Umi Pytyvõ Divíno Tekove Yvy Ariguápe g̃uarã

Profeta José Smith rupive, Ñandejára orrevela mbovy mba’e ñande rekove yvy ári mboyvegua rehegua. Upépe, jaikókuri Tupã ta’yrakuéra espiritual ramo Tupã oipytyvõségui Ita’yrakuérape okakuaa hag̃ua, Ha’e oiporavo ojapóvo peteĩ yvy ikatutahápe jahupyty peteĩ tete, ñañemoarandu tembiasa rupive, ñamongakuaa umi atributo divino ha jajepy’ara’ã ojehecha hag̃ua ñaneñe’ẽrendútapa Tupã rembiapoukapykuérare Umi okalifikávape “oñemoĩvéta glória iñakã arikuéra akói ha tapiaite g̃uarã.” (Abraham 3:26).

Oñemopyenda hag̃ua umi condición ko plan divino rehegua, Tupã oiporavo Ita’ýra Unihénitope ha’e hag̃ua ñande Salvador. Lucifer-gui, osuheriva’ekue peteĩ tape ambueichagua ombyaítavakuri yvypóra sãso oiporavo hag̃ua, oiko Satana ha “[oje]ityuka chupe yvýpe” Oñemosẽvo ko yvy ape áripe ha oñembotovévo chugui pe tekove terrenal priviléhio, ojeheja Satana-pe toñeha’ã “ombotavy ha ombohecha’ỹ hag̃ua yvypórape, ha ogueraha hag̃ua chupekuéra ñeñapytĩmbýpe ha’e oipotaháicha, jepe opa umi nohenduséivape [Tupã] ñe’ẽpu” (Moisés 4:4).

Peteĩ pehẽ imba’eguasúva pe Tupã plan tuichaitévape Ita’yrakuéra rekove yvy arigua jekakuaápe g̃uarã ha’ékuri tohasa hikuái “jejoavy opaite mbaʼépe” (2 Nefi 2:11). Ñande rete músculo ndaikatuiháicha oñemongakuaa térã oñemantene ombohovake’ỹre pe gravedad léi, upéicha avei tekove yvy arigua jekakuaa oikotevẽ yvypóra tombohovake Satana jepya’ara’ã ha ambue jejoavy yvy arigua. Imba’eguasuvéva katu jekakuaa espiritual-pe g̃uarã ha’e pe jeiporavokuaa iporãva ha ivaíva apytégui tekotevẽtéva. Umi oiporavóva iporãva okakuaáta ijehupytykuaa apyra’ỹ gotyo. Umi oiporavóva ivaíva—opavave ojapotaháicha opaichagua jeipy’ara’ãme ko yvy arigua rekovépe—oikotevẽta pytyvõ salvador, peteĩ Tupã oporohayhúva odiseñava’ekue ome’ẽ hag̃ua.

Mombyry, Ñandejára pytyvõ mortal imbaretevéva ha’e peteĩ Salvador ñeme’ẽ, Jesucristo, ohasa asýtava ohepyme’ẽ hag̃ua pe hepykue ha ome’ẽ hag̃ua perdón umi oñearrepentíva angaipáre. Upe Expiasiõ oiporiahuvereko ha igloriósova omyesakã mba’érepa pe jerovia Ñandejára Jesucristo-re ha’e pe evanhélio principio peteĩha. Iñexpiasiõ “ojapóva omanomavaʼekue oikovejey” (Alma 42:23), ha “[oexpia] yvóra angaipakuéra” (Alma 34:8), omboguévo opa ñane angaipa ñañearrepentiva’ekuégui ha ome’ẽvo ñande Salvador-pe pu’aka ñanepytyvõ hag̃ua ñane yvy arigua mba’asykuérape.

Umi angaipa ojejapóva ñembogue glorioso ha oñeperdonáva mboypýri, pe plan peteĩ Túva ha Ta’ýra oporohayhúva rehegua ome’ẽ heta ambue don ñanemo’ã hag̃ua, oikehápe ñanemo’ã ani hag̃ua jajapo angaipa. Ñande rekove terrenal tapiaite oñepyrũ peteĩ túva ha sy ndive. Iporãvehápe, mokõivéva oĩ presente, umi don iñambuéva reheve oisãmbyhy hag̃ua ñande jekakuaa. Ndaupéichairamo, ipore’ỹ ha’e pe jejoavy pehẽ jagueropu’akava’erã.

Ñande Ru Yvagagua plan ome’ẽ ambue pytyvõ ñande raperechauka hag̃ua ñande yvy arigua je’ói pukukue aja. Añe’ẽta irundy umívagui rehe. Ani chejoko che papapy irundy-pe, ko’ã pytyvõ oñembojoajúgui. Avei oĩve ambue ñemo’ã poriahuverekópe ko’ã mba’e ári.

Peteĩha, añe’ẽ pe Cristo Resape térã Cristo Espíritu rehe. Imbo’epy guasu Moroni Kuatiañe’ẽme, Moroni he’i itúva mbo’epykuéra “opa yvypórape oñemeʼẽha Cristo Espíritu, ohechakuaa hag̃ua iporãva ivaívagui” (Moroni 7:16). Ñamoñe’ẽ koichaguaite mbo’epy umi revelación ñande araguápe:

“Ha pe Espíritu ome’ẽ tesape opa tekove oúva múndope; ha pe Espíritu ohesape opa mundopegua tekove ohendúva pe Espíritu ñe’ẽpu.” (Doctrina ha Konveniokuéra 84:46).

Avei: “Che Espíritu oñemboúgui múndope ohesape hag̃ua umi imirĩva ha oñembyasývape, ha umi iñañáva kondenasiõrã.” (Doctrina ha Konveniokuéra 136:33

Presidente Joseph Fielding Smith omyesakã ko’ã escritura-kuéra: “Ñandejára ndohejái yvypórape (heñóirõ ko yvórape) ityre’ỹ, ojeporekávo ápe ha pépe ojuhu hag̃ua pe tesape ha añetegua, ha katu opa yvypóra … heñói iderécho reheve ohupyty hag̃ua pe taperechauka, pe ñemoarandu, pe ñemoñe’ẽ Cristo Espíritu-gui, térã pe Añetegua Resape.”

Upe tuicha pytyvõ mokõiha Ñandejára ome’ẽva ñanepytyvõ hag̃ua jaiporavo pe oĩporãva ha’e peteĩ moaranduha aty marangatu ojoajúva ojuehe umi escritura-pe upe plan salvación rehegua (plan vy’apavẽ rehegua) pehẽ ramo. Ko’ã moaranduha ha’e umi tembiapoukapy, ordenánsa ha konvénio.

Tembiapoukapykuéra omohesakã pe tape ñande Ru Yvagagua omarkava’ekue ñandéve g̃uarã jakakuaa hag̃ua tekove opave’ỹva gotyo. Umi tapicha oimo’ãva tembiapoukapykuéra ha’eha tape Ñandejára oiporavo hag̃ua mávapepa ohaviráta, noikũmbyporãi pe Tupã plan vy’apavẽ rehegua jehupytyse. Upe tapére, mbeguekatúpe jahupyty pe joaju ñaikotevẽva ñande Salvador ndive ha ojapo tajakalifika Ipu’aka ñembotuichavépe ñanepytyvõ hag̃ua ñande rapépe pe jehupytykuaa gotyo Ha’e oipotáva opavave ñandéve g̃uarã. Ñande Ru Yvagagua oipota opa Ita’yrakuéra tohojey pe reino celestial-pe, oikohápe Tupã ha ñande Salvador, ha toguereko pe tekove lája orekóva umi oikóva upe gloria celestial-pe.

Ordenansakuéra ha konveniokuéra ha’e pe léi pehẽ odefiníva upe tape tekove opave’ỹvape. Umi ordenánsa, ha umi konvénio marangatu jajapóva Tupã ndive umíva rupive, ha’e umi jeguata ojejeruréva ha umi barandilla oñeikotevẽva upe tape pukukuépe. Aguerohory apensávo umi konvénio rembiapo ha’eha ohechaukáva Ñandejára plan guýpe, Ijehovasa ijyvatevéva oñeme’ẽha umi oñe’ẽme’ẽvape tenonderã oñongatutaha tembiapoukapykuéra ha oñongatútava umi ñe’ẽme’ẽ.

Ambue pytyvõ Ñandejára ome’ẽva jaiporavo porã hag̃ua ha’e umi Espíritu Santo jehechauka. Pe Espíritu Santo ha’e upe Trinidad miembro mbohapyha. Hembiapo, umi escritura-pe oñemyesakãva, ha’e otestifika hag̃ua Túva ha Ta’ýragui, ñanembo’e, ñanemomandu’a opa mba’égui ha ñandegueraha hag̃ua opa añeteguápe. Escritura-kuérape oike heta ñemohesakã umi Espíritu Santo jehechauka, ha’eháicha peteĩ testimonio espiritual oñembohováiva peteĩ porandu Mormón Kuatiañe’ẽ añeteguáre. Peteĩ jehechauka ndaha’éi oñembojoavyva’erã pe don del Espíritu Santo ndive, oñeme’ẽva pe ñemongarai rire.

Peteĩva umi Tupã pytyvõ imba’eguasuvéva Ita’yrakuéra ijeroviarekóvape g̃uarã ha’e pe Espíritu Santo don. Pe tekotevẽ orekóva ko don ojehechakuaa pe oñeme’ẽ haguére formalmente arrepentimiento ha ñemongarai ýpe rire, “ha upérõ [umi escritura omyesakã] ou pene angaipa jora tata ha Espíritu Santo rupive.” (2 Nefi 31:17). Umi tapicha oguerekóva ko angaipa jora—ha upéi ombopyahu meméva jepi iñemopotĩ arrepentimiento ára ha aragua rupive ha oikove pe konvénio ojapóvape Santa Cena ordenánsa rupive—okalifika pe promesa-pe g̃uarã pe Espíritu Santo, pe Ñandejára Espíritu, “oguereko hag̃ua hikuái tapiaite … hendivekuéra.” (Doctrina ha Konveniokuéra 20:77).

Upéicha, Presidente Joseph F. Smith ombo’e pe Espíritu Santo“ohesapéta tavayguakuéra apytu’ũ Tupã mba’e reheguápe, okonvense hag̃ua chupekuéra oñekonverti jave ojapohague Túva rembipota, ha oĩ hag̃ua ipype peteĩ testimonio opytáva peteĩ irũ ramo tekove rupive, omba’apóvo pe taperechaukaha seguro ha ojejeroviakuaávare ramo opa añeteguápe ha omyenyhẽ chupekuéra ára ha ára vy’a ha vy’apavẽgui, peteĩ rembipota reheve ojapo hag̃ua iporãva opa yvypórape, ohasa’asy hag̃ua mba’evai ojapo rangue mba’evai, ipy’aporã ha iporiahuvereko hag̃ua, oha’arõkuaa ha ikaritatívo hag̃ua. Opavave oguerekóva ko don ijojaha’ỹva, ko pérla hepyetéva, oreko y’uhéi meme tekojojágui. Espíritu Santo pytyvõ’ỹre,” Presidente Smith omboty, “ ndaipóri yvypóra ikatúva oguata pe tape ipo’i ha ipyrusu’ỹvare.”

Hetaiterei pytyvõ mbarete reheve ñanderaperechauka hag̃ua ñande yvy arigua je’óipe, ñanembopy’arasy hetaite tapicha opytaha ñembosako’i’ỹre upe iñembyaty oñeseñalava’ekuépe g̃uarã ñande Salvador ha Redentor, Jesucristo ndive. Iparábola diez vírgenes rehegua, oñeñe’ẽvare hetaite ko conferencia-pe, ohechauka umi oñekombidávagui ojetopa hag̃ua Hendive, mbyterénte oĩta ñembosako’ípe.

Opavave jaikuaa techapyrã oñembosako’i’ỹvagui: umi misionero-kue ojokova’ekue ijekakuaa espiritual oñemomombyrýgui tupaógui, mitãrusukuéra omoĩva en peligro ijekakuaa espiritual ndopartisipái haguére Tupao mbo’epy ha mba’e’apópe, kuimba’ekuéra ombotapykuéva iñordenasiõ Sacerdocio de Melquisedec-pe, kuimba’e ha kuñanguéra—sapy’ánte umi pionero py’aporã térã tuvakuéra hekojojáva ñemoñare—osẽva’ekue pe konvenio rapégui ojapo ha oñongatu rangue umi konvénio templo marangatúpe.

Heta ko’ãichagua ñesẽ tapégui oiko miembro-kuéra ndosegíri rupi pe oñeikotevẽtéva ñemyatyrõ meme espiritual plan ha’éva ñembo’e ijehegui, ñemoarandu meme escritura-kuérape ha arrepentimiento py’ỹi. Peicha’ỹ katu, oĩ ohejareíva umi konvénio ñembopyahu semanal ndopartisipáivo pe Santa Cena-gui. Oĩ he’íva Tupao nomyanyhẽiha hemikotevẽnguéra; umíva omoĩ tenondépe umi mba’e ohecháva hikuái hemikotevẽ ára oútavape g̃uarã ramo umi Ñandejára ome’ẽva ári, umi Hekombo’e ha oportunidad-pe ñande servicio oñeikotevẽva ambue tapichápe g̃uarã.

Pe ñemomirĩ ha jerovia Ñandejárare ha’e pohã ko’ãichagua ñesẽ tapéguipe g̃uarã. Mormón Kuatiañe’ẽ ombo’eháicha, Ñandejára “ohovasaha ha omoʼakãrapuʼã umi hese omoĩvape ijerovia” (Helamán 12:1). Pe jerovia Ñandejárare ha’e peteĩ temikotevẽ particular opavave umi jejavýpe ombojojáva Tupã rembiapoukapykuéra ha Iprofetakuéra mbo’epy umi jejuhu pyahu ha yvypóra arandu rehe.

Añe’ẽma heta umi tape ko yvy arigua ñande Ru Yvagagua ñanderayhúva ome’ẽmava oipytyvõ hag̃ua Ita’yrakuérape tojevy Hendápe. Ñane pehẽ ko plan divino-pe ha’e jajerovia Tupãre ha jaheka ha jaiporu ko’ã pytyvõ divino, ko’ýte Ita’ýra Ohayhuetéva Expiasiõ, ñande Salvador ha Redentor, Jesucristo. Ajerure ñambo’e ha javivi hag̃ua ko’ã principio, Jesucristo rérape, amén.