Añete pe Jerovia Ñande Ru ha Ñande Sy Oñeñangarekóvare

Avisitávo pe Templo Nashville Tennessee-pegua peteĩ templo ñehesa’ỹijópe g̃uarãme, che poja ajapo hag̃ua peteĩ jeguata mbegue ñemyesakã reheve ko tembiapo pehẽ ramo, ahechaporãvo ko Ñandejára róga porãite. Tenonderãme chejurujái pe ta’anga Mary Wanlass ojapova’ekuére, hérava Carry On (Eguata tenonde gotyo), oĩva pared-re obrera-kuéra directora kotýpe.

Kóva ha’e ñemombe’u pe ta’angágui:

“Misuri-pe 1862-pe, mitãkuña Mary Wanlass 14 ary oguerekóva oñe’ẽme’ẽ isy’anga omanopotávape ohechataha itúva ijehe ipu’aka’ỹva [ha irundy ityvýra michĩetéva tog̃uahẽ] pe Lago Salado Tuichaite Yvypa’ũme. … Mary omboguata umi guéi ha vaka kamby ome’ẽva ogueraháva pe karréta, itúva [oñenoháme, ha] oñangareko … ityvyrakuérare. Peteĩteĩ ára jeguata rire, ha’e omongaru hogaygua ohekávo ñana, yvoty ha yva’i oje’ukuaáva. Taperechauka añoite ha’e oguerekóva ha’ékuri pe ñemoarandu ohupytyva’ekue oguata hag̃ua kuarahyreike gotyo ‘umi araígui oiko peve yvytyrusu’.

“Ha’ekuéra ohupyty [pe] Utah Yvypa’ũ Septiembre-pe, oje’ói rire opa upe arapoty ha pe arahaku jave. Itúva omano nda’aréi pe ogaygua ohupyty rire pe Condado de Utah, Mary upéi omenda ha omongakuaa haguépe hogaygua [teete].”

Kóva ha’e peteĩ mombe’upy hechapyrãva peteĩ mitãkuña 14 ary oguerekóva jerovia ha mbaretégui ñaneipytyvõkuaáva peteĩteĩ ñandéve “jaguata hag̃uánte tenonde gotyo”.

“Eguatánte tenonde gotyo”—térã oñeñe’ẽasáva che ñe’ẽ ypykue holandés-pe, Gewoon Doorgaan ramo}—ha’e avei ñe’ẽ che sy ha che ru ojapóva opa hekovekuérape.

Che sy, che ru ha che rembireko sy ha ru ha’e umi miembro peteĩha ore rogayguápe. Ha’ekuéra ohasa avei “iñu” teete rupi, ojapoháicha opa umi oúva Tupaópe, Ñandejára mymba’aty, peteĩteĩ ára. Imombe’upy ndaha’éi guéi ha karréta rehegua ha katu omba’apo upeichaite avei ñemoñareaty oúvare.

Ha’ekuéra omog̃uahẽ pe evangelio ha oñemongarai ikakuaa pyahu jave. Che sy ha che ru mokõivéva oiko’asyva’ekue imichĩ jave. Che ru okakuaa pe isla Java Indonesia-pe. Ñorairõguasu Mokõiha jave, oñemboja’o hogayguágui ha oñemoĩ peteĩ campo de concentración-pe, ohasa haguépe mba’erasy oñembe’ukuaa’ỹva imitã’i jave.

Che sy okakuaa peteĩ óga ñembyaipyrépe ha ohasa avei Ñorairõguasu Mokõiha ñembyahýi ha mba’erasy rupi. Sapy’ánte ha’e ho’uva’erã tulipán rapo jepe. Itúva ojapóva rupi ha ojopoi isýgui upeigua rupi, sapy’ánte hasy chupe ohecha hag̃ua Túva Yvagaguápe peteĩ Túva opohayhúva ramo.

Che sy ha che ru ojokuaa peteĩ Tupao ñembyatýpe ha sapy’aite upe rire oiporavo hikuái omenda ha ojesella hag̃ua pe Templo Berna Suiza-peguápe. Oha’arõvo pe estación de tren-pe, oipurupa rire pirapire’imi oñogatuva’ekue hikuái itemplo je’óipe g̃uarã, oñeporandu hikuái mba’éichapa ojapóta, ha katu ha’ekuéra ojerovia opa mba’e ohoporãtaha. Ha upéicha oiko!

Ha’ekuéra oñepyrũ omongakuaa hogaygua peteĩ koty’i michĩete mboriahumípe oĩva Ámsterdam mbytetépe. Heta ary ojohéi rire ijao ipópe, oñongatu ipahápe hikuái pirapire ojogua hag̃uáicha peteĩ ao jejohéi máquina. Ojogua potávo ramo, pe obispo ovisita chupekuéra, ojerurévo peteĩ ñeipytyvõ omopu’ã hag̃ua pe tupao ñembyaty renda Ámsterdam-pe. Ha’ekuéra oiporavo ome’ẽvo opaite oñongatuva’ekue pe ao jejohéi máquina-pe g̃uarã ha ojohéi meménte ijao ipopekuéra.

Peteĩ ogaygua ramo rohasa jehasa’asy, ohasávaicha oimeraẽ ambue ogaygua. Ko’ãva oremombareteve ha ombopypukuvénte ore jerovia Ñandejára Jesucristo rehe, oiko haguéicha Alma omombe’u jave imombe’upy ita’ýra Helamán-pe, omombe’uhápe chupe “oñemombaretehague opa jeipy’ara’ã ha apañuãi guýpe” omoĩ rupi ijerovia Ñandejára Jesucristo-pe.

Mba’éichapa mokõi tapicha ohasava’ekuégui hetaite mba’erasy rupi imitã jave oiko sy ha túva iporãvéva ojeipotakuaávagui? Pe mbohovái hasy’ỹ: ha’ekuéra omog̃uahẽmbaite pe evangelio ha oikove ikonveniokuéra rupi ko ára peve!

Hetave 65 ary omenda rire hikuái, che sy, oguerekova’ekue mba’asy Alzheimer, omano Febrero-pe. Che ru, oguerekópe 92 ary ha oiko gueteri hógape, oho ohecha chupe py’ỹi ikatumiháicha che sy omano peve. Nda’aréi ha’e he’i che ryvy ha ryképe umi mba’erasy ohasava’ekue pe campo Indonesia-pe Ñorairõguasu Mokõiha jave ombosako’ihague chupe oñangareko hag̃ua hembirekóre ñeha’arõkuaa reheve hetaite ary jave ha’e hasývo ko mba’asy vaígui ha avei pe ára og̃uahẽva’ekue ha’e ome’ẽtahápe iñeñangareko ambuekuérape ha ndaikatuveihápe oiko hendive. Hekove ñe’ẽ ha’eva’ekue ha ha’e gueteri “jaguata tenonde gotyo”, jaguerekóvo ñeha’arõ iporãmbáva Cristo-re ñañemopu’ã hag̃ua ára pahápe ha jaiko hag̃ua Hendive gloria-pe tapiaite g̃uarã.

Ijerovia ha itestimonio ha’e mbarete omboguatáva umi ñemoñareaty ouva’ekue ha’ekuéra rire.

Pe táva che rembireko okakuaa haguépe, isy ha itúva, ha’eva’ekue tapicha porã oho meméva tupaópe, omog̃uahẽ pe evangelio peteĩ omendaramóva imitãva ramo che rembireko reheve oguerekóva mokõi ary ha peteĩ mitã año upe árape. Ijeiporavo oiko hag̃ua chuguikuéra Jesucristo Tupao Santokuéra Ára Pahapegua miembro omba’apo tuicha hekovekuérare, oñemboyke rupi chupekuéra umi tavaygua tapichakuéra ha hogayguakuérare. Tekotevẽ heta ary, mborayhu marandu hogayguakuérape, ha ñeipytyvõ pe távape oñemoneĩ jey hag̃ua hikuái.

Peteĩ jave che rembireko ru oservi jave obispo ramo, oñemboja rei hese peteĩ mba’e ha upepete ojerreleva. Che rembireko sy oñeñanduvaiete ha oporandu imenápe oho memétapa gueteri hikuái tupaópe. Ha’e ombohovái ha’ekuéra oho memetaha gueteri tupaópe ndaha’éi rupi tapichakuéra tupao, ha katu ha’e rupi Jesucristo Tupao.

Tekotevẽ ohasa heta ára pe añetegua osẽ hag̃ua ha ñeñyrõ ojejerure. Mba’e ikatúva kuri ombyai chupekuéra ombojoapýnte imbarete ha ijeroviakuérape.

Mba’ére oĩ ñande apytépe oimo’ãva upeichanteva’erã voi ijypykuéra jerovia ha testimonio, ijeroviarekóva opa ijehasa’asy rupi jepe? Ñaimo’ãpa ha’ekuéra noikũmbyporãiha umi mba’e? Chupekuéra noñembotavyiva’ekue ha noñembotavýiri! Ha’ekuéra oguerekónte hetaite jehasa pe Espíritu ndive ha he’ikuaa pe Profeta José ndive: “Che aikuaa, … ha ndaikatúi anega”.

Ndapehayhúipa pe purahéi Helamán ejército rehegua, oĩva pe Canciones para los Niños-pe?

Ndaha’éirõ jepe kóva ojehúva peẽme, che sýpe ojehu haguéicha imichĩ jave, oikokuaa pendehegui peteĩva umi “sy ha ru porã ohayhúva Ñandejárape” ha peme’ẽkuaa techapyrã tekojoja rehegua ambuekuérape.

Ñañandúpa kóva añetehaite japurahéivo? Peñandúvapa ha’éramo “Helamán ehérsitoicha” ha ha’etaha “Ñandejára misionero oguerahátava yvórape hi’añetegua”? Añandúva heta ára apurahéi jave ko purahéi heta FSY-pe ha ambue huventukuéra atýpe.

Terã mba’e ñañandu japurahéivo pe purahéi “Firmes Creced en la Fe”?

Umi ñemoñareaty pyahúpe peime peimehápe ha oimeraẽ peikoháicha, peñemoarandumi ha pehupyty ñemombarete pe jerovia ha testimoniokuéra umi oúva peẽ mboyvégui. Penepytyvõta peikũmby pehupyty térã pemongakuaa hag̃ua peteĩ testimonio, ojejapovva’erãha temikuave’ẽ ha “temikuave’ẽ ogueruha yvagagua jehovasakuéra.”

Jajepy’amongetávo peteĩ ñeikuave’ẽ ohovasátava pende rekove, pema’ẽ porã ha peñembo’emi pe ñekombida ojapova’ekuére ñande profeta jahayhúva, Presidente Russell M. Nelson, he’i vove “opa mitãkaria’y hekopotĩ ha ikatúva, toñembosako’i ha toservi peteĩ misión. Santokuéra Ára Pahapegua mitãrusukuérape g̃uarã, pe servicio misional ha’e peteĩ sacerdocio responsabilidad. …

“Hermana imitãva ha ikatúvape g̃uarã, peteĩ misión ha’e avei peteĩ poja ipu’akáva, ha katu opcional”.

Reñehenoikuaa peteĩ misión ñeipytyvõ térã peteĩ ñembo’e reheguápe. Mokõivéichagua misionero oipytyvõ peteĩchagua jehupytysépe ojegueru hag̃ua umi ánga Cristo-pe, peteĩteĩ lája imbojojaha’ỹ ha ipu’akávape.

Mokõive servicio-pe, rehechaukáta Ñandejárape rehayhuha ha reikuaa porãseveha Chupe. Penemandu’áke, “mbaʼéicha oikuaa peteĩ yvypóra pe jára ndoservirivaʼekuépe, ha haʼéva oikuaaʼỹva, ha imombyrýva ikorasõ remiandu ha rembipotágui?”

Opavave ñande, tahaʼe ñemoñareaty peteĩha evangelio-pe térã quinto-ha, ñañeporanduvaʼerã ñandejupe, Mba’e jerovia, mbarete, ha ñe’ẽme’ẽ yvága rehegua ñemombeʼúpa ambohasáta ñemoñareaty oútavape?

Opavave ñande tañañehaʼã meme jaikuaa porãve hag̃ua ñande Salvador, Jesucristo-pe, ha jajapo hag̃ua Chugui ñande rekove mbytete. Ha’e pe ita ñamopu’ãva’erãha ári ikatu hag̃ua ñañembo’y mbarete, ára hasýva ou vove.

“Tañaneañete pe jerovia ñande ru ha ñande sy oñeñangarekóvare, añete pe añetegua umi mártir omanova’ekuérepe, Tupã apoukapy, ánga, korasõ, ha pópe, jeroviareko ha añetépe tapiaite ñañembo’ýta”. Jesucristo rérape, amén.