Vy’a Discipulado Konvénio rupi

Peteĩ ára 2023-pe, Uyanga Altansukh omba’apo hína táva Darkhan Mongolia norte-gua Mongóliaygua presidente de misión oike vove imba’apo rendápe. Iñe’ẽnguérape:

“Ahecha ichupe ha aimo’ã orekoha tesape mimbi hovápe. Ha’e horyeterei ha ombovy’a oĩva ijerépe, ha che añandu pe tory. Ha’e oho mboyve, aporandu chupe mbovy mba’e. Mbovy ára rire, ou jey che mba’apo rendápe ha oporandu chéve ikatúpa aha itupaópe. Che aimo’ã upéva cheipytyvõkuaaha. Che ajeipy’apýkuri che ñemoñare ára oútavare, pe sociedad ha’etégui henyhẽha jeipy’apy ha pytũgui. Che aipota che mitãnguéra toiko ko karaícha, tesape hovápe, omosarambívo vy’a opavave jerereguápe.

“Peteĩ ára umi misionero orembo’e diezmo léi. Che mitãnguéra he’i vy’apópe, ‘Ñahepyme’ẽva’erã ñane diezmo, Mamá.’ Ikatu ahecha che mitãnguéra jerovia upérõ. Ajoaju mboyve Tupaópe, ahecha conferencia general ha ahendu Presidente Russell M. Nelson oñe’ẽrõ. Ha’e omomarandu oĩtaha templo pyahu opa pe yvy ape ári ha he’i peteĩ templo pyahu oñemopu’ãtaha Ulan Bator, Mongolia-pe. Avy’a ha añohẽ tesay, ndaikũmbýi jepe mba’érepa. Ko vy’a reheve, ahechakuaa che jerovia ha testimonio okakuaaha hína.”

Uyanga, heta ambue tapicháicha, ha’e pehẽ ko ñembyaty guasu Israel reheguágui Jesucristo Jeju Mokõiha ñembosako’irã. Ha’e oñepyrũma ije’oi konvénio rapépe ha oikóma chugui Cristo-gua discípulo. Mba’e he’ise taha’e Cristo-gua discípulo? Che arohory ñe’ẽ japonés discípulo-guáva—deshi—de he’ise tyvýra, ha shi he’ise mitã.

Jesucristo he’i, “[Oimehague] Túva ndive iñepyrũmbýpe, ha ha’e upe Primohénito”. Ha’e ha’éva rupi, ha mba’e ojapóva rupi, ñatupãitũ Ichupe, ñamomba’eguasu Ichupe, ñame’ẽ gloria Ichupe ha jaha Hapykuéri. Cristo ñanerredimi, ha tapiaite peve ñandeaguyje Iñeikuave’ẽ apyra’ỹ ha expiatorio-re.

Jaguereko peteĩ Túva Yvagagua, ñanderayhúva Ita’ýra ha itajýra ramo. Imborayhu ñanderehe iporãmbaite. Jesucristo ha imisión ohechauka Tupã mborayhu ñanderehe. Juan ohai haguéicha, “Ohayhuetégui Tupã ko yvórape ome’ẽva’ekue Ita’ýra peteĩetévape, opavave ojeroviáva guive Hese ani hag̃ua oñehundi, ha katu oguereko hag̃ua tekove ijapyra’ỹva”.

Ñande je’ói ñaikũmby hag̃ua mba’e ndajaikuaáiva, sapy’a ikatu jajeko ñande yvypegua jehasáre, térã mba’e jaikuaáva rehe. Techapyrã, ikatu ñañemoarandumi Tupã pe Túva mborayhúgui ñande jehaságui túva ramo ha ñande rogaygua yvypegua joaju jehaságui. Upevére, ñañangarekova’erã ani jaiporueterei ko’ã ñembojoja ñañeha’ãvo ñaikũmby ñande Ru Yvagagua. Tupã pe Túva reko mombyry ijyvateve oimeraẽ yvypóra ho’apyréva reko oĩporãmba’ỹvagui. Tupã pe Túva ha’e pe Túva oĩporãmbaitéva. Ha’e iporãmbaite mborayhu, tory, ñeha’arõkuaa, ñeikũmbype, ha iglorioso porãmbaite. Ñande jajeroviakuaa porãmbaite Hese. Cristo mborayhu ohechauka Tupã pe Túva mborayhu ha ha’e upe mborayhu ñemoha’anga.

Jesucristo ha’e mokõivéva upe techapyrã ha upe tape. Cristo-pe, ñaikũmby porãvekuaa pe Túva rekoporãmbaite ha Iplan. Cristo rupi, ñandéve oñeme’ẽ pu’aka ñanderejáva ñandepu’aka ñande kuimba’e ha kuña reko natural oiko hag̃uáicha ñandehegui Túvaicha.

Ñande Ru Yvagaguáicha, Jesucristo iporiahuvereko ha hekojoja porãmbaite. Ko’ãva reko divino joja ha poriahuvereko rehegua noñemoĩri ojuehe. Ha’ekuéra ojopytyvõ. Mokõivéva joja ha poriahuvereko ohechauka Tupã mborayhu porãmbaite Iñemoñarére. Jajeroviakuaa Tupã pe Túva ha Jesucristo-re ha’ekuéra ijoja ha hekojoja rupi opavave ñanendive.

Tupã pe Túva ha Ita’ýra, Jesucristo, oĩporãmbaite ojoykére jehupytyse ha mborayhúpe. Tupã ha Jesucristo ñanderayhúgui, oñeme’ẽ ñandeve poja ha privilegio discípulo añete ramo jajapo hag̃ua konveniokuéra Hendivekuéra. Jajapóvo upéva, ñande joaju Cristo ndive ojeipyso: “Ha koʼág̃a, pe konvénio pejapovaʼekue rupi peñehenóita Cristo ñemoñare, itaʼýra ha itajyrakuéra; ha péina ápe, ko árape haʼe penemoheñói espíritu reheguávape; peje niko pene korasõ oñemoambuehague pejerovia haguére hérare; upévare, penereñói chugui ha oiko pendehegui itaʼýra ha itajyrakuéra.”

Discípulo ramo, jajapo ha ñañongatúvo umi konvénio marangatu jajehovasa pu’aka espiritual reheve. Jajoaju Cristo ha Tupã pe Túva ndive peteĩ joaju imbojojaha’ỹvape ha ñañandukuaa Imborayhu ha vy’a peteĩ medida oñeñongatúva umi ojapóva ha oñongatúva konveniokuérape g̃uarã. Ñande katupyry ñañandu hag̃ua Tupã mborayhu medida renyhẽ, térã ñaĩ meme hag̃ua imborayhúpe, odepende ñande apose ha rembiapo hekojojávare.

Juan, capítulo 15, versículo 9-pe, ñamoñe’ẽ, “Pe Túva cherayhu haguéicha, che pohayhu avei.“ Ha upéi ñañekombida: “peĩ meme che mborayhúpe.”

Pe versícul oúvape, oñeme’ẽ ñandéve tape ñakontinua hag̃ua Imborayhúpe: “Pejapóvo che rembiapoukapykuéra, pepyta che mborayhúpe; che ajapo haguéicha che Ru rembiapoukapykuéra ha apyta imborayhúpe”.

Upéi jahecha versículo 11-pe mba’érepa ñañongatuva’erã umi tembiapoukapy: “Ko’ã mba’e che ha’e peẽme, che vy’a opyta hag̃ua pende ryepýpe, ha pende vy’a henyhẽ hag̃ua.”

Discipulado añete konvénio rupive, ñañepyrũ ñaikũmby porãve Tupã reko ha pe vy’a Ha’e oipotáva opa Iñemoñare toñandu. Avei ñañepyrũ ñaikũmby mbovy principio ñepyrũháme ikatúva ha’ete oporomoapañuãiva. Techapyrã, mba’éichapa Tupã orekokuaa vy’a renyhẽ oĩvo Ita’yrakuéra apytépe umi ohasa’asyetereíva? Ñembohovái oĩ Tupã jehecha porãmbaitépe ha Iplan porãmbaitépe. Ha’e ñanderecha ñepyrũmby guive jahakuaaha glorioso peve. Ha’e ome’ẽ ñandéve peteĩ tape, Ita’ýra Jesucristo rupive, opavave ñandéve g̃uarã, Iñemoñare, jagueropu’aka hag̃ua ñembyasy, jehasa’asy, angaipakuéra, py’arasy, ha tekora’eño ko yvypegua rehegua. Tupã ome’ẽ ñandéve pe tape ha jeiporavokuaa.

Techapyrã umi oñanduva’ekuégui vy’a discipulado rupi ñanepytyvõkuaa ñaikũmby porãve ko mba’e. Ikatu pehendúma pe ñe’ẽnga he’íva nande vy’a ikatu tuicha ñane ñemoñare ovy’a’ỹvéva pevénte. Ahecháma péva natekotevẽi upéicha tapia. Che sy ombotýmava 94 ary oguereko 200 ñemoñare oikovéva. Oimeraẽ árape, peteĩ jepe umi 200-gui ndovy’amo’ãi. Ko ñe’ẽnga añetéramo, che sy oĩta vy’a’ỹ opa’ỹvape, ha ha’e ndoĩri péicha. Opavave oikuaáva ichupe oikuaa mba’eichaitépa ha’e ovy’a.

ko’ág̃a amombe’use ambue jehasa. Enero 2019-pe, che rembireko Debbie ha che roñekombida Presidente Nelson mba’apo kotýpe. Ha’e omoĩ peteĩ apyka ag̃ui orehegui, ha roguapy haimete orerenypy’ã ojávo. Oipyso rire oréve ore llamamiento roguerekóva ko’ág̃a, Presidente Nelson ojere Debbie gotyo ha ojesareko hese. Ha’e hory, ohechauka mborayhu, ikyrỹi ha henyhẽ vy’águi, peteĩ túva térã taita iporãmbávaicha. Ha’e ojapyhy ha oipete’i Debbie póre, oasegurávo ichupe oĩporãmbataha ha ñande rogaygua ojehovasataha. Ha’ete oréve upérõ ore ha’eha tapicha iñimportantevéva ichupe g̃uarã ha orekoha opa ára yvypegua oréve g̃uarã. Rosẽ imba’apo kotýgui upe Viernes ka’aru jave roñeñandúvo oñakarapu’ã, ojehayhu, ha ovy’áva.

Pe lunes rohecha umi marandu pyahu. Upe ára Presidente Nelson ohasa haguépe ore ndive, peteĩ itajýra omano cáncer-gui. Roñemondýi. Ore korasõ henyhẽ roñembyasy vove hese ha hogayguakuérare. Ore korasõ henyhẽ avei aguyjégui ijesarekóre Cristo-ichagua oréve g̃uarã oñembyasy jave itajýra ohasa’asyva’ekuére.

Rojeipy’amongetávo ko jehasáre, roñeporandu, “Mba’éicha ikatu ha’e horyete, ohechauka mborayhu, ha vy’a jepe ára upeichaite hasývape?“ Ñembohovái ha’e ha’e oikuaágui. Ha’e oikuaa Cristo ipu’akapamaha. Ha’e oikuaa oiko jeytaha itajýra ndive ha ohasáta peteĩ apyra’ỹ hendive. Vy’a ha jehechakuaa apyra’ỹ ou jajoajúvo pe Salvador-re jajapo ha ñañongatúvo konveniokuéra ha Cristo-ichagua discipulado.

Presidente Nelson ombo’e: “Salvador ome’ẽseháicha ñandéve py’aguapy, ‘ohasáva oimeháichagua ñeikũmby ári’ [Filipenses 4:7], avei ome’ẽse ñandéve vy’a’asy, pypuku ha ipyrusúva oñemoĩva yvypóra lógica téra yvygua ñeikũmbýre. Techapyrã ramo, ha’etévaicha ndaikatumo’aiha reñandu vy’a ne mitã hasy ramo mba’asy ndokueráivagui térã repyta ramo mba’apo’ỹre, térã nde ména térã rembireko netraiciona ramo. Ha katu upevaite ha’e pe vy’apavẽ pe Salvador oikuave’ẽva.”

Jajapo ha ñañongatúvo konveniokuéra, ñandejeheguínte ñama’ẽta okágotyo ha jarekóta potapy ñaipytyvõ hag̃ua ambuekuérape oñandu hag̃ua pe vy’a ha mborayhu medida ñañandúva ñande joajukuéra konvénio rupiguápe. Ñande ikatu ha’e pehẽ pe tembiapo tuichavévape ko yvórape ko’ágã—Israel ñembyaty. Jaipytyvõkuaa tojegueru Tupã ñemoñare Cristo-pe. Profeta Jacob ombo’eháicha, “Ha pejehovasa peẽ; pembaʼapo haguére chendive jesarekópe che víñape, ha peñongatúkuri che rembiapoukapykuéra, ha pegueru jey chéve pe yvaite, … péina ápe peẽ pevyʼáta chendive pe che víñapegua yva rupi.”

Ñañeha’ãvo ñamba’apo hag̃ua discípulo konvenio rupi ramo, taha’e ha’éva ñande katupyrykue, ñande joaju Túva ha Ta’ýrandi oñembopypukuve, ñande vy’a oñemombarete, ha ñande apyra’ỹ jehecha ojeipyso. Ñañeinvesti upérõ pu’akáre ha ñañandukuaa vy’a peteĩ medida oñeñongatúva umi Tupã discípulo añete konvénio rupi peg̃uarã. Jesucristo réra sagrádope, Amén.