térã ojapóva, jagueromandu’ava’erã ñande Salvador oikovéva Jeikovejey ñañemoarandúvo Imbo’epýgui ha ñaipytyvõvo ñamopyenda hag̃ua umi tradisiõ Pascua rehegua ñande socieda tuichakue javeve, ko’yteve umi ñande rogaygua tee apytépe.” Pehechaháicha, ndaha’éi peteĩ ñekombida añónte jaguereko hag̃ua umi tradisiõ. Upéva rangue, jaipuru ko’ã tradisiõ peteĩ tape ramo jaikuaave hag̃ua pe Salvador-gui ha ñanemandu’a hag̃ua Ijeikovejeýre.

Ikatúramo ñambojoaju hetave upe mba’erupivépa ñane mborayhu rehe pe Salvador-re, ñandekatupyryvéta jahupyty hag̃ua pe ñaikotevẽva térã jahekáva. Presidente Nelson he’i, “Taha’eha’éva ñeporandu térã apañuãi peguerekóva, pe ñembohovái akóinte ojejuhu Jesucristo rekove ha mbo’epykuérape.” Ha upéi oipyso ko ñekombida: “Peikuaave Ijexpiasiõ, Imborayhu, Iporiahuvereko, Idoctrina ha Iñevanhélio restaurado ñemonguera ha akãrapu’ã reheguágui. Tapeho Hendápe! Pesegi Chupe!”

Pejepy’amongeta kovare pene korasõ ha apytu’ũme: Peguerovíapa Presidente Nelson ñekombida oha’ãha ñanepytyvõ ñambosako’i hag̃ua peteĩ lísta jeverifikaha ñambyatytahápe hetave mba’ekuaa ha ñamohu’ãtaha umi tembiaporã ikatu hag̃ua jaipe’a inekombida ñane rembiaporãnguéra lista-gui? Térãpa ha’e ñanekombida jahechakuaa hag̃ua ko’ã añetegua ha prinsípio opave’ỹva ra’anga peteĩ oportunida ramo ñaikumby hag̃ua upe mba’érepa ha ñambojoaju ñanderehe pe Salvador mborayhu konvénio rupi upe ñande discipulado opa tekove pukukue aja rape rehe?

Pehejami tamohaʼanga peẽme pe prinsípio añehaʼãva ambohasa. Peteĩ jeporavo, ikatu oho mombyryvéva, ha’e amoñe’ẽ opa conferencia mensáhe peteĩ jave, ha ajapopávo, aipe’a ko ñekombida che rembiaporã lístagui ajapove’ỹre mba’eve pe amoñe’ẽva’ekue rehe. Antende kóva ha’eha peteĩ káso ohóva mombyryvéva, ha katu ndaha’éi mbaʼe oikoʼỹva. Oiméne, heta oĩva peteĩ púnto kóva ha pe oñehaʼarõva tahaʼe apytépe.

Pe ñekombida ha’ehína ñañemoarandu ha jajepy’amongeta umi mensáhe conferencia general-peguágui ha jaipuru jahekomeʼẽ ha ñaikumby hag̃ua mba’épa ikatu jajapo peteĩteĩva ñamehora hag̃ua.

Ñamog̃uahẽvo pe ñekombida, ñaikumby upe mba’érepa oĩva hapykuéri, jaguerekóta hetave oportunida ñañemoag̃uive hag̃ua pe Salvador-re. Ñañepyrũta ñaikumby pe ahayhúgui Salvador-pe, aikuaaseveha Hesegua añemoarandúvo profetakuéra oikovéva ñe’ẽme. Ha ahayhúgui che rapichakuérape, akompartíta umi profeta, vidente, ha revelador mbo’epykuéra ambuéva ndive, añepyrũvo umi ahayhúva ndive.

Mokõive ehémplope, rejapohína peteĩ mbaʼe hekojojáva. Peteĩme, pe méta ha’ete ku ojeiporuva’erãha umi tape Túva Yvagagua ha Salvador ome’ẽva’ekue ñandéve, ha’éva umi mensáhe oñekompartiva’ekue conferencia general aja. Pe versiõ mokõiha oñañuã pe jehovasa pypuku ojehupyty hag̃ua kuaapy umi mba’erupivépa rapykuéri oĩvagui, oikuave’ẽvo peteĩ tape oñeikumby hag̃ua umi añetegua ijapyra’ỹva ha umi jehovasa oñeprometéva opavave ojapóvape g̃uarã ñande Salvador Jesucristo mbo’epy ha rekovégui, pe hekovekuéra ojehesarekoha apyte.

Hermano ha hermana-kuéra pohayhuetéva, aipota peñandu ha pehecha iñimportanteha ñambojoaju umi ñane rembiapo ñane mborayhu rehe pe Salvador-re. Peteĩ mundo globalizado-pe, heta ñe’ẽ oñeha’ãta oinflui penderehe ha, ikatúramo, pendegueraha peguerovia oĩha añetegua fundamental Jesucristo evanhélio restauradopegua natekotevẽiha. Ko’a ñe’ẽ oñepyrũ pe añetegua esencial-gui tekotevẽha peteĩ restaurasiõ ko’ã ára pahápe, oikehápe tekotevẽha jaguereko Tupã réino ko yvy ape ári, oñerrepresentáva Jesucristo Tupao Santokuéra Ára Pahapegua ojerrestaurava’ekue rehe.

Ikatu pehendu ñe’ẽ oha’ãhatãva peteĩ relasiõ personal térã entendimiento añónte upe Salvador ndive oĩporãmaha ha pe religiõ térã pe Tupao ojerestaurava’ekue natekotevẽiha térã ndaha’eiha esencial. Pokombida mbeguekatumínte pekonsidera hag̃ua térã jepe peime inmune ko’ã idea oporombotavýva influencia-gui ha penemandu’a pya’eve hag̃ua umi mba’e Salvador he’i ha ñanembo’eva’ekuere ymaite guive—peñepyrũvo Túva Yvagagua ha Jesucristo mborayhúgui ñanderehe ha pembojoajúvo ñane mborayhu Hesekuéra ha’eha upe mba’erupivépa ramo jasegui hag̃ua Chupekuéra.

Tupã upe Túva ha Ita’ýra ou ha oñe’ẽkuri José Smith ndive omoĩjey hag̃ua Jesucristo Tupao ha omoñepyrũ hag̃ua pe dispensasiõ umi ára oñekumplipaiteha, Irréino ko yvy ape ári. Upévare, Jesucristo Tupao Santokuéra Ára Pahapegua ha’e pe tape oñemoĩva’ekue Túva Yvagagua rupive jaike hag̃ua umi konvéniope ñanderejáva jaha jey ñande rógape. Upéicharõ, ñaikotevẽve hetave peteĩ relasiõ personal-gui Túva Yvagagua ha Ita’ýra ndive; ñ aikotevẽ umi sacerdocio ordenánsa tekotevẽpy jajapóva rupive umi konvénio Hendivekuéra. Kóva ome’ẽ peteĩ joaju konvénio rupi Hendivekuéra ha ome’ẽ ñandéve jaike Imborayhukuéra konvéniope, ikatu hag̃uáicha jahupyty pe réino glória ijyvatevéva oñembosako’íva umi heko añete ha ijeroviarekóvape g̃uarã ikonveniokuérare.

Opa che ánga mbarete reheve, ame’ẽ testimonio ñande Salvador Jesucristo reko añete ha divinida rehe. Ha’e penderayhu. Ha’e oikuaa mba’épa oiko pende rekovépe. Umi Ipo ojepe’a, omyasãivo ñekombida “Eju che rendápe, … ha che pomombytu’úta.”

Che ahayhu Salvador-pe, ha che mborayhu Hese ha’e upe che “mba’érepa.” Jesucristo rérape, amén.