Peteĩ Mitã Michĩvaicha

Jesús oñepyrũ Hekove yvy ári ary paha omombaretévo Ijapostol-kuéra ñehekombo’e. Imarandu ha Itupao Ha’e omopu’ãva’ekue oikovétaramo Ha’e oho rire, hetave ojehaiva’erã umi doce kuimba’e jepiguáva oikuaáva Chupe ojapo 24 mes ajánte korasõ ryepýpe.

Peteĩ ára Jesús ohecha oĩha peteĩ ñe’ẽjoavy umi doce apytépe ha oporandu upéi, “Mba’ére peikovaihína oñondive?” Ojekuaa porã otĩgui upeichagua joavýre, “ojoko hikuái ipy’aguapy,”he’i jehaipýpe. Ha katu ko mbo’ehára tuichavéva opavavégui oñandúkuri ikorasõme oĩva ha oñandu upépe pe oñembotuicháva ijupe remiandu ñepyrũ. Upérõ Ha’e “ohenói peteĩ mitã michĩ, …

“Ha he’i, Añetehápe ha’e peẽme, Napeñemoambuéiramo, ha oiko pendehegui mitãmícha, ndapeikemo’ãi reino yvagaguápe.

“Oimeraẽva upérõ oñemomirĩva ijupe ko mitã michĩvaicha, upéva pe tuichavéva pe reino yvagaguápe.”

Ojehechava’erã Cristo heñói mboyve jepe, Rréi Benjamín ñe’ẽpahápe oike avei ko ñe’ẽ pypuku mitãmi ñemomirĩ rehegua. He’i, “Ha pe yvypóra inaturálva haʼe Tupã hayhuʼỹha, … ha haʼéta tapiaite peve, [noñemomarangatúiramo] pe Cristo Ñandejára expiasiõ rupive, ha haʼejey peteĩ mitã michĩvaicha, iñeʼẽrendúva, … oñemomirĩva, …, henyhẽva mborayhúgui, … pe mitã michĩ [ombohovaiháicha] itúvape.”

Ko’ágã, oĩ mba’e hesakãva imitãrekoha ndaha’éi ñamyañáva tojejapo. Ojapóma 25 ary, che nieto orekóva upérõ mbohapy ary oisu’u heindýpe, che nieta upérõ orekova’ekue cinco ary, ijyvápe. Che rajy ména, oñangarekóva umi mitãre upe pyhare, pya’e ombo’e itajýrape opa py’aguapy ñehekombo’e ikatúvare imandu’a, ohechakuaávo pe mitã michĩvéva katuete ndoikuaáichene ni mba’éichapa oñeñandu peteĩ jyva jeisu’u. Upe túva ñeha’ã oiko porã peteĩ minuto-re, ikatu minuto y medio-re, oĩ peve peteĩ tasẽ omboryrýiva umi ovetã oúva mitã kotýgui che nieta osapukaihápe, “ko’ágã katu oikuaáma“.

Mba’épa upéicharõ ha’e umi mba’e jahechava’erã tekove imitãveva virtud-gui? Mba’épa ogueraha Cristo-petevoi tasẽme pe mombe’u ikyrỹivévape opa pe Mormón Kuatiañe’ẽme? Mba’épa Jesús ombo’eva’ekuehína Ha’e ombou vove tata yvagagua ha ánhel mo’ãha umi mitã jerére, omandávo umi kakuaápe “[toma’ẽ imitãnguérare]“?

Ndajaikuaái mba’érepa ojapo upéva, ha katu aimo’ãva’erã orekoha mba’e ipotĩngue ha imara’ỹ reheve, imirĩ teete, ha umi mba’e umíva ikatúva ogueru ñande rekovépe.

Mbaʼérepa ñande ára ñembyasy rehegua ojehero peteĩ proféta rupi “mbaʼerei mbaʼereígui”? Mbaʼéichapa “umi mbaʼepotarei ha ñembotuicha ijupe oguerekóva yvyporakuéra raʼy“ haʼe ñeʼẽ ohechaukáva pe óga tuicha ha ipyrusúva omanóva espiritualmente Lehi visión-pe? Ha umi Zoramita, upe aty oñembo’éva ijupe g̃uarãnte? Chuguikuéra Alma he’i, “O Tupã, [oñembo’e ndéve] hikuái ijuru rupi, oñembotuichávo … umi yvorapegua mbaʼerei reheve.”

Mbojojápepa, oĩ mba’e he’ẽvéva, ipotĩvéva, térã imirĩvéva peteĩ mitãmi oñembo’evovégui? Ha’e pe yvága oĩramog̃uáicha pe kotýpe. Tupã ha Cristo ha’e añeteguaite, ha katu ambuekuérape g̃uarã uperire, pe jehasa ikatu ndaipypukúi.

Elder Richard L. Evans he’i haguéicha ojapóma 60 ary rupi: “Heta ñande ja’e ñane Cristiano-ha, ha katu ñande … ndajapenái Hese añeteguáme. … Ñamoherakuã Chupe, ha katu ndajasegíri Chupe. … Ja’ejey Ha’e he’iva’ekue, ha katu ndajaikói umi ja’évare.” “Ñandejurujái Hese, ha katu ndajatupãitũiri Chupe.”

Mba’eichaitépa tekove iñambuevaʼerãmoʼã pe yvóra ohayhu rire Jesús-pe peteĩ jurukyʼa ñeʼẽ árigui sapyʼapy’a.

Ha katu umi mitã ohayhu Chupe añete, ha upe mborayhu ikatu oho ambue ijoajukérape hekove ñembosarái rendápe. Jepive, Jepe umi ary imitãvévape, mitã hasy’ỹ ohayhu hag̃ua, pya’e oñyrõ hag̃ua, ha ijepuka omboykukuaa pe korasõ ho’ysã ha hatãvéva.

Néi, pe lista oho ha ohovénte. Tekopotĩ? Jerovia? Py’aguasu? Carácter?

Peju chendive jahecha hag̃ua pe Tupã renondépe ñemomirĩ peteĩ che angirũ imitãva ahayhuetévape ohechaukáva.

Enero 5, 2025-pe—ojapo 91 ára—Easton Darrin Jolley-pe oñeme’ẽ Sacerdocio Aarónico ha ojeordena diácono ramo Jesucristo Tupao Santokuéra Ára Pahapeguápe.

Easton ombohasaseterei Ñandejára Sacramento heta árama, imandu’akuaa guive. Ha katu ko poja marangatu ou kyhyje oipy’arasýva chupe, ojavýrõ g̃uarã, ho’árõ g̃uarã, oñeñembohorýrõ g̃uarã hese térã hogayguakuérare.

Pehechami, Easton oguereko peteĩ mba’asy ndajepiguáiva ha oporombyaietéva, distrofia muscular congénita de Ullrich. Omyenyhẽ kakuaa hekove mitãme ñeha’ã tuichaitereíva reheve omongu’ívo iñeha’arõ ha ikerayvotykuéra ára oúvape g̃uarã. Ha’e nda’aréi ko’ag̃a rire oĩta silla de ruedas ári opa hi’ára pukukue. Hogayguakuéra noñe’ẽi mba’e oha’arõvagui chupe uperire.

Domingo iñordenación rire, Easton ombohasáta kuri Sacramento jey peteĩha ramo. Ha omyañáva chupe ñemiháme ha’ékuri ikatutaha ojehechauka ijupe ha ombohasa ko’ã ñemoha’anga marangatu itúvape, ha’éva obispo upe barrio-pe. Oñemotenondévo hembiapógui ha’e ojerure’asy ha ojerure’atã, hasẽ ha ojerureve, oñeme’ẽ hag̃ua chupe garantía avave, avavete, noñeha’ãmo’ãiha oipytyvõ chupe. Heta mbaʼére, imbaʼerãitéva, haʼe oikotevẽ ojapo kóva haʼeño ha pytyvõʼỹre.

Umi presbítero opesa’ã ha ohovasa rire pe mbujape—peteĩ ñemoha’anga ohechaukáva Cristo rete opẽva—Easton, hete opẽva rehe, karẽme oguata oñeme’ẽ hag̃ua chupe imbujape bandeja. Upevére, oĩkuri mbohapy escalón yvate pe ñembyaty renda yvýgui pe púlpito peve. Upéicha, oñemeʼẽ rire chupe pe bandeja, haʼe ojeipyso yvate ikatuháicha ha omoĩ upéva pe pasamanos ári. Upéi, oguapývo peteĩ umi escalón ijyvatevéva ári, mokõive ipópe ombohupi hetyma akatúa pe escalón peteĩha ári. Uperire ombohupi hetyma asu pe escalón-pe, ha upéicha ojapove, hasýpe, ojupipa peve ijyvyty Everest mbohapy escalón oguerekóvare.

Uperire oñeha’ã ipojái peteĩ poste pe estructura reheguáre ikatúva rupive ojejoko ha oñembo’y. Oho upéi pebandeja oĩháme. Mbovymi jeguata rire oñembo’y pe obispo renondépe, itúva, hesay pororóva ha hesay hováre, ha ojejokova’erã ani hag̃ua oañua ko ita’ýra ipy’aguasu ha ijeroviarekoitévape. Ha Easton, py’apytu’u reheve ha tuicha pukavy hovápe, ikatu he’i, “Che aglorifika [che rúpe ha] ajapopa pe tembiapo [ha’e ome’ẽva’ekue] chéve ajapo hag̃ua.”

Jerovia, tekojerovia, tekopotĩ, jejerovia, terakuã ha, ipahápe, mborayhu upe túvare ha’e ombovy’asévape. Ko’ãva ha docena ambue cualidad ojapo ñandetaja’e avei, “Oimeraẽva … oñemomirĩva ijupe ko mitã michĩvaicha, upéva pe tuichavéva pe reino yvagaguápe.”

Hermana ha hermano ha angirũnguéra, yvate umi lista ta’anga iporãvéva rehegua aikuaávape oĩha umi mitãra´y ha mitãmi ha mitãrusukuéra iñakãporã ha ojehepyme’ẽkuaa’ỹva ñañe’ẽvaichagua ko árape. Atestifika ha’ekuéra ha’eha Tupã reino ra’anga ipotýva ko yvýpe opa imbaretekue ha iporãngue reheve.

Upe testimonio espíritu-pe, atestifika José Smith, ihuventúpe, ohechahague pe ha’e he’íva ohechahague ha oñe’ẽhague umi ha’e he’íva oñe’ẽhague ndive. Atestifika peteĩ Russell M. Nelson ipotĩ ha imirĩva ha’eha Tupã proféta ha techaukahára oñeordenáva ha orekóva pe don. Ajúvo peteĩ tekove pukuke rupi amoñe’ẽvo upéva, atestifika pe Mormón Kuatiañe’ẽ ha’eha pe kuatiañe’ẽ ome’ẽvéva jopói opaitégui umi amoñe’ẽva’ekue apytépe ha añetehápe ha’eha ita apytere che jeikógui peteĩ reino heta ogaguasu orekóva apytépe. Ame’ẽ testimonio pe sacerdocio ha ñembo’e omyatyrõha hpina che rekove—Cristo sacerdocio ha pene ñembo’ekuéra. Aikuaa ko’ã mba’e añeteguaha ha ame’ẽ testimonio peẽme Tupã ta’ýra hekojojavéva ha iñe’ẽrenduvéva opaitégui rérape—Alfa ha Omega, pe Che Ha’e Tuicháva, pe oñemongurusuva’ekue, pe testígo ijeroviarekóva—Ñandejára Jesucristo jepe, amén.